ايهما افضل الوكيل او الخليجي

[wdramiz]

السلام عليكم
امامي سيارتين لانسر بومة سبورت كاملة 2010 زيرو ( ستبترونيك)
الاولي وكيل بمبلغ 127 الف جنية عند احد موزعين المصرية ..... ضمان 3 سنوات او 100000كم
الثانية خليجي تبع الرواس بمبلغ 127 الف جنية ( ستبترونيك) ..... ضمان 3 سنوات او 100000كم

ايهما افضل الوكيل او الخليجي ...... من حيث الكفاءة ومراكز الخدمة

ام لا يوجد فرق بينهما

ايضا الفتيس الستبترونيك هل بة مشاكل ولو حدث عيب هل يمكن تصليحة وهل ثمنة غالي زي فتيس cvvt
ايضا هل هذا السعر مناسب ام اشترس هاف سبورت
مع خالص الشكر

[M.Akef]

طبعا انا افضل الخليجي و خصوصا انها بضمان زي المصري يعني سياره افضل بنفس السعر يا بلاش
اما عن الفتيس ولله الي افتكره ان الcvvt دي تكنولوجيا توفيل استهلاك الوقود و بتكون مكتوبه علي عربيات هيونداي غالبا! اما لو دي تكونولوجيا الي نزلت في الكورولا 2008 فدي حاجه و الاستب ترونك حاجه تنيا دي فيها كمبيوتر زكي و موضوع معقد جدا الاستيب ترونك العادي اسهل منها بكتير
اما عموما الاستيب ترونك في البومه محدش اشتكي منه و ان شاء الله مش حيصل فيه مشاكل خالص طول ما انت محافظ عليه
و انا ارشح لانسر شارك افضل لو حضرتك مش من هواه الحرق و الجري بشده

[medociv]

السلام عليكم ورحمة الله وبركاته
اولا اعتقد ان السعر ده مبالغ فيه
2-انت تقصد المصرية للسيارات ولا مصرية وكيل ميتسوبيشي، لان المصرية اللي هو معرض الناس بتقول عليه كلام سيئ جدا وتعامله سيئ والعربيات بتاعته بتبقى اوقات مخبوطة وملصمينها ياريت تعمل بحث على موضوعات هذا المعرض لان الناس بتشتكي منه. اما لو مصرية اللي هي وكيل ميتسوبيشي فاعتقد انها كويسة
3-اعتقد انك تستنى شهر ولا حاجة عشان تعرف اذا كان الوكيل هيظل الرواس (مصرية) ولا هيتغير لحد تاني (اخر يوليو هيبان)
4-الخليجي اللي ب 127 ده سبورت ولا ايه ؟ لانها لو بتاعة الرواس بتكون اماراتي وانا الحقيقة هنا في دبي رحت الحبتور وكيل ميتسوبيشي ولقيتهم معدوش بينزلو السبورت الكاملة (من حوالي شهر كنت عندهم) فقط الكلاسيك وده بلاش منها لانها مفهاش abs وده فعلا مهم علما بان المصري ال 1600 كله بينزل ب abs (اصل انا الصراحة ناوي باذن الله اجيب واحدة لما اجي)
5-نصيحتي هات المصري لانها مفهاش فرق غير الريداتير والتكييف تقريبا والبنزين (الخليجي المفروض بنزين 95 بس الناس بتحط 92 ومبيحصلش حاجة لكن لما 92 يغلى اعتقد مش هينفع تحط 90 وعلى فكرة المصري بينفع معاه من اول بنزين 90،،فانا رايي تجيب المصري او خليجي ب abs
6-الفروض ان الفرق بين المصري والخليجي يبقى من 5 الى 10 الاف مش نفس السعر
وربنا يوفقك والمهم انك تستخير ربنا

[wdramiz]

شكرا لكم علي الرد
اقصد مصرية وكيل ميتسوبيشي اما معرض المصرية فأنا اعلم بأنهم نصابين
العربية الخليجي سبورت كاملة 2 ايرباج -فتحة سقف - جنوط - سبويلر - سي دي - abs- عتب مع باقي الكماليات المعروفة مثل التكييف وخلافة
سيارة المصرية بها كاسيت عادي بلاضافة الي سي دي بيأخذ 6 اسطوانات بالاضافة الي الكماليات المذكورة اعلي
موضوع الفرق بين الوكيل والخليجي من حيث الريداتير والتكييف تفصد انهم افضل في الخليجي ام لهم نفس الكفائة في النوعين
عموما انا سوف انتظر حتي تتضح رؤية التوكيل الجديد

بالنسبة للسعر فأنا اعتقد بأن سعر الخليجي يجب ان يقل عن الوكيل

مع خالص تحياتي

[DrMax]

السلام عليكم ورحمة الله وبركاته
اولا اعتقد ان السعر ده مبالغ فيه
5-نصيحتي هات المصري لانها مفهاش فرق غير الريداتير والتكييف تقريبا والبنزين (الخليجي المفروض بنزين 95 بس الناس بتحط 92 ومبيحصلش حاجة لكن لما 92 يغلى اعتقد مش هينفع تحط 90 وعلى فكرة المصري بينفع معاه من اول بنزين 90،،فانا رايي تجيب المصري او خليجي ب abs
6-الفروض ان الفرق بين المصري والخليجي يبقى من 5 الى 10 الاف مش نفس السعر

دول اهم نقطتين فى رايى
والنقطة رقم 5 اهمهم
حط فى حساباتك موضوع البنزين فى ظل الكلام الكتير على ان البنزين هيغلى لان الوكيل بتمشى ب 90 عادى لكن الخليجى بيتحطلها المفروض 95 وتجاوزا الناس بتحط 92
وكمان فعلا لازم بيبقى فى فرق سعر من 5 ل 10 الاف بين المصرى والخليجى

[kemoelord]

مين قال يا جماعه ان اللانسر الوكيل ممكن يتحطلها بنزين 90 ؟؟؟؟؟؟؟
دلوقتي اي سياره حديثه بنزينها لا يقل عن 91 في الخليج او 92 في مصر لان نسبة الانضغاط تبع المحرك هي الي بتفرض علينا كده ,,

[tefafathy1]

سؤال يا شباب بعد إذنكم ..
انتو رأيكم ايهم أفضل ؟ الشارك وللا البومة ؟؟ 2010 خليجى

مش غريبة انهم نفس السعر ؟؟ خليجى و وكيل أعلى فئة نفس السعر ؟؟

بس بردو نفس السؤال تانى .. أيهم أفضل و لماذا ؟؟ ولكم جزيل الشكر

[DrMax]

سؤال يا شباب بعد إذنكم ..
انتو رأيكم ايهم أفضل ؟ الشارك وللا البومة ؟؟ 2010 خليجى

مش غريبة انهم نفس السعر ؟؟ خليجى و وكيل أعلى فئة نفس السعر ؟؟

بس بردو نفس السؤال تانى .. أيهم أفضل و لماذا ؟؟ ولكم جزيل الشكر

الشارك افضل فى كل حاجة وتكنولوجيا اعلى من البومه وموتور مايفك يعنى موتور تانى خالص غير البومة بس للاسف ملهاش سوق فى مصر بسبب انها اول منزلت كانت نازلة بسعر عالى جدا وكمان بسبب الفتى الكتير اللى طلع عالعربية وموتورها عشان 1500 وده سبب ان هية والبومه بنفس السعر بعد مكانت اغلى من البومه بحوالى 30 الف
لكن برضو البومه عربية حلوة ومفيهاش مشاكل كفاية انها اثبتت كفاءتها طول 7 سنين فاتو ومحدش اشتكى منها

فلو ميهمكش سعر اعادة البيع هات الشارك لانها احدث
لكن لو يهمك سعر اعادة البيع هات البومه لانها ماسكة سعرها

عامة العربيتين لا غبار عليهم فى اى حاجة
صلى استخارة وربنا يوفقك للى فيه الخير