مازدا 323 موديل 2000

[Ahmed Hamdy]

يا جماعة حد يعرف معلومات عن مازدا 323 موديل 2000 مانوال ؟؟
واحد قريبى قالى على واحدة بتاعة واحد معرفته وبيقولى حالتها حلوة جدا وعارضها بـ 35000 .. أعتقد السعر حلو .. بس قريبى ده رجع قالى لأ بلاش منها عشان قطع غيارها مش موجودة ولو لقيتها بتبقى غالية ..

يا ريت لو حد يعرف يفيدنا .. أنا عارف العربية دى وهى طبعا عربية جميلة وبالسعر ده حلوة أوى بس طبعا موضوع قطع الغيار مهم .. حتى لو موجودة وغالية شوية مش مشكلة لانها أكيد معمرة بس المهم تكون موجودة ..

[agwaa]

شوف يا عم أحمد
أنا معايا مازدا 232 موديل 83 وبالرغم من إن الناس بتقول إن قطع غيار المازدا قليلة لكن بخبرتي مع المازدا أقدر أقول لك أن المازدا أحلى وأرخص عربية ياباني في مصر وأحلى موديلاتها ال 323 أللي في رأيي إن المازدا 3 هي المازدا323 في ثوبها الجديد ....
عموماً قول لي إنت ساكن فين أقول لك أقرب بتاع قطع غيار للمازدا

[Ahmed Hamdy]

شكرا يا عم agwaa .. بس أنا عارف ان الموديل القديم ده قطع غياره موجودة .. لكن أنا بسأل عن موديل 2000 اللى هو مازدا فاميلى .. ع العموم أنا ساكن قريب من رمسيس .. يعنى قريب من التوفيقية واللى حواليها ..

[m_totti]

بعض قطع غيار المازدا 2000 موجود في التوفيقية مثل المساعدين والكبالن وبعض القطع الاخري موجود في الوكالة والحرفيين

[Ahmed Hamdy]

بعض قطع غيار المازدا 2000 موجود في التوفيقية مثل المساعدين والكبالن وبعض القطع الاخري موجود في الوكالة والحرفيين

متشكر لحضرتك جدا ..
يعنى القطع اللى فى الوكالة والحرفيين دى استيراد ؟؟

[agwaa]

إزاياك يا عم أحمد
على فكرة كان لي زميل دراسة كان إسمه أحمد حمدي وكان ساكن في الأميرية والظاهر..
هل هو أنت ..
أما عن سؤالك عن الوكالة والحرفيين :
الوكالة كل حاجتها إستيراد وفك ( ولازم تفتح عينيك كويس أحسن حد يبيع لك قطعة فك ويقول لك إنها إستيراد )
أما الحرفيين ففيها أماكن بتبيع قطع غيار إستيراد وأماكن أخرى فيها قطع غيار جديد فقط
عموما أحب أعرفك الأماكن اللي بأتعامل معاها في القطع الجديدة ( يمكن تفيدك في موديل عربيتك ) :ـ
- حلوان (.. نصار..) وعنونه مدينة الحرفيين بحلوان
- الدقي (.. السرساوي.. ) وعنوانه شارع التحرير بجوار معمل ساريدار
(.. زيدان .. ) وعنوانه ميدان الدقي
-التوفيقية ( .. سرور .. )
حرفيين مدينة السلام ( .. صديق .. ) في أول الحرفيين من ناحية الدائري
-جسر السويس أمام فندق السلام ( .. الملك .. ) وده ليه فرع آخر في التوفيقية لكن أنا لا أعرف مكانه بالضبط
( .. الشرقاوي .. ) وده ممكن تلاقي عنده حاجات كتير لكن أسعاره ناااار
وأنا في أقرب فرصة إن شاء الله هاسألك الناس دي عن موقفها بالنسبة لقطع غيار الموديل بتاعك

[agwaa]

أستاذ أحمد
أنا لسة قاري مشاركة من أحد الأعضاء إسمه hanyrehan وبيسأل عن أي حد محتاج قطع غيار إستيراد للموديلات من 2000 وحتى 2009 ....
ياريت تقدر تتحصل على المشاركة دي

[agwaa]

أستاذ أحمد حمدي
السلام عليكم
أنا فعلاً كنت ناوي أدلك عليه بس إتشغلت شوية و كويس أنك قريت مشاركته وعلى فكرة هو رد علي وقال لي أني أقول لك إنك لازم تبقى عارف إن الحاجة اللي تطلبها موش هتوفر قبل 15 يوم لأنها بتيجي من الخارج وبيقول إنها هتعجبك جداً لأنها كالجديدة وأرخص من مصر ..
م / أحمد يوسف

[max52lolo]

وقطع غيار المازدا 232 مو 91 اجبها منين