طلب تسعير كريستاله 98

[Bonanza]

ممكن حد يسعرلي العربية بالحالة دي

- موديل 1998 / 1300 سي سي مواصفات خليجي
- اساسيات العربية سليمة و مش واخده اي خبطتات عنيفة
- راشة بره بالكامل ( شنطة و سقف مرشوشين ) نظافه مش عشان خبطه او حاجة
- تحتاج لجوز كبالن
- تحتاج لاصلاح بوش علبة الدركسيون
- موتور زي الفل بشهادة الميكانيكي
- التكييف تسقيعة ضعيف قليلا
- بها خبطة عند الفانوس الخلفي شمال ادت الي كسرة بالكامل و تطبيق جزء من الشنطة خلف الفانوس
- الاكصدامين عاوزين يتغيروا
- تحتاج لفرش الشنطة بالكامل ( موكيت + الجزء الناشف ده اللي بيبقي فوق الاستبن )

العربية معروضة عليا وواحد صاحبي هو المالك يعني زيتنا في دقيقنا
ارجو تسعير السيارة علي هذه الحاله
و ايه هي مصاريف تصليح الاجزاء السابقة

شكرا جزيلا

[m.aligamal]

حضرتك العربيه لما بتكون سليمه و مش محتاجه مصاريف بتعملها من 43 الى 48 حسب الحاله و خد فى بالك انك هتغير الاكصدام الامامى تيوانى اسود بدون رش بيعمل جوالى 120 و الخلفى بيعمل 150 تقريبا ولسه هترش
هتحتاج فانوس و لن يقل عن 180 جنيه و شغل سمكره على حسب العربيه محتاجه ايه
فرش الشنطه يعمل استيراد من 150 الى 200 حسب ما تلاقيه
التكيف اكشف عليه وشوف الفريون يمكن عايز يزيد او تغيره او انك تنضف التلاجه
الكبالن التيوانى الواحد 100 جنيه او 95
الاصلى ب250 الواحد

[newuser2009]

ماشيه كام كيلو
سعرها ممكن 46000

و الله اعلم

[Bonanza]

العربية ماشية 225000 كيلو
و شكرا لكل اللي رد بالسرعة دي
جزاكم الله خيرا
و مستني باقي الاعضاء يقولو كلمتهم

[m.aligamal]

هوا عدد الكيلوات كتير مش عالموتور بس عامه على العربيه ككل يعنى حاله الصاج او الدواخل او الابواب فيها برومه ولا لا والرفارف و الشنطه و كده و كذلك حاله الصالون باعتباره استهلاك برضه و دى كلها صاريف
يباشا شوف المصاريف الى انتا هتصرفها عالعربيه الاول و اخصمها من التمن المتفق عليه او لو العربيه داخله قوى مزاجك يبقى النص عليك و النص على صاحب العربيه
و بعدين العربيه مش موتور بس الحاجات الى بتقول عليها بتفتح قوى فى المصنعيه برضه و قطع الغيار يعنى البوش الى فى الدركسيون او العلبه ده ممكن يطلع معاك حوارات تانيه فى اسكاتره فحضرتك محتاج برضه تشيك عالعفشه بالكامل عشان مكلفه
و فى النهايه البيع و الشرا ده نصيب لو ليك نصيب هتاخدها حتى لو ماشيه عالجنط

[Mohammmed]

انا فى رايئ متتدفعش اكتر من 43 الف

[Bonanza]

هوا عدد الكيلوات كتير مش عالموتور بس عامه على العربيه ككل يعنى حاله الصاج او الدواخل او الابواب فيها برومه ولا لا والرفارف و الشنطه و كده و كذلك حاله الصالون باعتباره استهلاك برضه و دى كلها صاريف
يباشا شوف المصاريف الى انتا هتصرفها عالعربيه الاول و اخصمها من التمن المتفق عليه او لو العربيه داخله قوى مزاجك يبقى النص عليك و النص على صاحب العربيه
و بعدين العربيه مش موتور بس الحاجات الى بتقول عليها بتفتح قوى فى المصنعيه برضه و قطع الغيار يعنى البوش الى فى الدركسيون او العلبه ده ممكن يطلع معاك حوارات تانيه فى اسكاتره فحضرتك محتاج برضه تشيك عالعفشه بالكامل عشان مكلفه
و فى النهايه البيع و الشرا ده نصيب لو ليك نصيب هتاخدها حتى لو ماشيه عالجنط

صباح الفل يا باشا و شكرا علي الرد لتاني مره

الصاج مافيهوش اي حاجة غير خبطة الشنطة اللي عند الفانوس و بالظبط اللي حصل فيها هي حتة الصاج اللي تحت الفانوس " بين الفانوس و الاكصدام " حتة كده بتاع 30 سنتيمتر عاوزة تترد عالبارد

الدواخل فبريقة و الفرش و التابلوة و الصالون عامة متحافظ عليه كويس
مفيهاش بارومة خالص

تم الكشف علي العفشة عند العفشجي و هو اللي قالي عاوزة بوش علبة الدركسيون بس

[zoro007]

كل دى حجات فى العربيه :]

متدفعش اكتر من 40 الف كدا الى حد ما سعر مناسب مش قليل عليها ولا كتير

لان يكفى اصلا وجع الداماغ وانتا بتصرف عليها دا لوحده صراحه لو انا مكانك هطنش العربيه

انا قبل كدا رفضت عربيه مكنش فيها اى شىء الا كان التكييف مش شغال ولقيت له لفه طويله عريضه علشان يتظبط رحت صارف نظر عن العربيه باكملها

مابالك بالحجات اللى انتا بتحكى عنها

لانك كدا هتلف عن جميع صنايعية السيارات من سمكرى ,, لعفشجى ,, لبتاع دوكو علشان ترش الاكصدامات وخلافه ,, لسروجى علشان الفرش ,, لكهربائى

دا فيلم هندى

[sonystar]

عايز راى شايف ان العربية اساسيات سلمية والعربية هتصرف مصارف\يف عادية مش مكلفة لو خلصتها بسعر حلو مثلا لو يكون43 الف

وهتصرف عليها 3الف بس هتبقى عربية شيل لاكن لو بقى صفرت نظر عن العربية وعشان تشترى واحدة تمام اكيد هتتدفع اكتر يعنى نقول عربية نظيفة 50 ولا انتا هتجبها هتقف عليك 47 بعد الشغل وهتبقى زى ام 50 انتا الاولى بالفلوس لاكن لو اكتر بلاش بس لازم تقول كمليات العربية عشان نعرف نححد سعر يعنى ازاز كهرباء فتحت سقف جنوط فرش كل دا هيفرق طبعااا

[Bonanza]

عايز راى شايف ان العربية اساسيات سلمية والعربية هتصرف مصارف\يف عادية مش مكلفة لو خلصتها بسعر حلو مثلا لو يكون43 الف

وهتصرف عليها 3الف بس هتبقى عربية شيل لاكن لو بقى صفرت نظر عن العربية وعشان تشترى واحدة تمام اكيد هتتدفع اكتر يعنى نقول عربية نظيفة 50 ولا انتا هتجبها هتقف عليك 47 بعد الشغل وهتبقى زى ام 50 انتا الاولى بالفلوس لاكن لو اكتر بلاش بس لازم تقول كمليات العربية عشان نعرف نححد سعر يعنى ازاز كهرباء فتحت سقف جنوط فرش كل دا هيفرق طبعااا

شكرا لاهتماماك يا باشا
العربية تكييف و باور و سنتر و 4 زجاج كهرباء

[sonystar]

معلش سوال الفانوس الامامى الكبير ولا الصغير

[Bonanza]

مش عارف ايه الفانوس الكبير و لا الصغير ده يا باشا
بس هي الشبكة الرفيعة موديل 98 مش الشبكة الكبيرة شوية

[sonystar]

مش عارف ايه الفانوس الكبير و لا الصغير ده يا باشا
بس هي الشبكة الرفيعة موديل 98 مش الشبكة الكبيرة شوية

الشبكة الرفيعى يبقى الفانوس الصغير حلو ياريس العربية لو خلصت 45الف واقل من كدااا تبقى تمام


انتا عارف الازاز الكهرباء دا بيتكلف كام لو مش موجود بيدخل فى حوالى 1500 جنية لان الواحد بيغير الفرش بتاع الابواب فا اللى انتا هتشتريها فى ازاز كهرباء


وعارف كمان الابواب كاملة بكام2000 جينى


يعنى الواحد لو العربية عندة مش ازاز كهرباء عايز يقلبها ازاز كهرباء من الاحسن انة يجيب الابواب كاملة احسم ما جيب الفرش بس ودى فى حد زتها مصاريف



فا توكل على الله

بس ياريت ططمن على العفشى كويس لان فى ناس بتكبس الاتياش يعنى انك تقصد البوش اللى فى الاسكتراء

لازم ططمن ان الاسكتراء حالتها حلوة ومش معمول فيها شكل قبل كدااا



تمنياتى بالتوفيق

[SkyBird]

العيوب اللي فيها بسيطه
بس حضرتك ما قلتش هي مانيوال ولا او اوتوماتيك
فول اوبشن ولا لأ ؟
انا رايي ان العربيبة حالتها كويسة
لو مانيوال فول اوبشن فابريكه جوه بيتهيألي 47
لو اوتوماتيك فول اوبشن فابريكه جوه يبقى 49 او 50 الف

[Bonanza]

انا مش عارف اشكركم ازاي يا جماعة علي الردود السريعة و المفيده جدا دي

جزاكم الله كل خير والله

العربيه 1300 مانيوال يا باشا ( تكيف و سنتر و باور و 4 زجاج كهرباء ) مفيهاش جنوط و مفيهاش فوج لايتس و مفيهاش فتحة سقف

هي كده تبقي فول اوبشن ولا هاف اوبشن ؟
اللي انا اعرفة الجنوط و الفوجات و فتحة السقف و السبويلر تبقي هاي لاين في الجديد
مش كده صح ؟