مشكلة صوت صفارة عند تشغيل المكيف على 2

[ashrofa72]

الباشمهندس طارق والاخوة الكرام اعضاء نايل موتورز ارجو الافادة عن سبب سماع صوت صفارة عند تشغيل المكيف على سرعة 2 مع العلم عدم وجود الصفارة على سرعة 1 فى المكيف المشكلة دى من يومين بس.
العربية لانسر 2009 1600 سى سى
مع الشكر الجزيل .......................

[mostafashokry]

فقط على السرعة التانية , و ال فى بدايه التشغيل؟

أنت بتسمع الصوت من الداخل و لا من الخارج؟؟؟ لو كان من الخارج يبقى
صوت الصفارة أما نوعية سير كومبريسور التكييف غير جيده ده لو كنت غيرت سيور قريب

أو لو كنت عملت أي صيانه أو غيرت زيت يكون او أى شئ من هذا القبيل هيكون في شحم أو زيت وقع على السير فبيسبب الصفارة ديه ، أو سير التكييف مشدود عليه أوى أو العكس مرخى.
و لو كان من الداخل يبقى العيب فى مروحة التكييف أو مجرى هواء التكييف مسدود جزئيا أو عايز يتنظف.

[kh_talaat]

كان عندي نفس المشكلة وقولتلهم في التوكيل اثناء صيانه ال20 ألف وصلحوها

ولما سألت المهندس قالي نضفنا فلتر التكييف ، فممكن تستنى لأقرب صيانه قادمة وتقولهم او تنضف الفلتر بنفسك وتشوف النتيجه

[ashrofa72]

انا عاوز اروح اعمل صيانة 10 الاف كيلو يبقى اقولهم على الموضوع ده يعنى المشكلة فى الفلتر

[mr_vampire]

اعتقد ان الصوت بيبقي من السير في الغالب عايز يتنضف مش اكتر زي سير الموتور لما بتدوس بنزين صوته بيعلي او بيخف لما تشيل رجلك فهو كدة لما بتزود سرعة التكييف صوته بيبان طب وعلي 3 ايه النظام لو بيعلي يبقي اكيد سير والله اعلم تبقي تعرفنا بقي طلعت ايه عشان نستفيد

[Ralliart]

حصلتلي وغيرت السير والصوت راح

[M.Nasr]

طيب جرب الاول تنضف فلتر التكييف بالهواء ولو فضل الصوت زى ماهو اكشف على السير
وان شاء الله تكون بسيطة

[gta10]

ياباشا الصفارة دة كانت عندى رحت فكيت فلتر التكيف و نظفته بالبلاور و ركبته و الصفارة راحت بس الفلتر طلع تراب كتير جدا و الفلتر ده هاتلاقيه ورا درج التابلوه هاتفك الدرج هاتلاقى مسمارين فكهم هاتلاقى الفلتر طلع معاك نظفة و ركبه برده بنفس الطريقة

[ashrofa72]

والله يا جماعة متشكر جدا على الاهتمام والرد انا حأحاول اشوف الفلتر وافكه المشكلة فى عدم الخبرة والمعرفة بالاشياء البسيطة دى لكن البركة فى النصايح الموجهه من طرفكم ...........

[m_waheed]

راجع برده علي سير التكييف

[mohamedway]

راجع برده علي سير التكييف

العيب ده مشهور قوى فى البومه و سببه ان فلتر التكييف عاوز يتنضف و هى ده المشكلة بشكل مؤكد 100% و مفيش أى احتمالات ان يكون السير هو السبب لأن الصفارة ده فى التابلوه جوه العربيه مش من عند الموتور عشان يبقه سير.


تنظيف الفلتر لا يحتاج توكيل و لا أى صنايعى فى أى حته و كل واحد يقدر يفكه بنفسه و هو عبارة عن درج بمسمارين بتفكهم و تشده من مكانه و تنضفه بالهوا و تدخله تانى و تربط المسمارين و مكانه خلف درج التخزين بتاع التابلوه بس لازم درج التابلوه يتفك الأول و ده سهله جدا (توجد قطعتين بلاستيك فى أخر الدرج على الجنبين من فوق و دول اللى الدرج بيبقه ساند عليهم و هو مفتوح و هتلاقى البلاستكه اللى على الشمال يمكن فكها عن طريق دفعها للداخل (عكس اتجاه التحميل عليها و الدرج مفتوح) و أول ما تشيل البلاستكه ده الدرج هيتفتح للأخر لغاية الأرض و هتقدر تشيله خالص و تتعامل مع الفلتر و وتركيب الدرج بردو سهل و هتحط البلاستكه زى ما شيلتها و شكرا على كده)

[Ralliart]

العيب ده مشهور قوى فى البومه و سببه ان فلتر التكييف عاوز يتنضف و هى ده المشكلة بشكل مؤكد 100% و مفيش أى احتمالات ان يكون السير هو السبب لأن الصفارة ده فى التابلوه جوه العربيه مش من عند الموتور عشان يبقه سير.


تنظيف الفلتر لا يحتاج توكيل و لا أى صنايعى فى أى حته و كل واحد يقدر يفكه بنفسه و هو عبارة عن درج بمسمارين بتفكهم و تشده من مكانه و تنضفه بالهوا و تدخله تانى و تربط المسمارين و مكانه خلف درج التخزين بتاع التابلوه بس لازم درج التابلوه يتفك الأول و ده سهله جدا (توجد قطعتين بلاستيك فى أخر الدرج على الجنبين من فوق و دول اللى الدرج بيبقه ساند عليهم و هو مفتوح و هتلاقى البلاستكه اللى على الشمال يمكن فكها عن طريق دفعها للداخل (عكس اتجاه التحميل عليها و الدرج مفتوح) و أول ما تشيل البلاستكه ده الدرج هيتفتح للأخر لغاية الأرض و هتقدر تشيله خالص و تتعامل مع الفلتر و وتركيب الدرج بردو سهل و هتحط البلاستكه زى ما شيلتها و شكرا على كده)

لو الصوت مش عند الموتور يبقى الفلتر طبعاً
وشكراً لشرحك هجرب انضفه واحاول اصور وربنا يستر علشان كل ما امد ايدي على حاجه في العربيه دي بتخرب

[wael2sh]

الكلام صح 100 1000 كان عندي نفس المشكلة ووتحلت بنفس الطريقة وعملهلي وانا في الصيانة (نضافة للفلتر )

[M_H]

انا حصلت معايا والموضوع بسيط جدا - مجرد انك تنظف فلتر التكيف حتي لو بنفسك لو تعرف تفكه . وان شاء الله خير.

[kemoelord]

اعتقد ان الصوت بيبقي من السير في الغالب عايز يتنضف مش اكتر زي سير الموتور لما بتدوس بنزين صوته بيعلي او بيخف لما تشيل رجلك فهو كدة لما بتزود سرعة التكييف صوته بيبان طب وعلي 3 ايه النظام لو بيعلي يبقي اكيد سير والله اعلم تبقي تعرفنا بقي طلعت ايه عشان نستفيد

سرعة التكييف ليس لها اي علاقه بسرعه دوران سير التكييف وانما هي مرتبطه فقط بسرعه المروحه المسؤوله عن التكييف في التابلوه (ومش فاكر الصراحه هل بيبقى لها تاثير على المحرك ولا لا) ,
سرعه دوران سير التكييف واي سير في السيارة مربتط بدوران المحرك فكلما زادت لفات المحرك زادت سرعه السيور