مشكلة في فتحة السقف بقالها أكتر من سنة ! يقدر حد يساعدني ؟

[ahmed_assala]

السلام عليكم
يا جماعة أنا عندي حكاية مع المازدا 3 موديل 2008
بدون ضمان وخليجي.
من حوالي أكتر من سنة وزيادة فتحة السقف عندي باظت ومن كتر ما حاولت اصلحها اتلعب فيها البخت.,,ودلوقتي محتاجة وير فتحة سقف والفريم بتاعها الفيبر
قالوالي روح الحرفين ,, رحت وسألت قالولي دي لازم تطلع من عربية متقطعة ودي كمان مش موجودة ولو لقيتها كتر خير الدنيا..قلنا حاضر قالولي لأ مينفعش نديلك حتة من السقف .. طيب وبقيتة نعمل فية اية.!
غبور تعطفت علي الناس وفتحت مركز صيانة مازدا في أبو رواش ونزلت اعلانات في الجرايد وفرحت وقلت أخيرا هتعامل مع ناس آخر شياكة ,اكيد لبن العصفور هلاقية .ومش مشكلة الفلوس .. خلاص بقى !
حجزت بالتليفون وحكيتلهم على مشكلتي قبل ما أروح قالولي أطمن يا فندم احنا تحت أمرك وفي خدمتك يا فندم ,, قلنا حاضر
سافرت بتاع 400 كيلو رايح جاي عشان خاطر عيون المازدا وقلت اقول على كل اللي عندي في العربية مرة واحدة عشان مرجعش تاني

ودة المشهد اللي حصل معايا في التوكيل هناك :

أنا : صباح الخير أنا جيت النهاردة حاجز ميعاد معاكوا.
غبور : اهلا بيك,, يا ترى اية مشاكلك مع العربية؟
أنا : والله أنا عندي مشكلة في فتحة السقف محتاجة قطع الغيار بتاعتها
غبور بدهشة غريبة : إزاي يا فندم احنا معندناش ...قطع الغيار لفتحة السقف في الفرع بتاعنا في قليوب _____ قلنا حاضر
أنا : طيب ممكن تكلموا فرع قليوب نشوفها موجودة وسعرها كام
غبور : اتصلنا يا فندم ولقينا ان المازدا بيركبلها اتنين وير للسقف وتمن الواحد 640 يعني الاتنين ب 1280 و الموتور ب 3400 جنية
أنا : طيب أوك هجيبة الوير ومش عايز موتور بتاعي سليم .
غبور : للأسف مش موجود يا فندم غير فردة وير واحدة ومحجوزة.
أنا : طيب انتوا خليتوني آجي لية ومين المحترم اللي قاللي في التليفون ان قطع الغيار موجودة ؟
غبور ( باستعلاء وغرور ): دي مشكلتكوا انتوا عملاء مازدا 3 ملكمش قطع غيار واحنا بنحاول نرضيكوا لكن لو موديل 2010 يبقى قشطة احنا معاكوا
أنا : طيب بلاها خالص فتحة السقف ..عايز أصلح قعدة كرسي السواق عايز الفريم ولا حد يشوفلي التروس
بعد فحص وتمحيص في أجهزة الكمبيوتر بحثا قاتلا عما سألت عنه
غبور : ب 700 جنية يا فندم
أنا : أوك هاتها وركبها لو سمحت
غبور : في فرع الهياكل في قليوب مش عندنا
أنا : طيب ممكن تتصلوا على قليوب تشوفوها موجودة ولا لأ
( وبعد اتصالات دامت قرابة الساعة )
غبور : مش موجودة يا فندم.
أنا ( باستياء شديد ) : طيب بلاها فتحة السقف والكرسي اللي بايظ ممكن اشتري لمبة خزنة التابلوة.. يا ترى موجودة ولا لأ ؟
غبور : موجودة يا فندم ب 10 جنية.
أنا ( وطاير من الفرحة ..أخيرا لقيت حاجة ) :طيب ممكن حد يركبها
غبور : فتح التابلورة وتركيبة مع اللمبة ب 100 جنية يا فندم
انا : إزاي يا بشمهندس أجيب لمبة ب 10 جنية واركبها ب 100
غبور عشان هنفتحلك التابلوة يا فندم من تحت
أنا ( طيب ما دام الحكاية كدة خلاص ) : طيب ممكن بالمرة بقى مادام هنفتح التابلوة ننضف فلتر التكييف.
غبور : أوك يا فندم يبقة 100 جنية كمان والمجموع 200 جنية غير 20 % ضريبة
أنا : لية 100 جنية كمان ماهو التابلوة كدة كدة هيكون مفتوح واللي هيركب اللمبة هيشيل الفلتر وبمسدس هوا ينضف الفلتر مافيهاش حاجة يعني .
غبور : لأ يا فندم دي بنحسبها بساعة عمل زيادة كمان وساعة العمل ب 100 جنية وغير اننا هنفتح التابلوة من فوق مش من تحت !
أنا : طيب بلاها اللمبة هبقى أحسس وبلاة الفلتر هبقى أهوي على نفسي ...عندي بوردة التحكم في المرايات والازاز وقع عليها مية وعايزة تتغير ,,ممكن
غبور : مش موجودة بردو يا فندم.
أنا : في داهية مش مهم هبقى احرك المرايا بايدي لغاية ما تتقطم ولا تزعلوا نفسكوا
ممكن طيب حد يجيبلي الفيبر بتاع الاكصدام
غبور : 375 جنية يا فندم في فرع قلبوب مش عندنا
أنا : طيب حد يقوللي بقى أنا جيت لية ومنزلين اعلان في الجرنان لية
غبور : ممكن حضرتك تتكلم مع مدير الفرع
أنا : ومالة أكلم المدير ورئيس مجلس الادارة كمان
(( وبعد محادثات ومفاوضات واسئلة وجذب وشد كانت الاجابة يا جماعة اننا كأصحاب مازدا 3 شربناها صح لما جبنا عربية مالهاش وكيل ووكيل محترم بيوفر صيانة وقطع غيار ))
وان الناس دي بتتعامل مع عملائها كأنهم أصحاب فضل علينا لما فكروا يعملوا صيانة -بمعنى آخر لما حضرتك تفكر تروحافتكر دايما الآية اللي بتقول لا تسالوا عن أشياء ان تبد لكم تسؤكم _ لانك مش هتلاقي حاجة ولو فتحت بقك هيتقالك احمد ربنا اصلا ان ليكوا شوية فلاتر الزيت والبنزين والبوجيهات غير كدة متتكلمش ولا تدور ....وهوة دي خدمة التوكيل

ملحوظة : لقيت فيبر الاكصدام اللي ب 375 ب 100 جنية في الحرفيين

يا ترى يا جماعة أنا مبالغ في ردة فعلي ولا انا مبعرفش اتصرف .. عندي حق لما اقول الكلام دة ولا احط لساني جوة بقي وهي كدة واللي عاجبة على كدة وانت حر وخلاص ..ولا اية

يا ترى هييجي اليوم الي اصلح فية فتحة السقف واطلع دماغي منها ولا لأ !! يا رب

[ASSASSIN]

أنا ( باستياء شديد ) : طيب بلاها فتحة السقف والكرسي اللي بايظ ممكن اشتري لمبة خزنة التابلوة.. يا ترى موجودة ولا لأ ؟
غبور : موجودة يا فندم ب 10 جنية.
أنا ( وطاير من الفرحة ..أخيرا لقيت حاجة ) :طيب ممكن حد يركبها
غبور : فتح التابلورة وتركيبة مع اللمبة ب 100 جنية يا فندم
انا : إزاي يا بشمهندس أجيب لمبة ب 10 جنية واركبها ب 100
غبور عشان هنفتحلك التابلوة يا فندم من تحت
أنا ( طيب ما دام الحكاية كدة خلاص ) : طيب ممكن بالمرة بقى مادام هنفتح التابلوة ننضف فلتر التكييف.
غبور : أوك يا فندم يبقة 100 جنية كمان والمجموع 200 جنية غير 20 % ضريبة
أنا : لية 100 جنية كمان ماهو التابلوة كدة كدة هيكون مفتوح واللي هيركب اللمبة هيشيل الفلتر وبمسدس هوا ينضف الفلتر مافيهاش حاجة يعني .
غبور : لأ يا فندم دي بنحسبها بساعة عمل زيادة كمان وساعة العمل ب 100 جنية وغير اننا هنفتح التابلوة من فوق مش من تحت !

يا رجل مبلغ في ردة فعل إيه
أنا لو مكانك كنت مسكت في خناقو

[punto759]

انا كمان روحت التوكيل بتاع غبور و بجد ما عجبنيش خالص

[Ahmed Samy]

هو اعلان غبور بقى بتاع ان عربيته بتنقي اللي يشتريها فعلا صح

هم نفسهم في عميل ..............

انما بنى ادم طبيعي ليه حقوق لأ

للأسف التوكيل ده ظلم العربية و بهدل اصحابها المحترمين

[asorour]

ايه رايكوا يا جماعه نقدم شكوي جماعيه لمازدا في اليابان....اكيد مش هيعجبهم الكلام ده خالص..لاني عارف ان من شروطهم علي غبور عشان ياخد التوكيل انه يعمل خدمه عملاء للموديلات القديمه...ياريت نعمل الشكوي ديه ونمضيها كلنا...

[ahmed_assala]

تمام حلوة حكاية الشكوى دي ونحط فيها أرقام الشاسيهات والموبايلات.. بس مين فيكوا بيتكلم ياباني d:

[asorour]

تمام حلوة حكاية الشكوى دي ونحط فيها أرقام الشاسيهات والموبايلات.. بس مين فيكوا بيتكلم ياباني d:

بيتكلموا انجليزي يا زعيم ...ومش هنغلب نكتبها ونترجمها ...هههههههههههه

[punto759]

وانا معاعكوااااااااااااااااااااااااااااااااااااا

[himaz]

ايه رايكوا يا جماعه نقدم شكوي جماعيه لمازدا في اليابان....اكيد مش هيعجبهم الكلام ده خالص..لاني عارف ان من شروطهم علي غبور عشان ياخد التوكيل انه يعمل خدمه عملاء للموديلات القديمه...ياريت نعمل الشكوي ديه ونمضيها كلنا...

+1111111111

[asorour]

+1111111111

يعني ايه +1111111111

[mazdaprotege]

و انا كمان متضامن معاكو فى الشكوى لمازدا فى اليابان لان و اللة انا اتسرقت قبل كدة من غبور قليوب و دول غير كفوء بالمرة و ما عندهمش اي فكرة او خبرة فى المازدا و اتضحك عليا ف 1280 جنية و النتيجة صفر حسبى اللة و نعم الوكيل فى كل التوكيلات اللى ماشية بالفهلوة و فتحة السقف و الصدر
و اكيد شركة مازدا ما يرضيهاش ان عملائها يتبهدلوا و يتسرقوا من وكيل لا يعرف الخبرة ولا الضمير

[Eng.Sameh]

سمارت كار برقبة غبور .. وفعلا الموضوع محتاج شكوى جماعية عشان يا أما يحترم نفسه .. يا أما يغيروه ويشوفوا توكيل محترم يعرف يمسك ماركة محترمة زي مازدا

[M.almaghraby]

انا : إزاي يا بشمهندس أجيب لمبة ب 10 جنية واركبها ب 100
غبور عشان هنفتحلك التابلوة يا فندم من تحت

هههههههههههههههههههههههههههههه مش ممكن بجد دي مسخرة

دا مش توكيل دا استهبال

[Mzeid]

طيب متشوف حضرتك عند سمارت كار عندهم خدمة صيانة المازدامن قبل غبور

[Magdyahassan]

غبور بيفكرنى بالنكته بتاعة الراجل اللى دخل سنتر محترم علشان يشترى فرخه فى الدور الاول سألوه مدبوحه ولا صاحيه قالهم مدبوحه قالولو الدور التانى وهناك سألوه بيضه ولا بلدي قالهم بلدى قالولو الدور التالت ومن التالت للرابع للخامس وفى الدور الاخير قالولو احنا ماعندناش فراخ بس ايه رأيك فى النظام.