ياريت حد ديلنى على مكان بيع الماروتى والالتو فى المنصورة

[hosine_eg]

ياريت يا جماعه حد يدلنى على الاتى
- مكان بيبيع ماروتى والتو فى المنصورة
- مكان بيبيع قطع الغيار الخاصه بالسيارتين فى المنصورة
- مكان ميكانيكى موثوق فيه فى المنصورة نقدر نعمل عنده الصيانه الدوريه والاعطال بعيدا عن التوكيل
والسبب فى جمعى للمعلومات انى بأفاضل بين العربيتين من حيث الثمن وقطع الغيار ومصاريف التشغيل لأشترى الافضل وما يناسب احتياجات الاسرة بدون مصاريف اضافيه

[m7nsh]

انا معرفش غير اول سؤال :)

معرض المصريه - توريل الجديده -- جمب المركز

و ربنا يوفقك للأختيار الأفضل

[hosine_eg]

شكرا يا باشا وتسلم على الرد وياترى ايه اخبار العربيه الماروتى معاك وهل تعرف حد جاب التو نسأله عن اخبارها وياريت لو حد يدلنا على مكان بيع قطع غيار الماروتى والالتو فى المنصورة

[m7nsh]

العربيه زى الفل فعلا ,, الحمد لله ,, مكنتش متوقع ده منها و كنت فاكرها هتخسع مع اللى بيتعمل فيها بس والله طلعت اصيله

و فى هنا اعضاء معاهم التو ان شاء الله يفيدوك

[hosine_eg]

ربنا يخليك يا اخى انا سألت النهارده عند محل فى ش عبد السلام عارف عنده قطع غيار السوزوكى لاقيت الماروتى موجود لها قطع غيار رخيصه وممتازه وكمان هو قاللى ان شارع الحسنيه مليان قطع غيار الماروتى بالكامل وسألته على الالتو قاللى قليله وتكاد تكون مش موجوده وكمان رحت معرض المصريه وسألت على الماروتى ماسكين على 38000 زى الوكيل بس قاللى فيه خصم ممكن توصل 36000 ولو فيه معلومات اكتر مش هاتأخر على احلى منتدى

[m7nsh]

ربنا يخليك يا جميل
ممكن تقولى شارع الحسنيه ده فين بالظبط ؟؟و ياريت لو تقولى اروحه منين من الجامعه او المحافظه

[hosine_eg]

شارع الحسنيه بجوار موقف التلاجه لو تعرفه ولو عاوز تيجى من ناحيه المحافظة بتمشى على شارع البحر وبتنزل من المشايه وبعدين تطلع من المطلع اللى قبل كوبرى طلخا وترجع شويه صغيرين لحد سنترال شارع البحر وتدخل من الشارع اللى على ناصيته السنترال اسمه شارع بنك مصر وتمشى على طول وتسأل فين الحسنيه الف مين هايدلك وده شارع كله بتوع قطع غيار وميكانيكيه وعفشجيه وكل اللى انت عاوزه ولو توصلت لمعلومه ياريت تقوللى مدى توفر واسعار قطع غيار الماروتى والالتو وانا كمان هاحاول انزل اسال ان شاء الله
ولو عاوز تروح من الجامعه لو من بوابه البحر بتاخد طريقك زى ما تكون رايح المحافظه وهايقبلك السنترال وشارع بنك مصر بعد كوبر طلخا اللى هايقابلك على الشمال وانت ماشى ولو خرجت من بوابه الجلاء تاخد الجلاء ويبقى وشك ناحيه نادى الشعب وقبل ما تحصله بشارعين تدخل يمين فى شمال اجبارى هاتلاقى موقف التلاجه اللى هو اخر الحسنيه بتتقدم شويه بتلاقى الشارع والميكانيكيه وبتوع قطع الغيار

[alhashem90]

الوكاله اليبانيه ده اسم المحل



0502356333

[m7nsh]

شارع الحسنيه بجوار موقف التلاجه لو تعرفه ولو عاوز تيجى من ناحيه المحافظة بتمشى على شارع البحر وبتنزل من المشايه وبعدين تطلع من المطلع اللى قبل كوبرى طلخا وترجع شويه صغيرين لحد سنترال شارع البحر وتدخل من الشارع اللى على ناصيته السنترال اسمه شارع بنك مصر وتمشى على طول وتسأل فين الحسنيه الف مين هايدلك وده شارع كله بتوع قطع غيار وميكانيكيه وعفشجيه وكل اللى انت عاوزه ولو توصلت لمعلومه ياريت تقوللى مدى توفر واسعار قطع غيار الماروتى والالتو وانا كمان هاحاول انزل اسال ان شاء الله
ولو عاوز تروح من الجامعه لو من بوابه البحر بتاخد طريقك زى ما تكون رايح المحافظه وهايقبلك السنترال وشارع بنك مصر بعد كوبر طلخا اللى هايقابلك على الشمال وانت ماشى ولو خرجت من بوابه الجلاء تاخد الجلاء ويبقى وشك ناحيه نادى الشعب وقبل ما تحصله بشارعين تدخل يمين فى شمال اجبارى هاتلاقى موقف التلاجه اللى هو اخر الحسنيه بتتقدم شويه بتلاقى الشارع والميكانيكيه وبتوع قطع الغيار

ماشاء الله ,, وصفك فوق الممتاز انا حاسس كأنى دخلت الشارع خلاص وواحد سمكرى بيبص من ورايا بيشوفنى بكتب ايه !

جزاك الله خيرا يا hosine

و ربنا ما يحوجك ولا يحوجنا لقطع الغيار ;)

[hosine_eg]

اى خدمه لك يا اخى وشكرا لأخونا alhashem90 على رقم تليفون المحل وعلى فكرة انا نزلت سألت فى الحسنيه على قطع غيار الماروتى والالتو ولقيت الماروتى متوفر جدا وفى اكتر من محل ولكن الالتو مش متوفر وقطع الغيار الالتو غاليه ولقيت ان اسعار قطع غيار الماروتى عبيطه فى سعرها يعنى الفانوس فى الثلاثينات وتيل الفرامل متدرج من خمسه وثلاثين لحد ستين حسب النوع ولاقيت ورش بتغير زيت للماروتى وجنوط وتركيب كاسيت واصلاح كهرباء وكل حاجه فى اللماروتى وكمان الاكسسوارات كلها من غطاء سيارة لمعطر لمنظف للماء الاخضر للردياتير ولقيت كمان الكاسيت اللى مقاسه يركب على الماروتى بدون تكسير حاجه بس ببكر وتستعمل معاه ام بى ثرى اللى بيركب فى ولاعه العربيه
وكمان سألت عن سعر العربيه عند السبع لاقيت تمنها 37000 جنيه وقاللى ممكن اعمل خصم على الكاش ولو فيه حد عنده معلومات تانيه مايبخلش علينا

[m7nsh]

الله ع الكلام يا جدعان

ربنا يخليك لينا يا حسين باشا

عاش عاش عاش :)

[hosine_eg]

على فكرة انا لسه المصريه للسيارات متصلين بيا حالا وقالولى ان سعر الماروتى وصل 35000 جنيه وده للى عاوز يشترى انا قلت اشارككم المعلومه علشان تستفادوا من الخصم

[m7nsh]

والله

طيب ع البركه ,, كده نزلو الف كمان مره واحده

شكرا لمتابعتك معانا دايما كده يا حسين باشا :)

[hosine_eg]

كل اللى عنده معلومات يضيفها يا جماعه حتى نستفيد جميعا

[romido2010]

انا جايب الماروتى بتاعتى من معرض اسمه شاهر...فى شارع عبدالسلام عارف
كنت جايبها كاش ب 35750
بس نصيحة محدش يجيب منه لانهم طلعوا عينى فى تخليص اجراءات الجمرك بتاعت العربية وكمان فى تسليمها وكمان اخدتها من غير كتالوج...ومن غير ولاعة!!!
أما قطع الغيار: اظن انها كتير فى الحسنية ..
انا بقى عندى سؤال....عندى مؤشر السرعة مش بيتحرك...
حد يعرف اروح لمين يصلحه؟؟
زكمان عايز دواسات للماروتى..لانى دورت ملقتس حاجة مقاسها مناسب(كله كبير )
حد يعرف بتتباع فين فى المنصورة طبعا..
وشكرااااااا