مشكله مش لاقيلها حل!

[Ralliart]

السلام عليكم ورحمة الله وبركاته

من فتره كده عندي مشكله غريبه ومش عارفلها سبب ،لما بجيب الفتيس على R واسيب الفرامل العربيه بتفضل واقفه شويه وصوتها يعلى لثواني وبعديها ترجع
وساعتها رحت التوكيل مخصوص وقعدوني 5 ساعات عندهم وقالولي عملنا ظبط موتور على الجهاز وكله تمام
المهم جربتها وكانت شغاله كويس (اصلاً الموضوع ده مش بيحصل دايماً)
اول ما روحت وبركن العربيه لقيتها رجعت تاني تعمل الحركه دي زي ما هي

المهم انا تعايشت مع المشكله المجهوله مع احساسي برجه وانا واقف ولما قلتلهم في التوكيل كشفو على القواعد وقالو سليمه وان اللي عندي تهيئات!!!

حالياً بقى في حركه جديده وهي ان انا لما بجيب الـd واسيب الفرامل العربيه بقت تقيله جداً ومبتمشيش غير لما ازود بنزين

مش عارف اعمل ايه ومش عايز اروح التوكيل (سابقاً) لانهم بيضيعو وقت كتير وممكن العربيه تترمي ساعتين تلاته وانا ملطوع في الاستراحه اللي لا تليق بورشه في الطالبيه مقارنة بغبور او دايهاتسو
وفي النهايه المشكله مبتتحلش

[Ralliart]

سبحان الله لما بشوف استفسار بجري ارد عليه
ولما احط استفسار محدش يعبرني!

[M.Nasr]

انا عندى نفس المشكلة دى بقالها يومين بس الموضوع ده اتكرر معايا اكتر من مرة قبل كده والعربية بلاقيها ترجع تانى طبيعية لوحدها مش لاقى تفسير للموضوع ده لحد دلوقتى

[Ralliart]

عندك مشكلة الرجوع ولا الـd ولا الرجه؟؟
انا شاكك في الفرامل (ممكن تكون قافشه)
او زيت الفتيس بس انا مش عارف اكشف عليه ازاي يعني لونه الطبيعي المفروض يكون ايه؟

في عند حضرتك افكار تاني؟

[ahms10]

انا هقولك حل التوكيل بيعملة فى تقريبا تلت تربع المشاكل الى بتجيلة باسم العربية مخنوقة السحب مش كويس رجة فى العربية بينضف الانجيكشن بعبارة عن انبوبة كدة كنت جايبها من موبيل الاوتوستراد ب28 جنية بتكفى مرتين او تلاتة لونها اصفر اسمها منظف انجيكشن وبتفك الحتة بتاعت فلتر الهواء الى داخلة فى الانجكشن وتطفى العربية وتقعد ترش وتلف فى كل المزانق وبعدين تدور العربية قبل ما تركب الفلتر مش هتدور من اول مرة ودا معناة انى السائل وصل كويس بعد 3 او 4 مرات بالكتير هتلاقى العربية دارت ومش مظبوطة لمدة دقيقة كانها بتنتش مع نفسها وبعدين هتلاقى العربية فاقت والار بى ام ظبط والدنيا بقت حلوة لو الموضوع دا محلش مشكلتك كدة كدة هيحسن العربية الموضوع دا انا ظبطت واحد فى التوكيل وقلى علية بكل تفاصيلة قلت انقلة عشان تعم الفائدة ويمكن تحل مشكلتك انا بقيت كل فترة اعملة وبيفرق جامد جدا والانسر محتاجة الموضوع دا فعلا كل فترة وبيفرق جدا خاصة لما تشغل التكيف او تحمل ناس وان شاء اللة هصورك شكل العبوة بردوة عشان تتاكد واى استفسار يا باشا انا تحت امرك

[ahms10]

بالنسبة لموضوع الفرامل لو عربيتك جانت تقدر تبص على التيل من برة اهو بردوة تتاكد تشوفة قافش زى ما حضرتك بتقول ولا اة ويستحسن تخلى حد يدوس على دواسة الفرامل وتتابع حركة التيل والعربية دايرة طبعا يا اما لو وهيا مش دايرة هتلاقية قافش فعلا بس دا وضع طبيعى
بالنسبة للزيت الطبيعى اعتقجد لاى زيت انك تلاقى لونى زى بنى فاتح او عسلى كدة لو لقيت فى زى اسود تعرف انى ابتدجى يتحرق بس هوا زيت الفتيس المفروض يتغير عند 40 كصيانة وقائية

[ahmed-moga]

سبحان الله لما بشوف استفسار بجري ارد عليه
ولما احط استفسار محدش يعبرني!

معلش ياأستاذ Ralliart ممكن تكون الناس غير متواجده حاليا او اللي بيشوف الموضوع معندوش الرد الوافي او المعرفه

المكيانيكيه زي حالتي كده ههههههههههه

اصبر وان شاء الله الزملاء هايجوبوك علي استفسارك ويكون رد شافي وافي

وان شاء الله لما تروح التوكيل اطلع للبشمهندس طارق ده انسان ذوق وخدوم وغايه في الأحترام هو والأستاذ محمد عبد العال ومش هيتأخروا عنك في حاجه وان شاء الله هتبقي مرضي تقبل تحياتي

[M!SHO]

سبحان الله لما بشوف استفسار بجري ارد عليه
ولما احط استفسار محدش يعبرني!

والله أنا عندى أستفسارات كتير
وعشان السبب ده بسكت أحسن

القسم هنا نايم أوى

[Haitham10]

تغيير زيت الاوتوماتيك كل 80 الف علي مااعرف دة مكتوب في الصيانات عموما لو حبيت تكشف عليه جرب الصبح وشوف لونه كل مايكون زايد احمرارا تعرف انه لسه بحالته وكل مايغمق لدرجة البني يبقي لازم يتغير .... زيت الاوتوماتيك بيكون لونه احمر لو جديد .

ممكن تكون مشكلتك كهربا موتور مثلا

[Atrees]

التوكيل بيزبط العربية زي الكتالوج ما بيقول - وطبعا كلنا عارفين ان ارقام الكتالوج دي لبنزين مش بتاعنا - البنزين لما بيبقي وحش بيعمل الرجة دي لان الايديال بينزل عن المعتاد


انا كان عندي نفس المشكلة في الانسر المكواه والشارك حاليا - روت التوكيل وقولتلهم العربية مخنوقة ومجبتش سيرة الرجة - رفعلي الار بي ام سنة بسيييييييييطة جدا - راح كل الكلام دة وبدون تاثير ملحوظ علي استهلاك البنزين

المشكلة ان بسبب البنزين بتاعنا الانسر بعد فترة من الاستخدام والوساخة اللي بتتراكم سواء علي الفلتر البنزين - غرف المحرك - المواسير الحساسات - وكمان علبة شكمان البيئة ودي مهمة جدا جدا جدا في زبط العربية والايديال بتاعها


ياريت تجرب تحط مرة 95 وتشوف حتعمل كدة ولا لاء ؟

[Atrees]

تغيير زيت الاوتوماتيك كل 80 الف علي مااعرف دة مكتوب في الصيانات عموما لو حبيت تكشف عليه جرب الصبح وشوف لونه كل مايكون زايد احمرارا تعرف انه لسه بحالته وكل مايغمق لدرجة البني يبقي لازم يتغير .... زيت الاوتوماتيك بيكون لونه احمر لو جديد .

ممكن تكون مشكلتك كهربا موتور مثلا

معلش يا باشا ملحوظة بس - زيت الفتيس لا يتغير لونة ابدا وجودة الزيت دة من عدمة بتقاس بدرجة حرارته قبل وبعد مشوار

وتقبل مروري

[Haitham10]

اعذرني .. انا بتكلم عن تجربة فعليه لاني مبركبش غير اوتوماتيك .. والزيت فعلا بيبقي بني لما بيتحرق ويحتاج تغيير

[kh_talaat]

اعذرني .. انا بتكلم عن تجربة فعليه لاني مبركبش غير اوتوماتيك .. والزيت فعلا بيبقي بني لما بيتحرق ويحتاج تغيير

أستاذ هيثم ازيك عامل اية

بالنسبة لتغيير زيت الفتيس (الأوتوماتيك) فحسب كلام الباشمهندس طارق زويل بيتغير في صيانه الـ40 ألف

وسؤالي ليك ازاي بتكشف على زيت الفتيس وتشوف لونه وكدة لأني مش عارف مكانه فين بالظبط

[Haitham10]

خالد باشا ايه النور دة انا تمام الحمدلله يارب تكون بخير

بالنسبة لزيت الاوتوماتيك له مقياس زي زيت الموتور بالظبط بس هتلاقيه عندك علي اليمين ناحية البطارية حاول تشوفه علي كذه مرحله العربيه تكون باردة وسخنة وهو فيه مقياسين hot cold شوف المقاس مظبوط ام لا .... وشوف لون الزيت ايه مايل للاحمرار ولا لدرجة اغمق من كدة زي البني او العسلي كل مازاد احمرار يبقي كدة تمام
ولو احتاج تغيير بيبقي شفط .
وسيبك من الي يقولك زوده لان كدة كدة تغيير الزيت مبيكملش 120 جنيه تكلفه للانواع العادية وتقريبا 150 للموبيل
وطبعا دول بيتغيروا كل فترة طويلة .. وابقي طمني

راللي انا جت فدماغي حاجه حاول تجربها هي مش مكلفة ..... هتنضف حساسات الفتيس والفيش بتاعته كلها
لو مش هتعرف تعملها بنفسك روح لاي كهربائي بيفهم وممكن تعملها بنفسك بw40 اخلع الفيش ورش ونضف مكانها وسيبهم 10 دقائق وبعدين ابقي ركب وجرب
جربتها مرة فعربيه كان فيها نتشه في الغيارات الاوتوماتيك وراحت بقت انعم بكتير

[Ralliart]

شكراً على ردودكم مش عارف اشكركم ازاي
العربيه النهارده كانت مظبوطه ومش مخنوقه بس حوار الـr لسه موجود وبيزيد والنهارده فضلت واقفه حوالي 5 ثواني وبعدين بدأت تتحرك

مع العلم ان من فتره كانت خزنه الراديتير اتكسرت والعربيه سخنت ومشيت وهي سخنه والمؤشر على آخره لمده دقيقتين مش عارف ده ممكن يكون أثر ولا لأ بس انا خليتهم كشفو في التوكيل وقالو محصلش حاجه
وان شاء الله هكشف على زيت الفتيس لما العربيه تبرد لاني اتلسعت :(