مشكله في كريستالتي

[FunnyMickey]

سالخير علي كل الاعضاء الموقرين
بعد التحيه والذي منه

دلوقتي عربيتي الكريستاله
عملت فيا حركه مش ولابد
كنت ماشي قبل رمضان بيوم
وفجأه لقيت مؤشر الحراره في السقف فوق
من ايه معرفش
مع اني ماشي بالليل
مكنش الدنيا حر ولا حاجه بس كانت زحمه فظيعه

المهم وقفت وركنت وفتحت الكبوت
وابص مفيش حاجه بس لاحظت ان المراوح مش شغاله
سبت العربيه تبرد
وفتحت الريداتير
ناقص طبعا
ازود فيه ينقص بردو
افتكرته مخروم
ابص تحت مفيش حاجه بتنزل
طب الميه دي بتروح فين يعني

المهم دورت العربيه وفضلت ماشي حبه حبه
واقف ابردها وبعدين امشي تاني لحد ما وصلت البيت

صراحه تعبت تاني يوم وكنت مضطر اني اخد العربيه واروح للدكتور
وفضلت بردو ابرد العربيه وامشي وكنت مرعوب العربيه تولع خصوصا انه كان يوم حر

المهم خلص اليوم ده علي خير وانهارده بقي قلت اروح للكهربائي (رضا بتاع الحي السابع )
يشوفلي ايه حكايه المروحه دي
فتح الكهربائي وبص علي ترموستات الكوعه لقاها بايظه
مع اني لسه مغيرها من 6 شهور اول ما جبت العربيه

قاللي هيا مش مهمه اوي يعني كل الناس بتشيلها عشان دي معموله لبلاد بره
ودي رابع مره اسمع فيها الحكايه دي
المهم قلتله شيلها
مش كل مره حدفع 100 جنيه وبردو تبوظ

وسألت عليها كل واحد يحور في سعر ويقولي الاصلي مره 135 ومره 175
قلت عنها ما اتحطت

المهم قفل الكوعه وبيبص تحتها لقي ميه
وفيه تسريب كده من الجمب

قاللي دي عاووزه ميكانيكي يشوف التسريب ده من ايه

ندهنا ميكانيكي يبص
راح فك الكوعه خالص بس قبل ما يفك الكهربائي قالله انا شاكك يكون الريدياتير ده مسدود وهوا اللي عامل المشكله دي

ونده بتاع الريداتير بص علي الخراطيم وعلي الريداتير
ده عاوز يتسلك ويتنضف ويطلع بره خالص

ماشي ياعم
اما نشوف اخرتها

الميكانيكي اشتغل وبتاع الردياتير نضف
وغسل الريداتير ونزل صراحه شويه صدا ووساخه عمري ما شفتها
كأني دابح خروف في الردياتير
بينزل احمر مش ميه

المهم الميكانيكي ركب جوان كده للكوعه من الناحيه التانيه وهمبك شويه كده وخدله 30 جند

وبتاع الريداتير ركب وظبط وخدله 100 جند 70 تنضيف و30 جوان ( طبعا انا حاسس اني حمار ولبست في الحيطه )

الوقت كان اتأخر وانا عاوز اخلص

المهم بعد ما خلصنا كل ده
ادور العربيه المراوح تشتغل فورا
مع ان العربيه بارده

يادي النيله
هوا ياكده ياكده

سخنت العربيه وبردو مفيش حاجه بتقف

جه عم رضا جمب العربيه وقعد يبص في الجمب
وقاللي العربيه دي فيها طرمبه ميه
الطرمبه مبتقلبش الميه

وانا كرمبه واقفه ولا فاهم اي حاجه في اي حاجه
خدت العربيه ومشيت ووانا مروح العربيه سخنت جدا
وولا كأني عملت اي حاجه

الاسئله بقي

1- الترموستات دي مهمه فعلا اشتريها ولا فعلا ملهاش لازمه ؟
2- هل كده العربيه ممكن تكون جابت وش سلندر عشان مشيت بيها كده لاني خايف جدا من الموضوع ده .؟
وهل كده مركبهاش تاني ولا اعمل اللي كنت بعمله ولا ايه؟؟؟
3- بتاع الريداتير حرامي مش كده ؟؟؟ انا لسه ليا عنده دوره غسيل معملتهاش كده تمام ولا ؟؟؟
4- هل فعلا العيب ده طرمبه ميه ؟؟ ولو طرمبه سعرها كام واجيبها منين ؟؟
5- العربيه محطوط فيها دلوقتي ميه عاديه من الحنفيه لانه كان بيحور في ميه خضرا وبتاع وانا كانت الفلوس خلصت

مستني ردود بفارغ الصبر عشان عاووز انجز في الموضوع الخنيق ده

[SkyBird]

-اعتقد والله اعلم ان المشكلة الاساسية كانت تلف طلمبة المية
- ثرموستات الكوعة مهم جدا للحفاظ على درجة سخونة الموتور في المعدلات الطبيعية
- اذا كانت المية الخضراء عملت صدا بالشكل ده كده يبقى مية الحنفية افضل ((والافضل منها المية المقطرة علشان مفيهاش املاح ))
لكن
ممكن بتوع الرادياتير يشتغلوا شغل فهلوة ويحطوا ماده على مية الرادياتير علشان تنزل حمرا ويقولك شفت يا بيه كان لازم الرادياتير يتنظف شغل سحر وشعوذه والزبون مبسوط لان انا اساسا غير مقتنع ان دورة التبريد تصدي هييجي الصدا منين يعني !!!
انا بقالي 7 شهور بحط مية حنفية ولما انظف دورة التبريد بنفسي المية تطلع زي الفل نظيفة وشفافة

وانتظر باقي البشوات علشان هيفيدوك اكثر مني ان شاء الله

[FunnyMickey]

مفيش حد تاني ياجماعه غير سكاي يدلي بدلوه في هذا الموضوع الخطير
طب انا دلوقتي لو مشيت بيها كده
حتجيب موتور ولا اعمل ايه طيب عاوز اروح للميكانيكي وخايف يحصل حاجه

[ahmeddoda]

1- الترموستات دي مهمه فعلا اشتريها ولا فعلا ملهاش لازمه ؟
صبحى حبيب قلبى انت ليه مقولتليش وانا بكلمك امبارح ؟
الترموستات دى اهم من المروحة زات نفسها هى اللى بتخلى المروحة تشتغل وتفصل زى وتحافظ على درجة حرارة الموتور طبيعية ولابد منها
2- هل كده العربيه ممكن تكون جابت وش سلندر عشان مشيت بيها كده لاني خايف جدا من الموضوع ده .؟
لا باذن الله مفيش حاجة من دى متحطش كدة فدماغك انت ممشتش عليها كتير وابقى بص على المتور بعنيك وشوف مقاس الزيت وبذان الله مفيش حاجة
وهل كده مركبهاش تاني ولا اعمل اللي كنت بعمله ولا ايه؟؟؟
حاول تعملها فى اسرع وقت الاول ويستحسن متركبهاش خالص لحد ما تشوف العيب فين بالظبط وتصلحة عشان متغرمش تمن حاجة تانى من المشى بيها وهى كدة
3- بتاع الريداتير حرامي مش كده ؟؟؟ انا لسه ليا عنده دوره غسيل معملتهاش كده تمام ولا ؟؟؟
حرامى ونصاب بصراحة يا صبحى دة لو كان لقاة مخرو كله ولحمهولك مكنش هياخود 40 جنية وجوان ايه اللى ركبو دة ؟

4- هل فعلا العيب ده طرمبه ميه ؟؟ ولو طرمبه سعرها كام واجيبها منين ؟؟
كدة احتمال كبير اوى اوى اوى ان دى طرمبه ميه واسال عليها استيراد بكام لان انا مش عارف والله هنزل قريب هسالك عليها
5- العربيه محطوط فيها دلوقتي ميه عاديه من الحنفيه لانه كان بيحور في ميه خضرا وبتاع وانا كانت الفلوس خلصت

ومالها الميه اللى من الحنفية يكون فعلمك ان الميه الخضرا اللى بتتباع فالمحطات و عند بتوع قطع الغيار دى كلها مضروبة و ميه الحنفية احسن سيبك انت

[FunnyMickey]

ياراجل ده انا قعدت انده عليك للصبح
بس انتا كنت قافش في طبق المكرونه

انا بالاجماع كده
نزلت امبارح جبت طرمبه ميه جديده
عملت 135 جند

والترموستات هيما قاللي علي طريقه كده اعرف بيه اذا كان بايظ ولا لا
لاني سالت عليه البهوات بيقولولي 175 و135
وانا اصلا شاريه ب85 جنيه

وربنا يكرم اعملها انهارده بالليل او بكره الصبح بالكتير

وحسبي الله في بتاع الريداتير
ان شاء الله حينقط ميه من كل حته زي الريداتيرات بتاعته

[FunnyMickey]

صوره الشئ اللي ب175 جنيه
حد يعرف البتاع ده بيعمل ايه

[HeMa_LanCeR]

صوره الشئ اللي ب175 جنيه
حد يعرف البتاع ده بيعمل ايه

دي ترموستات الكوعه
بس المفروض تبقي اصغر مش عارف هي كبيره كده ليه ولا الكاميرا هي اللي عامله كده

[FunnyMickey]

لا هيا الكاميرا هيا صغيره اصغر من كف الايد
المهم الست ترموستات دي بقي عملالي مشكله
اولا مش موجوده عند حد
ثانيا اللي عنده نافخ في سعرها
وكل واحد يقولي الاصلي
هوا اللي ب85 جنيه دي مش الاصلي ؟؟
عاوزين حد اشتراها ياشباب يقولي سعرها الحقيقي ايه
انا شاريها من كام شهر ب85 جنيه وبصراحه باظت

ما العمل يارجال
؟؟

[EngAhmedSayed]

الاسئله بقي

1- الترموستات دي مهمه فعلا اشتريها ولا فعلا ملهاش لازمه ؟
2- هل كده العربيه ممكن تكون جابت وش سلندر عشان مشيت بيها كده لاني خايف جدا من الموضوع ده .؟
وهل كده مركبهاش تاني ولا اعمل اللي كنت بعمله ولا ايه؟؟؟
3- بتاع الريداتير حرامي مش كده ؟؟؟ انا لسه ليا عنده دوره غسيل معملتهاش كده تمام ولا ؟؟؟
4- هل فعلا العيب ده طرمبه ميه ؟؟ ولو طرمبه سعرها كام واجيبها منين ؟؟
5- العربيه محطوط فيها دلوقتي ميه عاديه من الحنفيه لانه كان بيحور في ميه خضرا وبتاع وانا كانت الفلوس خلصت

مستني ردود بفارغ الصبر عشان عاووز انجز في الموضوع الخنيق ده

الرد على حضرتك
الاول لا تقلق حضرتك وكل مشكله و ليها سباب و ليها حل
و يجب عند ظهور مشكله اهم حاجه انو مش نحلها لا نعرف اسباب المشكله علشان نقدر نحلها من جذوره
اتفقنا و الله المستعان

الاجابه على السؤال الاول

بالنسبه للترومستات بتاعة الكوعه من الافضل انو حضرتك تلغيها لانها مصممه لبلاد الثلاج
فا نصيحه الغيها و اقفل الكوعه بجوان و شمع علشان عدم التسريب المياه من الكوعه

الاجابه على السؤال الثانى

هو طبعا من الغلط انو حضرتك تمشى و هى العربيه سخنه و مش على درجة الحراره المثاليه
لانو انتا ممكن حضرتك ممكن تضحى بالموتور كله و حتى لو اتغير الجوان و اتكشط وش السلندر عمرها ما ترجع زى الاول و ان شاء الله تكون سليمه
حضرتك عاوز تعرف جابة وش سلندر و له لا
حضرتك اولا هتبص على المياه فى القربه او الرداتير شوف المياه بيضا و له عليها بقع زيت
لو بيضا يبقى كويس
حضرتك ثانيا هترفع مقاس الزيت و شوف الزيت قلى على المقاس هلا فعلا طالع لونه اسود او بنى داكن يبقى كويس
طيب لو طالع لو نه مدى على طحينى قلى هو لون الطحينه يبقى كده جابت وش سليندر
نصيحه هامه ( اتاكد من الموضوع ده قبل اى شىء)

الاجابه على السؤال الثالث

هو ممكن يكون حرامى و مش ممكن يكون حرامى ليه لانو عندنا فى مصر مفيش ميكانيكى او اى فنى عربيات قدر يحدد اسباب المشكله فا لازم يجرب حبه يقولك ترموستات ها لسه طيب نظف الرداتير ها لسه يبقى المروحه ها لسه طيب طلمبة المياه (بيقول عليها طرمبة) ها و يقعد يجرب لحد ما تحل المشكله او متحلش و كوع يا زبون

الاجابه على السؤال الرابع

ما تستعجلش على تغيير طلمبة المياه لانه ممكن تكون شغاله علشان كده بقول لحضرتك حدد مشكلتك
الاول قبل ما تفك حاجه او تغير حاجه لانو حرام ممكن تكون شغاله
لانو انتا فى الاول قولت مؤشر الحراره لسقف و فتحة الكبوت المروحه مش شغاله يبقى الواضح انو ممكن تكون مشكلة ترموستات يا مروحه طيب تعرف ازاى هقولك هتلاقى فرداتين كهربا داخلين على الترموستات فكهم و لامسهم على بعض لو المروحه اشتغلة يبقى عيب ترموستات لانها هى قلى بتدى امر للمروحه تشتغل او تفصل بناءا على درجة الحراره لو مشتغليتش المروحه يبقى عيب مروحه او فيوز قاطع
اهو الفيوز ابو نص جنيه يوقف المروحه بتاعة دورة التبريد

الاجابه على السؤال الخامس

عادى جدا المياه العاديه و زى الفل و بعد ما تنتهى من المشكله ابقى حط مياه خضرا لرفع كفاءة اتبريد

يارب اكون وافقة فى الشرح

و لو حضرتك احتاجة اى مساعده انا فى خدمة اعضاء نايل موتورز
و ده رقم موبيلى و فى اى وقت
0126880055
م / احمد النجار
و الله المستعان

[FunnyMickey]

الرد على حضرتك

الاول لا تقلق حضرتك وكل مشكله و ليها سباب و ليها حل
و يجب عند ظهور مشكلها اهم حاجه انو مش نحلها لا نعرف اسباب المشكله علشان نقدر نحلها من جذوره
اتفقنا و الله المستعان

ربنا يكرمك ياباش مهندس يارب

الاجابه على السؤال الاول

بالنسبه للترومستات بتاعة الكوعه من الافضل انو حضرتك تلغيها لانها مصممه لبلاد الثلاج
فا نصيحه الغيها و اقفل الكوعه بجوان و شمع علشان عدم التسريب المياه من الكوعه
ده اللي حصل بالفعل ولكن كل الاعضاء هنا بتقول ان العربيه مش بلاد تلج ولا حاجه واللي كان موجود في مصر يااما مصري يااما خليجي وبلاد الخليج حر عن هنا يبقي الاولي انها تتحط
وانا فعلا محتار لان الميكانيكيه اللي اعرفهم كلهم قالولي شيلها
ماعدا اتنين ده غير هيما واحمد دوده

الاجابه على السؤال الثانى

هو طبعا من الغلط انو حضرتك تمشى و هى العربيه سخنه و مش على درجة الحراره المثاليه
لانو انتا ممكن حضرتك ممكن تضحى بالموتور كله و حتى لو اتغير الجوان و اتكشط وش السلندر عمرها ما ترجع زى الاول و ان شاء الله تكون سليمه
حضرتك عاوز تعرف جابة وش سلندر و له لا
حضرتك اولا هتبص على المياه فى القربه او الرداتير شوف المياه بيضا و له عليها بقع زيت
لو بيضا يبقى كويس
حضرتك ثانيا هترفع مقاس الزيت و شوف الزيت قلى على المقاس هلا فعلا طالع لونه اسود او بنى داكن يبقى كويس
طيب لو طالع لو نه مدى على طحينى قلى هو لون الطحينه يبقى كده جابت وش سليندر
نصيحه هامه ( اتاكد من الموضوع ده قبل اى شىء)

هوا انا فضيت ميه الريدادتير اما طلعته يتغسل بس اما العربيه سخنت كان عادي مفيش اي حاجه ولا الميه بيضا ولا فيها بقع زيت
ميه حنفيه عاديه خالص
ابقي ابص علي موضوع الزيت ده


الاجابه على السؤال الثالث

هو ممكن يكون حرامى و مش ممكن يكون حرامى ليه لانو عندنا فى مصر مفيش ميكانيكى او اى فنى عربيات قدر يحدد اسباب المشكله فا لازم يجرب حبه يقولك ترموستات ها لسه طيب نظف الرداتير ها لسه يبقى المروحه ها لسه طيب طلمبة المياه (بيقول عليها طرمبة) ها و يقعد يجرب لحد ما تحل المشكله او متحلش و كوع يا زبون


فعلا والله علي رأيك يعني انا اليوم ده دفعت اكتر من 150 جنيه عالفاضي ومحصلش تحسن ولا اي حاجه
المعلومه بقي اللي عاوز اقولهالك
ان العربيه اتسخنت اكتر من 3 مرات بعد ما نضفت الريداتير وظبطت الدنيا ومؤشر الحراره علي النص عادي جدا
اول ما مشيت بالعربيه واتحركت ومروح عالبيت
مع العلم ان المسافه من البيت للحي السابع متتعداش 5 كم00
العربيه سخنت تاني والمؤشر علي للاخر
الاجابه على السؤال الرابع

ما تستعجلش على تغيير طلمبة المياه لانه ممكن تكون شغاله علشان كده بقول لحضرتك حدد مشكلتك
الاول قبل ما تفك حاجه او تغير حاجه لانو حرام ممكن تكون شغاله
لانو انتا فى الاول قولت مؤشر الحراره لسقف و فتحة الكبوت مش شغاله يبقى الواضح انو ممكن تكون مشكلة ترموستات يا مروحه طيب تعرف ازاى هقولك هتلاقى فرداتين كهربا داخلين على الترموستات فكهم و لامسهم على بعض لو المروحه اشتغلة يبقى عيب ترموستات لانها هى قلى بتدى امر للمروحه تشتغل او تفصل بناءا على درجة الحراره لو مشتغليتش المروحه يبقى عيب مروحه

المراوح شغاله عادي لانه عمل اللي انتا قلته ده
لمس السلكتين وقفل الكوعه بعد ما شال الترموستات والعربيه بردو مشغلتش المروحه
والغريب انه اما فك الريداتير ونضفه حصل العكس
كان الاول المروحه مبتشتغلش
بقت تشتغل علي طول ومبتفصلش
عشان كده شك في طلمبه الميه

الاجابه على السؤال الخامس

عادى جدا المياه العاديه و بعد ما تنتهى من المشكله ابقى حط مياه خضرا لرفع كفاءة اتبريد


يارب اكون وافقة فى الشرح

و لو حضرتك احتاجة اى مساعده انا فى خدمة اعضاء نايل موتورز
و ده رقم موبيلى و فى اى وقت
0126880055
م / احمد النجار

و الله المستعان

تسلم ياباش مهندس وربنا يخليك لنايل موتورز

[EngAhmedSayed]

انا شكك انو الميكانيكى قالب فرد الكهربا بتاعة المروحه او الفيشه بدل ما المروحه تدخل هو على الرداتير لا بتسحب هوا
اتاكد من الموضوع ده
ازاى حط ايدك ورا المروحه شوف اتجاه الهوا داخل على العربيه فى اتجاه البربيز و له مفيش هوا
متابع معاك باهتمام

[doctor_eid]

السلام عليكم
بخصوص طلمبة المياه
دور الموتور و افتح غطا الرادياتير بس مش و العربية سخنة علشان ما يضربش في وشك البخار
لو المياه بتاعة الرادياتير بتتقلب يعني بتبقلل تكون الطرمبة شغالة. و لو المياه ساكنة تكون الطرمبة غير شغالة
و بعدين لو على المصاريف اللي حضرتك صرفتها و ضياع الوقت مع اشتغالات الأسطوات، انا لو مكانك كان مشوار لتوكيل مصرية في قليوب ناس فاهمة العربية كويس، كانت المشكلة اتحلت . و حتى لو كلفتك زيادة شوية تكون اشتريت راحة بالك.
بخصوص ساعة الرادياتير، كانوا زمان بيسموها كده، انا مش مع شيلها، لأن المهندس اللي حطها مش حاططها ديكور.
انا فضلت راكب الكريستالة تسع سنين عمر المؤشر بتاع الحرارة ما علي عن النص و لا كنت اعرف مكان الرادياتير فين.
و ده لأني كنت متابع في التوكيل كل 10.000 كم زي الساعة.
انا ضد الأسطى بلية على طول الخط.

[FunnyMickey]

انا شكك انو الميكانيكى قالب فرد الكهربا بتاعة المروحه او الفيشه بدل ما المروحه تدخل هو على الرداتير لا بتسحب هوا
اتاكد من الموضوع ده
ازاى حط ايدك ورا المروحه شوف اتجاه الهوا داخل على العربيه فى اتجاه البربيز و له مفيش هوا
متابع معاك باهتمام

انا رايح لميكانيكي تاني بكره ان شاء الله
وحشوف موضوع فرد المروحه دي
وارد عليك

[FunnyMickey]

السلام عليكم
بخصوص طلمبة المياه
دور الموتور و افتح غطا الرادياتير بس مش و العربية سخنة علشان ما يضربش في وشك البخار
لو المياه بتاعة الرادياتير بتتقلب يعني بتبقلل تكون الطرمبة شغالة. و لو المياه ساكنة تكون الطرمبة غير شغالة
و بعدين لو على المصاريف اللي حضرتك صرفتها و ضياع الوقت مع اشتغالات الأسطوات، انا لو مكانك كان مشوار لتوكيل مصرية في قليوب ناس فاهمة العربية كويس، كانت المشكلة اتحلت . و حتى لو كلفتك زيادة شوية تكون اشتريت راحة بالك.
بخصوص ساعة الرادياتير، كانوا زمان بيسموها كده، انا مش مع شيلها، لأن المهندس اللي حطها مش حاططها ديكور.
انا فضلت راكب الكريستالة تسع سنين عمر المؤشر بتاع الحرارة ما علي عن النص و لا كنت اعرف مكان الرادياتير فين.
و ده لأني كنت متابع في التوكيل كل 10.000 كم زي الساعة.
انا ضد الأسطى بلية على طول الخط.

بص يادكتور
انا صراحه مخدتش بالي من موضوع بارده ده
بس وهيا العربيه سخنه العربيه بتطرطش ميه فعلا
بس لو الطرمبه شغاله
طب ازاي العربيه تسخن بغباوه كده مع العلم ان المراوح شغاله علي طول
يعني حتي مبتفصلش اصلا

الحراره زي الفل وانا واقف
مجرد ما اتحركت لقيت المؤشر ابتدي يعلي وعلي ما وصلت البيت كان المؤشر علي خالص


وبعدين حروح التوكيل ازاي وانا العربيه درجه حرارتها عامله كده
ده انا في مدينه نصر

[FunnyMickey]

الحمد لله المشكله اتحلت

طرمبه الميه كانت بايظه وترموستات المروحه كانت فاصله

اشتريت طرمبه ميه
ب135 جنيه ياباني

واشتريت ترموستات مروحه ب45 جنيه

وترموستات الكوعه للاسف محطيتهاش

لقيتها غاليه اوي

ب175 جنيه مش عارف فيه ايه

عالم حراميه والله

وقال الراجل بقولي غاليه عشان بتتحط في البومه
طب انا مال اهلي انا يعني

يلا خير شكرا لكل اللي ساعدوني وعقبال عفشه العربيه كده ان شاء الله