اشتريت ألتو ..... باركولي

[mfarid_inbox]

السلام عليكم
منتدي عظيم وعريق واستفدت منه كتير ربنا يخليكم

انا الحمد لله اشتريت امبارح ألتو 2009 ودخلت نادي الالتوايه

محتاج رايكم في العربيه

ألتوا 2009 - 800 سي سي
ماشية 42900 كم
بطارية جديدة
فرش جديد
جنوط جديدة
2 فردة كاوتش ادام جديدة

خدتها وديتها بنزينة كشفت عليها وكان تقرير البنزينة كالتالي :

حالة الماتور فاضل في عمره 70% لما ركبوا عليها جهاز كده بيقيس الماتور وقالي بيهرب 8 رطل وده كويس جدا
العربية فيها خبطة الرفرف اليمين وصاحبها غيره في التوكيل بس الخبطة دي خبطت الكرتيرة اليمين وحصلها استعدال ع البارد
المساعد الشمال ورا جايب زيت خفيف ومحتاج يتغير ونصحوني اغير الاربعه بالمرة

الحالة الخارجية نضيفه جدا جدا ومتحافظ عليها بس في رشة علي جزء في الكبوت في المنتصف بالظبط لما مشي عليها الجهاز بتاع الرش ده

بس كده

محتاج اعرف منكم تساوي كم عشان اشوف اشتريتها بسعر كويس ولا لا وبعدها مباشرة هقولكم انا جبتها بكام

ودي شوية صور ليها

[mfarid_inbox]

نسيت اقولكم ان العربية مكيفة وتكيفها شغال الحمد لله كويس

[mfarid_inbox]

معلش يا جماعه محتاج كمان اعرف اول حاجة اعملها ايه مع العلم اني لسه هتعلم عليها السواقة ومش فاهم اي حاجة في العربيات
يعني الصيانات كل اد ايه واغير ايه فيها اول لما استلمها واسعار قطع الغيار كم واجيها منين والقصص دي

كمان محتاج ضروري اروشها وادلعها بشوية اكسسورارات كده حلوة اجيبها منين وبكام

مع العلم اني من عين شمس

[Amr Axel]

الف مبروك ربنا يباركلك فيها و يديك خيرها و يكفيك شرها

لو بالحالة ديه و في الوقت الحالي سعرها في حدود 40-43 الف

اللي حضرتك محتاجه مبدأيا كده تعمل صيانة وقائية للعربية عشان متضمنش اللي قبلك عمل ايه و لا كان محافظ و لا لأ عليه و بالتالي اللي هيحصل الأتي : تغيير طقم سير كاتينة و بلية كاتينة و سير الدينامو ع حسب حالته لو بيخلص يتغير سعره رخيص و طقم بوجيهات و خد بالك ان طقم البوجيهات بتاعتها مقاس 16 سن 14 و يفضل تجيبها NGK
و نصيحة سير الكاتينة و البلية تجيبهم من التوكيل و لو جبتهم من برة يبقي كبيرهم معاك 20 الف ك او اقل للاحتياط
تغيير زيت موتور و فلتر زيت معاه و فتيس و فرامل
تغيير مية الريداتير
تغيير فلتر هوا و بنزين
مراجعة و تغيير ما يلزم من العفشة و تشحيمها شحم ابيض و تربيطها

جيب عبوة منظف انجيكشن او منظف دورة وقود من stp هتلاقي في اي بنزينة سواء العلبة السودا او الفضي اوعي حد يديلك واحد اي لون تاني و رخيصة بـ 20 و لا 25 ج لأنها اوكتان بوستر او محسن اوكتان يعني
و بعد ما تجيبها تفول التانك و تحطها ع البنزين في التانك و تستني شوية و بعدين تتحرك بالعربية و طول ما انت ماشي تحرق ع الغيارات شوية لحد ما البنزين يخلص هتلاقي العربية فاقت و زي الفل

يفضل الكاوتش كله يكون نفس العمر او متقارب و نفس النقشة و النوع المقاس

مواعيد الصيانات
زيت الموتور لو هتجيب تخليقي كل 9-10 الاف ك و لو نص تخليقي كل 5-6 الاف ك و يفضل التخليقي الأول اغلي بس هيحافظ ع الموتور و اداء احسن و فلتر الزيت تغيره مع كل تغييرة زيت حتي لو حطيت زيت نص تخليقي او حتي معدني و بلاش من المعدني ده دلوقتي خالص طالما الموتور حالته كويسة و الزيت مبينقصش

زيت الفتيس كل 20 الف

زيت الفرامل كل 20 الف

مية الريداتير كل 30-40 الف

سير الكاتينة و بلية الكاتينة لو هتجيب من برة كل 20 الف بالكتير و لو الاصلي ممكن يكمل معاك 30-40 الف بس انا دايما بفضل تغيير الكلام ده بدري للاحتياط ديه فيها موتور و خد بالك و انت بتشتريه تشوف تاريخ صنع السير ايه المهم ميكونش عدي عليه اكتر من سنة

سير الدينامو ملوش عدد محدد ع حسب بس مبيقلش عن 20 الف حسب تاريخ الصنع و النوع

البوجيهات و الفلاتر هوا و بنزين كل 20 الف

باقي طقم الكهربا الموبينة و الاسبراتير محدش يجيلك ناحيته طالما الاصلي اللي هو دينسو الا لو فيه حاجة لو مفيهوش حاجة و يقولك يتغير للاحتياط لأ لأن الاصلي عمره ما هيتعوض انا الاصلي ما شاء الله قعد معايا لحد 200 الف و مفيش مشكلة

منظف الانجيكشن او دورة الوقود اللي بقولك عليه يكون كل 10 او 20 الف زي ما تحب

بس كده يا باشا دول اهم حاجة الأول و بعد كده براحتك بقي تظبيط و الكلام ده زي ما انت عايز الاهم فالمهم

[mfarid_inbox]

طب والله العظيم انا مش عارف اشكرك ازاي
ربنا يجعله في ميزان حسناتك ويدخلك الجنه من غير حساب ولا سابقة عذاب وكل سنه وانت طيب

وطبعا انا لسه هبدأ اتعلم عليها الاول ينفع اتعلم عليها وهي كده وبعدين اغير كل الحاجات دي لاني حاسس انها كده هتعمل مبلغ كبير ولا لازم اغيرها دلوقتي علي طول وبعد كده ابقي اتعلم عليها ؟
ولو في رقم تقريبي للتكلفة يبقي ربنا يبارك لك

معلش بقي بنحاول نستفيد من خبراتك فأعذرنا في كتر الاسئلة

[عﻻء سالمان]

مبروك العربية الجديدة

[AymanEF]

الى بيقولو دا كله مش هيعدى ل 1000 جنيه و نصيحتى غير و اعمل الصيانه لانك لسه مش عارف حاجه فى العربيات و اى مشكله لقدر الله مش هتعرف تتصرف و هتلاقى اشتغالات من الميكانيكى فهتصرف اكتر

[mnon_mahmoud]

الى بيقولو دا كله مش هيعدى ل 1000 جنيه و نصيحتى غير و اعمل الصيانه لانك لسه مش عارف حاجه فى العربيات و اى مشكله لقدر الله مش هتعرف تتصرف و هتلاقى اشتغالات من الميكانيكى فهتصرف اكتر

مبرووووووووووووووك

[Amr Axel]

طب والله العظيم انا مش عارف اشكرك ازاي
ربنا يجعله في ميزان حسناتك ويدخلك الجنه من غير حساب ولا سابقة عذاب وكل سنه وانت طيب

وطبعا انا لسه هبدأ اتعلم عليها الاول ينفع اتعلم عليها وهي كده وبعدين اغير كل الحاجات دي لاني حاسس انها كده هتعمل مبلغ كبير ولا لازم اغيرها دلوقتي علي طول وبعد كده ابقي اتعلم عليها ؟
ولو في رقم تقريبي للتكلفة يبقي ربنا يبارك لك

معلش بقي بنحاول نستفيد من خبراتك فأعذرنا في كتر الاسئلة

لا طبعا غير و ظبط العربية الأول لان واضح انك لسه معندكش خبرة في العربيات و بالتالي اي حاجة تحصل هتتسوح في الطريق و الكلام ده مش هيكلفك كتيير و كده كده المفروض و انت بتشتري عربية مستعملة بتكون عامل حسابك ع 2000-3000 ج للاحتياط لاي صيانات او حاجة تظهر برده ديه عربية مستعملة و وارد حاجة كده او كده
نقدر نقول التكلفة ممكن تبقي في حدود 1000 ج و ممكن متعديش بالمصنعية كمان بس هتبقي مرتاح
و القطع كلها ممكن تجيبها من سوزوكي سنتر هتلاقي موضوع اعلانه في القسم و قوله انك تبعنا
بس سير الكاتينة و بلية الكاتينة افضل تجيبها من التوكيل هي هتبقي اغلي بس حاجة أصلية
و لو عايز ميكانيكي اعرف برده ميكانيكي كويس بيشتغل في السوزوكي و اغلب الرجالة هناك بيتعاملوا معاه موجود في المطرية لو معندكش قولي
و متنساش كمان تربيط العفشة و تظبيط الزوايا و ديه ارشحلك فيها مكانين بريدجستون في مصطفي النحاس بنزينة كالتكس بس سعره غالي شوية بس حاجة نضيفة و لو معاك كارت نايل موتورز ليك خصم 50 % و مكان تاني في الحي السابع اسمه الدالي جنب مصر و السودان و مخبوزات كريستال عندهم الابليكشن بتاع العربية برده

[mfarid_inbox]

الى بيقولو دا كله مش هيعدى ل 1000 جنيه و نصيحتى غير و اعمل الصيانه لانك لسه مش عارف حاجه فى العربيات و اى مشكله لقدر الله مش هتعرف تتصرف و هتلاقى اشتغالات من الميكانيكى فهتصرف اكتر

جزاكم الله خيرا وانا مايل فعلا للراي ده اني اعملها واخلص .... ربنا يبارك لك

[mfarid_inbox]

مبروك العربية الجديدة

الله يبارك فيك

[mfarid_inbox]

مبرووووووووووووووك

الله يبارك فيك تسلم

[mfarid_inbox]

لا طبعا غير و ظبط العربية الأول لان واضح انك لسه معندكش خبرة في العربيات و بالتالي اي حاجة تحصل هتتسوح في الطريق و الكلام ده مش هيكلفك كتيير و كده كده المفروض و انت بتشتري عربية مستعملة بتكون عامل حسابك ع 2000-3000 ج للاحتياط لاي صيانات او حاجة تظهر برده ديه عربية مستعملة و وارد حاجة كده او كده
نقدر نقول التكلفة ممكن تبقي في حدود 1000 ج و ممكن متعديش بالمصنعية كمان بس هتبقي مرتاح
و القطع كلها ممكن تجيبها من سوزوكي سنتر هتلاقي موضوع اعلانه في القسم و قوله انك تبعنا
بس سير الكاتينة و بلية الكاتينة افضل تجيبها من التوكيل هي هتبقي اغلي بس حاجة أصلية
و لو عايز ميكانيكي اعرف برده ميكانيكي كويس بيشتغل في السوزوكي و اغلب الرجالة هناك بيتعاملوا معاه موجود في المطرية لو معندكش قولي
و متنساش كمان تربيط العفشة و تظبيط الزوايا و ديه ارشحلك فيها مكانين بريدجستون في مصطفي النحاس بنزينة كالتكس بس سعره غالي شوية بس حاجة نضيفة و لو معاك كارت نايل موتورز ليك خصم 50 % و مكان تاني في الحي السابع اسمه الدالي جنب مصر و السودان و مخبوزات كريستال عندهم الابليكشن بتاع العربية برده

* انا فعلا مايل اني اعمل الصيانات دلوقتي وشايف فعلا ان ده احسن
* وكده كده انا شايل فلوس صيانات لاني بشتري عربية مستعمله ووراد فعلا فيها الكلام ده .... كلامك 100%
* سوزوكي سنتر بيعمل خصم لاعضاء المنتدي يعني ؟
* سير الكاتينه والبليه هجيبهم من التوكيل بس هو عنوان التوكيل بتاعها اللي في الدقي مش كده ؟
* اروح احسن للميكانيكي بتاع المطرية ده ولا الحاجات دي بتتغير مع تغير الزيت في البنزينه ؟ اصل صاحب العربية اللي باعهالي قالي معلومه معرفش صح و لا لا بيقولي ان الماتور مفيش ميكانيكي مد ايده فيه فلو الكلام ده صح ازاي محدش مد ايده في الماتور وانا اعرف ان السيور والحاجات دي بتتغير كل فترة او كل عدد معين منالكيلومترات يعني كده اما هو بيكذب واما يكون مكانش بيغير الحاجات دي خالص وده اهمال للعربية.
* لو كده استاذنك تبعت لي رقم الميكانيكي بتاع المطرية وكويس انه قريب مني وعنوانه ...معلش هتعبك .
* طب تمام ده انا شغال اصلا في الحي السابع جنب مخبوزات كريستال الله ينور عليك انت جايب لي اماكن ولا اروع ولا اقرب من البيت ومن الشغل كمان جزاكم الله خيرا

سؤالين بقي معلش :
* هو تغير المساعد الخلفي شمال لازم اغير الاربعه ولا ينفع اغير 2 ورا بس وايه الصح عشان ناس قالولي غير الاربعه احتياطي . وتكلفتهم كم تقريبا .
* مالك العربية الاول قالي ان صفيحة البنزين بتعمل معاه 230 لتر تقريبا في المتوسط . الاستهلاك ده مش عالي شوية وقريب من معدل استهلاك العربيات الكبيرة ال 1600 سي سي .
* فرد الكاوتش انت قلت لي قبل كده ان الافضل يبقوا الاربعه عمر واحد طب هو غير الاتنين اللي قدام بس ومن فترة مش بعيدة اغير انا الاتنين اللي ورا حتي لو كويسين وتكلفتهم كم تقريبا .

واسف جدا علي الاطالة وشكرا بجد لذوقك وردك علي اسئلتي ربنا يبارك لك

[volociximab]

ال20 لتر 91 بيعملوا حوالى 170 كيلو معايا فى المدينة

[volociximab]

و عليكم السلام
اكشف عفشة و فرامل