الماروتى عملت 23000 كيلو

[ronygirl]

السلام عليكم
الحمد لله اشتريت ماروتى موديل 2008 من سنة تقريبا
كملت 23000 كيلو الاسبوع ده
المهم انا كنت بطمن على المياه فى القربة من غير ما افتحها علشان احافظ على دورة التبريد المقفولة ( حسب ما سمعت طبعا لانى ماشية على السمع بدون اى خبرة)
لقيتها الاسبوع ده (المياه فى القربة)وصلت الثلث تقريبا طبعا نظرا للاستعجال الدائم (اختكم علطول بتجرى ) زودتها مياه عادية وان شاء الله المرة الجاية اجيب المياه الخضراء الى حضراتكم قولتوا عليها
المهم::
العربية الحمد لله نعمة من ربنا حلوة والفتيس رخم شوية بس هيه كده من ساعت ماجت حتى انا قولت لهم فى التوكيل وقالوا عملناه بس تقريبا هوه كده
انا على فكرة بطلت اروح التوكيل من بعد صيانة ال5000 طبعا علشان الوقت وعلشان بادفع اكتر ومش حاسة بفرق
انا الحمد لله بغير زيت موبيل 1 (10000)
بس المشكلة بقى
انا اليومين دول حاسة بريحة سخونة (((ريحة بس )))) العداد مش سخن ولا حاجة مش عارفة ايه سببها يارب حد يفيدنى ويقولى ممكن يكون ايه السبب
طولت معلش بس قولت احكى تاريخ العربية علشان الرد يكون بفايدة ان شاء الله
شكرا

[Ahmed Hassan]

زودتي القربه لغايه فين؟ لو القربه فيها ميه زياده و انتي ماشيه بعد ما العربيه توصل للحراراه الطبيعيه الميه ضغطها هيزيد في القربه لغايه ما تنزل بره القربه و تيجي على اي مكان سخن تعمل الريحه اللي بتشميها دي.

[meemo]

انا كنت عايز اجيب سيارة مستعملة للمدام توصل الاولاد المدرسة وناس نصاحوني بالماروتي بس مش عارف حاسس انها مش كويسة بجد ممكن تنفع مثلا في السفر للمصيف بصراحة انا بفضل 128 او حتي 127 مستعملة عليها ممكن حد يفدني انا خام خالص

[snake2082000]

سعات بتبقي راحه السخونه من تيل الفرامل

[muslimah_dentist]

ممكن حد يقولى ايه المية الخضرا ديه؟

[muslimah_dentist]

انا كنت عايز اجيب سيارة مستعملة للمدام توصل الاولاد المدرسة وناس نصاحوني بالماروتي بس مش عارف حاسس انها مش كويسة بجد ممكن تنفع مثلا في السفر للمصيف بصراحة انا بفضل 128 او حتي 127 مستعملة عليها ممكن حد يفدني انا خام خالص

الماروتى عربية فى منتهى الجمال و بتوفر فى البنزين بشكل خرافى

و حضرتك ممكن تدخل على موضوع مزايا و عيوب الماروتى بالتفصيل و تعرف كل حاجة عنها

و رابط الموضوع أهو

http://www.nilemotors.net/Nile/showthread.php?t=14710

[Ahmed Hassan]

ممكن حد يقولى ايه المية الخضرا ديه؟

دي ميه مخصوصه لونها اخضر او احمر بتتحط في الريداتير للتبريد. الميه دي مضاف عليها مواد بترفع درجة الغليان بتاعتها... و بتحافظ على اجزاء الريداتير و الموتور الداخليه من التآكل الناتج عن الاملاح اللي بتكون موجوده في الميه العاديه.

[ronygirl]

السلام عليكم :)
هيه الميه زيادة شوية فى القربة فعلا
بس انا اكتشفت المشكلة
العربية ما اتنضفتش من شهر 2 ما اتغسلش الموتور يعنى فلقيت بخار زيت خارج مع التراب هوه ده الى عامل الريحة
ربنا يسهل هاروح انظفها ونشوف ان شاء الله خير
وبجد شكرا لكل الى رد على الموضوع
الى عاوز عربية للمدام
الماروتى الحمد لله حلوة وفعلا موفرة فى البنزين وسهلة السواقة للستات وفى الاخر اعتقد ان الفلوس الى معاك هيه الى تحكم وربنا يوفقكم للقرار السليم

[ronygirl]

اه بالمناسبة
ممكن تعرفونى ايه الى محتاج متابعة للعربية
يعنى مثلا تيل الفرامل يتغير امتى ويتجاب منين والحاجات الضرورية للعربية يعنى
شكرا جداًً

[OZYDREAMS]

العربية فعلا فى منتهى الروعه والجمال وبتستحمل الضغط والشد مع ان الماتور صغير انا لسه مجدد رخصتها من اسبوع وبرده موديل 2008 وعامله معايا حاليا 4700 كيلو العربيه دى من يومين مقفل امبيرها الثبات عالى جدا لغاية 100 :110 كيلو بعد كده مش هيفرق الثبات هتحس انك راكب الهو جايز علشان كنت لوحدى مش عارف والله بس اهم حاجه ان العربية مبتكذبش زى ما قالت مدام نظيفة القطنه مبتكذبش العربية اقتصاديه فى البنزين مصرفتش عليها من يوم ماجت الا بنزين وزيت وبطاريه جافه لزوم طقم الصوت والسنتر والانذار فقط لاغير أنصح بمن يفكر بها الصراحة اقتنائها لانى كنت متردد بشرائها قبلها بينها وبأى عربية إستعمال اعلى منها بنفس تمنها بس سورى الزيرو زيرو

[frg]

اه بالمناسبة
ممكن تعرفونى ايه الى محتاج متابعة للعربية
يعنى مثلا تيل الفرامل يتغير امتى ويتجاب منين والحاجات الضرورية للعربية يعنى
شكرا جداًً

المفروض السياره تتفحص فحص دورى كل 5000 كم والتيل بيتغير كل 10000كم وبيتوقف على حسب الاستعمال والمفروض حضرتك تراجعى كل يوم الصبح على مياه القربه والزيت وزيت الفرامل و.... حفاظا على سلامتك والله المستعان

[frg]

وانا مهندس سيارات لو حبيتى مساعدتى فى اى شئ وربنا يبارك لك فيها سلام

[ronygirl]

شكرا يا frg
بس كل يوم ابص على المياه والزيت
مش الزيت له عدد كيلومترات بيمشيها والمياه ليه كل يوم المفروض انها عربية بقالها سنة انا على فكرة ما بصتش على المياه من يوم ما جبتها الا الاسبوع الى فات علشان مهندس الصيانة كان قايل انها دورة تبريد مقفولة متفتحيش القربة الا اما تحسى بسخونة العربية
والحمد لله عملت 23000 ك قبل ما احس انها سخنت علشان الحر الرهيب بتاع الفترة الى فاتت
والزيت انا المفروض اغيره على 30000 يبقى ابص عليه ليه
طب قول كل اسبوع لكن كل يوم ده صعب قوى
احنا متفقين انا علطول مستعجلة:)
لو سمحت قولى الكشف الدورى ده بيكون عند مين وبيكشف على ايه انا بغير فلتر الزيت بعد 10000ك زى ا لزيت وهمه بيكشفوا على مياه البطارية ساعتها اعمل ايه كمان؟؟؟
شكرا جدا :)