لماذا ننصح بعض بالسياز على حساب نيسان صنى وعربيات اخرى؟

[salam100100]

لماذا ننصح بعض بالسياز على حساب نيسان صنى وعربيات اخرى؟

هذا السؤال محيرنى
هل من معلومات كافيه لدينا لننصح بالسياره للاخرين؟
هل هذه الاجابات كافيه اننا نحكم على العربيه انها احسن من غيرها؟
السياز سمعنا عنها يوم 1 يناير 2015, يعنى بقالها 5 شهور بس فالشارع المصرى
هل ديه مده كافيه اننا ننصح بيها؟

انا من ملاك الصنى الجديده, ناس كتير بقابلهم ويسألونى عنها, نشتريها ولا نجيب السياز؟
برد عليهم بالحرف وقول انا معرفش حاجه عن السياز اسال ملاك السياز لكن اكلمك عن الصنى اللى معايا
وابتدى اسرد المميزات والعيوب بتاعت الصنى

انا مش بهاجم السياز لكن بهاجم المروجين للعربيه بدون اعطاء معلومات كافيه عنها
السياز منافس شرس لعربيات كتير فى السوق المصرى لكن محتاجه تثبت نفسها قدامهم عن طريق التجربه

ملخص: السياز محتاجه تتجرب وبعد كدا نقيم. ممكن تطلع احسن مليون مره من الصنى وممكن تطلع اسوء
زى الصنى متجربه وقيمناها وعرفنا عيوبها عشان جربناها

فبلاش نهرب من عيوب الصنى ونروح للمجهول بحجه "اكيد السياز احسن" وننصح بعض بعربيه متجربتش بما فيه الكفايه

خلينا ننصح بعض عن تجاربنا الحقيقيه وخبراتنا اللى اكتسبناها مع عربياتنا
كلنا عندنا خبرات رائعه, خلينا نشارك بعض بامانه وحياديه وبكدا المنتدى يبقا مفيد بجد ومرجعيه حقيقيه للى عنده استفسارات

نفسى الاقى حد محايد بيتكلم عن السياز

اسف انى طولت عليكم
وشكرا

[تامر.محمد]

متفق جدا
الله ينور

[amrseif]

لماذا ننصح بعض بالسياز على حساب نيسان صنى وعربيات اخرى؟

هذا السؤال محيرنى
هل من معلومات كافيه لدينا لننصح بالسياره للاخرين؟
هل هذه الاجابات كافيه اننا نحكم على العربيه انها احسن من غيرها؟
السياز سمعنا عنها يوم 1 يناير 2015, يعنى بقالها 5 شهور بس فالشارع المصرى
هل ديه مده كافيه اننا ننصح بيها؟

انا من ملاك الصنى الجديده, ناس كتير بقابلهم ويسألونى عنها, نشتريها ولا نجيب السياز؟
برد عليهم بالحرف وقول انا معرفش حاجه عن السياز اسال ملاك السياز لكن اكلمك عن الصنى اللى معايا
وابتدى اسرد المميزات والعيوب بتاعت الصنى

انا مش بهاجم السياز لكن بهاجم المروجين للعربيه بدون اعطاء معلومات كافيه عنها
السياز منافس شرس لعربيات كتير فى السوق المصرى لكن محتاجه تثبت نفسها قدامهم عن طريق التجربه

ملخص: السياز محتاجه تتجرب وبعد كدا نقيم. ممكن تطلع احسن مليون مره من الصنى وممكن تطلع اسوء
زى الصنى متجربه وقيمناها وعرفنا عيوبها عشان جربناها

فبلاش نهرب من عيوب الصنى ونروح للمجهول بحجه "اكيد السياز احسن" وننصح بعض بعربيه متجربتش بما فيه الكفايه

خلينا ننصح بعض عن تجاربنا الحقيقيه وخبراتنا اللى اكتسبناها مع عربياتنا
كلنا عندنا خبرات رائعه, خلينا نشارك بعض بامانه وحياديه وبكدا المنتدى يبقا مفيد بجد ومرجعيه حقيقيه للى عنده استفسارات

نفسى الاقى حد محايد بيتكلم عن السياز

اسف انى طولت عليكم

وشكرا

بص ياافندم , انا متفق مع حضرتك انك عشان تحكم على العربية لازم تجربها ...
لكن . فى نفس الوقت منقدرش ننكر ان فى بعض الناس بتشترى سيارات بدون تجربة وده لكذا سبب ..منها ان فى موديلات تانية فى نفس الماركة اثبتت نجاح كبير ومحدش اشتكى منها الا عدد قليل ( خصوصا لو نفس المصنع ) ومنها بردة ان الماركة ديه ليها سمعة كويسة فى السوق .. وبردة سمعة التوكيل بتفرق .. وكمان سعر العربية مقارنة بامكانياتها ...
انا شايف ( وديه وجهة نظر شخصية على فكرة ) ان سوزوكى سمعتها كويسة فى مجال السيارات وبردة بالرغم من ان العربية سياز متقفلة فى الهند و لكن تقفيل الهند اتجرب قبلى كدة كتير وطلع تقفيل جيد جدا ( عن تجربتى الشخصية لسوزوكى التو )
عايز اقول حاجة كمان اخيرة ممكن عربية تكون اكتسحت السوق زى تويوتا كورولا اليابانى وينزل بعدها الفيس ليفت الجديد ولكن تقفيل بلد تانية وأغلى !!! لكن بردة الناس تشترى وهى مغمضة معتمدة على الشكل والكماليات وسمعة العربية اللى قبلها ..

[MaZaGAngeE]

اظن انا محايد… . لا عندي دي ولا دي ولا ناوي اشتري قريب…

لو هشتري…… هختار السياز للاسباب :

الشكل اجمل
المساحه الداخلية اكبر ( اظن )
الشنطة اكبر ( اظن )
كماليات اكتر
سوزوكي كشركة معملتش هرتلة زي نيسان لما نزلت عربيات صيني و انضربت في السوق .. و حتي الصني اللي مصر كله راكباها لما نزلوا الموديل الجديد ناس كتير اشتكوا من الفرامل و حصل هري كتير عن درمات الفرامل ..

سياز طبعا هندي و دي افضل في الجودة من المصري و من الصيني

[MaZaGAngeE]

بس طبعا سوزوكي ( نفس وكيل نيسان ) عامل حوار مالوش لازمة في توفير العربيات و كله بيشتكي انها مش موجودة و بحجز 6 شهور او اوفر 15 الف ..

[mohamedshalaan]

السلام عليكم
1- السياز سوزوكي شركه ياباني غنيه عن التعريف
2- عربيه شكلها حلو اوبشن كتير ومحترم وتقفيل جيد جدا
3- تقفيل العربيه هندي وليس مصري وحط تحت مصري ميت خط

الكلام بوجه عام لاني لم اقتني السياره حتي الان ولكن اسمع من ملاك السياره كلام محترم
انا كان معايا سوزوكي sx4 افضل واحسن من عربيات كتير اكثر انتشارا وحظا في السوق المصري الغريب العجيب

تقبلوا تحياتي

[volociximab]

سيارة جديدة مع توكيل سيئ يساوى مخاطرة كبيرة
لان اى مشكلة او حادثة يبقي مفيش تصليح و لا قطع غيار
توكيل سوزوكى هو مشكلة سيارات سوزوكى ليس فى مصر وحدها

[Abo_Mazen]

أنا مش هدخل في تفاصيل ..وأجيب لحضرتك الأوبشن اللي في السياز ..مقابل الأوبشن اللي في النيسان ..لإن طبعا الأوبشن اللي في السياز هياخد بتاع أربع أو خمس سطور ..بينما الأوبشن اللي في النيسان ممكن يتلم في سطر أو سطرين ..بالإضافة للسعر التنافسي ..بالإضافة إن السياز الإيد المصرية الكريمة ما أتحطتش فيها ..يعني مش واخده التاتش المصري في التقيل ..سوزوكي بقالها سنييييييييييين في مصر ..والنيسان برضه بقالها سنييييييييين في مصر ..بالنسبه لتوكيل نيسان هو نفسه توكيل سوزكي ..مع إحترامي ..الهم طايلني وطايلك ..فمتجيبش سيرة التوكيل لإن راكب السياز وراكب النيسان في الهوا سوا ..ده غير إن السوزوكي يكسب في توافر قطع الغيار الإستعمال عند التجار وقطع غيار الجديد عند التجار..أنا معرفش النيسان إيه وضعه في حتة قطع الغيار بس أنا بقول بالنسبه للسوزوكي محدش بيعاني فيه ..السوزكي مش محتاجه تتجرب عشان تنجح ..أي سوزوكي بتنجح في مصر ..حتى السوزوكي جيمني نجحت في مصر وفيه ناس بتدور عليها ...شركة سوزوكي أصلا شركة محركات صغيره ...محركاتها أخدت كذا مره في كذا عام أفضل محركات توفير للوقود ..سوزوكي بالسيارة ماروتي أخدت أفضل سيارة موفرة في البنزين على مستوى العام ..مع إن الماروتي أصلا مش بتاعتها بتاعة شركة ماروتي ..لكن بعد شراء سوزوكي لنسبة تتيح لها حق الإدارة وحق تعديل العلامة التجارية لشركة ماروتي ..أخدت سوزوكي مسمى أكتر سيارة موفرة للوقود على مستوى العالم ..عموما عشان أنا رغيت كتير ..السياز أوبشن وسعر وتقفيل..

[تامر.محمد]

يا جماعة الراجل قصده مش ان السياز احسن او اوحش
الراجل قصده ازاي بننصح بعربية لسه ما اتجربتش و ما نعرفش فيها مشاكل ولا لأ , لسه معلوماتنا عنها شكلها و الاوبشن و بس

[shady_elkady]

و الله انا من ملاك النيسان الشكل الجديد من سنتين و شايف انها عربية كويسة و اتوا ايجيبت رافع من قميتها

[amrseif]

يا جماعة الراجل قصده مش ان السياز احسن او اوحش
الراجل قصده ازاي بننصح بعربية لسه ما اتجربتش و ما نعرفش فيها مشاكل ولا لأ , لسه معلوماتنا عنها شكلها و الاوبشن و بس

هل معقول ان اى حد هيشترى عربية لازم يقعد سنة يستنى تجارب الناس ويشوف المميزات والعيوب وتوفر قطع الغيار وجودة التوكيل ... الخ
لو كل الناس فكرت بالشكل ده يبقى مفيش حد هيشترى اى عربية وكل العربيات مش هتتباع اصلا .....

[salam100100]

العربيه نفسها ايه اخبارها؟

هل معقول ان اى حد هيشترى عربية لازم يقعد سنة يستنى تجارب الناس ويشوف المميزات والعيوب وتوفر قطع الغيار وجودة التوكيل ... الخ
لو كل الناس فكرت بالشكل ده يبقى مفيش حد هيشترى اى عربية وكل العربيات مش هتتباع اصلا .....

شكرا لكل من شارك او قراء الموضوع
فى انواع كتير من المشتريين للسيارات:
فى نوع ممكن يشترى عربيه لسه سامعين عنها وهو ممكن يكون اول واحد يسقها فى مصر, وله اسبابه للشراء, ممكن يكون مستعجل- ممكن يكون معندوش خبره كافيه- ممكن يكون مقتنع بيها لاسباب معينه- ممكن يكون حد شار عليه بالعربيه (مسؤل المبيعات مثلا)- ممكن يكون متوقع نجاحها- ........................الخ

فى نوع تانى بيقف على كتاف اللى قبله, بيبنى قرار الشراء على انطباعات النوع الاول من المشتريين وخبرتهم مع العربيه وقادر يقرا السوق
النوعين صح . اى سوق لازم يكون فيه النوعين عشان العجله تمشى

انا بهاجم اللى بينصح بالسياز بدون ادله كافيه عن العربيه ولست بهاجم العربيه

حضرتكم اثبتم وجه نظر فئه كبيره من المشترين وهى صحيحه
ملخص لردود حضراتكم عنالاقبال على شراء السياز:
· موديلات تانية فى نفس الماركة اثبتت نجاح كبير ) الناس تشترى وهى مغمضة معتمدة على الشكل والكماليات وسمعة العربية اللى قبلها(
· الماركة ديه ليها سمعة كويسة فى السوق ) سوزوكى سمعتها كويسة(
· سمعة التوكيل
· سعر العربية مقارنة بامكانياتها
· الشكل اجمل
· المساحه الداخلية اكبر
· الشنطة اكبر
· سياز طبعا هندي و دي افضل في الجودة من المصري (التقفيل)

هل الاجابات والمعلومات ديه كفايه انى احكم على السياز انها عربيه كويسه وناجحه؟

احنا عندنا معلومات عن التوكيل والماركه والكماليات والتقفيل لكن نسينا اهم حاجه..............العربيه نفسها ايه اخبارها؟
هل الشكل والشنطه والكماليات والتقفيل كفايه انى اشترى العربيه؟

عيوب العربيه لسه متعرفتش عشان لسه متجربتش بما فيه الكفايه
محدش يقول السياز مفيهاش عيوب, اى عربيه فيها عيوب ومميزات

ملخص:
اولا: اى حد من حقه يشترى عربيه زيرو لسه متجربتش لسه جديده فى السوق المصرى بالمعلومات اللى عندنا ديه
المهم انه لما يشتريها يحط فى باله انها لسه متجربتش.
اى عربيه وهي جديده بتبقا رائعه وجميله وبتلمع, فاكيد محدش هيشتكى منها
بلاش ننصح بعض ونقول العربيه صفقه رائعه ورابحه/ عربيه محترمه / دا محدش بيشتكى منها. دا طبيعى مهى عربيه جديده ياجماعه

ثانيا: لما ننصح بعض بيها نذكر المعلومه ديه "انها لسه متجربتش" نكمل بقيه المعلومه.

[تامر.محمد]

هل معقول ان اى حد هيشترى عربية لازم يقعد سنة يستنى تجارب الناس ويشوف المميزات والعيوب وتوفر قطع الغيار وجودة التوكيل ... الخ
لو كل الناس فكرت بالشكل ده يبقى مفيش حد هيشترى اى عربية وكل العربيات مش هتتباع اصلا .....

هو ما قالش ما تشتريش
هو قال "ما تنصحش" و اكمل له الجملة انا "دون علم"

اقل واجب ان اللي ينصح بعربية لسه ما اتجربتش انه يفهم اللي بينصحه انها لسه ما اتجربتش لكن مواصفاتها كويسة مثلا

[amrseif]

متفق مع الاعضاء الكرام ان اللى ينصح بعربية لازم يقول انها لسة ماتجربتش بما فيه الكفاية ...

لكن بردة فى نسبة مخاطرة فى شراء العربية حتى لو متجربة على فكرة ... ازاى ؟.. هو مش ممكن العربية يطلع فيها عيب صناعة يطلع عين المشترى ومايكونش ظهر قبل كدة ... طبعا حد هيقوللى ماهو التوكيل هيصلح العربية او يبدلها او يغير قطعة الغيار المعيبة ... لكن بعد اد ايه هل انت ضامن انك مشكلتك تتحل فى نفس اليوم وخللى بالك انك ممكن تستلم العربية وماتلاقيش فيها اى حاجة وبعد كام يوم وممكن يكون فترة ال 14 يوم الاولى تكون فاتت ... خش بقى فى متاهات .. التوكيل ممكن يقولك احجز قطعة الغيار البايظة وممكن يقولك ان مافيهاش عيب اصلا .. تقعد تناهد وتجادل معاه .. تفتكر بعد كدة انت هتحب العربية ... اكيد تختلف من شخص لاخر ... لكن اللى عايز اقوله ان لازم يكون فيه نسبة مخاطرة ( يعنى محدش يفتكر ان تجربة السيارة من ملاكها هى كل حاجة - بس اكيد هيا بتديك فكرة وخلفية عن السيارة طبعا )
فى حاجة كمان افرض السيارة مافيهاش تست درايف يبقى هتجربها ازاى ؟.. لازم يكون حد صاحبك او قريبك معاه العربية عشان تاخدها منه وتسوقها واحيانا بيكون ده مش متوفر .. يبقى فى النهاية لازم تسمع من ملاكها ... والناس ارائها مختلفة .. تلاقى واحد بيشكر فى العربية جدا وواحد تانى بيقول ديه اسوأ سيارة ... ساعتها هتسمع كلام مين ؟؟ لازم تجرب بنفسك .........

[ahmed_moeaz]

فيه عربيات بتبان من وقفتها كده وما بالك باة لما تكون سوزوكى