الحقونى العربية مبتتحركش!! مشكلة غريبة فجأة!!!

[mfnada]

السلام عليكم

انا عربيتى مازدا3 موديل 2008 و مافيهاش أى مشاكل خالص...فجأة و انا نازل حصل الاتى

دورت العربية و جاى اتحرك العربية مبتتحركش كأنها محجرة...نزلت ملقيتش أى حجارة و فوجئت ان العجلة الورا يمين مبتلفش كأنها مفرملة علطول

فكيت الكوتش ملقتش أى حاجة مفيدة...فرامل اليد مش هى المشكلة لأنى شفتها بتقفل و تفتح فى العجلة عادى و طريقة كلبشة العجلة مالهاش غير ان فرامل العربية ماسكة فى العجلة الورا يمين و مبتفكش!!!

طبعا العربية مبتتححركش و انا مش عارف أيه السبب...حاجة حصلت امبارح أن كان فى ماسورة مياه ضاربة فى طريق مصر الفيوم (أنا ساكن فى حدايق الاهرام) فإضريت امشى بيها فى المياه و كان مستوى المياه مرتفع

بس بعد كدة كانت ماشية عادى لحد ماروحت

انا محتار جدا و مش عارف أعمل إية...حد ممكن يقولى إيه السبب و ازاى اصلحها...هى ممكن حد يبعتلى نمرة ميكانيكى قريب من حدايق الاهرام يكون بيفهم فى المازدا و يجى يشوفها

هل أكلم التوكيل يجوا و لا إية؟

أنا مش عارف أعمل إية و مستنى ردودكم و بعد الفطار حاشوف ايه اللى ممكن يتعمل

شكرا ليكم جدا جدا

[amrelsaqqa]

ممكن تبقى دسك واسطوانة (دبرياج) لو العربية مانوال

هتصرف في حدود 400 500 للطقم الجديد

[A.Saad]

على حد علمى العربية جر امامى

جرب ترفع الفردة اللى فيها المشكلة على الكوريك
اعتقد ان التيل عندك قافش على العجلة وده هيكون بسبب
الزيت مش بيرجع
عيب ماستر

[asorour]

بص دد من الاي بي اس...متقلقش حركها ومتخفش افضل جيب وره وقدام لغايه لما تتحرك...وهتسمه طقه اول متفك متقلقش....الي بي اس دايما بيعمل كده لما العربيه تبقي سخنه وتتغسل او تييجي عليها مياه......وابقي طمني

[mfnada]

شكرا ليكم:

1- العربية اوتوماتيك مش مانيوال
2- أعتقد برضة انها مش منالزيت يقفش فجأة كدة من غير سبب على عجلة واحدة
3- انا حاسس انه ممكن تكون الاية بى اس بس خايف تكون حاجة خطر

حانزل دلوقتى اجرب و أقولكوا,,,,ممكن حد يقولى على واحد ميكانيكى يقدر يجى حدايق الاهرام بس يكون بيفهم؟؟

[moro14]

بص بصراحة أنا مش عارف ، بس ممكن تجرب آراء الزملاء اللي فوق
و لو مفيش فايدة كلم التوكيل، و طمنا عليك يا باشا
كل اللي هقدر أقولهولك ، ربنا يفك كربك و يحل مشكلتك

[mfnada]

يا جماعة انا نزلت دلوقتى و جربت أمشى كدة و اشوف حتفك و تلف و لا لأ ولكن فشلت تماما

العجلة مبتلفش خالص و لمبة الabs نورت فى التابلوه :( ماكنتش بتنور فى الاول

مش عارف أعمل أيه

ممكن حد يدينى نمرة غبور و لا سمارت و لا سونستا يبعتولى حد يصلحها فى البيت ؟؟

شكرا ليكم جدا جدا و مستنى ردودكم و مقترحاتكم

[mfnada]

بص دد من الاي بي اس...متقلقش حركها ومتخفش افضل جيب وره وقدام لغايه لما تتحرك...وهتسمه طقه اول متفك متقلقش....الي بي اس دايما بيعمل كده لما العربيه تبقي سخنه وتتغسل او تييجي عليها مياه......وابقي طمني

أنا جربت أمشى ورا و قدام كتير جدا و مفيش أى حاجة العجلة مبتلفش خالص و كمان لمبة الabs نورت فى التابلوه

مش عارف أعمل أيه!!!:( .....هل لو دخلت مية جوة العجلة مثلا و نشفت حترجع تانى و لا إية؟ أنا محتار جدا

أى أفكار تانية يا ريت تقولى عليها

شكرا جزيلا

[raouf]

العملية سهلة ان شاء الله خلى حد يفك العجلة اللى واقفة ويفك التيل تماما وينظفه

هى الفرامل قافشة مش اكثر والظاهر ان مساتر الفرامل دخل فيه حاجة ومانع الزيت انه يرد شوف اى ميكانيكى العملية سهلة ان شاء الله

[waelfarid]

هو ال abs طاله ميه السنسور بتاع سرعة العجلة دي مخرف وشايف انه لازم يفضل قافش عالعجلة دي ربنا يكرمك بحد من التوكيل لولسة في الضمان او لو مش عايز حد يبوظ لك حاجة فيها او يمكن حد من الاخوة الاعضاء يدلك علي حد بيفهم في الفرامل ييجيلك ويمشيهالك لحد متروح للتوكيل وربنا يفرج عنك والمازدا فاسدة مقولة حسد مش اكتر

[mfnada]

أنا كلمت غبور و قالولى لازم الونش يشيل العربية لحد التوكيل و أنا بصراحة مش محبذ الحكاية دى عشان حاسس أن الموضوع يمكن علاجة بدون نقل بالونش

فى حد ممكن يدلنى على ميكانيكى أكلمة يجيلى حدايق الاهرام دلوقتى أو بكرة الصبح؟

[A.Saad]

شوف محمد عبده
هو بتاع دايو وكورى
ورشته فى الدقى
بس مجربتش انه ييجى 0114543448
وقوله انك من المنتدى
علشان فيه ناس مننا بتروح عنده كتير فى الدايو

[MASERATI]

السلام عليكم و رحمة الله و بركاته

السيناريو اللى أنت بتحكيه ده, اللى هو أنك مشيت فى ميه عالية و تانى يوم لقيت الفرامل قافشة عالعجل ده, حصل معايا بالمللى بالظبط فى يوم كانت الدنيا ممطرة عندنا فى المنصورة و كالعادة الشوارع غرقاااااااااااانة.

بس, أنا اكمن عربيتنا قديمة, فأنا قلبى جامد عليها, قمت مديها الأول و طالع بيها, الأول زرجنت شوية و بعد كده طلعت بعد ماسمعت تكة كده أنا عارفها كويس أوى, اللى هى صوت الفرامل لما بكون قافشة عالعجل و تفك.

أنا من رأيى أنك ماتتعبش نفسك فيها و من الأفضل, أدام حاولت و مانفعتش التجربة, أنك تجيبلها أى بتاع عفشة بالعدة و هوا يصلحهالك و هى واقفة مكانها ان شاء الله.

[ahmedhawas]

ده حساس abs متوسخ ، وعايز يتنضف.
الموضوع بسيط وممكن تعمله بنفسك ، تفك الحساس وتنضفه وتركبه تاني مع مراعاة انك متتنيش الأسلاك بتاعته جامد ومتدقش عليه.

[asorour]

أنا كلمت غبور و قالولى لازم الونش يشيل العربية لحد التوكيل و أنا بصراحة مش محبذ الحكاية دى عشان حاسس أن الموضوع يمكن علاجة بدون نقل بالونش

فى حد ممكن يدلنى على ميكانيكى أكلمة يجيلى حدايق الاهرام دلوقتى أو بكرة الصبح؟

نصيحه بلاش...الموضوع بسيط وحصل معايا قبل كده و جبت الاول وطلعت واحده واحده ومشيت وزي الفل...ولا توكيل ولا يحزنون...هيفتحللك حوار ....ومش هتعرف تقفله....وهيكرهك في العربيه....


الموضوع مش مستهل عفشجي ...لو اتفك مش هيرجع زي مككان ابدا....جرب بس ومتقلقش...هتلاقي العجله اللي ورا شمال هي اللي فيها المشكله...ان شاء الله خير..

وممكن ترفعها بالكريك و wd40 تنفها وتلفها بايدك شويه شويه......وابقي طمني