معجزة ميتسوبيشي ... عربية صديق ليا

[Haitham10]

السلام عليكم ورحمة الله وبركاته

ياجماعه بإختصار شديد ليا واحد صاحبي معاه لانسر بومة 2008 1600 العربيه عدادها حاليا عدي ال80 الف ومع ذلك محصلش فيها غير انه بيغير زيت وفلتره احيانا وطبعا طبعا بنزين 80

دلوقتي عاوز اعرف العربيه دي ماشيه ولا شغاله لحد دلوقتي ازاي
ومن يوم مااشتراها عمرها مادخلت توكيل اصلا او اتعملها اي نوع صيانة ييجي علي بالكم

صاحبي دة من الاسماعيليه

[eng.m7md.ali]

بسم الله ماشاء الله
ربنا يباركلو فيها

[moroattar]

بنزين 80 !!!!!!!!!!!!!!!

[amooor22]

مش معنى انها ماشيه يبقى كله تمام
العربيه دي ممكن او لازم هتلاقيها بتأخر في الدوران لان فلتر البنزين متغيرش ومعاد تغيره كل 40 الف كلم ومعاه زيت الفتيس الاتوماتيك وسير الكاتينه عال 60 الف وبعدين كل 40 الف دي الصيانات الدوريه
اما بالنسبه للتيل طبعا حسب المشي لكن في المجمل ده مش صح الي صاحبك بيعمله لازم تتابع الصيانه الدوريه في مكان كويس على الاقل مركز خدمه وكل 20 الف على الاقل علشان العربيه تفضل ماشيه معاك لان لا قدر الله لو سير الكاتينه اتقطع اقل شئ انك هتحل وش سلندر وتغير طقم صباب

[shooter123]

ليه يا هيثم الحقد ده؟؟؟؟؟
تلاقي صاحبك بس نيته صافية وقلبه ابيض وبيحب احمد عز والحزب الوطني

[kh_talaat]

ربنا يبارك له فيها

[Dr Ahmed]

هيبقى عمرها قصير وهتفتح بقها فى أى وقت خاصة بعد الموضوع ده

[mr_vampire]

اتصل بصاحبك بكرة اطمن عليه وعالعربية بعد الكلام اللي اتقال. ولو قالك ان في حاجة حصلت فالعربية علي فجاة وميعرفش السبب قوله احنا عارفين السبب واعمل عبده عشان صداقتكو تستمر

[zakiali]

لو فضل كده هتنهار انهيار مفاجيء .. مش هيلاحق عليها طلبات متقلقش .. وسعتها هتسأل .. هو ازاي كان مكبر دماغه كده

[sonystar]

عادى دا فى بى امات ماشة برضة 80

[tigernet]

ياباشا انا عندى واحد صحبى معة لانسر 1300 2008 عاملة 96000 الف كيلو
و مغيرش اى حاجة فى العربية غير الزيت
و العجل لسة مغيرة من اسبوعين
وحالة العربية نظيفة جدا و لو شفتها هتقول انها عاملة 30 40 الف كيلو

[أبو إياد]

طبيعى جدا ياهيثم ومحدش يستغرب فعلا ياجماعه وانا عارف ومتاكد من الكلام ده

ومعاك لغايه 120 الف بس طبعا لازم تغيير السيور قبل ال90 وانا جربت الكلام ده بنفسى فى عربيه 2005 كل اللى غيرته دراعات الاسكترا فقط لا غير

[M.Al-Hefnawy]

في ناس بتخلط البنزين 90 مع 80 أو 92 مع 80، هل ده كويس ولا أيه.؟

[MAX_PIN]

فعلا انا ليا واحد قريبى كان جايب لانسر وشغلها فى مكتب تأجير وبعد ما استلم العربيه من المكتب
كانت عملت 90 ألف كيلو واكتشف فى التوكيل لما وداها انها معملتش اى نوع من انواع الصيانه
وعملها الصيانة المطلوبة وماشية معاه ماشاء الله زى الفل وبعدين اللانسر من العربيات الى بتتحمل
اوى لأن لو العربية ديه اى كلام مكانتش اصلا هتقعد لحد 50 ألف بحالة كويسه بدون صيانة

[Ahmed Nouh]

خلينا نشوف ايه اللى كان المفروض يتغير فى الفترة دى غير الزيت

فلتر البنزين فى المقابلة اللى فاتت الناس اجمعت ان طالما انت مبتجيش ناحية الربع الاخير من التانك مش محتاج تغيره ابدا , حتى الناس اللى مبتعملش كدا العربيه ماشية معاهم تمام ولا الفلتر اتسد ولا حاجة

التيل اكيد طبعا اتهرى والفرامل بقت ضعيفه وبياكل فى الطنبوره

فلتر الهواء بالتنظيف يمشى عليه عادى بس اكيد هتلاقى فيه حتت مقطوعة وكدا غلط ممكن يدخل منه وبر او اى حاجه صغيرة جوا وتعمله مشاكل كبيرة

البوجيهات هى اللغز الوحيد بالنسبة لى ازاى كل ده ولسه شغالة !!!

ربنا يباركله فيها بس نبه عليه ان دلوقتى لازم يغير السيور علشان العملية متقلبش معاه بدراما

اللانسر بتثبت كل يوم قد ايه هى عربية حمارة شغل متفصلة للمصريين :)