طنابير مازدا 3

[hamada50]

سلام عليكم،

انا عندى مشكلة فى عربيتى المازدا 3 2008 وهى انى لما بكون ماشى بسرعة وادوس فرامل ، الدركسيون بيترج جامد شوية. انا كنت فاكرها حاجة طبيعية أو ده بسبب ال abs. بس انا قريت ان دى ممكن تكون مشكلة طنابير.

العربية معايا دلوقتى بقالها سنة و عاملة 22 الف بس المشكلة دى عندى من زمان بس انا مكنتش مركز معاها.

أنا برده غيرت التيل بعد 17 ألف (مش عارف ده بدرى ولا ايه) وبعدين لما جيت أغيره كانت الناحية الشمال متاكلة أكتر شوية من اليمين. برده مش عارف ده طبيعى ولا لأ.

أنا حاسس انى ممكن أكون بستعمل الفرامل وحش شوية. أنا بقيت ساعة لما أفرمل بجيب الفتيس على n. بحس ان العربية بتقف أسرع وخصوصا لما بكون ماشى بسرعة وعايز أهدى جامد (اعتقادا منى ان ده هيطول عمر التيل شوية). مش عارف ده كويس ولا ممكن يأثر على الفتيس عشان بستعمله كتير .

أرجو الافادة.

[PoweRPassioN]

الدركسيون بيترج جامد شوية حاجة طبيعية مع ال abs عند الفرمله العنيفه فقط او عند الفرمله على اسطح زلقه

العربيه تقف اسرع وهي على الd اكتر من ال n حيث تستفيد فيما يعرف بفرمله المحرك وزياده تماسك السياره

وبالتوفيق

[EslaM_NagY]

أنا بقيت ساعة لما أفرمل بجيب الفتيس على n. بحس ان العربية بتقف أسرع وخصوصا لما بكون ماشى بسرعة وعايز أهدى جامد (اعتقادا منى ان ده هيطول عمر التيل شوية).

أرجو الافادة.

دا مش حيطول عمر التيل دا حيقصف عمره بدرى بدرى

التيل انت مغيره على 17 الف دا قليل المفروض الطبيعى على 30 الف او اكتر كمان

[Ahmed Selim]

أنت عربيتك أتوماتيك......الطبيعى تغير التيل من 15 الى 20 ألف

التيل متاكل من ناحية أكتر من التانية ده مش طبيعى.......ممكن يكون بسبب الطنابير.

أكشف على الطنابير لأنها لو بايظة تخلى التيل يتاكل ناحية أسرع من التانية و تعمل معاك أهتزاز عند الفرامل على سرعات.

ممكن برضه الأهتزاز يبقى ناتج عن حاجة تانية بس أحتمال ضعيف ( حصلت معايا ).....السبب هو تراب التيل اللى بيتجمع على مكونات الفرامل.......و الحل أنك تروح لحد يفكلك العجل الأمامى و يشيل الكاليبرات من على الطنابير و ينضف الكاليبرات و الطنابير بكمبرسور هواء بس تنضبفة حلوة و بذمة.

أنت ساكن فين يا باشا عشان ممكن نوصفلك حد يكون كويس و قريب منك.

[Fadi Ezzat]

انا راىز زى المستر احمد بالظبط
الاوتوماتيك بياكل التيل بسرعة اوى اوى
وبيقعد حوالى 20 الف
ولو لقيت هزة وغربلة عند الفرملة اعرف كدة ان الطمبورة بايظة
عايز اقولك حاجة بس فى سرك





طمبورة المازدا بتبوظ بسرعة
هوس هوس بقى متقلش لحد

[hamada50]

أنا شارى العربية دى من سمارت كار ومعايا ضمان 3 سنين. هل الطنابير ممكن أغيرها فى الضمان لو فيها مشكلة ولا هيقولولى ده حسب استخدامك انت.

أنا لما سألتهم عن التيل قالولى ده طبيعى ان الشمال يكون متاكل أكتر من اليمين عشان حمل الموتور وعشان دى اللى ناحية السواق وكلام تانى كده مفهمتوش. المهم انهم قالولى كل العربيات كده.

أنا ساكن فى التجمع الخامس بس عادى أنا بتحرك فى كل حتة تقريبا.

شكرا على الردود

[Fadi Ezzat]

أنا شارى العربية دى من سمارت كار ومعايا ضمان 3 سنين. هل الطنابير ممكن أغيرها فى الضمان لو فيها مشكلة ولا هيقولولى ده حسب استخدامك انت.

أنا لما سألتهم عن التيل قالولى ده طبيعى ان الشمال يكون متاكل أكتر من اليمين عشان حمل الموتور وعشان دى اللى ناحية السواق وكلام تانى كده مفهمتوش. المهم انهم قالولى كل العربيات كده.

أنا ساكن فى التجمع الخامس بس عادى أنا بتحرك فى كل حتة تقريبا.

شكرا على الردود

هو طبعا التوكيل بيتكلم غلط فى غلط
المهم انت ختكشف على الطمبورة عن اى حد ميكانيكى وقولة شوفعالى بايظة ولا لأ
لو قالك بايظة خد العربية رورح التوكيل والضمان فى ايدك
وقولهم الطمبورة بايظة ودة عيب صناعة
هيقولولك سوء استخام ساعتها اتخانق معاهم وهما هيغروها او اطلع على الكبير بتاعهم
ولو مش بتعرف تتخانق زى خد حد يعرف يتخانق ويزعق بصوت حلو كدة