اللعب في العداد

[abcdefghijk]

السلام عليكم و رحة الله
مشكلة كبيرة موضوع الغش في العدادات الديجيتال ،تلاقي العربية عاملة 100000 و لا اكتر و يروحو لاعبين في العداد ترجع شابة في نظر الزبون

نفسي اعرف خطوات عملية الواحد يقدر يعرف بيها عمر السيارة الحقيقي..و ياريت لو في علامات سهلة الواحد يعرفها بنفسه
و هل التوكيل بيحدد عمرها الحقيقي ؟
و جزاكم الله خيرا

[M.FOUAD]

التوكيل يعرف ان كانت فيشة العداد اتشالت قبل كدة و لا لا و انت بكدة تبعد عنها بس اهم حاجة الحالة مش مهم العداد بس ميقدرش يعرف العداد الحقيقي بالضبط

[amooooor_s]

أعتقد ان حالة العربية بتبين هية ماشية كام الف يعني حالة عربية ماشية 40 الف مثلا مش زي ماتكون ماشية 100 الف يعني بقصد ان الحالة بتبان على العربية

[أبو إياد]

ولا التوكيل ولا اى حد فى الدنيا للاسف يقدر يكتشف التلاعب ده مافيش غير حاله العربيه فقط هى اللى بتكون مقياس لعدد الكيلوات
وفى حاجات صغيره اوى ممكن منها تعرف زى مقبض الفتيس والطاره ومقعد السائق حاله الصالون عموما هى اكتر حاجه تكشف حاله العربيه

[A7MED_PHARMA]

اسمع ان في ناس شغاله في الموضوع ده..تصفير العدادات

وزي ما محمد بك عزت قالك

العربية هتتكلم عن نفسها...وهتكون واضحة أوي لو ماشية كتير
والأهم طبعا

حالة العربية ..مش عدادها

[abcdefghijk]

في واحد قاللي تبص على وش الموتور لو لقيته معرق زيت تبقى ماشية كتير
بس واحد تاني قاللي ده احيانا بيحصل لو هى عربية جديدة بس الزيت استهلك فيها اكتر من وقته

حد عنده خلفية عن موضوع الموتور ده؟

[zoro007]

محدش بيبص دلوقتى على العداد المهم حالة العربيه عمر مكان العداد هوه الفاصل بين حالة العربيه فى الشراء او البيع

العداد فايدته الوحيده بس انك بترتب عليه حجات تانيه بالعربيه حالة الموتور وسير الكاتينه و و و ... الخ
بمعنى لما تلاقى عداد العربيه عامل كلوات كتير بتركز كل تركيزك على فحص الموتور وبقيت الحجات اللى الخوف يكون صاحب العربيه الاصلى مهمل فيهم ويسببوا مشاكل بعد كدا

ممكن تلاقى عربيه عامله 100 الف كيلوا حالتها احسن من عربيه عامله 30 الف فمش مقياس العداد اطلاقا

[mazagngi2010]

محدش بيبص دلوقتى على العداد المهم حالة العربيه عمر مكان العداد هوه الفاصل بين حالة العربيه فى الشراء او البيع

العداد فايدته الوحيده بس انك بترتب عليه حجات تانيه بالعربيه حالة الموتور وسير الكاتينه و و و ... الخ
بمعنى لما تلاقى عداد العربيه عامل كلوات كتير بتركز كل تركيزك على فحص الموتور وبقيت الحجات اللى الخوف يكون صاحب العربيه الاصلى مهمل فيهم ويسببوا مشاكل بعد كدا

ممكن تلاقى عربيه عامله 100 الف كيلوا حالتها احسن من عربيه عامله 30 الف فمش مقياس العداد اطلاقا

[A.Saad]

فيه حركة انك نعرف رقم الشاسية بالكامل من القايم مش من الرخصة وتسال فى التوكيل على الضمان
يعنى يها فى الضمان ولا لا
وتسال على اخر صيانة اتعملت فيها

بس لو تاجر ......... اعرف انه مش بيوديها التوكيل اصلا

[m_waheed]

اعتقد ان في مراكز صيانة تقدر تكشف قوة كبس الموتور وفي معادلة من خلالها بيقولك المهندس المختص العربية دي ماشية كام وعادة بيقولك استهلاك زيادة 10% عن الرقم الموجود في العداد نتيجة الاشارات واستهلاك الاوتوماتيك يعني مثلا ممكن يقولك العربية دي عاملة 70000 كيلو ولو لقيت في العداد 62000 يبقي طبيعي غير كده يبقي العداد ملعوب فيه

[د.محمود صلاح]

فعلاً الموضوع صعب وفي ظل تأجير العربيات العربيات بتبقى هلكانه وملعوب في عداداتها اكيد عشان تتباع

[A7MED_PHARMA]

اعتقد ان في مراكز صيانة تقدر تكشف قوة كبس الموتور وفي معادلة من خلالها بيقولك المهندس المختص العربية دي ماشية كام وعادة بيقولك استهلاك زيادة 10% عن الرقم الموجود في العداد نتيجة الاشارات واستهلاك الاوتوماتيك يعني مثلا ممكن يقولك العربية دي عاملة 70000 كيلو ولو لقيت في العداد 62000 يبقي طبيعي غير كده يبقي العداد ملعوب فيه

يعرف عاملة أد إيه من كبس الموتور
طيب لو واحد مهمل أوي في عربيته ..وكبس الموتور عنده مش إلي هوا
ده يكون معناه إنها ماشية كتير؟؟؟
ماعتقدش
والله أعلم

[zaza_lanos]

حالة العربية
وحسبى الله ونعم الوكيل فى الناس
اللى مابتخفش ربنا وبتساعد على الغش

[m_waheed]

يعرف عاملة أد إيه من كبس الموتور
طيب لو واحد مهمل أوي في عربيته ..وكبس الموتور عنده مش إلي هوا
ده يكون معناه إنها ماشية كتير؟؟؟
ماعتقدش
والله أعلم

انا عملت كده فعلا والمهندس ضرب نسبة كبس الموتور في رقم ( تقريبا في معادله هما بيطبقوا عليها ) وفعلا بدون ما يشوف العداد عندي جايب كام قالي العربية دي عامله 110000 كيلو والعداد كان عامل 101000 والله اعلم

[abcdefghijk]

يعني زى البطيخة

ربنا يستر