أصدق مين أنا تعبت

[Dr.SherifMansy]

أنا آسف يا جماعة كنت سألتكم قبل كده على شراء لانسر جديدة و لكن حصلت ظروف مالية صعبة ادت الى الغاء المشروع مؤقتا (لحين انفراج الأزمة باذن الله) و لكن انا متابع لأخبار السوق و خصوصا اللانسر
اللى ناقطنى و مجننى الإختلاف الرهيب فى المواصفات اللى باسمعها
مثلا اسأل فى التوكيل (مصرية) يقول لى ان 1600 اوتوماتيك كلاسيك فيها ايرباج واحدة و بدون ABS ، و اسال فى لايف موتورز (موزع معتمد من الوكيل) يقول لى ايرباج واحدة مع ABS و اسال الرواس (الشركة الأم لمصرية) يقول لى بدون ايرباج و بدون ABS ، الحلو ان موزعين (اكتر من واحد) اخرين اكدوا لى انها 2 ايرباج و فيها ABS و تحدى (زى سمنة روابى) مع العلم ان الكلام كله على الكلاسيك مش الهاف او السبورت او السوبر اكشن ، فيه ايه يا جدعان ؟؟ هو مافيش مواصفات قياسية للى داخل عندنا من العربية دى ولا ايه ؟؟؟
و طبعا مش حاجيب سيرة الخليجى لأن الرد جاهز و هو ان المواصفات تختلف باختلاف البلد و الطلبية !!!
الشئ الآخر الظريف هو ان البعض بيقول ان فتيس اللانسر 1600 الأوتوماتيك هو CVT مع انى قريت فى الكتالوج بتاعها ان فى نوعين من الأوتوماتيك واحد CVT و التانى اوتوماتيك تقليدى 4 سرعات (مرفق صورة من كتالوج لانسر 2007) و طبعا البعض الآخر يؤكد انه اوتوماتيك تقليدى (ياريت اللى عنده لاتسر 1600 اوتوماتيك يقول لنا ال RPM بيزيد بالتدريج مع تزايد السرعة ولا عمال ينزل و يطلع مع كل غيار) و عموما مرفق وصلة لتوضيح شكل ال RPM مع السرعة فى ال CVT (طبعا كثير عارفين كدة و لكن الوصلة لمن لا يعلم).

http://www.youtube.com/watch?v=LlWYTnaDnK0&feature=related

عذرا للإطالة و لكن احترت اصدق مين و احترت اكدب مين (زى الأغنية القديمة) و لو حصل نصيب و جيت اشترى ، اجيب منين علشان يكون فيها المواصفات الحقيقية و ماحدش يضحك عليا
و شكرا

[fahd_628]

بص يا باشا انا الى حقدر افيدك فية ان فتيس الانسر 1600 الأوتوماتيك Cvt و دة متأكد منة

و ان شاء الله الأزمة تتحل عن قريب و ربنا يوفقك و بالنسبة لحكاية ال Abs ف انت ممكن تتأكد عن طريق موضوع كان موجود فى منتدى الميتسوبيشى ححاول اجيبلك اللينك بتاعة بيوريك ازاى تفرق بين الانسر الى فيها Abs و الى مفيهاش عن طريق انك تفتح الكابوت و تشوف ازا كانت وحدة ال Abs موجودة ولا لأ و طبعا الأيرباج سهلة تتعرف على الطارة بتاعت الدركسيون حتلاقى Srs Airbag دة بالنسبة للسائق و بالنسبة للراكب حتلاقى فى التابلوة قدام الراكب حتة كدة مستطيلة مكتوب عليها برضضة Srs Airgab و لو العربية بأيرباج واحدة حتلاقيها بس على الطارة بتاعت الدركسيون و لكن لو 2 حتلاقى على الطارة و على التابلوة قدام الراكب الأمامى

[Dr.SherifMansy]

شكرا على ردك يا فهد ، و لكن الموضوع مش اعرف ازاى اذا كان فيها ايرباج او ABS فدول لو موجودين بيبانوا ، الموضوع انى لو حادفع 107000 جنيه فى عربية حرام اجيبها من واحد (سواء توكيل او موزع معتمد) من غير الكلام ده ، و بعدين الاقيها عند التانى فيها كل ده و بنفس السعر، او افاجأ ان اللوت ده بدون و بعد ما اجيبها الاقى اللوت اللى بعده فيه ، او خد يدفعنى فلوس زيادة علشان تكون فيها الحاجات دى فى حين انها عند التانى كاملة و بدون فلوس زيادة ، المشكلة زى ما سبق و قلت ان كل واحد بيأكد و بشدة او بينفى و بشدة و مش معقولة الف على كل العربيات اللى فى التةكيل ادور فيها ايرباج و ABS ولا لأ ، فمثلا حضرتك بتاكد لى ان فيها CVT فهل ده الستاندارد فى مصر ولا معارض معارض ، و لو سمحت جايبها منين و شكرا يا باشا:

o

[hero]

دي مشكلة عامة في اللانسر في مصر فعلا....لان التوكيل نفسة مش محدد مواصفات قياسية....وكل شوية بيغير فيها....
وعلشان كدة ناس كتير فضلت الياريس عن اللانسر علي الاقل في فئة الـ 1300 ...

[مصراوي جدا]

أستاذي العزيز اسمح لي اشرح لك الموضوع بدقة حيث أني باشتغل في التوكيل


طبعا احنا هنا بنتكلم عن اللانسر العادية 1300 و 1600 سي سي مش الشكل الجديد Lancer EX 1500 سي سي


اولا سبب اللخبطة دي هي وجود عربيات خليجي في السوق ومن جميع دول الخليج ومن الأردن كذلك وكل بلد من دول بتجيب كماليات خاصة بيها وبالتالي السوق مليان عربيات لانسر بكماليات مختلفة


انما النقطة اللي لازم نتفق عليها بوضوح ان العربيات اللانسر المصري يعني من الوكيل مصرية كمالياتها محددة بوضوح ومفيش فيها لخبطة وشركة مصرية بتوزعها على الوكلاء المعتمدين بتوعها ده غير بيعها من معرضها في شارع رمسيس ت : 19830 والمفروض ان السعر متقارب فيما بين الجميع انما المؤكد واللي ميختلفش عليه اتنين ان المواصفات ثابتة عند الجميع طالما ان العربية مصرية


لاحظ ان فيه معارض بتبيع عربيات خليجي وتوهم العميل للأسف انها مصرية ولما يسألهم عن دفتر الضمان الأحمر يقولوا له لما تروح مركز الخدمة حتستلمه أو يديله الدفتر لكن طبعا بدون ختم شركة مصرية وبعدين ييجي عندنا ونقول له للأسف عربيتك خليجي او أردني وملهاش ضمان عندنا - فلازم تتأكد ان العربية اللي بتشتريها مواصفات مصرية ومعاها دفتر الضمان الأحمر اللي مختوم بختم الوكيل (مصرية)


نيجي بأه لموضوع الكماليات


الكماليات ثابتة مش متغيرة يعني على سبيل المثال معندناش حاجه اسمها هاف سبورت نهائي


احنا عندنا 1300 مانوال - 1300 اوتوماتيك
وكمالياتها زي ما هي مذكورة في صفحة الكماليات في موقع مصرية

http://www.mitsubishi-motors.com.eg/products/lancer/1600GLX/options.html

هي تكييف وباور ستيرنج وسنتر لوك وزجاج كهرباء ومرايات كهرباء وعفشة رياضية وتجهيزات راديو كاسيت يعني 4سماعات وضفيرة واريال جانبي (يعني تشتري الكاسيت وتركبه فقط)



1600 مانوال - 1600 أوتوماتيك
وكمالياتها تكييف وباور وسنتر وزجاج كهرباء ومرايات كهرباء وايموبيليزر وايرباج واحدة للسائق وفرامل ABS وعفشة رياضية وتجهيزات راديو كاسيت



1600 أوتوماتيك سبورت
وكماياتها تكييف وباور وسنتر وزجاج كهرباء ومرايات كهرباء وعفشة رياضية وايموبيليزر واتنين ايرباج وفرامل ABS
ثم معاها فتحة سقف وسبويلر خلفي ولمبات شبورة وراديو كاسيت و سي دي واريال سقف وأعتاب جانبية وكساحات أمامية وفوانيس أمامية غامقة وفوانيس خلفية شفافة وفرش عادي


1600 أوتوماتيك سام هي نفسها السبورت لكن تفرق فقط فرش جلد والفوانيس الأمامية مش غامقة انما عادية والخلفية مش شفافة انما حمراء عادية

دول الست اشكال الموجودين فقط لا غير


اما بأه موضوع الهاف سبورت فده كله خليجي


بخصوص الفتيس فكل ال 1300 بدون CVT


وكل ال 1600 بأشكاله الأربعة (مانوال - اوتوماتيك - سبورت - سام ) فيه CVT

وآدي صفحة المواصفات من كتالوج العربية من موقع شركة مصرية

http://www.mitsubishi-motors.com.eg/products/lancer/1600GLX/spec.html

جزئية أخيرة أحب أوضحها وهي ان الرواس عنده المصري وعنده الخليحي وبيدي ضمان حقيقي على الخليجي يعني 3 سنوات او 60 ألف كيلومتر


وأي استفسار تاني انا تحت امرك

[007]

شكرا علي الشرح الوافي بس ياريت تزودونا بالأسعار

[Dr.SherifMansy]

ألف ألف شكر يا باشمهندس ، حضرتك كده ريحتنى من لخبطة فظيعة كنت حاسس بيها ، و لكن هل الردود اللى سمعتها (و كما سبق حددت الأماكن) معنى كده ان كان فيها تكبير دماغ او للأسف ردود بدون معرفة ؟
أيضا حضرتك ان الرواس بيدى ضمان حقيقى على الخليجى فهل معنى كده ان لو ربنا قسم لى و جبت من الرواس خليجى صيانتها تبقى عند سيادتكم ؟
و آسف للإطالة و لكن هل تعتقد انى لو لقيت عند الرواس خليجى فيها ايرباج و ABS علما بأن الخليجى عادة فيه كاسيت أصلى فهل كده تبقى كويسة علشان اشتريها (أعلم ان سيادتك بالتوكيل و لكن سؤال من خبرتكم برؤية العربيات فى السوق) و استفيد من فرق السعر ؟؟
و أخيرا أسف يا باشمهندس و لكن ازاى المانيوال فيها ABS ؟؟ مش قادر استوعب النقطة دى ، يعنى حانقل الغيارات ازاى؟؟
ألف ألف شكر على المعلومات القيمة و المساعدة و سامحنى لو طولت بس من عشمى

[مصراوي جدا]

شكرا علي الشرح الوافي بس ياريت تزودونا بالأسعار

للأسف الأسعار متغيرة دائما علشان كده ارجو الاتصال بمعرض الشركة للحصول على آخر الأسعار ت: 19830
-------------------------------------------------------------
بخصوص صيانة اللانسر الخليجي المشتراه من الرواس هي في مراكز خدمة الرواس الأربعة :
5 ش النيل المهندسين - بجوار نفق العجوزة ت: 33475992
ك 12 طريق الاسكندرية الزراعي بجوار غبور ت: 42151570
وسط البلد 12 ش عبد الخالق ثروت ت: 25758130
120 ش بورسعيد غمرة ت : 24830754
انما مركزي خدمة شركة مصرية (قليوب وجسر السويس ) لضمان السيارات المصري فقط

مع ملاحظة ان للمحافظة على الضمان لازم تعمل الصيانة كل 10 آلاف كيلو في المراكز المعتمدة

وحسب كلامك لو لقيت عربية خليجي ضمان الرواس وفرق سعر كويس عن المصري تبقى كويسة
---------------------------------------------------------
طبعا سؤالك الأخير صح جدا جدا ازاي مانيوال وتبقى CVT

طبعا دي غلطة مني أنا المانوال طبعا مفيهوش CVT

انما كان قصدي ان الـ 1600 الأوتوماتيك العادي والسبورت والسام فيهم CVT

[Dr.SherifMansy]

مليون شكر و احترام لك يا باشمهندس على ردك الجميل و توضيح الأمور المتلخبطة فى دماغى ، كده كل شئ واضح
:D

[remony]

فتيس الانسر 1600 الأوتوماتيك Cvt