سعر اعادة بيع اللانسر بوما - " موضوع للنقاش "

[Hosam_Optrawy]

السلام عليكم ورحمة الله وبركاته

مفيش شك ان اللانسر بوما من ساعة مانزلت مصر موديل 2004

وهى من انجح واكثر العربيات انتشارا فى مصر

بيتهيألى مفيش مبيعات حصلت زى العربيه دى فى خلال ال 5 6 سنين اللى فاتوا وحصلت على ثقة الجميع

ومن اكبر مميزات اللانسر هى انها مطلوبه وتتباع وانت واقف وماسكه سعرها

بس مع التركيز مع اسعار الانسر لقيت ان حكاية ماسكه سعرها دى مش موجوده او كانت موجوده وحاليا مبقتش موجوده

طب ازاى ؟

مبدأيا سعر العربيه زيرو بيزيد كل سنه عن اللى قبلها

والمفروض ان دا يزود سعر المستعمل معاه

تمام ؟

بس الظاهر من كتر ما اللانسر كترت وباسعار متفاوته وفئات مختلفه

الناس بقت مضطره تنزل الاسعار عشان تعرف تبيع لانه لو مانزلش السعر هايشترى من غيره , ماهى مغرقه الدنيا

يعنى مثلا لما اشوف لانسر 2008 سبورت 1600 معروضه على 78

واوبترا 2008 اوتوماتيك معروضه على 78

يعنى معنى كدا ان انا مثلا ممكن ادخل عربيتى فى لانسر سبورت نفس موديل السنه بتاعتى ؟

واللانسر زيرو دلوقتى ب 130 والاوبترا ب 91 دلوقتى

طب ازاى حد يفهمنى !!

ممكن تقولولى دى اكيد حالتها مش كويسه او فيها حاجه

اقولكم ماشى ممكن

بس المشكله ان الاسعار دى مش من واحد او اتنين لا من كذا واحد

مثلا فى واحده 2007 مانيوال 1600 معروضه ب 69 ( يعنى خسرانه حوالى 30 الف فى 3 سنين )

لانسر 2007 سوبر اكشن معروضه ب 79 ( خسرانه حوالى 35 الف )

وال 2008 سبورت تعتبر خسرانه 35 او 40 الف فى سنتين

لان هو اكيد مش جايبها ب 130 كان جايبها مثلا ب 120 او 115

مش كتير برضه 35 الف خساره فى سنتين على عربيه زى اللانسر باسمها وتاريخها ؟

مستنى ارائكم

وياريت اللى عنده تجربة بيع لانسر قريب يشاركنا

[zoro007]

موضوع جميل
لكن المشكله فى مصر كل عربيه ليها سوق والسوق هوه الى بيحكم على سعر المستعمل
تعرف انك لو اشتريت عربيه زيرو النهرده وروحت ركبت عليها النمر والترخيص بكره بينزل من تمنها 5 تلاف جنيه :) يعنى عربيه مكملتش معاه يومين نقصت 5 تلاف جنيه فى العقل تقول ليه دا بالعكس انا رخصتها ودفعت تكالفها يعنى العربيه على الجاهز للمشترى

لكن السوق بتعنا دى طبيعته وبيمشى فى تيار متعرج مش خط مستقيم

غير ان اللانسر 1600 كامله الموديلات تحت 2009 مكنتش ب 130 الف كانت فى التسعينات تقريبا على ما اتذكر بتبدا من 97 الف او 95 فيما فوق مش متذكر اوى دا وقت مكنت عايز اشترى عربيه زيرو

يعنى مثلا لما اشوف لانسر 2008 سبورت 1600 معروضه على 78

السعر دا غريب فعلا ومش موجود لعربيه حالتها طبيعيه
اكيد هتلاقى فيها حاجه

[أبو إياد]

عربيتى 2007 1300 مانيوال عرضتها للبيع من فتره قريبه حب استطلاع
لقيت السعر من 63 حد ادنى
68 حد اقصى
مع العلم العربيه رشه اكصدامين
وشاريها ب93 من 2007
فكره البيع شلتها طبعا من دماغى نهائى

[Ralliart]

فعلاً سعرها وقع والسوق بتاعنا عجيب اساساً لان عربيه زي الكريستاله بنفس سعرها لما كانت زيرو
والمكوه والبومه قربو على سعرها !! ومفيش فايده تلاقي واحد عايش في الوهم وعارضها ب60 الف وكل واحد ماشي بمزاجه وحاجه تقرف
ابتديت اعذر اللي راكب عربيات صيني زيرو

[مصراوي جدا]

من حوالي شهر عملت الموضوع ده في المنتدى العام عن سعر اعادة البيع

http://www.nilemotors.net/Nile/117472-a.html

[د.محمود صلاح]

كثرة المعروض مع الأزمة والغلاء وتفضيل الناس للزيرو , والشكل الجديد والفتيس الجديد ,, كل ده عوامل أدت لهبوط السعر

[KSA2011]

كثرة المعروض مع الأزمة والغلاء وتفضيل الناس للزيرو , والشكل الجديد والفتيس الجديد ,, كل ده عوامل أدت لهبوط السعر

+111111111111111

[mgasser]

انا لسه شاري لانسر موديل 2008 1600 خليجي ( واحد ايرباج - طاره سبور - اوتوماتيك - ابانوس ) بـ 84.5 ... و ناس بتقولي سعرها حلو مش وحش...انا شفت مهازل يا جماعه ... و الله اللي عايز يبيع عربيته يصبر و يستني ... الا بقي لو هو محتاج ... لكن الكلام اللي بتقولوه ده تهريج جدا ... لانسر سبورت بـ 76 الف ؟؟؟ هو فين ديه ؟ و انا ابيع بتاعتي و اشتريها دلوقتي ... بس طبعا الحاله و انتم عارفين ... و ربنا يخللنا بلدنا و عظيمه يا مصر و يجعله عامر

[seadaelbeda]

انا سمعت انها هتتجمع فى مصر ولو حصل الكلام ده على ايد ابو الفتوح حتنزل كتيروهيضيع سعر المستعمل

[Ahmed Nouh]

افتكر ان من كتر العربيه فى السوق وفرق الكماليات واكيد فرق الحاله عملها رنج سعر فى اعاده البيع كبير ممكن تلاقى عربيتين نفس الموتور والسنه بس بينهم حوالى 5 الاف فرق , انا لما اشتريت كانت ال 1300 مانيوال بتتكلم من 71 لحد 79 وكلها 2008 وبعدين فهمت انه فرق نضافه العربيه مش اكتر

يمكن كل العربيات اللى حضرتك شوفتها كانت بالحاله دى خاصه ان اللانسر بتتباع هوا من كتر الطلب عليها , بس مين عارف يمكن بكره تتضرب ومنلاقيش لها بيعه او يمكن سعرها ينط لفوق فجأه زى الكريستاله

[marwan_147]

السلام عليكم ورحمة الله وبركاتة

والله يا جماعة الموضوع جميل انا كنت شارى لانسر اوتماتيك 1300 موديل 2007 وبعتها 72 الف وكنت شارى فوق 90الف .. وبصراحة انا بفكر الان فى ميجان 2007 تقريبا بنفس السعر والفارق شاسع فى الامكانيات والابشن اللى فى العربية .. ولما حسبتها من ناحية التوكيل وانه غالى لقيت ان العملية محصلة بعضيها فلية مستمتعش بعربية مثل الميجان طالما ان الاسعار كدة كدة فى الارض واكيد مفيش عربية مش بتصرف تحياتى للجميع