استفسار عن عيب في اللانسر ؟

[wafer]

-انا كان معايا لانسر 1600 اوتوماتك كانت عاملة 29000 و كان الدركسيون بتاعها بيرج عند 110 و ناس كتير سمعتهم بيشتكو من العيب دة ؟
-و كمان سمعت إن دة عيب في تيل الفرامل عشان مش بيعيش و لازم يتغير كل 10000 و هو ب 350 تقريبا ياما هيبوظ الطنابير و بلتالي الدركسيون هيرج زي ماقولت في الأول؟
-ياريت لو فية حد معا العربية و عمل بيها اكتر من 50000 يقوللي العيب دة عندة هو كمان والا لأ و يلريت يقولي على حالت العربية؟
- و كمان ياريت لو اي حد من الأعضاء يتكرم و يكتب اسعار الصيانات اللي عملها 10000 20000 30000 50000 ؟ و ياريت لو يقوا العربية بتصرف جامد وللا كويسة صرف على العربية كام لحدالنهردة؟

اسف يا جماعو إنني طولت عليكوا .....ياريت تستحملوني اصل في واحدة ادامي كسر عداد ...

[Dr Ahmed]

يا راجل يا طيب.. رجرجة الدركسيون مالهاش علاقة بنوع العربية لأنها فى 99% من الحالات بتكون بسبب تآكل الكاوتش أو إحتياجه للترصيص..
وبالنسبة للتيل فلىّ أصدقاء لم تظهر عندهم الصفارة مع الفرملة إلا عند 45 ألف كم لكن السيارة مانيوال... ومن المعروف أن الأوتوماتيك بيستهلك التيل أكتر من المانيول لأن فى المانيوال التيل عند الفرملة بيوقف القصور الذاتى للعجل لأنك بتبقى دايس دبرياج .. إنما الأوتوماتيك التيل بيقف ضد عزم الموتور فلازم يتّاكل أسرع لأنه بيشتغل ضد قوة أعلى.

[wafer]

شكرا لردك Dr Ahmed بس حضرتك ممكن تقوللي عربيتك عامله كام و بترج واللا لأ و كمان بلنسبة لباقي الأسئلة و الصيانات
و على فكرو مش بتكلم على الصفارة خالص انا العربية مكنتش بتصفر معايا بس كان في رجة في الدركسيون عند 110 و سمعت الحوار دة من كذا واحد ياريت يا جماعة حد تاني يطمني لأني مش معقول أغير تيل كل 10000 عشان مبوظش الطنابير خصوصا التيل غالي 330 ج

[Dr Ahmed]

عربيتى عاملة 19 ألف والدركسيون الحمد لله لا يرتج أبدا
وصيانة ال 10 آلاف غير مكلفة ، الصيانات الزوجية هى المكلفة
برجاء مراجعة مواضيع منتدى الانسر لأن كل هذه المسائل أذكر أن الأعضاء تناقشوا فيها سابقا.

[SEATLOVER]

معلش انا لى تعقيب على العنوان (استفسار عن عيب في اللانسر) استخدام كلمة عيب قبل اللانسر بيدى انطباع لى اللى بيقرا العنوان عن عيب عام فى موديل الانسر ..و خصوصاً فى شريط اخر المداخلات اللى بيظهر فى الصفحة الاولى
كان ممكن تكتب (رجرجة فى الدركسيون ) أو (ظهور رجرجة فى دركسيون الانسر)

وذلك لأن فى اعضاء كتير من المنتدى بيحددوا على كلامنا ممكن يجيبوا اية

مع كل التقدير و الاحترام لللانسر

[شاهين - بنز]

أنا جبت بيها 170 وسافرت ساعتين على 150 ومكانش في أي نوع من الرجرة نهائيا

وموضوع التيل فعلا بيتآكل بسرعة بس مش قبل 20 ألف كيلوا

[samehlow]

انا عربيتي موديل 2001 وعاملة 53000 كم ومفهاش اي مشكلة خالص
والتيل غيرتة علي 40000 كم بس
ومفهاش اي مشكلة خالص
وشكرا

[wafer]

شكرا يا جماعة ليكو على الرد انا متشكر جدا و ربنا يباركلكم في عربياتكم
- بلنسبة ل Seatlover انا فعلن كنت كاتب العنوان على انه عيب في كل العربيات اللانسر لأني لاحظتها في العربية اللي كان معايا و تقريبا لاقيت كذا موضوع في المنتدى بيتكلم عن العيب دة فقولت اتأكد بنفسي بس الحمد لله الأعضاء هنا طمنوني و متزعلش مني :)

[wafer]

بلنسبة للعنوان لو مدايق حد غيروه انا مش عارف اغيرة من عندي

[wafer]

العربية اللي قدامي 1600 اوتوماتك مواصفات مصرية عاملة 800 كيلو مامشيتش اصلا 2007 اخدها على كام و على فكرة صاحب العربية شريها اسط كدة إية الورق اللي المفروض اعملة عشان اشتريها توكيل بس كدة و خلاص ؟؟

[salehgharib]

يا جماعة لازم نكون موضوعيين العربية ذى الفل بس لازم نسمع أى شكوى عشان نستفيد ومفيش عربية خالية من العيوب العملية نسبية

كان عندى نفس العيوب تماما فى 1300 مانيوال كما انه يتكلم بلسانى

وكان الحل كما يلى

الرجرجة فى الدركسيون نتيجة إعادة رصرصة العجل لان عند عمل خرم بالعجلة يتم تدوير الكوفر بشكل خاطئ يتطلب رصرصة العجلة وسترى النتيجة إن شاء الله

الجزء الثانى
حدوث نتشة بالأول بالزات لم أرى لها حل حتى الأن وفى الغالب نتيجة عن التيل ماسك جامد ويمكنك التأكد عن طريق سخونة الطاسات يمكنك التجربة

أو تغيير بيجوهات


انا لم اتوصل الى نتيجة نهائية

وشكرا يمكنك التواصل لكى نصل إلى حل

salehgharib@hotmail.com

[hfekry]

أستاذى . انا عربيتى موديل 2001 اتوماتيك وماشية لغاية دلوقتى 150 الف كم وبوصل بيها لغاية 160 كم / الساعة ومافيش اى رجرجة . اللى عندك فى الغالب هتلاقيه انك محتاج ترصص العجل . ماتخفش الانسر عربية حلوة وتمنها فيها ومصاريفها قليلة . ربنا يديك خيرها ويكفيك شرها .

[عمرو عبيد]

ان بصراحة مش شايف اى عيب فى الدريكسيون انا عامل 10000 و العربية معايا زى الفل و العيب الوحيد بصراحة هو ان العفشة ناشفة حبتين و بتهبد جامد فى المطبات بس ان شاء الله تلين مع الأستخدام

[ahmedamee]

رجرجة الدركسيون اكيد من الطنابير , بأختصار حضرتك نسيت التيل لحد ما كل الطنبورة , عن تجارب التيل الأصلي مفيش زيوا إلا لو بقة عاوز تركب Break Kit كاملة , انما عامة خلي عينك على زيت الفرامل , اول لما تحس انه نقص شوية , غير التيل و ريح دماغك .

[ahmedamee]

الرجرجة على السرعات العالية مش من التيل بس , تبقي من التيل او من الطنابير لو الرجرجة اثناء الضعط على الفرامل ’, اما لو رجرجة على طول فدي يأما كاوتش او ترصيص دي كل الحكاية , اموضوع مالهوش دعوة بكام الف عملتهم العربية ولا اية حتي نوع العربية, الحكاية موضوع صيانة بس ,,