غيرت قواعد الموتور... ولكن!

[boma]

يا جماعه انا كان عندى رجرجه فى الموتور بحس بيها لما اجى اقف فى اشارة مثلا خصوصا وانا مشغل التكييف ولما انقل من d الى n او اجيب r وكانت بتزيد الرجرجه و رحت للميكانيكى قالى دى قواعد الموتور وكشف عليها وفعلا لاقى 3 قواعد مقطوعين وخصوصا قاعدة اسمها الجمل وقاعدة تانية بتاعة الفتيس تحت فلتر الهواء واشترتهم وركبتهم المهم الرعشة راحت والرجرجة راحت بس بردو بحس برجة بسيطة اوى اوى عند تشغيل التكييف بس مش زى الاول .. فقلتله عليها قالى اللانسر كده وهيا مش محسوسة الا لما تركز اوى غير الاول فهل كده بقت طبيعية ولا فى حاجة غلط ولا ايه انا غيرت 3 قواعد الامامية والخلفية اللى هى الجمل واليمين بتاعه الفتيس اما الشمال سليمة وزيت الفتيس حلو ومش ناقص والعفشة كويسة مفهاش حاجة والموتور حالته كويسة جدا ... يا ريت حد من المختصين يرد عليا فى السبب وليه بحس كده مع التكييف بس من غير التكييف مفيش الرجة نهائى

[M.Al-Hefnawy]

جرب تنضف الايدل كنترول بـ wd40 وبعدين اعمل ايدل ليرن وشوف.

[mr_vampire]

ايه ياصاحبي نحل مشكلة التكييف نلاقي حوار تاني في قواعد المتور. عموما العربية لو 1300 الرجرجة ده طبيعية عشان التكييف حمل علي الموتور ( وده حاجة معروفة علي السرعات الاول والتاني ) انما علي العالي مبتحسش برجرجة.لو العربية 1600 يبقي ممكن في حاجة تانية بقي انا معرفهاش. ثانيا انتا بتحط بنزين ايه ؟؟؟؟؟؟؟؟؟ ثالثا هي القواعد تمنها كام كلها تفصيلا ( سعر كل واحدة علي حدة ان امكن. وصناعة ايه؟؟؟؟؟؟؟؟؟؟

[wdramiz]

جرب تنضف الايدل كنترول بـ wd40 وبعدين اعمل ايدل ليرن وشوف.

يرجاء التكرم اين الايدل كنترول وكيف اعمل ايدل ليرن

ايضا هل قواعد الموتور اصلية ولا تايلندي وياريت تخبرنا بالاسعار والمصنعية لو يكرمت

مع خالص شكري لكما

[boma]

قواعد الموتور تايلاندى الامامية 35 جنيه والجمل 80وقاعدة الفتيس 110والمصنعية 50 جنية .
القواعد الاصلى الاربعه بالف جنية.... بس الفرق كبير طبعا قلت التايلاندى وامشى على مهلى وخلاص وانا سألت فى التوكيل قالوا الاربع قواعد ب الف ومائتين جنيه ومصنعيه 200 جنيه تقريبا

[authority973]

الرجرحة عمرها متكو ن طبيعيه ا نا عربيتى 1300 وكان عندى نفس المشكلة وانت مشغل التكييف بتزيد و تحس الدريكسيون بيتهز بتردد بسيط اخر مرة لما عملت صيانة فى التوكيل وقلتلهم اتظبتت و بقت زى الفل ومفيش اى رجرجة بتكييف او من غير و غالبا دى ليها علاقة بكهربة العربية لأنها ظهرت عندى بعد تغيير البطارية, حضرتك اول حاجة تجربها سيب العربية دايره على N و هى واقفه لمدة ربع ساعة لأن الكبيوتر بيعمل re programing و بيظبط نفسه لو منفعش حضرتك ممكن تروح التوكيل تنضف ال injection و بتتحط على جهاز بيظبط الدايره الكهربية, يا ريت حضرتك تجرب و تقولنا..

[mohamedrabia]

انا معايا نيسان صني وبحس بنفس الرجه بس علي خفيف وانا واقف بيها كنت معتقد ان المشكلة من المساعدين لحد ما رحت اغير زيت صاحبي كان معايا قلته اركب واطلع بيها والكابوت مفتوح لاحظت ان الماتور اتهز فعرفت ان القواعد مش تمام وكان ليا صديق معاه لانسر 2008 نفس المشكله الغريب ان كل العربيات الي فيها المشكله اوتوماتيك كنت عايز اعرف الطقم الاصلي للقواعد للصني بكام وهل يمكن لاي ميكانيكي تغيرها ولا التوكيل وبس

[Ralliart]

انا عندي نفس المشكله وكمان لما بجيب r العربيه بتفضل واقفه ثواني وبعدين ترجع ورحت التوكيل وقلتلهم اكشفو على القواعد وكشفو قالولي سليمه وبعدين حطوها على الجهاز (ظبط الموتور) والرجه قلت شويه بس لسه موجوده ومش عارف فين وفي التوكيل بيقولو طبيعي وكله تمام؟؟
ويا ريت تقولي زيت الفتيس بتشوفه ازاي ؟من الغطا اللبني اللي مكتوب عليه atf ولا من حته تانيه

[A7MED_PHARMA]

الرجة دي غبية جداااااااااااا
وبالذات لو الموتور بتاعك صغير ( 1300 سي سي )
بس دي فعلا حاجة من إتنين
1.قواعد موتور
2.كهربا

وإسألوا إستشاري قسم الانسر ...أبو إيااااااااااد

[M.Al-Hefnawy]

مكان حساس الأيدل كنترول في اللانسر تحت المانفولد اللي راكب فيه الخرطوم الأسود بتاع فلتر الهوا تروح لميكانيكي ينضفه بمنظف كاربيراتير ويركبه تاني..
طريقة الايدل ليرن : تفتح الكونتاك لمدة 5 ثواني وتقفله وتكرر العملية دي 3 مرات وبعدين تشغل العربية لمدة 3 دقائق وبعدها تشغل التكييف لمدة 3 دقائق وتبطل العربية.
أو طريقة سهلة شوية تفصل كابل البطارية السالب لمدة دقيقتين.

بردو أتأكد إن الآر بي إم عندك مضبوط ممكن الموتور واطي وعاوز يعلى من مسمار البوابة.

وإن شاء الله تبقى حاجة بسيطة

[A7MED_PHARMA]

مكان حساس الأيدل كنترول في اللانسر تحت المانفولد اللي راكب فيه الخرطوم الأسود بتاع فلتر الهوا تروح لميكانيكي ينضفه بمنظف كاربيراتير ويركبه تاني..
طريقة الايدل ليرن : تفتح الكونتاك لمدة 5 ثواني وتقفله وتكرر العملية دي 3 مرات وبعدين تشغل العربية لمدة 3 دقائق وبعدها تشغل التكييف لمدة 3 دقائق وتبطل العربية.
أو طريقة سهلة شوية تفصل كابل البطارية السالب لمدة دقيقتين.

بردو أتأكد إن الآر بي إم عندك مضبوط ممكن الموتور واطي وعاوز يعلى من مسمار البوابة.

وإن شاء الله تبقى حاجة بسيطة

سؤال غبي شوية..
هوا الــ rbm المثالي بيكون 750 ..؟؟؟؟

[wdramiz]

من 750-900 يكون مثالي

[M.Al-Hefnawy]

هو العربية لو مظبوطة قوي بيكون 900.