استفسارات بخصوص الكريستاله

[m.aligamal]

السلام عليكم ورحمه الله
بدايه كل سنه وانتم طيبين
ليا شويه استفسرات عالماشى
انا عربيتى لانسر 99 كرستاله اوتوماتك
الحمد لله العربيه حالتها كويسه و السحب بتاعها تمام رغم انى ممشيها بنزين 80
نضفت الكربراتير بتاعها و بقا فل خالص كان فى رعشه فى العربيه و تقريبا خفت كتير بعد مظبت كهربا العربيه و نضفت الكربرتير بس لسه موجوده مش عارف ممكن يكون بنزين 80 مثلا وبعدين فى حاجه تانيه لاحظتها ان الزيت بتاعى الموتور تقريبا قل شويه هو موبيل 1000 وانا ماشى دلوقتى عليه 800 كيلو مع ملاحظه ان البوجيهات مش مهببه ولا عليها زيت و تقريبا الموتور مفيش عليه زيت خالص غير ان العربيه الصبح و انا بدورها الشكمان بينزل منه ميه كده فسالت عالموضوع ده قلولى يبقى المكنه حالتها كويسه
حاسس ان عربيتى بتستهلك بنزين كتير يعنى تقريبا 160 الى 180 مطلعتش على طريق سريع اكتر من 30 كيلو عشان كده مش عارف احكم عليها و معظم مشى جوا البلد او فى طريق سريع بس مليان مطبات و العربيه مبعرفش اجرى بيها عشان كل شويه مطبات المحروسه على فكره انا من المنصوره و الطريق الى بتكلم عليه طريق الزقازيق كمان انتوا عارفين الاوتوماتك تجميعته غير المانويل خالص فبطر انى اكبس عليه بدوسه تقيله عالاكسراتير عشان تسارع العربيه و تجميع السرعه هل الضغط ده بيستهلك بنزين زياده لان واحد صاحبى قلى ده بيزود استهلاك البنزين برضه عامه الحاجه الاخيره برضه الفتيس تجميعه الرابع تقريبا بتبقى وحشه الى بعد 80 بحس ان الموتور صوته بيعلى و rbm بيعلى يمكن تقريبا بيوصل 3 ونص
استفسراتى بخصوص استهلاك البنزين ونقص الزيت وتسارع الفتيس وبعدين هل فى طريقه لظبط الكربراتير بالكمبيوتر و تكون فى المنصوره عشان انا مش عارف ازا كان مظبوط اساسا ولا بس حاسس ان سحب العربيه كويس و جريها حلو وبرضه استهلاكها للبنزين زايد ده بالنسبه للمكنه نيجى بقا للكماليات بستفسر عن حاجات بسيطه كده عالماشى عايز اغير مساحات عشان خربشت الزجاج الامامى طبعا اجيب مساحات نوعها ايه و يكون سعرها معقول
وعايز قربه مياه للمساحات عشان الى عندى بايظه تفتكروا اجيبها استيراد ولا تايونى و تكون فى حدود كام على فكره القربه موتورها شغال يعنى حته القزازه دى بس

[bmya]

باشا 80 بيهرتل كل حاجه في العربييييه

[cuppo]

و مالو يا عم شريف ال 80 يهرتل و ايه يعني
بس ضرره قليل
انا ممشيها 80
بس مانيوال

[m.aligamal]

الف شكر يا بهوات عالرد على فكره انا مش حاسس ان 80 فارق معايا خالص بالعكس العربيه ما شاء الله لا بتسقف ولا بتكركر ولا صوت المكنه عالى ولا حاجه انا النهارده قيست الزيت لاقيته فى النص بين الماكس و المينى مش عارف كده يبقى القرايه صح ولا منخفض ومعتقدش ان البنزين 80 يؤثر على تسارع الفتيس ؟؟؟لان النفلات الاولى بيعملها بمنتهى السلاسه انا بيتهيئلى ممكن يكون زيت الفتيس عامه هغير الزيت بس عايز نصيحتكم اغير زيت نوع ايه ؟؟؟للفتيس وكمان عايز اعرف تبطيل العربيه و تشغيلها كتير بيستهلك بنزين اكتر من ان اسيبها دايره مثلا 5 دقايق لان سمعت ان طلعت العربيه بيبقى معدل استهلاك النزين عالى فيها

[bmya]

يابشوات ال80 بيموت العربيه معرفش انتم زي مش حاسيت بكده
انا كنت بحوط 90 لما اتزنق ويبقي مفيش 92 كنت بحس اني راكب بطه بلدي خصوصا الاتوماتيك حساس اكتر للبنزين المانوال اهو هتقرص علي الغيارات وهتخليها تجري غصب عنها
ابن خالتي بيحوط 80 قشطه وبيقرص علي الغيارات وبتجري وبيجيب 160 170 عادي اجي انا اسوقها بجد بتبقي صعبانه عليه مش هي دي اللانسر اللي كانت معايا
انا كان معايا الكريستاله دي من الزيروو وعارف ظبطتها ايه
المهم ما علينا طالما ان العربيه مرياكم يبقي خلاص مش مشكله
بص ياباشا معلش انا مش فاهم حاجه براحه كده وقل تاني ايه المشكله بالظبط

[m.aligamal]

ميرسى جدا يا باشا على ردك و اوضح اكتر
1-تبطيل العربيه و تشغيلها كتير بيستهلك بنزين اكتر من ان اسيبها دايره مثلا 5 دقايق يعنى ابطل وادور من جديد و افضل داير احسن لو الوقت 5 دقايق مثلا
2-ازاى احس ان الكربراتير اتظبط و احكم ازاى على عربيه من ناحيه استهلاك البنزين يعنى بتسف بنزين ولا كويس عليها كده
3-نقلات الفتيس ياترى ليه بحس ان بعد 80 كيلو تجميع الفتيس بطىء نوعا ما ده عادى ولا ايه
4-قياده السياره الاوتوماتك بتحتاج ان تسارعها يكون براحتها ولا اقرص عليها بالاكسراتير ولو قرصت عليها هتستهلك بنزين اكتر ولا ملهاش علاقه
5-يريت بقا تنصحنى بمساحات اصل المساحات بتاعتى حاسس انها بتجرح القزاز
وميرسى جدا لردودك عليا و كل سنه و انتا طيب

[bmya]

بص ياباشا انا هرود عليك باللي انا اعرفه
اولا بالنسبه لتبطيل العربيه وتشغيلها في فتراب متقاربه اعتقد مش حلو للمارش يعني مش كل دقيقه تدور وتبطل لكن انا عن نفسي لو هقف اكتر من 5 دقايق ببطل العربيه
ثانيا بالمسبه للكربيراتير ده احساس يعني مش عارف حاجه معينه اقولك عليها يعني انت حاسس العربيه مكتومه مثلا لو مكتومه نضفه بالاسبراي بتاع الكربيراتير انا كنت بعمل كده اول محس العربيه مكتومه ابص علي 3 حاجات فلتر هواء والمفروض يتغير كل 20 الف تقريبا بجانب تنضيفه كل فتره خلال ال 20 الف وفلتر البنزين والكربيراتير
بالنسبه بقه لانك بتحس ان التجميع بطئ بعد ال80 ابصملك بالعشره انه بسبب البنزين ال80 وعلي فكره جرب تشغل التكييف كمان وانت هتحس ان راكب كتكوت وعشان انت بتحوط 80 مستسناش تجميع رهيب بالاضافه الي ان لعربيه اتوماتيك وده بيكون ابطئ من المانوال
طبع الاتوماتيك عادي براحتك يعني لو عايز تجمع اقرص عليها بس طبعا القرص ده بيزود الاستهلاك والكيك داون كمان بياكل بنزين كتير
فخليك في الوسط يعني سيبها تجمع براحتها لما تحتاج تجري ابقي اقرص علي البنزين
بالنسبه للمساحات عادي بتتباع عن اي حد بتاع اكسسوارات وممكن تجيبها زي بتاعت الاوكتافيا بتبقي احسن بكتيييييييير طبعا انت بتغير الجزء اللي بيمسح بس
وده في حدود معرفتي بس بصراحه انا مش عارف حكايه تبطل العربيه وتدورها دي بتستهلك بنزين ولا ايه فممكن حد يقولنا احنا الاتنين

[أبو_حمزة]

فى حالة الانتظار طبعا تبطيل العربية افضل و 5 دقايق مش فترة قصيرة
المساحات ممكن تجيب بوش و ده ممتاز بيعيش واداءه محترم و فى انواع كتير حلوة
بنزين 80 اكيد بيأثر على السحب و عن نفسى مجرب و با استخدم 92 على طول
و لو جربت تحط 92 مش ها تحس بالفرق من اول تفويلة. لازم مرتين على الاقل و بعد كده الفرق يبان

[bmya]

الحمد لله في ناس مقتنعين ان ال80 بيفرق في اداء العربيه والفرق كبير جدا علي فكره

[m.aligamal]

الف شكر يا بهوات عالرد وانا مقتنع ان فى فرق كبير بين بنزين 90 وبنزين 80 بس انا مش شايف ان الفرق ده يخلينى ادفع الضعف فى التفويله

[bmya]

مهو ياباشا ال80 مش هيخليك تحس بالعربيه صح خصوصا انها اتوماتيك بس عموما باين ان حضرتك مش فارق معاك السحب والسرعه وكده فمش مشكله بالنسبه لك بس مدام هتقضيها 80 خليك دايما متابع فلتر البنزين تغيره كل فتره ومتسيبش التنك يفضي خليك بالكتير اوي علي اخر ربع وروح مفول تاني

[m.aligamal]

الف شكر ياباشا و انا فعلا متفرقش معايا السحب اصلا و مش هاوى سرعات يعنى اخرى 100 و بقول كده رضا قوى عشان بعد كده بجد بحس انى متهور وانا متابع تغير الفلتر والعربيه دايمه بممن كل 30 لتر يعنى بيكون فى التنك حوالى 20 لتر مبحبش امشى عالاحتياطى ابدا وعلى فكره قريب 80 هيغلى و نرجع تانى 92 مساله وقت ليس اكثر

[bmya]

ربنا يستر ياباشا والله الواحد بيحوط 92 وايده علي قلبه ربنا يسترها وميغلاش تاني

[m.aligamal]

اعتقد ان 80 هوا الى هيزيد بعد مبقى فى عربيات جديده بتحط 80 لدرجه انهم بيغيروا الرشاشات و طبعا معروف ان 80 الدوله بتدعمه و ممكن برضه تكون الحكومه عايزه تجبر مالكى السيارات على الاعتماد على الغاز الطبيعى