الاشياء المشتركة بين المازدا و الفوكاس .. حصرى جدا جدا

[janjon1978]

ان شاء الله يكون مرجع للناس اللى معاهم العربيتين و اى حد عندة اضافة يكمل الموضوع ان شاء الله

المعروف ان شاسية المازدا 3 و الفورد فوكاس II حاجة واحدة لكن الحقيقة مش كل حاجة هنا زى هنا و الكلام ده انا جمعتة من كذا موقع علشان اكون متاكد من الكلام اللى هاكتبه

ثانيا الموتور بتاعة المازدا مختلف كل الاختلاف عن الفوكاس و بالتالى لا يوجد شى مشترك بينهما غير فلتر البنزين فقط


بالنسبة للعفشة ... نبتدى بالفرامل و الشى المشترك هو تيل الفرامل

و مخدع التيل (brake caliper)


اما الطنابير فهى مختلفة و مينفعش يركبوا على بعض

بالنسبة للعفشة الامامية فالاشياء المشتركة هى
تيش او الميزان الامامى

و الغطاء البلاستك اللى يحمى المساعد dust cover و صدادة المساعد

واخيرا قاعدة المساعد و البطاحة


اما المساعدين الامامين مخلفين فى الطول فقط .. المازدا اطول ب 5 مم فقط و الحقيقة انا ركبت مساعدين الفوكاس عادى من غير مشكلة لكن المرة اللى جاية هاركب بتوع المازدا لانى فعلا حاسس ان ضاغط على السوست علشان المساعد اقصر ويمكن يكون ده هو اللى عاملى دبة مع المطبات
اما المقصات و جلبهم (الامامية والخلفية) مختلفين فى القطر الداخلى بالرغم من ان شكلهم من برة يشبهوا بعض
وبرضة بيض الطرف و العمود مختلفين فى الطول و ده انا تاكدت منه لما غيرت بيض الطرف جبت بتوع الفورد ماركبوش
برضة السوست مختلفة طبعا بتوع المازدا اطول

بالنسبة للعفشة الخلفية فى متشابهة لحد كبير كالتالى
المقصات الخلفية وهى 3 قطع زى بعض وصورهم



والجلب الخلفية الكبيرة و الصغيرة برضة هى هى

تيش الميزان الخلفى هو هو


بالنسبة للمساعدين فمختلفين فى الطول 40 مم ودة كتير قوى فا مينفعوش يركبوا على بعض و ايضا السوست الخلفية
لكن القاعدة و البطاحة هى هى

اما غطاء المساعد و الصدادة بتاعة المازدا 3 متشابهة مع الاوكتافيا a4 و golf4 و كمان الافيو ومختلفة عن الفوكاس


وان شاء الله لو عرفت اى حاجات تانية هاكتبها علطول .. بس دى الحاجات اللى انا متاكد منها

[عبدالرحمن-جبر]

على فكرة فيه حاجات مشتركة بين الفيستا القديمة و المازدا 121 برضه

[Thebutcherr]

بجد موضوع هايل هيلا و احنا قدامي المنتدى بنشكرك

[levelpower]

شكرا على المعلومات و ياريت نكمل فى البدائل و ياريت يكون مع ذكر الاسعار ان امكن

[Maghraby1987]

عايزين الموضوع ده يثبت عندنا في فورد :)

[dr/hamza]

bravoooo

[tone]

شكراً جزيلاً

وأسمع إنهم بقوا شركة واحدة

[janjon1978]

شكراً جزيلاً

وأسمع إنهم بقوا شركة واحدة

هما خلاص انفصلوا من 2010

وشكرا جزيلا على تشجيع كل الناس

[romar]

أنا عارف إن موتورهم حاجة واحدة.. اسمه z6.. بس دة كمل في المازدا لكن فورد غيرته من أول موديلات 2010

[elmkaneeki]

موضوع معدي اقسم بالله... ما شاء الله

[WalidAdel]

بالنسبه للمساعدين الخلفي ... انا مركبهم هما هما بتوع الفورد فوكس لاني لما جيبتهم Monroe و بعد الفك لاقيت المونرو قصيرين فروحت للعالميه اللي في شارع دمشق و قولتله علي اللي حصل قالي لأ عربيتك دي خليجي و يركب عليها بتوع الفورد فوكس هتلاقيهم نفس الطول و روحت جيبت المساعد القديم و قيستهم لاقيتهم فعلا نفس الطول و ركبتهم و اخر حلاوه بس نشفين شويتين علي اللي كانوا فيها و بس
الراجل بتاع الفورد لما روحتله قالي ان جلب المقصات الكبيره و الصغيره يركبوا فورد بس البيضه لأ ... و الله اعلم ليسه ماجربتش يعني