تجربة السفر بماروتي 2014. القاهرة - العين السخنة

[Ahmed Metwally]

بسم الله

اولا دى اول مرة اسافر واكون انا اللى سايق
واول مرة العربية تسافر فيها

قبل السفر بكام يوم عملت التالي
تغير زيت لزيت توتال كوارتز 5000
ظبط زوايا وربط عفشة وقواعد
ترصيص عجل وظبط ضغط الكاوتش
وقبل كدة باسبوعين غيرت الموبينة الزيت لموبينة الكتروني

حمولة العربية
انا والمدام وابنى خمس اشهر
وشنطة سفر متوسطة الحجم وشنطة هاندباج كبيرة وتقيلة
وكام شنطة ايد صغيرين
وكار سيت واسترولر
ترتيب الحاجات دى كالتالى
ابنى قاعد فى الكار سيت فى الكنبة الخلفية ومربوط كويس بحزام الأمان
شنطة العربية فيها الهاند باج الكبيرة والشنط الصغيرة
واضطريت افتح كرسي من الكنبة علشان احط شنطة السفر
والاسترولر نايم فى ارضية العربية ادام الكنبة ومعاه غطاء العربية

الطريق من البيت لغاية الفندق عمل 207 كيلو بالظبط
الطريق لغاية العين السخنة حوالى 140 كيلو والسرعة القانونية 120
انا كنت ماشى مابين 100 و 120 وفتحت معاياة شوية لغاية 130
بس مارضيتش اضغط على العربية ورجعت تاني ل 100 و 120
الحمد لله العربية ادت كويس وكانت ماشية كويس اللهم الا فى المطالع كنت بحس انها بتكافح شوية
الطريق من العين السخنة للفندق 60 كيلو
طريق الزعفرانة وده سرعته 90
ورايح جاى ومنحنيات زى اللوز ونقل تقيل من كل حتة
طبعا على السرعة دى العربية كانت مرتاحة اكتر
والحمد لله وصلت بالسلامة من غير ما اقف فى اى استراحة

بخصوص البنزين انا كنت مفول قبل ماطلع وعند بنزينة الأمارات اللى فى طريق الزعفرانة كان المؤشر على النص مش فاكر العداد كان عامل كام تقريبا 170
المهم دخلت البنزينة فولت وكملت الطريق.

العودة
وانا راجع بقى وبعد ماخلصت طريق الزعفرانة واستلمت طريق القطامية
قلت اضغط على العربية واشوفها هتوصل لكام
قفشت عليها ووصلت ل 135 وحلفت ماتعديهم
وكنت جايب اخر دواسة البنزين
مشيت شوية على كدة وقلت اريحها بقى حرام
راحت عاملة حركة وقعت قلبي الصراحة
بعد ماريحت السرعة ونزلتها ل 110 جيت اضغط بنزين تاني العربية راحت مهدية كأنها هتقف وراحت مزودة السرعة عادي
عملت الخركة دى مرتين كمان ولاقيت مؤشر الحرارة عدى النص بحاجة بسيطة
رحت مهدى خاااالص وفى اول استراحة رحت راكن
فتحت الكبوت الموبينة درجة حرارتها عادية الحمد لله
يمكن اقل من درجة حرارتها جوة البلد
الاسبراتير سخن
المياة كويسة
وقفت خمس دقاءق بالظبط ومشيت تاني
وكملت الطريق ومعدتش ال 110
ومعملتش اى حاجة تاني والحرارة فضلت طبيعية لغاية ماوصلت البيت بالسلامة
انا طبعا مش فاهم ايه اللى حصل!
اتوقع ان العربية شرقت بنزين مثلا الله اعلم

حاجة تانية فى بعض اجزاء من الطريق الدركسيون كان بيرعش
وفى اجزاء تانية كان زى الفل برضه مش فاهم ليه

خلاصة التجربة
الماروتي بنت حلال فعلا واصيلة
بس الواحد لازم يبقى عاقل وهو بيسوق

[hugan]

130 بماروتي
ومعاك المدام وطفل
خطر جدا

[Ahmed Metwally]

عايز اقولك العربية كانت ثابتة بشكل فاجءني الصراحة

[Abo_Mazen]

خلي بالك في حكاية القرص على المكنه عشان ما تكلش منك زيت ..وممكن مره مع التانيه المكنه هتبدا تخف فعلا

[rotanamasoud]

عايز اقولك العربية كانت ثابتة بشكل فاجءني الصراحة

مع احترامى ليك الماروتى لا اتزان ولا امان ولا حمايه للى فى قلبها وعربيه نقل تعدى جنبها تقلبها مش حتعرف الفرق الا لو سافرت بعربيه حجمها كويس
انا بدئت ب 127 كنت بحسب اتزانها معقول وبعد لما ركبت ستروين زد اكس استحاله اسافر ب127 مفيش اى فرق اطلاقا بين ثبات الاتنين واتزان الاتنين ومناوره الاتنين وفرمله الاتنين وامان الاتنين ولما ركبت التمبرا بعد الستروين فرق كبير جدا جدا بين اى واحده فيهم ولما ربنا يكرمنى واجرب حاجه اعلى حعرف ان اللى كانت معايا كانت اقل
كل مشىى بالعربيه سفر والسفر يعنى عربيه كبيره ربنا يكرمك بعربيه كبيره

[Ahmed Metwally]

خلي بالك في حكاية القرص على المكنه عشان ما تكلش منك زيت ..وممكن مره مع التانيه المكنه هتبدا تخف فعلا

والله يا باشا بعد التجربة طلعت بأن القرص مالوش اى فايدة
ده غير ان زى مابتقول ممكن يضر المكنة
تجربة وعدت

[Ahmed Metwally]

مع احترامى ليك الماروتى لا اتزان ولا امان ولا حمايه للى فى قلبها وعربيه نقل تعدى جنبها تقلبها مش حتعرف الفرق الا لو سافرت بعربيه حجمها كويس
انا بدئت ب 127 كنت بحسب اتزانها معقول وبعد لما ركبت ستروين زد اكس استحاله اسافر ب127 مفيش اى فرق اطلاقا بين ثبات الاتنين واتزان الاتنين ومناوره الاتنين وفرمله الاتنين وامان الاتنين ولما ركبت التمبرا بعد الستروين فرق كبير جدا جدا بين اى واحده فيهم ولما ربنا يكرمنى واجرب حاجه اعلى حعرف ان اللى كانت معايا كانت اقل
كل مشىى بالعربيه سفر والسفر يعنى عربيه كبيره ربنا يكرمك بعربيه كبيره

انا معاك انها مافهاش امان بس هى مش ضايعة اوى كدة :)
بس الواحد محتاج يتعامل معاها بعقل علشان ياخد اللى هو محتاجه

وتسلم على الدعوة الحلوة وربنا يكتبلنا جميعا احسن حاجة

[mohammad isdf]

تقرير جميل
متشكر جدا
وربنا يحفظك ويسعدك بيها