العجل الامامي بيسخن جدا

[husseinthemaster]

السلام عليكم انا معايا لانسر بطة غيرت التيل الامامي وبعد كدة لاقيت العجل الامامي سخن جدا عن العادي والخلفي بارد رحت لبتاع الفرامل قام رجلش التيل اللي ورا بس العجل لسة سخن فقام قالي استني لما التيل يطبع فهل دة كلام مضبوط ولا لا

[A.Saad]

كدة التيل قافش زيادة
الافضل يضبط من دلوقت

[husseinthemaster]

طب اية الحل

[M.Akef]

الراجل قال لك كدا علي ما التيل يتبرا و يكون بعيد عن الطنابير فمتسخنشي
هو المفروض انك تظبها من دلوقتي تجنبا للمشاكل عشان الجو حر و التيل افش علي الطنابير مشكله
او ممكن ان حضرتك الي بتكبس فرال كتير جامد و بتجرب التيل و بتمسك فرامل كتير و سايق لفتره طويله فأكيد العجله هتكون نار مولعه

[husseinthemaster]

يعني ارجعلة تاني واقولة اية

[A.Saad]

يرجلشة تانى

[mr_vampire]

الراجل ده قالك لحد مايطبع يعني فعلا زي العضو المحترم قال لحد مالتيل يتبري شوية ويبعد عن الطنابير وطبعا ده غلط علي العجل والتيل وكمان علي العربية نفسها ( تغير ماشي مثلا والعجل مفرمل ) فارجعله قوله يظبطه وعيب عليه اسطي ميكانيكي يقولك الكلام ده ازاي تستنا لحد مالتيل يطبع ويتبري وهو جديد ( ميكانيكية اخر زمن

[husseinthemaster]

شكرا يا جماعة انا فعلا هرجعلة تاني

[marwan_147]

والله يا اخى انا حصل معاية نفس الشىء فى لانسر 2007 وتعبت جدا من الحكاية دى ولفيت كتير جدا وكل ما اروح لواحد يقولى طبيعى سخونة العجل .. وفى الاخر استسلمت وسكت . متابع موضوعك وبالتوفيق

[husseinthemaster]

هحاول معاة تاني وشكر للرد

[M.Al-Hefnawy]

إحنا مش عارفين درجة السخونية قد أيه يا جماعة لأننا ما شوفناش أو حسينا العجل ممكن تكون الدرجة بالنسبة لصاحب السؤال عالية للفني المتخصص حاجة تانية بس اللي أعرفه إن طبيعي العجل الأمامي بيبقى درجة سخونيته عالية عشان الجر والحمل بيكون عليه...وممكن تستشير ميكانيكي تاني.

[husseinthemaster]

درجة السخونية بيلسع اليد::b4_592:

[mr_vampire]

لا بيسلسع الايد يبقي فعلا حاجة زيادة وفعلا تيل الفرامل قافش عالطنابير وده غلط جداااااااااااااااا بيبري التيل وبيبوظ الطنابير وكمان حمل زايد عالعربية ( تخيل ماشي والعربية قافشة او متكلبشة بالفرامل ).

[haroun707]

اولا يا باشا انا عاوز اسألك سؤال

انت حاسس ان العربية سحبها زى الاول ولا لا ؟؟
لو مش زى الاول ولو بأختلاف صغير

يبقى التيل ده مش كويس وزياده عن الحجم اللى المفروض يكون عليه وبالتالى بيكون ضاغط على الطنابير وده ليه كذا عيب

اولا انه حيسبب سخونه العجلة وبالتالى ضعف الفرامل لان المفروض الفرامل والطنابير تكون بارده

ثانياً مع ضغطه على الطنابير بجانب السخونية حيسبب تأكل سريع فى الطنابير ( ريجه ) وتضعف اسرع من المعدل الطبيعى

ثالثا سخونه العجلة بتتسبب فى زيادة ضغط الهوا داخل الكاوتش ولا قدر الله ممكن يسبب انفجار العجله ( عافانا الله واياكم )

الحلول

1- تغير نوع التيل ويفضل الاصلى

2- تروح لميكانيكى كويس يفك التيل ويوديه لخراط كويس بيشيل منه جزء بسييييط جدا جدا علشان يكون بعيد كفايه عن الطنابير

والله أعلم

[salehgharib]

ممكن تعمل التجربة دى
وانتى ماشى على سرعة 80 أو 60 قم بتموير العربية شوف هتقف على مسافة كبيرة ولا صغيرة

طبعا التيل ماسك دى مفيهاش كلام

بس لو سخن زى المكوة لازم تحله ويعاد تركيبة وضبطة بحيث تتحل المشكلة

العملية دى بتحصل لما التيل يكون جديد او السيارة جديدة

لكن لما تحصل فجاه يبقى فى حاجة غلط

ملحوظة
اوعى تحاول تبرد التيل او الطنبير بالمياه ده خطا ممكن تقع فيه