سؤال عن Alto 2015 800 A/C New

[Mofareq]

السلام عليكم ورحمه الله وبركاته

اود الاستفسار عن السياره Alto 2015 800 A/C New

انا دائم السفر الحقيقه خصوصا طريق القاهره - دمياط غالبا كل اسبوع مره يعنى رنج ثلاث او اربع ساعات بسافر وبرجع بعد يومين ثلاثه مش فى نفس اليوم ساعات بقى سفريات تانيه فسح بقى دى مش دائمه

انا املك حاليا فيات بونتو 2000 وبصراحه حماله اوى و 1300 سى سى بس كنت جايبها مستعمله وبصراحه مشاكلها كترت وعايز اجيب حاجه زيرو ويكون سعرها مرتاح وطبعا بعيد عن الصينى

هل العربيه دى تتحمل السفر خصوصا انها تقريبا 998 سى سى ؟؟

هل هى العربيه اصلا جيده فنيا او بمقارنتها ب بونتو 2000 فهى افضل ؟؟

ارجو الرد فى اقرب وقت ..

اشكركم

[Ahmed emad has]

حضرتك التو لا تتحمل السفر نهائي بسبب ثباتها المعدوم و الموتور الضعيف نسبيا

[volociximab]

اجرها او خدها من واحد صاحبك و سافر بيها و احكم
انا عندى التو 2009 و لسه من ساعة كنت راكب التو 2012
2012 اكثر ثباتا و لكن فى النهاية انت راكب عربية مدينة--من صنعها و من يتحدث عنها يتحدث انها عربية مدينة فاستخدامك لها بخلاف ما صنعت من اجله يبقى تجاوز
العربية سيئة عند المنحنيات--خفيفة عربية عدت من جنبك هتهزك بسهوله
ممكن القديم يكون مصنوع للسفر فتلاقى عربيتك القديمة بالرغم من مشاكلها عادى جدا تسافر الف كيلو مثلا
واحد صاحبى اخد تويوتا تيرسل مو تسعينات و سافر بيها من السعودية لمصر
عربيتى لا اضمن اروح بيها مدينة مجاورة على بعد 70 كيلو
لكن فى النهاية اركبها بنفسك و احكم بنفسك

[Abo_Mazen]

شركة مشاوير ..عارفها شركة مشاوير بتاعة توصيل الطلبات ؟؟؟...جايبه أسطول ماروتي وأسطول التو ...مشغلينهم ما بين القاهرة وإسكندرية لنقل الطرود الخفيفه وتخليص الطلبات الخفيفة..وده طبعا داخل فيه حسابات إقتصادية عشان موفرين في البنزين ..بدأو يتخلوا عن الألتو شوية ..عشان قطع غيارها بس مش أكتر ..ومعتمدين على الماروتي ..بص ..كانوا زمان يقولوا لنا إيه ..أي عربيه تسافر ..ده حتى كان فيه واحد مشهور عندنا في إسكندرية بيقال إنه سافر من إسكندرية لأسيوط بسيات 133 ..أهم حاجه في العربية وهي مسافرة ..زيت ..ومياه ...ده طبعا بالإضافة لعوامل الأمان التانيه زي طبعا حالة الكاوتش وحالة المحرك وحالة العفشه ..لكن أنا عايز أقولك إن الناس القدام إختزلوا كل ده ..في كلمتين ..زيت ..يعني حالة المحرك ..ومياه ..يعني مفيش حرارة ..غير كده سافر كيفما شئت وأينما شئت ..نيجي بقى للي سافر من إسكندرية لأسيوط بسيات ..لما الناس سألوه عملت كده إزاي ..قالهم كلمة سهلة قوي ..قالهم سايست العربية ..كلمة سايست العربية دي لما نحب نترجمها لكلام علمي يبقى معناها ..عرفت إمكانيات العربية ومشيت على قد إمكانياتها ..حضرتك برضه كده ...الألتو بتسافر كل يوم ..شركة مشاوير بتستخدم الماروتي والألتو في السفر ويوميا ..وأدخل على جوجل وشوف تجارب الأعضاء في السفر بالماروتي ..بس أهم حاجه تعرف إنت معاك إيه وراكب إيه ..راكب عربية 800 سي سي ..يعني مش هينفع تحط بيها سرعات 130 و 140 ..ممكن توصل للسرعات دي لكن تنزل تاني ..راكب عربيه أصلا أصلا إستخدام داخلي ...يبقى تعمل حسابك إن حسابات الإتزان عندك مش زي عربيات تانيه زي الأوكتافيا مثلا ..لكن برضه هي إتزانها مش ضايع ..أهم حاجه ..تعرف إمكانيات العربية وإنت اللي تحدد ..أخيرا .أي عربيه تسافر ..في ناس سافرت بموتوسيكلات 150 سي سي ..بصرف النظر بقى كانوا بيريحوا في الطريق كانوا بيخدوا السكه في كام ساعه ..هو عرف إمكانيات المحرك اللي معاه وإتعامل معاه على أساس كده ..حضرتك برضه نفس الموضوع ..إعرف إمكاينات سياراتك ..تسافر أينما شئت

[TaoTao]

السيارة الألتو 800 سي سي فقط.
بالنسبة للسفر كما أوضح الزملاء، أي سيارة يمكن أن تسافر، لي صديق سافر بسيارته الماروتي القديمة من القاهرة للأردن :)

[Abo_Mazen]

السيارة الألتو 800 سي سي فقط.
بالنسبة للسفر كما أوضح الزملاء، أي سيارة يمكن أن تسافر، لي صديق سافر بسيارته الماروتي القديمة من القاهرة للأردن :)

حضرتك بتأيد نفس كلامي

[Ahmed emad has]

شركة مشاوير ..عارفها شركة مشاوير بتاعة توصيل الطلبات ؟؟؟...جايبه أسطول ماروتي وأسطول التو ...مشغلينهم ما بين القاهرة وإسكندرية لنقل الطرود الخفيفه وتخليص الطلبات الخفيفة..وده طبعا داخل فيه حسابات إقتصادية عشان موفرين في البنزين ..بدأو يتخلوا عن الألتو شوية ..عشان قطع غيارها بس مش أكتر ..ومعتمدين على الماروتي ..بص ..كانوا زمان يقولوا لنا إيه ..أي عربيه تسافر ..ده حتى كان فيه واحد مشهور عندنا في إسكندرية بيقال إنه سافر من إسكندرية لأسيوط بسيات 133 ..أهم حاجه في العربية وهي مسافرة ..زيت ..ومياه ...ده طبعا بالإضافة لعوامل الأمان التانيه زي طبعا حالة الكاوتش وحالة المحرك وحالة العفشه ..لكن أنا عايز أقولك إن الناس القدام إختزلوا كل ده ..في كلمتين ..زيت ..يعني حالة المحرك ..ومياه ..يعني مفيش حرارة ..غير كده سافر كيفما شئت وأينما شئت ..نيجي بقى للي سافر من إسكندرية لأسيوط بسيات ..لما الناس سألوه عملت كده إزاي ..قالهم كلمة سهلة قوي ..قالهم سايست العربية ..كلمة سايست العربية دي لما نحب نترجمها لكلام علمي يبقى معناها ..عرفت إمكانيات العربية ومشيت على قد إمكانياتها ..حضرتك برضه كده ...الألتو بتسافر كل يوم ..شركة مشاوير بتستخدم الماروتي والألتو في السفر ويوميا ..وأدخل على جوجل وشوف تجارب الأعضاء في السفر بالماروتي ..بس أهم حاجه تعرف إنت معاك إيه وراكب إيه ..راكب عربية 800 سي سي ..يعني مش هينفع تحط بيها سرعات 130 و 140 ..ممكن توصل للسرعات دي لكن تنزل تاني ..راكب عربيه أصلا أصلا إستخدام داخلي ...يبقى تعمل حسابك إن حسابات الإتزان عندك مش زي عربيات تانيه زي الأوكتافيا مثلا ..لكن برضه هي إتزانها مش ضايع ..أهم حاجه ..تعرف إمكانيات العربية وإنت اللي تحدد ..أخيرا .أي عربيه تسافر ..في ناس سافرت بموتوسيكلات 150 سي سي ..بصرف النظر بقى كانوا بيريحوا في الطريق كانوا بيخدوا السكه في كام ساعه ..هو عرف إمكانيات المحرك اللي معاه وإتعامل معاه على أساس كده ..حضرتك برضه نفس الموضوع ..إعرف إمكاينات سياراتك ..تسافر أينما شئت

وجهة نظرك تمام انا بايد كلامك . بس احب اضيف ان صاحب الموضوع عاوز عربية للسفر فملهاش لازمة يجيب عربية غير مخصصة للسفر بغض النظر عن انها تقدر تسافر خصوصا ان في بدايل في التويوتا والاوبل و الهيونداي مخصصة للسفر وبنفس السعر

[Mofareq]

اشكركم جميعا اخوتى واحبتى على الافاده القيمه

الموضوع مادى جداا حقيقى انا معى بونتو 2000 سعرها اعتقد 38 الف اكمل عليهم للالتو 13 الف تقريبا

واريد ان اسال ما هى البدائل التى تعادل الالتو فى السعر وتتفوق عليها فنيا ؟؟

منتظر الافاده

[micromoud]

لو على السفر فالموتوسيكل بيسافر.... العربيه اعتماديه داخل المدينه...بنفس السعر يمكنك شراء عربية مستعمله او تدفعهم مقدمة لعربيه تقسيط...

[Ahmed emad has]

اشكركم جميعا اخوتى واحبتى على الافاده القيمه

الموضوع مادى جداا حقيقى انا معى بونتو 2000 سعرها اعتقد 38 الف اكمل عليهم للالتو 13 الف تقريبا

واريد ان اسال ما هى البدائل التى تعادل الالتو فى السعر وتتفوق عليها فنيا ؟؟

منتظر الافاده

دايو نوبيرا ، تويوتا كورولا لحد 2000 ، اوبل استرا او فيكترا ، اكسنت gls او نيو اكسنت قديمة ، فيرنا و لانوس ، رينو لوجان .......... وفي حاجات تانية كتير في المستعمل

[Abo_Mazen]

دايو نوبيرا ، تويوتا كورولا لحد 2000 ، اوبل استرا او فيكترا ، اكسنت gls او نيو اكسنت قديمة ، فيرنا و لانوس ، رينو لوجان .......... وفي حاجات تانية كتير في المستعمل

بقت الخيارات دلوقتي ما بين التو زيرو والعربيات اللي حضرتك قلت عليها دي إستعمال

[Mofareq]

اشكركم جزيلا يا جماعه والله على اهتمامكم

للاسف انا كنت عايز اهرب من المستعمل لانى خبرتى على قدى والثقه بقت معدومه فى اى بنزينه لان ليا سابقه وحشه معاهم

اشكركم جدااااا

[amrseif]

عايز اسال سؤال كدة .. هو يعنى ايه عربية بتاعت سفر وعربية لأ ؟؟
هلى نقصد ان عربية بتاعت سفر يعنى تجيب سرعات فوق ال 120 وتبقى ثابتة مثلا .. وللا عربية تقدر تسافر وخلاص وماتعطلش ؟
هل لما نقول انها مش بتاعت سفر .. نقصد انها متسافرش وهى زيرو !!! وللا تسافر لكن الاداء مش قد كدة !!؟؟

الاسئلة ديه محتاجة اجابة فعلا . لان ده موضوع مهم وفى ناس كتير بتسال عليه .. لكن مابتلاقيش اجابة وافية .

نيجى بقى للموضوع الاساسى .. انا من خبرتى لسوزوكى التو .. العربية ديه تقدر تسافر طبعا .. وفنيا كويسة جدا
ولكن من حيث الاداء .. بعد تقريبا سرعة 110 تصبح السيارة خفيفة بمعنى انك لو حاولت تاخد ملف صعب على نفس السرعة ديه هتضطر انك تخفض السرعة ل 80 مثلا وبعدين ترجع تانى لنفس السرعة .. وبرده فعلا لو جت عربية تقيلة جمبك هتحس بيها بس مش معناها انك هتتقلب لا قدر الله ..
السؤال دلوقتى لصاحب الموضوع هلى حضرتك ممكن تسافر على سرعة 110 او 120 وللا لازم تجيب سرعات فوق ال 140 و ال 150 وتاخد ملفات صعبة على نفس السرعات ؟؟
اذا كان الجواب هو سرعات عادية من 100 ال 120 يبقى زى الفل وهتقضى معاك الاغراض ..
لو عايز تحس بالعربية وتجيب اخرها وسرعات عالية .. يبقى شوف عربية اقوى فى السي سي واكبر فى الحجم ولكن خللى بالك ده على حساب استهلاك البنزين .. وبردة انت اللى هتقرر حسب احتياجاتك ..
يا رب تكون استفدت منى .. وربنا يوفقك للاختيار المناسب ليك .