شكلى اضحك عليا فى مازدا323

[hurgada]

السلام عليكم وتحيه الى اعضاء هذا المنتدى العظيم المحترمين
انا اتدبست فى عربيه 323 موديل 82 حالتها وحشه ماعدا الموتور والكاوتش والصالون كويس بس هيا رشه دواخل وبتعوم على سرعه 60 تقريبا ومش عارف اعمل ايه حاسس انى محتاس ومش عارف اشدها ولا دى هتبقى مصاريف مش هترجع تانى ولا اعمل ايه الى يعرف حد بيشتغل فيها فى فيصل ياريت يدلنى او حد يشور عليا اعمل ايه وجزاكم الله خير
ملحوظه انا اشترتها ب16000 ومصاريف التسجيل وعموله المعرض 400
شاكر لافضالكم جميعا

[kimo_xXx]

اول حاجه لازم تعملها انك تكشف على الاساسيات لانها طالما بتعوم منك على 60 يبقى ممكن تكون عاملة حادثة وحشة اوى قبل كده

[yaser107]

بص يا باشا انا هقولك اللي اعرفه عنها انا كان معايا 323 بس الله يرحمها بقي اتسرقت المهم هي برضه لما جبتها كانت بتعوم مني بعد 80 بس لما عملت العفشه بتاعتها بقيت اجيب بيها 120 عادي جدا ولو عايز تزبط العربية دي صح الصح
شوف حد تعرفه ضابط جيش حليه يودهالك ورش الوطنية الناس دول في الماذا جامدين موت انا كان الشاسيه اتقطم 3 مرات ولحمته تاني س اخر مره واديتها ورش الوطنية لحمو الشاسية وبقيت بالبس في المطبات واطير من فوقها عادي جدا وكمان سعر التصليح عندهم ارخص بكتير من اي ميكانيكي بره لانها خدمه لضباط الجيش بس وعيش مع احلي عربية في القديم كله


المهم خلي بالك كويس هاتلها قفل للدريكسيون وانذار عيب العربية دي الوحيد انها بتتفتح بسهوله واسهل عربية تتسرق فخلي بالك انا عرفت المعلومات دي بعد ما عربيتي اتسرقت

[hurgada]

جزاكم الله خير على الردود بس كنت عاوز افهم من حضرتك لو انا معرفش ظابط جيش هينفع اروح الوطنيه وهى مكانها فين بالظبط لو سمحت

[yaser107]

هيه مكانها في صلاح سالم علي ما افتكر خلف دار المركبات بس لو ما تعرفش ضابط ما اعتقدش هينفع لانها لازم تدخل بأسمه انا اللي دخل العربيه اصلا ورش الوطنيه كان اخويا والعربيه اصلا بأسمه ومرور قوات مسلحه ومع ذالك سألته اني عايز ادخل العربية تاني الورش قالي مش هينفع لاوم هوه اللي يوديها فا معتقدش انه هينفع لازم حد قوات مسلحه
بس علي العموم انا عملت العفشه بتاعتها بره والعربية بقت زي الفل انا قلتلك عل موضوع ورش الوطنية لانهم ارخص من بره طبعا ده عير ان العربية دي اصلا جيش فبتلقيهم خفظينها كويس بس علي العموم اي عفشجي كويس يعرف يشتفل فيها واي ميكانيكي كويس برضو يعرف يصلحها وربنا يكرمك ودوبها في شوارع مصر

[hugan]

لو مش غاوي تشد وتكلف
و انت مش عندك خبره كبيره في شد العربيات
لانها متاهات والصنايعيه لازم تكون فاهم قوي وانت بتتعامل معاهم
لانهم ممكن يكرهوك في اليوم اللي فكرت تشتري فيه عربيه
ومفيش عندهم ضمير المهم انه يفضي جيوبك
بيع العربيه في السريع وشوف لك حاجه نضيفه
وشراء العبد ولا تربيته

[hurgada]

اشكرك على اهتمامك وردك انت شخص محترم فعلا
انت كده عاوز تقولى انى اهتم بالعفشه وان اى سمكرى بره ممكن يعملى الشاسيه لو فيه مشاكل
وانت عملت ايه ى العربيه ملقتهاش انا اعرف ان فى ناس بتجيبها بمقابل مادى بس مين هم معرفش بس فى ناس اتسرقت منهم عربيات ورجعت بفلوس بس حاول تتحرك بسرعه قبل متتقطع وتتباع اجزاء وقطع غيار وابقى طمنى

[abofarah]

الف مبروك يا باشا و ان شاء الله تكون حاجه بسيطه بس اول حاجه تعملها تروح ترفع العربيه فى بنزينه و يا ريت يكون معاك سمكرى محترم ... لو لا قدر الله الشاسيه فيه حاجه يبقى تحاول بسرعه انك ترجعها للبايع و ان لم يكن حاول تبيعها و الحل الاخير انك تعملها بس المهم تتعمل صح ... العربيه دى ليها ميكانيكى محترم قوى فى القلعه اسمه بل بل مازدا راجل مخترم و حافظ العربيه و عنده كل قطع الغيار بتاعتها و الله الموفق

[hurgada]

بارك الله فيك لو حد يعرف سمكرى فى منطقه فيصل وعفشجى وميكانيكى يبقى تمام اوى لانى حاسس انى تايه والله والراجل مش هيرجعها غير بمشكله وانا مش فاضى للمشاكل

[yaser107]

فيصل بصراحه انا معرفش حد هناك لاني من شبرا بس بالنسبه لموضوع الشاسيه في متخليش اي سمكري يلعب فيه فيه ناس متخصصه شاسيهات فقط علشان مقاسات الشاسيه بتاع العربية هو في واحد معروف في شبرا متخصص شاسيهات هتلاقيه عند محطة مترو مسره امام الحي بس شوف سمكري
اما عربيتي بقي يعوض عليا ربنا انا بدور اشتري عربيه تانيه علشان بصراحه انا قرب يتخرب بيتي علشان طبيه شغلي لازم يكزن فيه عربية وهي علي العموم ما اعتقدش انها هتتقطع لانا مفيهاش حاجه تتقطع

[hurgada]

طيب هو الشاسيه ناحيه الشمال فى خبطه ولازم يستعدل اما باقىالعربيه السمكرى قالى سليمه او فابريكه والشنطه فيها بلاك الفابريقه ومكنش فى لحامات فى الشاسيه بس هى واخده خبطه فى جنب السواق واتعملت اى حاجه علشان تتباع رايك ايه

[hurgada]

هو الشاسيه ممكن يستعدل فعلا ويرجع زى الاول فى ناس قالتلى عادى جدا مفيش اى مشكله
بس المهم حد محتلرم يشتغل فيها

[yaser107]

اه الشاسيه ممكن يتظبط بس مش عارف هيكلفك كام بصراحه اعتقد غالي انا ليا واحد صاحبي كان عامل حادثه وتصليح الشاسيه ملفه 4000 ده علشان الميكانيكي اللي اللي راح معاه يعرف الراجل لما هو راح لوحده بتاع الشاسيه قاله 5500 ةلما الميكانيكي راح معاه نزلها 4000 وبرضه مش اي حد يعملها لازم واحد متخصص شاسيهات وربنا معاك بقي لان ده موضوع هياخد حوالي اسبوع شغل عند بتاع الشاسيه لسه هيظبط وبعدين هيعملها زرجينه وموال شويه وبرضو زي ما قلتلك في الاول لو تعرف حد في الجيش يوديهالك ورش الوطنية هترتاح والتكلفه هتقل والله لو اخويا كان في مصر كنت كلمتهولك بس للاسف

[abofarah]

4000 استعدال شاسيه لييييييييييييييه

ده كده اتضحك عليه جاااااااااامد ... و اشتغلوه
هى مش اكتر من 400 او 500 ج و لما يكون صنايعى كويس ........ و الاول يروح يظبط زوايا فى بنزينه و هناك هيقوله الشاسيه فيه ايه بالظبط و ممكن تكون حاجه بسيطه و يعملوها زرجينه و ربنا معاك

[hurgada]

السلام عليكم يا اجمل شباب مصر
روحت امبارح اظبط زوايا وابص على العفشه وكده عند واحد ابن حلال فى العشرين وكلى ياس وقرف وتوهان
المهم الراجل بس على العفشه وظبط زوايا وقالى كان فيها بيضه مفكوكه ربطها ومش عارف فيها ايه وعمله المهم قلتله تعرف حد بيستعد شاسيهات علشان الشاسيه ده معوج وملحم وكده قالى افتح الكبوت بس ونزل تحت وطلع قالى مين قالك الكلام ده قلتله السمكرى الى جنب البيت قالى يبنى عربيتك مفيهاش اى حاجه ولا لحام ولا عوجان ولا غيره ده سمكرى عاوز يشتغلك اوعى تروحله تانى المهم الحمد لله ان فى ناس لسه عندها ضمير والحمد لله دلوقتى بجرى على ميه والعربيه ثابته ومفيش الحدفه الشمال والعومان ماشا الله تبارك الله وجزاكم الله خير