فيات 128 ولا ماروتى

[eng_ahmed2002]

السادة الخبراء الاعزاء .. انا عملت مشاركة فى الفيات وح اعمل مشاركو هنا لنفس الموضوع
... انا عمال اتابع اغلب المنتديات ( لكل نوع عربية يعنى ) لانى عايز اشترى عربية .. بصوا دى اول عربية وانا بسوق خفيف .. وقلقان اجيب عربية غالية تتبهدل منى .. رأيكوا اية .. اجيب فيات 128 ولا ح تتعبنى عند الميكانيكية .. وطبعا انا مش عايز تغلبنى وكل يوم انزل اشترى قطعة غيار والميكانيكى يعذبنى والعربية تشغلنى عندها ..... مش عندى صبر .. ياريت حد ينصحنى من الخبراء .. الخلاصة دى اول عربية يعنى عايز عربية اتعلم فيها ومش تتعبنى وبعد سنة او اتنين ابيعها واجيب بأة عربية العمر تكمل معايا ( 10 - 15 ) سنة ( لو فية عمر ) ... المبلغ اللى معايا حوالى 20 الف وممكن نزودهم شوية ... والبعض نصحنى بالماروتى ... رأيكوا اية .... وشكرا لكل السادة الخبراء .. مهندس احمد :b4_556:

[shake]

انا مش عارف 20 الف تجيب ماروتى حالتها حلوة ولا لا بس على العموم الماروتى حلوة وموديل حديث والعربية حالة بس اكيد مش هتروح للميكانيكة كتير عكس الفيات 128

[Mahmoud.Fathy]

لو ينفع تقسط ماروتي او التو زيرو وتدفع ال 20 مقدم وتكمل اقساط هيكون احسن مليون مرة من اى عربية مستعملة ...

[Abo_Mazen]

والله يا خويا ال 128 كانت معايا ..لما كنت أروح للميكانيكي كان يقولي إنت ما بتجيش ليه ؟؟..مش تبقى تيجي ..أقوله ما أنا جايلك أهو ..يقولي جاي تغير زيت وتمشي ..إنت مفكر نفسك راكب زيرو ...

الغرض من الكلام ده إن عربيات كتييييييييييير حديثه وجديده ..ومعذبه صحابها ومطلعه عينهم وبيصرفوا عليها شيء وشويات ..وعربيات كتيييييييييييير قديمه ..وعايشه مع صحابها عيشة الغلابة ..نادرا ما تعطل ..ولو عطلت تلاقي حاجتها بملاليم ..أهم حاجه في أي عربيه هتجيبها ..سواء 128 أو ماروتي أو حتى مرسيدس ..يتكشف عليها كويس ..وهي خلي بالك أعتاب وأرزاق ..العربيه دي عتبة زي عتبة البيت كده ..ربنا ممكن يبارك فيها ..وممكن تبقى عتبة سوء عليك ..أهم حاجه ..توكل على الله ..خد بالأسباب في الكشف عليها كويس ..وربنا إن شاء الله يبارك لك فيها ..

أدخل هنا على المنتدى هتلاقي ناس راكبه عربيات ب 150 الف جنيه ..عملت حوادث عشان الفرامل مشتغلتش ..وناس راكبه عربيات ب 15 الف جنيه ..كل مشكلتها ابلاتين وكوندنسر بتلاتين جنيه يتغيروا وتبقى العربيه زي الفل ...توكل على الله ..وربنا يبارك لك

[J A G U A R]

يركبوك ماروتى موديل اوائل الالفين بس ممكن تزود حاجه بسيطه

[vip74]

الماروتي افضل ان شاء الله

[alking_2006]

ماروتى طبعا
بس حاول تزود المبلع شوية و تجيب موديل مش اقل من 2008 مثلا علشان متتعبش معاها

[Abu mazen]

انا كان معايا 128 وكانت مبهدلاني وعفشيتها بتتعب بسرعه ودايما فاتحه بقها اما الماروتي مع انها اصغر بس ماشاء الله بتستحمل واصيله انا شايف حتي لو مش هتجيب ماروتي بلاش 128

[eng_ahmed2002]

انا عاجز بجد عن الشكر وربنا يجازيكوا خير يا افاضل .. لكل اللى رد واللى نصحنى Abu mazen و alking_2006 و vip74 و m_m_sh_a و J A G U A R و Mahmoud.Fathy و shake الف ميرسى ليكوا وشكلى ح اجيب ماروتى .. بس انا كان قصدى شىء حاجة مؤقتة بدل ما ادشدشها وانا بتعلم .. على العموم برضة الماروتى صغيرة وح اتعلم فيها بسهولة .. ومش ح تبقى ضايعة وحالتها بؤس .. شكرا ليكم .. بس كدة باة ح اروح لمنتدى السوزوكى - الماروتى .. بس طبعا مش ح استغنى عنكم .. اى مشكلة ح اعرضها واللى يقجر ينصحنى .. يبقى لية الف شكررررررررررررررررررررررررررر .. سلام مؤقت