يوم مع توكيل سوزوكى

[monaabanoub]

النهاردة رحت مودورن موتورز علشان الماروتى
العربية دخلت الصيانة الساعة 10 خرجت الساعة 3.30
انا وديتها قبل صيانة الالف كم علشان كان فيها مشاكل كتير هما ظبطوها بس مواعيدهم وحشة يعنى قالو العربية هتخلص الساعة 2 خلصت 3.30 بس
المهم وانا هناك حبيت اجيبلكم شوية اسعار من هناك والعروض اللى هما عملينها
سنترلوك 200 + تركيب 75 +10% ضريبة =302.5
جهاز انذار 300+ تركيب 75 +10% ضريبة =412.5
كاسيت سى دى وبيركب فيه فلاشة و كارت ميمورى بالسماعات 700+تركيب 100 +10%ضريبة =880
غطاء للسيارة 120 +10% ضريبة =132
فرس للكراسى 250 +تركيب 50 +10%ضريبة =330
وكان فية عرض لو ركبت السنتر +الانذار +الكاسيت +غطاء تاخدهم ب 1200 بدلا من 1727
السنتر لوك لازم يركب فى التوكيل علشان لو حصل حاجة منه للعربية بتخرج من الضمان لو ركب برة التوكيل

هناك كانو عاملين عرض للعازل الحرارى 3m قالو ان العربية تتكلف 660 بس انا شفتة لقيت لونة غامق حاسة انة هيتكشف فى المرور

عرض تانى عن الزينون بيقولو عرض خاص ب 1000 جنيه
عرض تانى عن dvd ب 3000 جنية

اسفة لو كنت طولت عليكم

[كابوس الليل]

سنترلوك 200 + تركيب 75 +10% ضريبة =302.5
جهاز انذار 300+ تركيب 75 +10% ضريبة =412.5

يلهوى ادفع اكتر من تمن الحقيقى للحاجة بزيادة 120 جنيه ليه يعنى ؟؟؟؟

[monaabanoub]

علشان العربية ما تخرجش من الضمان

[كابوس الليل]

علشان العربية ما تخرجش من الضمان

برضوا مش للدرجة ديه ديه سرقة علنى

[مواطن مصرى]

السلام عليكم و رحمه الله و بركاته

شاكرين جدا على هذا الموضوع الجميل جدا

اختى الصغيره بعدما دبستنى فى تعليمها السواقه تفكر فى ان تشترى عربيه بدل بهدله المواصلات ففكرت ان نشترى لها ماروتى زيرو لان سعرها مناسب و اقتصاديه فى استهلاك البنزين و هتريحها من تعب التصليح و الصنايعيه لو كانت عربيه مستعمله

انا فرحت جدا بهذا الموضوع لان مشكله الماروتى انها تاتى بدون اى كماليات و لا حتى اساسيات (التكييف مثلا) و لاول مره اشوف حد بيعرض اسعار حاجاتها فى التوكيل

النهاردة رحت مودورن موتورز علشان الماروتى
العربية دخلت الصيانة الساعة 10 خرجت الساعة 3.30
انا وديتها قبل صيانة الالف كم علشان كان فيها مشاكل كتير هما ظبطوها بس مواعيدهم وحشة يعنى قالو العربية هتخلص الساعة 2 خلصت 3.30 بس

هو حضرتك رحتى فرع التوكيل فى الدقى ام فرع اخر ؟!
لو حضرتك رحتى فرع اخر من فضلك قولى لنا العنوان و كيف نروح
كل الناس فى قسم سوزوكى تقريبا لم يشكروا فى فرع التوكيل اللى فى الدقى

سنترلوك 200 + تركيب 75 +10% ضريبة =302.5
جهاز انذار 300+ تركيب 75 +10% ضريبة =412.5
كاسيت سى دى وبيركب فيه فلاشة و كارت ميمورى بالسماعات 700+تركيب 100 +10%ضريبة =880
غطاء للسيارة 120 +10% ضريبة =132
فرس للكراسى 250 +تركيب 50 +10%ضريبة =330

اول حاجه حضرتك الحاجات دى نوعها ايه ؟!

هل هى السنترلوك و الانذار وولف و كوبرا و سيمفونى زى السوق ام حاجه مختلفه تستاهل السعر ده ؟!
هل الكاسيت كينوود او رودستار او بيونير ام نوع صينى مثلاً ؟!

بصى حضرتك اسعار الحاجات دى فى السوق (من قسم كماليات السيارات فى نايل موتورز)

سنترلوك كوبرا = من 100 الى 150 جنيه بالتركيب
سنترلوك سيمفونى = من 120 الى 150 جنيه بالتركيب

انذار وولف = من 200 الى 250 بالتركيب (سعر الجهاز بدون تركيب اقل من 200 جنيه فى توكيله فى جسر السويس)
انذار صن = من 250 الى 300 بالتركيب
انذار روكيت = حوالى 250 جنيه (الاستاذ اللى قال سعره ركبه على عربيه كيا سيراتو زيرو)
انذار صينى بشاشه تحديد موقع العربيه = 300 جنيه بدون تركيب

السنتر لوك لازم يركب فى التوكيل علشان لو حصل حاجة منه للعربية بتخرج من الضمان لو ركب برة التوكيل

هل لو ركبت الحاجات دى فى مركز معتمد مثل ادريان (معتمد من توكيلات شيفروليه - كيا - بيجو) برضو يخرج العربيه من الضمان ؟!


اسف جدا للاطاله

و شكراً

[zalpany2000]

أخي المواطن :)

اسمحلي اجاوبك علي بعض أسألتك بعد إذن الاستاذة مني

بالنسبة للأكسسوريز اللي موجوده عندهم فهي انواع مش بالكفائة اللي حضرتك متخيلها .. قد تكون أسوأ من السوق كتيير
و بالتجربة في حاجات كتير ما تشتريش اكسسوريز من التوكيل نفسه.. حرام
يا فندم الماروتي اكسسوارها مالي الدنيا .. انت بس توكل علي الله و هاتها.. و انزل مرة التوفيقية و ممكن ب 200 جنيه تجيبلها انذار و سنتر .. و ما تقلقش من موضوع الضمان ده .. دده كله كلام فاضي و ضحك علي الدقون .. لو لاقدر الله العربية حصل فيها حاجه برضو هما ملزمين بتصليحها.. اعتقد انهم مرنين نسبيا في الحتة دي

بالنسبة للكاسيت .. نوعه مجهول الهوية يا فندم وده مايرجحش ان حضرتك تشتريه ... بنفس المبلغ ده حضرتك ممكن تجيب حاجه Kenwood فيها برضو Usb و محترمة

بالنسبة لتوكيل الدقي بقي
فــهم بحالات

اوقات تلاقيهم مبتسمين و ظراف و الحياة لذيذة... واوقات تانية بيبقي الشغل صربعة و الدنيا مزنقة قووي ما تفهمش ليه
بس انا اعتقد ان السبب ان مركز الدقي عليه ضغط كبير جدا . لانه الاقرب من وسط البلد ..

انا عملت 3 صيانات في الدقي
و 3 في ابو رواش
و ارشح لحضرتك طبعا ابو رواش في توافر قطع الغيار.. وبعض المعدات اللي مش موجوده في الدقي .

تحياتي
وأخيرا شكرا استا1ة مني علي الموضوع علشان الناس فعلا تقارن الاسعار ببره و توصل لنتيجة

[monaabanoub]

مواطن مصرى
انا رحت فرع ابو رواش
ثانيا انا معرفش حاجة عن الانواع فى السنترلوك والانذار انا لسة بتعلم سواقة
انا ركبت الكاسيت والانذار والسنتر فى التوكيل علشان هما بيتلككو على كل حاجة كل شوية لو عملت حاجة فى العربية هتخرج برة الضمان
ربنا يوفق اختك فى شراء عربية بس نصيحة بلاش ماروتى مش حلوة انا ادبست فيها ونفسى اخلص منها مع انى شرياها زيرو لكن مشاكلها كتيير


zalpany2000
ميرسى لتوضيحاتك الجميله

[m7nsh]

بس نصيحة بلاش ماروتى مش حلوة انا ادبست فيها ونفسى اخلص منها مع انى شرياها زيرو لكن مشاكلها كتيير

ياريت نعرف من حضرتك نوعيه المشاكل اللى قابلتك مع العربيه فى الأول كده خصوصا انها لسه زيرو؟
دنا كنت داخل اقولك مبروك عليها و على الكاست و الأنذار و السنتر و عقبال صيانه الميت الف بس شكلك مش مبسوطه منها ع الأخر !!
بس برده مبروك ^_^

[monaabanoub]

الله يبارك فيك

[m7nsh]

حضرتك مقولتيش ايه هى المشاكل اللى مقابلاكى مع العربيه ؟؟ يمكن تطلع حجات بسيطه و حلولها متوفره ؟؟

[monaabanoub]

ميرسى m7nsh
العربية كان فيها عيوب كتير تزعج جدا خصوصا انها زيرو انا كنت هبيعها علشان موضوع ان مش بيركبلها تكييف لكن رحت التوكيل اركب كاسيت وسنتر وانذار وقلت اخليهم يكشفو عليها اكتشفت فيها بلاوى زى:
تقل فى عصايه الفتيس
رعشة فى الموتور مصدعة فى البودى
ونة فى العجل الامامى
حكة فى الفرامل +الفرامل محجرة
دبه فى المساعدين الخلفيين
سحب ضعيف
رعشة فى الدركسيون عند سرعة 90
سخونة العربية بيوصل المؤشر للربع الاخير
انا طبعا ما كنتش اعرف دة كله لانى لسة هتعلم اسوق
واخيرا الماروتى سيئه جدا

[m7nsh]

Omg
انا بجد مستغرب جدا من الكلام اللى حضرتك قلتيه ده ,, بس الحجات دى ابعد ما يكون عن عربيه زيرو ايا كانت!
هو حضرتك كنتى جيباها منين بالظبط ؟ لأن ناس كتير معانا فى المنتدى و بره جابو العربيه زيرو و مفيهاش الحجات دى ,, ممكن يكون المعرض اللى اتعاملتى معاه مثلا هو اللى مش تمام؟

طيب لما رحتى التوكيل ظبطولك الحجات دى ولا لسه برده ؟؟

بس خير ان شاء الله و ميبقاش فى مشاكل بعد كده و تريحك من وجع القلب فى المواصلات

[monaabanoub]

انا جبتها من المصرية فرع المعادى
رحت التوكيل اول مرة قالو انهم ظبطوها وطبعا كدب رحتلهم تانى مرة مش انا اللى رحت اخويا واتخانق وزعق هناك ونزله مدير فرع ابو رواش وقاله احنا هنظبط العربية ومع حضرتك لحد ما تكون سليمة وهو بيجربها لكن لسة مشاكلها مخلصتش

[zalpany2000]

طيب هو انا بس عايز اعلق تعليق صغير

الماروتي عربية اكتر من ممتازة
هي مكن عفشتها ناشفة شوية ويكون اخو حضرتك متعود علي عربية كبيرة و مساعدينها يعني مش بيحسسوه بالمطبات والكلام ده و ده يبرر الدبة

الباقي ده بقي .. لو فعلا صح . يبقي حسبي الله ونعم الوكيل في المعرض اللي باعها لحضرتك لان ده غالبا بسبب سوؤ تخزين او سوء شحن
و في الحالتين حضرتك مش ملزمة بأي حاجه غير ان عربيتك تربقي زي الفل

وخليكي ورا التوكيل لحد ما العربية تبقي تمام

تحياتي

[LORD.ADeL]

زيرو وتعمل كدة لا يبقى فى حاجه غلط
واذا كان كدة يبقى تروح توكيل بتاع ابو رواش
لان عرفت من ردود الاخوة هنا انه فيه امكانيات غير بتاع الدقي
وقلهم ع كل دة وشوف هيقول لك ايه وباذن الله خير
تحياتى..