أضحك على فى تيل الفرامل!!!

[bakbakbak]

حسب الله ونعم الوكيل ربنا ينتقم أنا رحت جبت تيل فرامل لانسر من المنصورة من عند واحد أسمه الخضرى المهم أشتريته ب 420 جنية والله من دم الحى وكان فى العلبة الأصليه خدته من غبائى ومشيت رحت أركبه طلعته من العلبة شكله كده وسخ شوية المهم الراجل قلى هو كان راكب قبل كده ولا أى قلت له لا فركه فى الأرض وجده كويس
طيب المشكلة بقى والمصيبة أنى لما فتحته لاقيت مكتوب على التيل أسم شركة تانية لكن برضه ركبته من خيبتى أصل فى ناس قالت لى لو لونه أخضر يبقى الأصلى وبعدين لاقيت هنا ناس بتقول أن ده بيكون صينى بيتحط فى علب أصليه بس بيكون سعره 100 جنية يقوم هو بيعه أعلى من سعر التوكيل للأصلى ربنا ينتقم يارب

[mr_vampire]

ربنا يعوض عليك. بس مكنتش تركبه وكنت تروح ترجعه. وبعدين في حد يشتري تيل ب 420 من برا التوكيل ياراجل. يلا معلش محدش بيتعلم ببلاش. ربنا يعوض عليك كمان مرة

[bakbakbak]

ربنا يعوض عليك. بس مكنتش تركبه وكنت تروح ترجعه. وبعدين في حد يشتري تيل ب 420 من برا التوكيل ياراجل. يلا معلش محدش بيتعلم ببلاش. ربنا يعوض عليك كمان مرة

تقول أى بقى أصلى من المنصورة والله لو شركة الرواس دى محترمة مكنتش بهدلة الناس والله يا أخى أنا جيبت الغالى عشان مش تفتح بقها والناس كلها بتقول أن عنده الأصلى "حسب الله ونعم الوكيل "ده أصلى ده ربنا ينتقم منه

[مصراوي جدا]

الخضري فعلا موزع قطع غيار معتمد لشركة مصرية وعنده قطع غيار أصلية وسعر 420 جنيه ده سعر الأصلي زي ما بيتباع عندنا

شوف حضرتك الموضوع ده فيه صور التيل الأصلي اعتقد هتلاقيه هو نفسه اللي انت اشتريته

http://www.nilemotors.net/Nile/23168-a.html


سعر الأصلي عندنا الآن 385 ج + 10% يعني 423.5 جنيه

[dr-mohamed]

اخيرا الباشمهندس طارق ظهر وبيرد كمان على استفسار
نورت مكانك يا باشمهندس
واحشنا

[bassem_sams]

حمد الله على سلامتك يا بشمهندس طارق و ان سعيد ان حضرتك بتشارك و قسم متسوبيشى منور بحضرتك و هتلأقى الاعضاء كلهم هيسعدوا جدا بمشاركتك كتير

[M.Akef]

انا مش بجيب حجتي الا من الخضري الي عند سميه الجمل اصلا و اسعاره كويسه جدا و لسه جايب تيل يباني من عنده ب120 و وراني قال في يباني ب80 و تيواني ب100 و دا اليباني التاني ب120 و في الاصلي ب420 و انا خد الي ب120 و كلهم هناك ناس محترمه اصلا لو انت رجعت لهم و قلت لهم هيرجعولك فلوسك او يشوفو ايه الغلط الي حصل و يغيرهولك بالاصلي مكنشي يمفع تركبه اصلا كنت ترجع لهم تاني الخضري ليه فروع كتير و عمره ما يضيع اسمه عشان تيل فرامل!!

[asemx1]

على فكره كان ممكن ترجعه وتاخد فلوسك دول ناس محترمه بس حراميه علامات ههههههههههههه بتشترى من عنده العلامه مسروقه ب 30 جنيه

[shooter123]

نورت القسم يا باشمهندس طارق ايوة كدا
حرام عليك تشتري تيل ب 420 جنية
كنت تروح ترجعه

[Abdo_Eldesokey]

لأ على فكرة الخضري مش حرامي خالص ، ده من أكثر التجار المحترمة

هيقلك عندي الصيني بكذا والأصلي بكذا والمضروب بكذا ، ولك حرية الاختيار

ممكن يكون حصل خطأ غير مقصود مع حضرتك ، وكنت المفروض ترجعله تشوف إيه الوضع

[mohamedway]

أكيد هو ادالك الأصلى (الأصلى شكله و سخ عن التقليد و لونه أخضر و مش مكتوب عليه متسوبيشى زى ماانت فاكر و لكن مكتوب عليه ماركة التيل sumitomo) و بعدين متخليش ميكانيكى يعمل حركة فرك التيل فى الأرض ده تانى عشان ده حركة غبية جدا و بتخلى سطح التيل غير مستوى زى ما بيبقه جاى من المصنع و هياخد وقت أكبر معاك لغاية ما يطبع و ممكن يقرفك لغاية ما يطبع و تلاقى الفرامل بتمسك ناحية أكتر من ناحية حسب درجة فرك (تبويظ) كل لقمه تيل عن التانية

شوف صورة التيل الأصلى فى الرابط اللى حطه البشمهندس طارق..........................


منور يا بشمهندس طارق و بجد وحشتنا جدا.........

[bakbakbak]

بجد مشكور لكم على الرد أنا أظن فعلا أنه كان مكتوب عليه سوميتو حتى أنا أستغربت وكنت هاتجنن
هو التيل ركب فى ثانية ولغاية دلوقتى مفيش أى مشكلة هو اللى خوفنى أنه لم يعطنى أى فاتورة ,بس كنت عايز أسئلكم عن حد فى المنصورة أغير عنده زيت الفتيس الأتوماتيك وأى نوع وبكام بس يكون نوع نظيف عموما هو صاحب العربية غير الزيوت والسيور كلها فى صيانة ال80 ألف كيلو هى دلوقتى 100 ألف هل محتاجة تغيير

[M.Nasr]

طالما الباشمهندس طارق - اللى رجع نور المنتدى من تانى - قال ان الخضرى ده موزع معتمد يبقى حضرتك اطمن ان شاء الله خير بس موضوع الفاتورة ده اللى معلش حضرتك غلطان فيه لازم كنت تاخد فاتورة باللى اشتريته عشان اى ظروف

[bakbakbak]

طالما الباشمهندس طارق - اللى رجع نور المنتدى من تانى - قال ان الخضرى ده موزع معتمد يبقى حضرتك اطمن ان شاء الله خير بس موضوع الفاتورة ده اللى معلش حضرتك غلطان فيه لازم كنت تاخد فاتورة باللى اشتريته عشان اى ظروف

ربنا يخليك يا أستاذ ناصر على مداخلتك والباشمهندس طارق.

[مصراوي جدا]

طالما العربية عملت صيانة التمانين فالمفروض اتغير فيها كل الزيوت والسبور وعموما بخصوص مكان لتغيير زيت الفتيس او مراكز صيانة بشكل عام في المنصورة ففية في الموضوع المثبت عن مراكز الصيانة مركزين معتمدين في المنصورة هما العدوي والدلتا ممكن تروح لواحد منهم ويراجع على السيور والزيوت ويتأكد انها كويسة ومش محتاجة تغيير

وشكرا لكم جميعا على ترحيبكم بي وباذن الله ارجع اشارك بقوة تاني قريب جدا