عيوب اللانسر

[heka_m_y]

أنا حبيت ان كل واحد يكتشف عيب فى الانسر يكتب تعليقه هنا حتى نجمع كل الشكاوى ونحاول نحلها وانا هابتدى بنفسى انا كان معايا مكواة 2001 ودلوقتى بومة 2009 1300 وبصراحة أنا شايف انها عربية ممتازة جدا صالونها شيك عفشتها نوعا ما كويسة وبتستحمل يمكن ضعيفة شوية أمام التويوتا مثلا بس مش كلنا بنخش حلبة سباقات فالسيارة على أد الغرض منها ممتازة جدا بس فيها بعض العيوب من وجهة نظرى وبعض العيوب الاخرى اللى جمعتها من مشاكة سيادتكم فى المنتدى :

أولا : العزل فيها مش كويس يعنى لما بقفل الزجاج بسمع الضوضاء الخارجية اللى فى الشارع وصوت الماتور العالى طبعا غير بعض التقفيل اللى مش كويس زى مثلا بعض الناس ومن ضمنهم أنا عندى صوت تكتكة خفيفة من الزجاج الامامى ولقيت كثير من الناس بيشتكوا من عيوب التقفيل هذه .

ثانيا : فيها عيب كثير من الناس اشتكوا منه وأولهم أنا إن عند كسر الدريكسيون فى الملفات ويكون الملف فيه مطبات أو مطبات عين القطط بسمع صوت خبطة أو تكة حديد فى الدريكسيون والصوت ده صادر من علبة الدريكسيون وبيسمع فى الطارة نفسها والمهم ان فى التوكيل نفسه قالوا ان الصوت ده طبيعى فى اللانسر البومة وخلونى أجرب عربية تانية لقيت فيها نفس الصوت وعلى فكرة الصوت ده كان عندى فى المكواة وبرده هو هو فى البومة اللى لسة مكملتش 2000 كيلو والغريب ان بعض الناس أسألهم هل الصوت ده مضايقهم يقولون ان الصوت ده مش موجود أصلا مع العلم ان فى شكاوى كتير فى المنتدى عن هذا الصوت والسؤال ازاى شركة عريقة زى متسوبشى عارفة العيب ده ومش بتحاول تحله من موديل 2001 وحتى 2010 .

ثالثا : بعض الناس بتشتكى من الفرامل بس يمكن أنا شايفها نوعا ما كويسة .

رابعا : العربية ممتازة جدا فى المنحنيات بس ثباتها بعد الـ 120 وحش جدا جدا جدا جدا .

خامسا : الاوتوماتيك رائع حسب علمى لان عربيتى مانيوال بس عيبه حسب الشكاوى منه ان فى بعض السيارات لما يجيب n أثناء وقوف السيارة الـ rbm بينزل إلى 400 وتترعش السيارة ثم يصعد مرة أخرى وأحيانا بتبطل السيارة .

سادسا : من أشد الاشياء استهلاكا فى السيارة هى قواعد الماتور وكل فترة بتحتاج تغيير مش عارف ليه حتى الاصلى منها .

سابعا : استهلاك البنزين فيها عالى جدا حتى يمكن الـ 1600 بتعمل حسب علمى 200 كيلو فى الصفيحة وانا بسمع ان السيارات القديمة مثل البيجو مثلا 2000 سى سى بتعمل نفس الرقم .

ثامنا : الـ 1600 الرياضية حسب علمى أيضا عفشتها ناشفة شوية على الطريق .

تاسعا : وده عيب تافه شوية ان لما لمبة فى التابلوه بتتحرق وتحاول تجيب غيرها من التوكيل بيكون لونها أصفر يعنى مافيش عليها الطربوش اللى بيدها اللون بتاع التابلوه فيتغير لون الاضاءه يبقى كوكتيل شوية أصفر والباقى نفس اللون اللى بتزل بيه .

10: موديل 2010 البومة غالى 10 الاف جنيه وكل اللى اتغير فى السيارة شكل ولون عدادات السرعة والبنزين والحرارة والـrbm أما التكيف والكاسيت فنفس اللون القديم يعنى بقيت كوكتيل واتغير أيضا شكل طارة الدريكسيون والجنوط فهل هذا يستحق ارتفاع السعر هذا انا شايف انها غالية جدا جدا يعنى ازاى اجيب عربية 1300 سى سى مانيوال بـ 100000 الف جنيه مع العلم ان فى سيارات اخرى منافسة للانسر فى السوق وأعلى أمكانيات ويمكن أقل فى السعر .

يا ريت يا جماعة تكتبوا تعليقاتكم على الموضوع وكل واحد موافق على كلامى أو معترض يكتب أيضا واللى شايف ان بعض العيوب اللى ذكرتها موجوده عنده يكتب أيضا واللى عنده عيوب أخرى يكتب حتى نستفيد من خبرة بعض ونجمع المزايا والعيوب فى موضوع واحد حتى يستفيد كل من يقتنى هذه السيارة .

[heka_m_y]

نسيت أن أضيف شىء وهو أن الباور بتاع العربية تقيل شوية مقارنة بالتويوتا مثلا أو السيارات الكورى .

وكمان أسعار قطع الغيار الاصلى غالية شوية

[shooter123]

والله الموضوع بتاعك رائع جدا
انا معايا لانسر اخر المكواة 2003 اوتوماتيك والحمد لله العربية عاملة 85 الف كيلو وانا مشاويري بيها كلها سفر ولحد دلوقتي مش لاقي فيها عيوب غير العيب اللي حضرتك ذكرته اللي هو صوت الطقة في الدريكسيون وبالذات في الملفات بتبقي واضحه اوي
واشكرك علي هذا الموضوع الرائع

[zoro007]

رابعا : العربية ممتازة جدا فى المنحنيات بس ثباتها بعد الـ 120 وحش جدا جدا جدا جدا .

اختلف معك فى هذه النقطه حيث العربيه ثباتها ممتاز

انا معايا لانسر 2001 مكواه ثابتها فوق الممتاز بمشى بيها على 160 والعربيه ثابته جدا وتحس انها تقيله وماسكه على الارض
باخد بيها مطبات بسيطه على الطريق العربيه ماشيه زى الالف

[rafik_rwm]

اشكرك جدا علي هذا المجهود الرائع
ونتظر رد ا طارق علي هذا الموضوع الشيق

[مصراوي جدا]

الحقيقة اتعمل قبل كده عى مدار عمر المنتدى موضوعين تلاته عن عيوب اللانسر وكان حجم المشاركات فيها ضخم (ممكن مراجعتهم في الصفحات الموجودة داخل المنتدى) انما انا لم اشارك في تلك المواضيع خاصة لما الاقي واحد بيتكلم عن اللانسر البومة اللي هي اكثر السيارات انتشارا في مصر ان فيها كم هائل من العيوب وكأنه بيتكلم عن عربية صيني وكأن الشعب المصري تم سحره بمجموعة كبيرة من السحرة والمشعوذين علشان يقبل على شراء العربية بهذا الشكل رغم العيوب دي.

انما طالما صاحب الموضوع طلب رأيي فأنا هارد عليها نقطة نقطة :

1- العزل مش كويس دي حقيقة انما مش سيء برضه وتم تحسين العزل في اللانسر شارك أما التقفيل فهو ياباني 100% وان كان فيه ناس عندها اصوات في التابلوه فده ليس معناه شكوى عامة

2- موضوع صوت علبة الدركسيون فده بيحصل في حالة خاصة وهي المرور على عين قط وانت بتحود يعني Odd Case بتحصل نادرا وقليل من الناس اشتكي منها والغالبية مش حاسس بيها اصلا

3- الفرامل زي ما حضرتك قلت بعض الناس اشتكت منها وكل واحد منهم له سبب والمهندس محمد (Mohamedway) شرح واستفاض في النقطة دي يا ريت تتابع موضوعاته

4- الثبات بعد 120 - اعتقد ان الميزة الأساسية في البومة هي الثبات على كل السرعات فالكلام غير مظبوط الا لو حالة خاصة في عربية محتاجة ظبط زوايا واصلاح عفشة

5- موضوع الرعشة حالات نادرة - انا حاسس ان حضرتك دخلت على المنتدى شفت اسئلة الناس وكل واحد اشتكى من حاجه اعتبرتها عيب وحطيته في نقطة لوحدة - العيب في العربية يعني شكوى عامة من كل الناس ولو دي شكوى عامة كان زمان الناس واقفة امم بترجع عربياتها

6- قواعد المحرك دي قطع كاوتش وتغييرها بيعتمد على المطبات التي تتعرض لها العربية

7- استهلاك البنزين ليس عالي وانما بعض العربيات بيعلى فيها استهلاك البنزين ووقتها المحرك بيحتاج ضبط وبيرجع لمعدله الطبيعي

8- عفشة رياضية يعني ناشقة علشان تتحمل مطباتنا في مصر اما العفشة الناعمة بتتدمر بسرعة جدا والعفشة من القطع المغطاه بالضمان 100 ألف كيلو متر

9- موضوع اللمبة لم اسمع عنه اصلا قبل ذلك

10- سعر الـ 2010 مش اغلى 10 آلاف جنيه ولا حاجه هي غليت عن موديل 2009 مبلغ 6000 جنيه ومن الطبيعي ان سعر الموديل الأحدث بيزيد عن سعر الموديل الأقدم (وان كان السنة دي تحديدا كنت افضل لظروف السوق ان سعر 2010 ينزل بنفس سعر 2009)

عموما زي ما قلت في أول المشاركة اني مش باحب اشارك في مواضيع الشد والجذب في مميزات وعيوب العربية واترك الدفاع عنها لأعضاء المنتدى

[heka_m_y]

أولا أنا باشكر حضرتك يا باش مهندس طارق على المشاركة مع انى حاسس من رد حضرتك أنك مش راضى عن كلامى أو يمكن فهمت كلامى غلط وزعلت منه مع العلم انى لم أقصد أنى أعيب السيارة لا سيما انى بعد ما بيعت المكواة اشتريت بومة ولو أنا شايف ان العربية وحشة أوى ماكنتش اشتريتها زى ما قلت حضرتك ومش معنى انى بذكر عيوب العربية علشان أعرف اعالجها انى بعيب فيها ومفيش حاجة كاملة ولكن لو تسمحلى ليه ردود على حضرتك ويا ريت ترد عليا فيها والموضوع مش موضوع شد وجذب أنا بحب العربية دى جداجدا ومكانش قصدى انى اعمل الموضوع لهذا الغرض ولكن يعلم الله ان كان قصدى انى أشوف بعض الحلول من الاخوة الاعضاء علشان أعملها فى عربيتى وعربيت واحد قريبى كان عنده بعض الشكاوى اللى ذكرتها قيا ريت ياباش مهندس ترد على تعليقى على رد سيادتك .

أولا : حضرتك قولت ان اليابان حسنت العزل فى الشارك وان العزل فى البومة مش كويس يبقى ازاى البومة بتنتجها اليابان بقالها سنين والعزل فيها مش كويس ولسه محسناه فى موديل مش كل الناس مقبلة عليه .

ثانيا : موضوع علبة الدريكسيون كتير اشتكوا منه بلاش نتكلم عن حد هاتكلم عن نفسى حضرتك بتقول انه بيحصل فى حالات نادرة طيب ازاى بيحصل فى عربيتى فى معظم المطبات لو كاسر الدريكسيون أو فى العدل مع العلم ان عربيتى عاملة 1800 كيلو فقط فيعنى مش فى الحالات النادرة ولوحضرتك مش مصدقنى يبقى أحضر للتوكيل عند حضرتك واكشفوا على السيارة وجربوها وخالولى الصوت يحصل فى الحالات النادرة وانا هابقى راضى عن ذلك ويا ريت اجى التوكيل وتحللى المشكلة دى يا باش مهندس .

ثالثا : انا باعتذر علشان ذكرت موضوع الفرامل لانى بصراحة محستش بالمشكلة دى وان كنت ذكرتها علشان قرأى زى ما قلت حضرتك بعض المشاركات ولقيتهم بيشتكوا منه فأنا بعتذر .

رابعا : موضوع ثبات السيارة برده لما هاجى لحضرتك التوكيل ظبتها وجربها وانا راضى عن رأيك لانى بثق فحضرتك جداجداجدا جدا .

خامسا : موضوع الرعشة وهو بيحص لعربيت قريبى انا بعتذر عنه لانى لما هاشتكى من حاجة بعد كده هاتكلم عن عربيتى فقط .

سادسا :انا مصمم ان استهلاك البنزين فيها عالى .

سابعا : موضوع العفشة حضرتك بتقول وانا والله ما أقصد أن أزعل حضرتك ان العفشة الناعمة بتدمر بسرعة طيب يبقى أعمل أيه فى عربيتى اللى عفشتها ناعمة .

ثامنا : موضوع اللمبة اللى حضرتك عمرك ما سمعت عنه حضرتك ممكن تسأل فى قسم المبيعات فى التوكيل زى ما أنا سألت فى فرع جسر السويس أن لو لمبة من التابلوه اتحرقت هل عندهم لمبة فيها الطربوش زى اللى بينزل فيها أصلى واللى بييديها اللون الاخضر المبيض شوية ده بتاع التابلووه ولا معندهمش غير لمض بيضة من غير طاربوش ولو حطتها هايتغير لون التابلوه .. يا ريت تسأل يا باش مهندس وانا لا أقصد اى شىء يمكن حضرتك لم تتعرض لموقف زى ده قبل كده .

تاسعا : حضرتك قولت أن قواعد الماتور عليها ضمان 100000 الف كيلوا يعنى لو اتقطعوا قبل 100000 الف كيلو هاغيرهم عندكم ببلاش .

وعلى فكرة انا عندى صوت من الزجاج الامامى ومش هاقول تانى انه عيب فيا ريت حضرتك تبقى تشفهولى فى التوكيل لما اجى وتجربوا العربية وتخلوا صوت علبة الدريكسيون يحصل نادرا .

انا مستنى رد حضرتك يا باش مهندس طارق وعلى فكرة أنا مستنى ردود حضرتك علشان أعملها فى السيارة علشان أحبها أكتر وابقى حابب قيادتها والله دى نيتى وده قصدى من الموضوع كله .

فى انتظار رد حضرتك .

[heka_m_y]

إلى المهندس طارق

أنا بطلب من حضرتك طلب ولو عملتهولى هبقى سعيد جدا جدا جدا جدا جدا جدا وهو انى اكتشفت عن طريق سيارتى القديمة المكواة ان لما بفك الصمولة اللى فى علبة الدريكسيون والى وظيفتها لما تربط عليها تتقل الدريكسيون ولما تفكها سنه يخف الدريكسيون (الرجلاش) بيقى تحتها بستم حديد صغير وده اللى بيمسك العمود الصلب (المشرشر) اللى جوة العلبة فغيرت البستم ده وجبت أخر فايبر تقريبا بتاع تويوتا تقريبا وربط الصامولة تانى وده كله من غير ما يفك العفشة خالص الصامولة دى بتبقى باينة من تحت السيارة والصوت راح خالص ولكن بعد المشى 2000 كيلو بيرجع بسيط وده طبيعى علبان علشان بتكون العلبة أخذت الخلوص بتاعها فبرجع للراجل تانى يربط على الصامولة سنه صغيره ولم أسمع الصوت اللى قارفنى ده أخرى بتاتا .. فطلبى من حضرتك وانا عارف انى تقلت على حضرتك انك تكللملى مدير التوكيل فى قليوب وانا على فكرة قابلته مرة قبل كده أول ما اشتريت العربية القديمة علشان نفس العيب وتستأذنلى منه انى اجيب البستم ده جديد وعلى فكرة هو هو نفس المقاس بالرقم زى اللى فيها بس فايبر واركبه فى التوكيل تحت مسؤولتى وأتحمل المصاريف عشلان السيارة ماتخرجش من الضمان وحضرتك لو لبيت طلبى هذا مش عارف أقول لك أنا هابقى مبسوط وسعيد ازاى بل مش عارف أقدر أشكرك إزاى وأبقى ممنون لسيادتك جدا جدا جدا جدا جدا جدا ... منتظر رد حضرتك .