سفر مرسى مطروح بالماروتى .. !!

[Ahmed Hamdy]

السلام عليكم ورحمة الله وبركاته ..
كان عندى سؤال للإخوة الأعضاء فى المنتدى ..
انا عندى سيارة ماروتى موديل 94 وحالتها الحمد لله جيدة ..
كنت بفكر أسافر بيها مرسى مطروح (مسافة حوالى 500 كيلو) .. بس قلقان ..
أرجو لو حد عنده سيارة زيها وجرب حاجة زى كده يقولى ..


شكراً
أحمد

[معاذ الشرباصى]

لسه السنة اللى فاتت ابن خالتى معاه ماروتى مو 94

سافر بها العجمى لمدة اسبوع

و كذا مرة راح بها الساحل

اهم حاجة تطمن ان العربية تمام و تقدر تسافر

اكشف على الزيوت, و الفرامل, و دورة التبريد, الكاوتش

[Nader]

عادي ممكن تسافر بيها، غير زيت وفلتر ومتخدش الطريق على مرة واحدة. دة غير طبعاً ضبط ضغط الاطارات والانرتيبات الاساسية المتبعة في السفر

[Hossam_Hassan]

المهم ما تستعفاش على العربية و تستعجل، ريح كل ساعة.

[Ahmed Hamdy]

شكرا على الرد السريع ..

شكرا يا جماعة على الرد السريع ..
انتوا كده طمعتونى أسأل تانى ..
انا الفرامل عندى فيها حاجة مش مظبوطة أوى ..
يعنى لما بكون ماشى على سرعة عالية وعايز أفرمل بسرعة العربية بتاخد وقت على ما تقف ..
أو لازم أدوس أوى على الفرامل ..
ميكانيكى قالى الماستر فيه مشكلة وعايز يتغير ..
بس سألت عليه لقيته حيتكلف ففقلت أأجله شوية ..
أنا بصراحة معنديش خبرة اوى فى ميكانيكا السيارات ..

حد عنده رأى فى الموضوع ده .. ؟؟
كمان انا مغير فلتر وزيت من حوالى 3 شهور .. بس الزيت اللى حطيته المفروض انه يعمل 2000 كيلو وأنا عملتهم ..
هل ممكن أغير الزيت بس ولا لازم الفلتر كمان ؟؟

شكرا ً

[Nader]

اولاً متسافرش والفرامل فيها مشكلة، دة شبة انتحار صلح الفرامل الاول وبالنسبة للفلتر ممكن متغيرهوش ةتكتفي بتغيير الزيت بس.

[معاذ الشرباصى]

شوف كمان الفرامل الخلفى بتاعت الماروتى

ناس كتير بتنسى ان فى طنابير ورا محتاجة يتشيك عليها

و طبعا ممنوع السفر و الفرامل فيها حاجة

[Karim_Monir]

الماستر مش هافتيلك فيه عشان ما شوفتش غير الزيت
والفلتر لو حاطط مصري غيرة لو الاصلي اعمل غيار كمان
لما تيجي تسافر ما تسوقش اكتر من ساعة وتريح
عشان الموتور صغير وما تسخنش منك جامد خاصة ان فيها حمولة
ما تسافرش ابدا بعربية فراملها ضعية وما تستخسرش
لان مفاجات الطريق مالهاش كبير ومفيش حاجة في الدنيا تسوي بهدلتك انت واسرتك في الطريق
ترجع بالسلامة ان شاء الله

[Islam_galal]

قبل السفر لازم تغير الزيت و ممكن تأجل الفلتر لو الزيت القديم شكله معقول
بس الفرامل لازم تظبطها قبل السفر
علي فكرة انا سافرت بسيارتي القديمة اسكنرية - القاهرة - اسكندرية ده غير اللف داخل الفاهرة يعني حوالي 600 كم و الحمد لله من غير مشاكل ، اهم حاجة تسايس العربية و تريح علي الاقل مرة في السكة و يا ريت لو تسافر بعد الفجر علشان تبعد عن الشمس قدر الامكان

[sab3aawy]

إلا الفرامل

بص انا كنت بسافر بعربية 126 موديل 93 اسكندرية وارجع فى نفس اليوم بدون اى مشكلة ، ومتهيألى انى دى تقريبا نفس مسافة مرسى مطروح ، ومرة سافرت بيها اسكندرية ورجعت فى نفس اليوم وتانى يوم سافرت اسكندرية ورجعت فى نفس اليوم، ومرة تانية عملت بيها 900 كيلومتر فى يوم واحد

لكن وانا مطمن تماما من 3 حاجات، الكاوتش والفرامل وعدم السخونة

ولذلك صلح الفرامل وبعدين سافر على بركة الله

[Ahmed Hamdy]

شكرا على الردود ..

متشكر جدا يا جماعة على الردود ..
بس بالنسبة لموضوع الفرامل انا مش بقول ان فيها مشكلة خطيرة ولا حاجة ..
انا عارف طبعا ان الفرامل مهمة جدا ..
هى الفرامل كويسة ..بس انا بقول انها بتحتاج لدوسة جامدة لو ماشى بسرعة مثلا 90 أو 100 وحبيت أقف بسرعة .. أو ممكن أدوس وأشيل كام مرة ورا بعض ..

يعنى هى دلوقتى كويسة بنسبة 80 فى المية ..
انا عايز أخليها مية مية عشان ابقى مطمن ..

بس خايف الميكانيكبة يقعدوا يمطوحونى ويخلونى اغير حاجات ملهاش لزمة لأن كل واحد برأى ..

فياريت رأى الأستاذ الكبير سبعاوى ..

[اسلام المصرى]

Re: شكرا على الردود ..

هى الفرامل كويسة ..بس انا بقول انها بتحتاج لدوسة جامدة لو ماشى بسرعة مثلا 90 أو 100 وحبيت أقف بسرعة .. أو ممكن أدوس وأشيل كام مرة ورا بعض ..

يا أخ أحمد فى موقف طارىء على الطريق حد معدى مثلا و ما أكثرهم اللى بيعدوا بدون تفكير عيب الفرامل ده ممكن تكون عواقبه و خيمة أنا من رأى تتصلح مهما تكلف مش مشكلة , بس تمشى بيها مرتاح البال و تأمن نفسك و من معك , تروح و ترجع بألف سلامة أنت و من معك , و على مهلك.

[vooooo]

ياراجل توكل على الله و سافر

ده انا سافرت مع خالى من القاهره للغردقه بعربيه 127 قديمه قوى و مهكعه و ماوقفتش فى الطريق مع انها كانت بتعطل كتير جوه البلد
خلى عربيتك تشم نفسها شويه

و تروح و ترجع بألف سلامه

[hazem_khidr]

طبعا الاخوه الاعزاء قالو الكلام اللي المفروض الواحد يقوله بس بضيف حاجه صغيره.
غير السيور قبل ما تسافر و اهم حاجه سير الدينامو لو بقاله فتره طويله و خلي القديم معاك احتياطي في العربيه ولو لسه مغيره قريب اشتري سير و خليه معاك و اشتري شويه فيوزات خليهم معاك برضه ممكن حاجه تضرب منهم.

[ahmed1981]

Re: شكرا على الردود ..

هى الفرامل كويسة ..بس انا بقول انها بتحتاج لدوسة جامدة لو ماشى بسرعة مثلا 90 أو 100 وحبيت أقف بسرعة .. أو ممكن أدوس وأشيل كام مرة ورا بعض ..
يعنى هى دلوقتى كويسة بنسبة 80 فى المية ..انا عايز أخليها مية مية عشان ابقى مطمن بس خايف الميكانيكبة يقعدوا يمطوحونى ويخلونى اغير حاجات ملهاش لزمة لأن كل واحد برأى ...

1- أول حاجة تروح لميكانيكي تخليه يكشف على الفرامل في الأربع عجلات تيل وطنابير ويعمل اللازم
2- ياخد الهواء من الأربع مساتر
3- يتأكد إن السرفو سليم
4- تطلع تجرب الفرامل وتقول لنا إيه الأخبار