تقييم مازدا 3

[M_ElSabaa]

واحد صاحبى اشترى مازدا 3 الجديدة فئة AERO وجربت سواقتها واليكم تقييمى للعربية :
الشكل من بره حلو جدا واعتقد ان كتير من الناس ممكن يجمعوا ان الشكل بتاعها حلو من اول لما تفتح باب العربية وتجرب تسمع صوت القفلة بتاعته تحس ان العربية محترمة . ممكن تحس ان الصالون مش كبير بس لما تدخل جوة تلاقى فعلا المساحة الداخلية ممتازة بس الراكب فى الكنبة الخلفية لو طويل شوية هيبقى مش مبسوط اوى خصوصا لو كان الى راكب قدامه برده طويل و مرجع الكرسى.الشنطة بتاعتها مساحتها معقولة بس مش كبيرة اوى . التابلوه انا عن نفسى شايفه جامد جدا والالوان الحمراء بتاعته تحسسك انك راكب عربية مختلفة عن اى عربية ركبتها قبل كده. كل حاجة فى متناول اليد والكاسيت تتحكم فيه من الدريكسيون وفى مسند لليد مريح و الكرسى بتاعها طول فترة السواقة كان مريح جدا والرؤية من جوة العربية واضحة و القوائم مش معاكسة الرؤية والخامات بتاعت كل حاجة نضيفة والتقفيل برة على مستوى عالى جدا . دورت العربية صوت الموتور محترم جدا تحس انه فى الاول كده عربية المانى بس بعد كده يرجع للهدوء اليابانى تانى. الموتور و القوة بتاعته من اجمل الحاجات الى عجبتنى فى العربية فعلا جامد السحب بتاع العربية جامد جدا اقوى من الانسر 1600 ومن النيسان صنى و الانترا فعلا العربية بتستجيب للدوسة بتاعتاك بسلاسة جامدة مع انها اتوماتيك السحب بتاعها اكتر من ممتاز . جريت بيها شوية الثبات بتاعها حلو اوى انا وصلت ل140 ومكنتش حاسس بأى اختلال فى الثبات . فعلا عربية ممتازة



قاعدة العجلات (مم) 2640
الطول (مم) 4490
العرض (مم) 1755
الارتفاع (مم) 1465
الوزن (كغ) 1265
سعة الشنطة (لتر) 413
سعة خزان الوقود (لتر) 55

سعة الموتور (سم3) 1598
عدد الأسطوانات 4
عدد الصمامات 16
القوة (حصان/د.د) 105/6000
العزم الاقصى 15/4000
الاندفاع جر أمامي

[وائل عطية]

والله ياأخي العربية دي كل ماباشوفها أنحني لها احتراماً
ولو هيه جمبي وانا ماشي لازم أوسع وأعديها طبعاً المقامات محفوظة
أنا بس مأخذي الوحيد عليها إنها تُعتبر نسبياً ضيقة من جوه.

[Hassan]

والله العربية دى محترمة جدا لكن مشكلة الوكيل لابد اخذها فى الاعتبار عند قرار الشراء

[معاذ الشرباصى]

ستظل مشكلة المازدا فى التوكيل
غبور وكيل مازدا فى مصر, لا يلقى لها اى بال, و مموت الماركة من الاخر لصالح هيونداى
هو مصمم على الاحتفاض بالتوكيل, و فى نفس الوقت من غير دعاية, او قطع غيار كافية تغطى احتياجات مالكى السيارة, ده غير التسعير الخاطىء جدا للسيارة

اما لو جبت العربية خليجى, ممكن احتمالين, انك تشتريها من مكان مشهور زى سمارت او سونستا كار و دول بيدوك ضمان, او تشتريها من مكان مجهول و ساعتها مفيش مكان هيعملك صيانة لعربيتك لا غبور و لا سمارت او سونستا و هتحتاس بالعربية

اضف الى ذلك عدم وجود حتى الان قطع غيار للعربية فى السوق, و ان وجدت بتتباع باسعار عالية جدا, و ده كله للاسف لا يشجع على شراء هذه التحفة الرياضية

لان الحفاظ على العربية هيبقى صعب جدا فى ظل هذه الظروف.

فكلنل ندعى ان مازدا يسحبوا الوكالة من غبور علشان تاخد حقها فى مصر,آمين :)

[hazem_khidr]

عربيه جميله جدا جدا انا سوقتها في الامارات الصراحه الهوندا سيفك الجديده احلي منها بس مش بفرق كبير
المازدا اول ما شوفتها افتكرت الالفاروميو و بعد ما ركبت و شوفت العدادات افتكرت الافا روميو اكتر و لما شغلت العربيه و سمعت صوت الموتور و اول ما اشتغلت قولت مستحيل دي الفا روميو و تشطيبها من جوه حلو بس مش بمستوي الالفا روميو طبعا و ابسط حاجه الاطواق اللي حوالين العدادات لونها فضي لو كانو يصرفو شويه و يعملوها نيكل زي الالفا روميو كانت حتبقي تحفه.
انا جبت بيها لحد 190 و العربيه كانت ثابته و مغريه الصراحه و لما روحت أأجرها اخترت المانيوال علشان استمتع بالعربيه و فضلت معايا يومين مكنتش عاوز انزل منها.عربيه الصراحه حلوه بس مشكلتها هنا هيا التوكيل و قطع الغيار دي حاجه تقلق بجد و بصراحه انهارده اول مره اعرف منكم ان غبور لسه ماسك توكيل مازدا في مصر و مش عارف ليه الشركه الام في اليابان ساكته علي مستوي المبيعات و الخدمه الرديئه دي لو كان فعلا التوكيل لسه معاه.
ايام ما كان التوكيل مع ماجد و لطفي(توكيل مازدا في التمنينات )كانت المازدا ليها شنه و رنه و ماننساش ال323 و لسه لحد انهارده بيسموها مازدا الجيش علشان التوكيل ددفعه كبيره منها للقوات المسلحه.فعلا كانت عربيه ممتازه

[Karim_Monir]

بصراحة انا عجباني جدا جدا
ولما سالت عن المانيوال عشان اشتريها لقيت انهم بطلوا يستوردوا المانيوال وانا بكرة الاتوماتيك جدا
عشان كدة مستني لو نزلو مانيوال تاني هاجيبها من سمارت كار لانهم افضل من سونستا كتير
اما لو مالقتيش هادور علي الاختيارات التانية بقي

[Nader]

عربية خرافة ما شاء الله عليها

[fahd_628]

والله انا اكتر عربية بتعجبنى فى الفئة السعرية بتاعتها

يعنى انا مثلا يعنى لو قدامى اختار بين اوكتافيا اوتوماتيك ولا مازدا 3 ايرو حختار و بدون تردد المازدا

حتى لو اليع صعب علشان انا لو اشترتها عمرى ما حبيعها ( دة لو اشتريتها )

[أبو عبدالله]

طبعا هي من افضل العربيات الان في السوق المصري
ولكن ربنا يرحمنا ويهدي لينا الناس ويشيفولنا توكيل محترم لها

[هشام.النجار]

عيب كبير فيها إنها لا تناسب عائلة متوسطة من خمس أفراد مثلاً , لكن الباقي كله يهون

[zorooo1986]

يا جماعة معلش سؤال يعنى ازاى المازدا 105 حصان
والنوبيرا 106 حصان ودة مكتوب فى التوكيل والكتالوج
والالنترا 2006 خليجى 107 حصان يعنى دول يتفوقو عليها فى الدرافت
مع انى حاولت اجرى مرة مع صحبى هوة معاه مازدا 2007 وانا نوبيرا
وطبعا كلكم عارفين النتيجة مقدما
فكيف تكون 105 حصان فقط

[hazem_khidr]

الموضوع يا زورو مش قوه حصانيه و بس لاء بيدخل عده عوامل زي انسيابيه العربيه و الوزن و مدي التماسك و الات الجر في حاجات كتير بتفرق في السحب غير الموتور

[zorooo1986]

فعلا كلامك صح ولا مكنش حصل الى حصل لما دخلت درافت مع صحبى
طارق

[sarhan]

وبيكون في تكنولوجيا في فتح الصبابات في الوقت المناسب يعني ممكن عربية 130 حصان زي الليجانزا متسحبش زي الاوكتافيا 115 حصان

[sarhan]

انا والدي لما كان في السعودية كان معاه ماذدا 323 موديل 94 انا فاكر مرة واحنا مسافرين انه قفل عداد 200 كم/س
مع العلم ان الموديل دا كان 1300 سي سي / 90 حصان فقط