طلب مساعدة مستعجل جدا مازدا 3 2007 ايرو ولا هوندا سيفيك 2003 ال 2 اتوماتيك

[matawfeek]

السلام عليكم
انا عضو جديد بس مش قوى لان ده تالت موضوع اكتبه و اكتب فى اوله انى عضو جديد فتقريبا كده انا قدمت و انا مش واخد بالى

الموضوع بأختصار انى بسوق هوندا سيفيك 97 lxi اتوماتيك من 2001 و لسة بايعها الاسبوع اللى فات لظروف انها كانت منطقة حرة بورسعيد و انا شغلى اتنقل القاهرة فكان لازم ابيعها و اجيب ملاكى

المهم المقولة المشهورة و اللى ثبت صحتها ان اللى بيسوق هوندا مابيعرفش يسوق اى حاجة تانى بسهولة

المهم انى بقالى 4 شهور بدور و ان شاء الله استقريت على عربيتين هاخد رأى حضراتكم فيهم

الاولى هوندا سيفيك 2003 اتوماتيك رشة برة كله عدا السقف و محتاجة حاليا رش تانى على الاقل للاكصدامات و ماشية 145 الف كيلو و فيها تكة او خبطة صغيرة فى الشنطة ورا الاكصدام الراجل لامانته قعد ربع ساعة يشاورلى عليها و يحاول يوريهالى و انا مش شايف اى فرق

دى انا سوقتها و حسيت انى استرجعت ايام الهوندا الجميلة و التكييف العالى و الموتور اللى مالوش صوت و الطلعة السلسة من الثبات و الحاجات الحلوة دى كلها اللى فى الهةندا و هوطالب 70 الف عشان الحاجات اللى فيها و هى كمان محتاجة مساعد و البربريز فى شرخ



العربية التانية و اللى انا لسةماسوقتهاش و ان شاء الله خلال ساعات هاكون شوفتها و سوقتها هى مازدا 3 2007 اللى هى اعلى فئة اللى اسمها ايرو

العربية دى مطلوب فيها 78 الف و هى ماشية 135 اف كيلو و هى رشة من برة كله ما عدا سقف و شنطة و بيقوللى الكبوت كان خد خبطة راح مغيره فى التوكيل ببلاش و هى فيها شوية مصاريف مش كتير تقريبا كوبلن و حاجات صغيرة تانية مش مشكلة
المهم سبب نزول السعر حاجة تانية و هى دى اللى عاوز من المزداوية يفيدونى فيها بعد اذنكم
لما كلمته قاللى العربية دى الصدر بتاعها بلاستيك او فيبر مش حديد و قاللى السبب ان لو فى خبطة يقوم الفيبر يتكسر و ياخد الخبطة لوحده و الخبطة ماتوصلش للموتور و بعدين الفيبر ده يتفك و يتغير
و قاللى ان هو عنده خبطة صغيرة هايوريهالى لما اشوف العربية و الخبطة دى خلت الصدر يتكسر و هو بس يتفك و يتغير ب 300 جنيه
الموضوع ده بجد يا جماعة و هل ده يعيب العربية ولا فعلا فكرة الفيبر اللى بيتفك و يتركب دى قضيت على موضوع الدواخل اللى مش فابريكا و اللى بتعيب العربية?

كنت قريت هنا ان حد اشترى مازدا و بعدين طلعت مغيرة صدر و الايرباج كان اتفتح فاتصلت بالراجل اطمن فقاللى ولا الايرباج اتفتح ولا اى حاجة و الخبطة كانت بسيطة و لماا نغير الصدر برده مش هانيجى جنب ايرباج ولا حتى هاتحتاج تفك مروحة


انا اسف على الاطالة والله بس اعذرونى انا هاخد قرار و ادفع عربون كمان ساعات
انا عايز اعرف من حضراتكم رأيكم فى العربيتين عامة و فى الحتتين اللى معايا بشكل خاص و موضوع الصدر بالذات و ايه رأيكم فى الاسعار هل مناسبة ولا ايه

و يا ريت لو حد يقدر يفيدنى او يدينى نصيحة قبل ماكشف على العربية المازدا الساعة 12 الظهر يوم الاربع يبعتلى او يكلمنى على 01004794446 او 01205048024

مهندس محمد توفيق

و شكرا لحضراتكم جزيلا

[matawfeek]

يا جماعة انا روحت شوفت العربية و لقيت فيها الاتى
هى مبدأيا واضح انها كانت اخدة خبطة محترمة من قدام فى النص بالظبط بس الراجل بيأكدلى ان كل اللى رفعوا العربية و شافوها قالوا ان الشاسيه ماتأثرش
بس اللى اتأث اولا الصدر البلاستيك عاوز يتغير
ثانيا و ده الاهم العارضة الحديد او الصلب اللى تحت الصدر و اللى المفروض قبل الصدر مخبوطة و داخلة لجوة جامد و دى لا تتعدل بزرجينة لا تتفك و تتغير برده بس دى بقى بتترش

الكابوت فى تطبيقة و فى فرق جامد بينه و بين الرفرفين
بخلاف كل ده كان زمان بعد ما اشتراها زيرو الكابوت اتفتح و هو ماشى فغير الازاز الامامى و الكابوت و رش اول عشرين سم من السقف الجزء اللى قبل فتحة السقف
و فتحة السقف مش شغالة
و محتاجة كوبلن
و طبعا الاكصدامات عاوزة تترش و حتت بسيطة فى الجناب

الايجابيات بقى انه شاريلها شوية حاجات عشان كان ناوى يصلحها
شارى 2 فانوس جداد لسة ماركبوش
و شارى 2 قواعد بلاستيك ابيض اللى بيركب عليهم الاكصدام الامامى
و شارى الكارتيرة اللى تحت الموتور و اللى برده بيتثبت عليها الاكصدام الامامى
و شارى اربع كارتيرات اللى فوق الكاوتش

و مطلوب نهائى 77500 ايه رأيكوا؟

[wowohero]

مبدئيا الاختيار بين العربيتين المازدا والهوندا اختيار ممتاز
ثانيا او امكانياتك تسمح لحد 80 : 85 الف تقدر تجيب مازدا نضيفة مفيهاش مشاكل
على كلامك على المازدا بحكم ان كان معايا مازدا 2007 ثم 2008 والالتنين اول فئة فابريقة بالكامل اقدر اقولك ان المازدا اللى انت شوفتها شقيانة ومتضمنش بعد ما تشتريها تلاقى حاجة تانية فيها
لو انت حابب المازدا دور على حاجة نضيفة ولو الهوندا حالتها نضيفة اتكل على الله العربيتين احلى من بعد فى الحالات النضيفة فقط
واستنى راى الخبراء فى القسم زى الجزار وميدو قاسم هيقولولك على الخلاصة

[semmsem]

سامحنى ياباشا
ارمى العربيتين دول
وشوف حاجه نضيفه
وانا افضل مازدا سليمه هتلاقيها بـ 80000

[matawfeek]

كتر خيرك يا استاذ wowohero و يا استاذ semmsem اعلى الردود

انا فعلا سيبتنى منهم و عملت بالنصيحة و النهارده ان شاء الله هاتفرج على عربية او عربيتين
الاولى باذنجانى 2008 ماشية حوالى 80 الف كيلو و فابريكا دواخل و سقف و شنطة و كبوت و جنب من الجنبين و رشة اكصدامين و جنب واحد . و الراجل كاتب كاملة ما عدا فتحة السقف و الجنط و طالب 82 و كلمته و حلفلى ان جابت 79 و رفض و اخره 80 . يا رب بس تطلع كويسة ( هو مش حاطط صور فى الاعلان )

و فى واحدة تانية نزلت على كونتاكت من شوية لونها سيلفر رشة رفرف فقط 2008 برده و ماشية 95 الف كيلو و طالب 84 الف لسة ماكلمتوش و معرفش هاتنزل ل 80 ولا لأ . بس هو حاطط صور و العربية ما شاء الله واقفة كويس بس باين برده انها من غير فتحة سقف يعنى مش الايرو - و فى نقطة كمان فى دى ان هو اول مالك

ايه رأيكوا مبدأيا انا طبعا هحاول انى اشوف ال 2 لو السيلفر سعرها نزل ل 80 بس انا كنت عاوز كمان اسألكوا عن حاجتين مهمين

اولا ايه الفرق بالظبط بين فئات المازدا 3 ال 2008 الايرو و غيرها و هل هما فئتين فقط و لا اكتر لأن الاولانى كاتب كاملة ما عدا فتحى السقف و الجنط و التانى حاطط صور حلوة باين منها ان فى مثلا عواكس فى الاكصدام الخلفى فى حين انى لما اتفرجت على الايرو اللى حكيتلكوا عنها قبل كده كانت العواكس دى من ضمن الحاجات اللى قالهالى الراجل عشان يقوللى انها فى الايرو بس ( طبعا يا جماعة انا كلامى كله عن الاتوماتيك و ال 3 عربيات اتوماتيك )

ثانيا عاوز اعرف منكوا اكشف فين عن العربيتين كشف محترم يجيب قرارها؟ و يكون بيفهم فى المازدا عشان انا مرعوب بالذات من العداد عشان موضوع اللعب فى العداد ده فلازم اشوف مكان محترم يأكدلى عاملة كام كيلو تقريبا و طبعا يطمنى على اساسياتها و شاسيه و دواخل و فعلا مش رشة من برة غير حاجات بسيطة ولا لأو الفتيس و العافشة بالذات لأنى عرفت ان الكوبلين تمنة 3500 جنيه و لما اجيبها مش هايبقى معايا مليم اصرفه عليها اللهم الا زيت الموتور ولا حاجات بسيطة كده

معلش انا طولت عايكم بس محتاج مشورتكم ضرورى . انا رقمى 01004794446 و 01205048024 و هاشوف العربية ان شاء الله الساعة 12 . يا ريت لو حد يقدر يفيدنى يكلمنى حتى يعرفنى ابص على ايه فيها الاول قبل ما اكشف عليها .

شكرا لمساعدتكم.

[alzmanegy]

طمنا اشتريت ولا لسه ؟
انا جيت متأخر معلش

[matawfeek]

والله يا باشا لسة للأسف
انا خلاص ان شاء الله استقريت اخيرا على المازدا 3 ( صحيح النيسان تيدا بتيجى فى دماغى كل شوية و ادخل الف لفة عليها كده عشان ارتفاعها عن الارض عن المازدا طبعا و عشان واسعة قوى من جوه) انما انا ان شاء الله مستقر على المازدا.
بس مش لاقى حاجة كويسة نهائى بسعر معقول و كل يوم انزل اشوف واحدة ولا 2 لما بدات ايأس.
انا عامل موضوع بطلب فيه من الناس انهم يشوفولى او يسألولى صحابهم او لو حد عاوز يبيع يكلمنى
انا بدور على مازدا 3 2007 2008 2009 شرط الحالة النظيفة بجد و شرط الكشف فى التوكيل.
اصلى لقيت من يومين واحدة حالتها كويسة و صاحبها محترم و تانى يد و عاملة 88 الف كيلو . روحنا التوكيل قالوله اللى انت شاريها منه اسمه كذا و كان عندنا بيعمل صيانة فى اخر 2012 و كانت العربية عاملة 226 الف كيلو . طبعا الراجل خد صدمة عمره . و انا اخدت درس عمرى ان اللى مايرضاش ييجى معايا التوكيل ماشتريش منه.

و على فكرة انا كنت هاشتريها فعلا و كنت هاكشف فى اى بنزينة و خلاص و الفضل فى انى اعرف موضوع التوكيل ده يرجع للمنتدى العظيم ده و لراجل محترم هنا اللى هو الاستاذ وائل لو انا فاكر الاسم صح هو اللى كلمنى لما طلبت مساعدة ملاك مازدا و قاللى اعمل ايه بالظبط و انا عاوز اشكره بجد و اشكر كل واحد كلمنى يساعدنى او كتبلى على الموقع.

كملوا جميلكوا بقى و وقعولى واحدة حلوة :)

[alzmanegy]

طب الحمدلله انك روحت التوكيل ولازم تكشف في التوكيل علشان تضمن الحالة وبلاش تيدا المازدا 3 عربية تحفة وانا بدور علي واحدة باردو نفس الموديل بس لو في حاجة لازم هاقولك لاني مش هشتري دلوقتي وربنا يكرمك وتلاقي حالة نضيفة

[rooka]

والله يا باشا لسة للأسف
انا خلاص ان شاء الله استقريت اخيرا على المازدا 3 ( صحيح النيسان تيدا بتيجى فى دماغى كل شوية و ادخل الف لفة عليها كده عشان ارتفاعها عن الارض عن المازدا طبعا و عشان واسعة قوى من جوه) انما انا ان شاء الله مستقر على المازدا.
بس مش لاقى حاجة كويسة نهائى بسعر معقول و كل يوم انزل اشوف واحدة ولا 2 لما بدات ايأس.
انا عامل موضوع بطلب فيه من الناس انهم يشوفولى او يسألولى صحابهم او لو حد عاوز يبيع يكلمنى
انا بدور على مازدا 3 2007 2008 2009 شرط الحالة النظيفة بجد و شرط الكشف فى التوكيل.
اصلى لقيت من يومين واحدة حالتها كويسة و صاحبها محترم و تانى يد و عاملة 88 الف كيلو . روحنا التوكيل قالوله اللى انت شاريها منه اسمه كذا و كان عندنا بيعمل صيانة فى اخر 2012 و كانت العربية عاملة 226 الف كيلو . طبعا الراجل خد صدمة عمره . و انا اخدت درس عمرى ان اللى مايرضاش ييجى معايا التوكيل ماشتريش منه.

و على فكرة انا كنت هاشتريها فعلا و كنت هاكشف فى اى بنزينة و خلاص و الفضل فى انى اعرف موضوع التوكيل ده يرجع للمنتدى العظيم ده و لراجل محترم هنا اللى هو الاستاذ وائل لو انا فاكر الاسم صح هو اللى كلمنى لما طلبت مساعدة ملاك مازدا و قاللى اعمل ايه بالظبط و انا عاوز اشكره بجد و اشكر كل واحد كلمنى يساعدنى او كتبلى على الموقع.

كملوا جميلكوا بقى و وقعولى واحدة حلوة :)

لو سمحت لما حضرتك كشفت فى التوكيل على العربيه اخدو من حضرتك كام مصاريف يا ريت ترد على لانى كمان بدور على مازدا ويا ريت حد يفيدنى من حيث انها واطيه اوى ده مشكله لانى الشوارع عندى مكسره وفيها مطبات

[matawfeek]

سلام عليكم

اولا انا الحمد لله جبت من كام يوم نيسان تيدا 2007 سيدان
و انصحك لو انت مش بتجرى على الطريق قوى زى حالاتى و كمان مش بتهدى على المطب قوى و ساعات بتبقى مستعجل و تاكل مطبات زى حالاتى يبقى فكر فى التيدا . انما لو العكس يبقى خليك مع المازدا و ربنا يوفقك

انا لما كلمت التوكيل قالولى الكشف الكامل ب 350 جنيه و لما روحت و كشفوا و لقولا ان فيها كذا حاجة و بالذات موضوع العداد ده قالولى بصراحة حرام ندفعك 350 و خدوا منى 150 بس

التوكيل اسمه سمارت كار فى 9 او 10 شارع فلسطين المعادى الجديدة و نمرته 01116663665 و فى نمرة تانية فيها اربعات كتير مش لاقيها دلوقتى .

على فكرة غالبا لازم تحجز قبلها بس يوم ما اتصلت قالولى مافيش ضغط انهارده فروحت على طول . المهم تكون هناك قبل الساعة 4 .

ربنا يوفقك

[mazda gb]

الهندسية للسيارات فيها
check for sale
ب 100 وكشف شامل على العربية
لو حبيتو +قطع ا لغيار موجودة
ت 01225178471

[Shido]

الهندسية للسيارات فيها
check for sale
ب 100 وكشف شامل على العربية
لو حبيتو +قطع ا لغيار موجودة
ت 01225178471

ده فين لو سمحت؟؟؟

[mazda gb]

ده فين لو سمحت؟؟؟

فى شارع شبرا امام قسم الساحل (شبرا مصر)
أوصل واتصل بالتليفون

[pioneerahmed]

خليك في مازدا نضيفة و الله هتريحك جدااا

[matawfeek]

الف شكر لكل الردود
انا خلاص الحمد لله جبت نيسان تيدا 2007 سيدان عشان واسعة من جوة و عالية على المطبات

شكرا جزيلا