سؤال بخصوص قطع غيار مازدا فاميلي 97-98

[FunnyMickey]

محتاج شويه قطع غيار لمازدا فاميلي 97- 98

قلت محدش حيدلني عليها غير حبايبنا هنا في المنتدي

1- طقم دبرياش كامل ديسك واسطوانه وبليه
2- جوز كبالن kne
3- مساعدين امامي
4- سلك بنزين
5-فانوس اشاره يمين

الحاجات دي انا محتاجها جديده ومش عارف الاقيها فين
ياريت اللي يعرف يدلني عليها

العربيه اهي







وشكرا لسعه صدركم

[FunnyMickey]

يارجاله المازدا

حد يعرف ماركه مساعد المازدا الاصلي اللي فيها ايه
عشان الشافعي بتاع قطع الغيار اداني مساعدين kyb
وطلع اازور بتاع المساعد واسع علي بليه البطاحه

والعفشجي قاللي ده مش مساعد العربيه

التاني اروحله يقولي شيل بليه البطاحه دي ملهاش لازمه

مع العلم ان لانسر الكريستاله البليه دي مهمه اوي


اعمل ايه يارجاله

[mazdaprotege]

الاخ الفاضل صاحب الاستشارة بخصوص قطع الغيار
بالنسبة للمساعدين : الاصلى اللى بينزل فابريقة ماركة توكيكو tokiko و دى ممكن تلاقيها عند سمير عبد الرحيم فى شارع دمشق فى مصر الجديدة
و لو انى ليا تحفظ على المساعدين الجديدة فى الفترة الحالية لان 90% من الموجود فى السوق مضروب و دون المستوى و مش حايعيش معاك زى ما انت فاكر و لذلك انصحك بشراء الاستيراد على الاقل حايجى كامل بالسوستة و البطاحة و على التجربة و انشاء اللة بيعيشوا على الاقل سنه او سنة و نص على بال ما تشتكى منهم
بالنسبة لسلك البنزين لازم تفك القديم و تجيب واحد زىة نفس المقاس
بالنسبة للكبالن فاحسن نوع و هو الاصلى اللى بينزل من المصنع ال nkn اليابانى و دة حتلاقية الاتنين فى حدود 520 جنية و بييجى معاة كاوتشة التراب و الشحم الاصلى و الكوليهات الحديد اللى بتتركب على كاوتشة التراب
و بالنسبة لفانوس الاشارة حتلاقى التايوانى فى حدود 60 جنية اما الاىصلى ب 90 او 100 جنية
ارجو لك التوفيق انشاء اللة و انا باحب العربية دى و ما باركبش غيرها و لو محتاج اى مساعدة او مشورة لا مانع من الاتصال بى ( خالد 0106980105 )

[FunnyMickey]

مش حضرتك الاستاذ خالد اللي اخدت منه خرطوم الموتور :)

[FunnyMickey]

انا الحمد لله اشتريت كل حاجه
ووقفت عالمساعدين

قررت اجيبها kyb
زي اللي عندي في اللانسر

المهم والدي نزل معايا توكيل kyb في شارع الصحافه وسط البلد
للاسف ملقيناش عندهم

طلع والدي علي شارع دمشق عند واحد اسمه الشافعي
اخد منه مساعدين
وراح للميكانيكي

المساعد
الماسوره الفضي بتاعته تخينه

غير الاصلي
اما بييجي يسقط بليه البطاحه
مبتدخلش طبعا

خدت المساعدين ورحتله قلتله دول مش بتوع العربيه
انا عاوز زي دول
ووريتله المساعدين ووريته ان بليه البطاحه مبتدخلش

قاللي دي ملهاش لازمه خالص
خد الكاوتشتين دول ركبهم مكانها حتشتغل

علي كاوتش التراب

المهم قلت ياواد بطل فتي عشان متعكش دي مش عربيتك
وخدت المساعدين وريتها للميكانيكي
قاللي يابيه ماهيا هيا
عملنا ايه
البليه دي مهمه جدا ازاي اشيلها
هيا الللي بتبيت المساعد في البطاحه ومتخليهوش يلقلق

قلتله قفل العربيه وانا حروحله اما اشوف اخرتها ايه
ووالدي يكلمه
يقوله والله احنا مبنرجعش حاجه
كل اللي اقدر اعملهولك اني حركبهملك واديك ضمان 6 شهور
لو جرالهم حاجه

طبعا انا لو رحت حتبقي اخر قله ادب
وحجيبله البوليس

فنصيحه منك كده
من الاخر
اروح للراجل ده اخليه يشتغل في العربيه
وفعلا كلامه صح

ولا اتخانق واقل ادبي
:)
:)

[keko]

لو الكلام على اشتغالات كلم حماية المستهلك وهما يخلوه يرجعهم عافية وللتاكيد اسال ميكانيكى تانى هما بتوع عربيتك ولا لا

[mazdaprotege]

اخى الفاضل
انا خالد اللى اخدت منة خرطوم الهوا و ارجو انة يكون شغال تمام و مشكلة البرجلة دى اتحلت
بالنسبة الى موضوع المساعدين اللى اشتريتهم من عند الشافعى فاحب اقولك ان الكلام اللى هو بيقوله ده مش مضبوط و انصحك بانك لازم ترجعهم لة سواء بالذوق او بالعافية لان الواضح من كلامك ان فية اختلاف فى الابعاد او المقاسات عن اللى كان موجود فى العربية
الا اذا كنت عملت شغل فى العفشة القديمة و حد غيرلك الكاوتشة او الطبق اللى عاملك المشكلة دى
اما اذا كنت متاكد ان العفشة القديمة هى كلها بتاعة بلدها فانت دلوقتى تكون متاكد ان المساعدين الجديدة مش هى المقاس المضبوط
اتمنى لك التوفيق انشاء اللة

[FunnyMickey]

لو الكلام على اشتغالات كلم حماية المستهلك وهما يخلوه يرجعهم عافية وللتاكيد اسال ميكانيكى تانى هما بتوع عربيتك ولا لا

مانا حعمل كده ان شاء الله لو مرضيش يرجعهم او يجيبلي بتوع العربيه
والمساعدين نفس المقاس ونفسالطول وكل حاجه
كل الحكايه ان العمود الفضي اتخن ب3 مللي
وده مخلي كاوتشه البطاحه اللي فيها رمان بلي دي
مبتدخلش في المساعد عشان البطاحه بعد كده تركب عادي

اخى الفاضل
انا خالد اللى اخدت منة خرطوم الهوا و ارجو انة يكون شغال تمام و مشكلة البرجلة دى اتحلت
بالنسبة الى موضوع المساعدين اللى اشتريتهم من عند الشافعى فاحب اقولك ان الكلام اللى هو بيقوله ده مش مضبوط و انصحك بانك لازم ترجعهم لة سواء بالذوق او بالعافية لان الواضح من كلامك ان فية اختلاف فى الابعاد او المقاسات عن اللى كان موجود فى العربية
الا اذا كنت عملت شغل فى العفشة القديمة و حد غيرلك الكاوتشة او الطبق اللى عاملك المشكلة دى
اما اذا كنت متاكد ان العفشة القديمة هى كلها بتاعة بلدها فانت دلوقتى تكون متاكد ان المساعدين الجديدة مش هى المقاس المضبوط
اتمنى لك التوفيق انشاء الله

اي حاجه من ايدك ياباشا لازم تبقي حلوه
بس المشكله كانت في الديسك والاسطوانه والحمد لله اتغيروا وكله تمام
بالنسبه للعفشه فصاحب العربيه القديم يبقي خالي
يعني مش غريب
والعربيه كانت ببتتعمل علي طول في التوكيل

والعفشه متعملش فيها اي حاجه خالص من ساعه العربيه ما جت

فالمساعدين اللي فيها الاصلي بتاعت العربيه

هوا مش عارف بيعمل كده ليه

متقول معنديش وخلاص

ويعني ايه مبترجعش

حمايه المستهلك ان شاء الله حتظبطه
بس ربنا يكرم وييجي يوم الاتنين واروحله

ساعتها اعرف حيعمل ايه

[FunnyMickey]

الحمد لله رجعت المساعدين
والمشكله مش فيهم
المشكله ان البياع مش عارف يقنعني

نقول الموضوع ببساطه عشان اللي يقع في نفس المشكله يعرف يحلها

اما حنييجي نغير المساعدين الاصلي بتاعت العربيه
مش حتلاقي التاكيكو
ودي ماركه المساعد الاصلي

البديل ماركه kyb
طيب ايه المشكله

المشكله في الجزء الموضح امامنا في الصوره دي
والمحاط بمربع اصفر


عمود المساعد اللي بيركب في البطاحه فوق اتخن 4 مللي عن الاصلي

العمود ده بيركب فيه فبره مدوره فيها رولمان بلي
مهمه جدا
بتركب تحت البطاحه وفوقها

ودي كانت سبب االخلاف بيني وبين الشافعي
لانه كان مصمم ان دي لازم تتشال
وانا اقوله لا

ورجعت الحاجه ولفيت علي 4 بتوع قطع غيار عندهم نفس المساعد ويقولوا نفس الكلام

الي ان رحت للعفشجي انهارده الصبح
وفك المساعد ورحت جبت الكي واي بي
قاللي المساعد بتاع العربيه فعلا

بس حنعمل حل ظريف خالص
حنروح للخراط
ناكل الفبره دي سنه صغيره بحيث تبات في المساعد
امين؟
قلت امين
وفعلا
ركبت الفبره والبطاحه عالمساعد الجديد
بدون اي فتي ولا كلام كتير

فعلا
اللي يلف ياما يشوف
واللي يمشي ورا صنايعي مبيفهمش
يكسب

اخيرا
شكر خاص غالي جدا جدا لاستاذ خالد
اللي بصراحه من غيره مكنتش عارف حعمل ايه والله
لولا حبك للعربيه دي
كان ابويا باعها لانه اتخنق فعلا
ربنا يجازيك كل خير ويكرمك يارب

واخيرا شكر خاص لكل من ساعدني في حل هذه المشكله
ولقسم مازدا كله

[astraman]

بص يا اخى اقولك تجربتى
انا عندى نفس العربيه موديل 97 وبغير المساعدين ب kyb بدون اى مشاكل ...وانا غيرت المساعدين اكتر من مره...وعلى فكره المساعدين الاصلى بتوع العربيه kyb ...عارف انا بقول كدا ليه لانى اشتريت العربيه دى من صديق ليا جابها زيرو على ايدى ومحطش فيها مسمار من يوم ما اشتراها وبعدين انا اخدتها منه ولما حبيت اغير المساعدين فكيتها وكانت kyb
ودورت فى السوق على نفس النوع وجبته...هو صحيح مش بنفس كفاءة الاصلى اللى بيجى مع العربيه بس بيقعد معاك سنتين معقولين...طبعا يمكن عشانا انا بركب العربيه لوحدى فى اغلب الاوقات...المهم هتلاقيهم عند واحد صديق ليا اتعرفت عليه لما كنت بدور على قطع الغيار للعربيه هو فى شارع دمشق...لو تعرف ترى بون اللى فى دمشق هو تانى محل على الناصيه وانت رايح لترى بون من دمشق...محله بعد محل الكاوتشات...بص عنده اغلب الحاجات بتاعة العربيه...طبعا الحاجات الخفيفه...مساعدين كشافات تيل فرامل بطاحات طرمبة ميه...ولو عاوز فى الحرفيين فيه واحد اسمه العالميه عنده قطع استيراد وكمان جديده خصوصا خرطوم الهوا اياه اللى لسه انا شاريه ب 450 جنيه وكمان عنده حساس الايديل دا طبعا بخلاف كل حاجه ليها تانيه بس استيراد...الصراحه العربيه دى زى الفل ومفيش زيها واحسن من العربيات الجديده اللى نازله اليومين دول كفايه انى اقولك انى كنت بشد قصاد كيا سيراتو جديده من كام يوم والعربيه ماشاء الله بتسحب احسن من السراتو كمان...بس انت اهتم بيها ومتخليهاش محتاجه اى حاجه ومتخليش اى حد يفتى ليك ويقولك شيل دا او استغنى عن دا عشان احنا هنا فى مصر مفيش اكتر من الفتايين

[FunnyMickey]

الف شكر ليك ياباشا
بس ممكن تكون عربيتي الخليجي عشان كده مش نازله بkyb
لان لو اللي عندي kyb
كانوا ركبوا علي طول

انا مشتغلوش عندي غير لما رحت للخراط شال شويه من البليه عشان تشتغل وتركب

[japaroky]

أخيرا لقيتكوا
محدش يعرف ميكانيكى كويس بيفهم فى الفاميلى ؟

[FunnyMickey]

من قراءتي السابقه
افضل واحد بيفهم في المازدا واحد اسمه بلبل مازدا في القلعه
وابن اخته مش عارف اسمه قشطه ولا حاجه كده
ممكن تستني الاخوه يفيدوك بردو
بس انتا عندك ايه
يعني محتاج ايه في الميكانيكا

[head]

الف شكر ليك ياباشا
بس ممكن تكون عربيتي الخليجي عشان كده مش نازله بkyb
لان لو اللي عندي kyb
كانوا ركبوا علي طول

انا مشتغلوش عندي غير لما رحت للخراط شال شويه من البليه عشان تشتغل وتركب

ممكن اعرف سعر المساعدين واسم وعنوان العفشجى ولك جزيل الشكر

[FunnyMickey]

علي ما اتذكر كانوا الخلفي ب700 تقريبا
او 670 حاجه كده
والعفشجي ده كان في السيده زينب
قدام محلات قطع غيار الياباني عند بحه الجديد اللي في الناصريه