ماذا تعرف عن مازدا موديل 2010 الشكل الجديد

[moody_687]

ارجوكم ياجماعة انا عايز اعرف معلومات عن مازدا الشكل الجديد اول فئة والفرق بينها وبين اول فئة ف الرينو فلونس ومين احسن فيهم عشان انا محتار وعايز اجيب العربية قسط عشان معايا 70 الف ويريت اشوف اقتراحاتكم

[hamata]

بص يا باشا انا معايا ميجان 2 من حوالى 4 سنين و نص (على ما اسمع ان الفلوانس مفرقتش كتير) و لسه جايبين مازدا 3 2010 فى البيت من شهر, انا بركب الاتنين و هلخصلك الفروق الجوهرية من وجهة نظرى:
1- صالون المازدا اضيق من الفلوانس, لو معاك عيلة المازدا هتضيقك شوية.
2- الاداء: المازدا سحبها انعم من الرينو عشان مشكلة النتشة اللى فى فتيس الاوتو بتاع الرينو, بس الاداء متقارب جدا.
3- الاتزان: تقريبا واحد فى العربيتين, بس عفشة الرينو انعم من المازدا و الفرق ملحوظ.
4- مركز صيانة رينو (المقطم عشان عمرى ما روحت العبور) ممتاز جدا و الناس هناك معاملتهم كويسة جدا و بيفهموا فى العربية كويس و قطع الغيار متوافرة. اما مركز غبور انا مجربتوش بس فى ناس قليلين فى القسم جربوه وقالوا انه معقول (بس كلها كانت صيانات دورية)
5-فروق الكماليات: الفلوانس تزيد عن المازدا مالتى فانكشن و كمبيوتر رحلات. اما المازدا تزيد ان الاربع شبابيك اوتو (يقفلو و يفتحو من لمسة وحدا) الفلوانس الاتنين اللى ادام بس هما اللى اوتو. المازدا فيها aux (مش عارف موجود فى الفلوانس ولا لأ)
6- اهم حاجة حضرتك تروح تشوف العربيتين عالحقيقة و تجرب تقعد عالدركسيون و تشوف انهى وحدا هتريحك اكتر.
7- الضمان 3 سنين او 100 الف كيلو متر فى ايهما اقرب فى العربيتين.
8- المازدا الشكل اللى فات الشكاوى منه قليلة جدا جدا سواء هنا فى المنتدى او من اصحابى, مع العلم ان الشكل الجديد نفس الشاسيه و الموتور والفتيس.
9- تكييف الرينو اداءه متوسط ( انا عربيتى سودا فلما بتكون مركونة فى الشمس اداء التكييف بيبقى اقل من المتوسط) تكييف المازدا مجربتوش طبعا بس سمعة اليابانى فى التكييف كويسة جدا.

ملحوظة اخيرة المازدا اللى فى السوق كلها stock 2010 ممكن تجيبها ب 126 او اقل, الفلوانس سعرها اللى فى كونتاكت النهاردة 132

[moody_687]

مشكور ليك يااستاذى ع ردك بس انا عايز اعرف كماليات المانيوال ف العربيتين عشان الاتنين سعرهم متقارب مع بعض ف المانيوال وبالنسبة لحوار العائلة فاحنا عائلة متكونة من 4 افراد مش طوال قوى كلنا قصيرين d: وبالنسبة لحوا ر العفشة افهم من كلام حضرتك ان عفشة المازدا زى السيراتو ناشفة والرينو انعم

[hamata]

للاسف مش مش متأكد كماليات المانيوال زى اول فئة اوتوماتيك ولا لا. و بردو معرفش عفشة السيراتو اخبارها ايه, انا بقارن بين عفشة الرينو و عفشة المازدا

[levelpower]

احب اقولك ان عفشه المازدا احسن من السراتو و انعم منها خاصه الهاى لين فى السيراتو نشفه

[medo_msmsa]

اللي اعرفة ان المازدا مفيهاش مانوال على الاقل اللي هنا (انا في السعودية) بس حابب اضيف حاجة عن التكييف في المازدا ما شاء الله عليه مجرم وبالنسبة للعفشة رغم الثبات الهايل - ما شاء الله- الا ان العفشة ناعمة ومش هتلاقي اصوات دبة مثلا مع المطبات مع ان العربية متماسكة جدا
اتمنى اكون افادتك

[moody_687]

لا الحمدلله عندنا فيها مانيوال ف اول فئة بس للاسف مش عارف كماليتها ايه وشكل الاعضاء هنا معندهمش معلومات عنها والحمدلله ان ف حد بيشكر ف عفشتها لان اهم حاجة العفشة نظرا لكثرة مطبات شوارعنا

[dr.amr]

لا ياباشا متقارنش بين المازدا والسيراتو في العفشه

انا كان معايا سيراتو وبعتها وجبت مازدا

المازدا انعم واريح بكتير جدا

بس طبعا اقل من الميجان وللعلم مفيش عربيه زي الميجان في طريان العفشه

يمكن الوحيده كانت الكورولا الشكل القديم بس ثباتها وحش

نصيحه ليك روح اركب المازدا لو القعده ورا كويسه ليك ولطولك اتكل ع الله ومش هتندم وهتيجي تشكرني كمان

بصراحه المازدا من افضل العربيات اللي ركبتها رشيقه جدا

[Formulator]

فعلا المازدا3 لا تقارن فـ العفشة بالسيراتو...!
لأن المازدا3 مبنيه على شاسيه الفورد فوكس... والتعليق الخلفى multi-link = ثبات+نعومة, وهاندلينج رائع..
السيراتو تعليقها الخلفى torsion-beam مع أغرب setup ممكن تشوفه (مختلف تماما عن الأوروبى زى بتاع الميجان مثلا) أنا قصدى مش كل الـtorsion-beam واحد...؟؟؟!!
عشان كده السيراتو عفشتها ناشفة... وكمان ثباتها عليه comments كتير

[FARFORE]

انا مستغرب ,انا صاحب مازدا 3 وركبت رينو (مش فلوانس) وارى ان المازدا 3 عفشتها انعم وافضل من الرينو بفرق واضح جدا خاصة مع النقر اللى الميجان بتهبد معاها على الطريق,
مشكلة المازدا فى ارتفاع اسعار قطع الغيار .

[moody_687]

مشكوريين ياجماعة ع حسن تعاونكم وانا بالفعل ركبت الاتنين ف معرض المصرية للسيارات ومن حيث الاتساع من الداخل فالرينو تكسب المازدا وبالنسبة لشكل التابلوه ف المازدا احلى من وجهة نظرى من الرينو خاصا الكاسيت بتاع المازدا تحفة شكله حلو بس ياترى مين يستحمل فيهم انه يعيش خاصا ان احنا مش بنهين العربية وبنحافظ ع نظافتها واحنا طبعا مش من هواه التغيير ف العربيات

[hamata]

المازدا 3 2010 اثبت من الميجان 2 !!!
انا لغاية ما جبت الالف كيلو مكنتش شدت بالعربية, روحت عملت صيانة الالف فى ابو رواش و انا راجع قلت افتح فى السرعة على وصلة المريوطية الجديدة جبت 140 و اخدت غرز فوجئت بثبات هايل اعلى من الميجان بفرق ملحوظ بالذات من ورا, الميجان كنت بحس انها بتلم نفسها متأخرة جزء من الثانية فى الغرز على السرعات العالية, اما المازدا الله اكبر بتتحرك كتلة وحدا تماما

[himaz]

مشكوريين ياجماعة ع حسن تعاونكم وانا بالفعل ركبت الاتنين ف معرض المصرية للسيارات ومن حيث الاتساع من الداخل فالرينو تكسب المازدا وبالنسبة لشكل التابلوه ف المازدا احلى من وجهة نظرى من الرينو خاصا الكاسيت بتاع المازدا تحفة شكله حلو بس ياترى مين يستحمل فيهم انه يعيش خاصا ان احنا مش بنهين العربية وبنحافظ ع نظافتها واحنا طبعا مش من هواه التغيير ف العربيات

كدة انت جبت من الخر

عاير عربية تعمر وتعيش معاك

انا افضل المازدا
اشيك و افخم
والوانها جامدة جدا

[dr.amr]

كدة انت جبت من الخر

عاير عربية تعمر وتعيش معاك

انا افضل المازدا
اشيك و افخم
والوانها جامدة جدا

م الاخر عربيه فحيته
وثبات اجمد
وسحب جميل جدا
وصوت الموتور رائع
والعزل ممتاز
اتكل علي الله انا كنت في نفس حيرتك وجبت المازدا
والخلاصه
الحمد لله

[Formulator]

لاااااااااااااازم المازدا تكون أثبت سيكا من الميجانII (السيدان, لكن الهاتش لأ) .. الميجان Torsion-beam بس معمولة بحرفية شديدة..؟! و فعلا الهاتشباك أجمد بكتيييييييييير.. واللى ركب الـ2 هيعرف الفرق..!
المازدا3 أول مرة سوقتها.. استغربت جدا من الهاندلينج والثبات بتاع العربية..؟؟؟! مش يابانى خااااااااااالص..؟؟!
لحد ماعرفت أنها Focus Underneath زى ماقولت فـ أول الـThread..!!
بس الصراحة.. الميجانII موتورها أكثر عصبية من موتور المازدا3.. كعادة المواتير الأوروبى: فيها Punch وااااااااضح جدا على rpm صغيرة ومتوسطة..!
غير المازدا3... لاااااااازم تضغط شوية عـ الموتور عشان يسحب...!! وفوق سحبته أجمد بكتييييييييير

وده لا يقلل منها على الأطلاااااااااااق.. العربية رااااااااائعة شكلا ومضمونا...
بالتوفيق أن شاء الله.