تغيير الزيت للبومه؟؟

[A7medHeaders]

السلام عليكم ورحمة الله وبركاته

انا معايا لانسربومه1600 2010 وهيا دلوقتي عامله 2270 كيلو متر فكنت عايز أغيرلها زيت .. فمش عارف أحطلها موبيل 1 ولا شل ولا كاسترول ولا ... ؟؟ وأيضا هل زيت كاسترول ايدج سبورت يصلح للانسر؟؟ وهل بيتم تغيير فلتر زيت عند تغيير الزيت؟؟ ويا ريت أسعار الزيوت الشائعة وهل علبة واحدة تكفي أم أكثر؟؟
وأخر سؤال معلش هل فلتر زيت k&n يعتبر أحسن من الستوك - أصلي شايف ناس كتير بتركبه - وما هي مميزاته عن الفلتر العادي؟؟؟

وشكرااااااا,,,

[eldell]

وعليكم السلام بالنسبه للزيت انا بحط موبيل وان هو كويس بالنسبه للفلتر يستحسن انك تغيره لو هتغير نوع الزيت الى عندك والعربيه لو مغير فلتر بتاخد الجركن كلو لاكن لو مش مغيره بتاخده الا حبه منه

[A7medHeaders]

وعليكم السلام بالنسبه للزيت انا بحط موبيل وان هو كويس بالنسبه للفلتر يستحسن انك تغيره لو هتغير نوع الزيت الى عندك والعربيه لو مغير فلتر بتاخد الجركن كلو لاكن لو مش مغيره بتاخده الا حبه منه

شكرا جزيلا لرد حضرتك وفي انتظار باقي الأراء ..

[nice_bird]

بص يا باشا انت ممكن تستخدم موبيل 1 من الزيرو طول ما انت مشيك بالعربية كويس (مبتحرقش و مبشدش وكدا ) لاكن لو عايز شغل الحرق والسحب يبقي خليك في موبيل xhp كل 3 الاف هيكون احسن لك والكلام دا عن تجربة بجد مفيش زيت هيريحك زي دول وبالنسبة للفلتر بيقعد 10000 كيلو علي نفس نوع الزيت لاكن لو غيرت نوع الزيت يبقي لازم تغير الفلتر معاة ومتجبش غير الفلت الياباني الاصلي وربنا يباركلك فيها يا ريس

[devilishtigers]

انا مش بيعجبني موبيل وكنت حاطط شيل وكنت حابب سحب العربية وفي مرة نسيت اشتري شيل وانا رايح اعمل الصيانة وحاطيت موبيل
بس حاسس ان شيل افضل

[rekillme]

شوف يا عزيزى
الخلاصة هو مفيش غيره افضل زيت موبيل xhp الجركن الرصاصى 3000 كم
عن تجربة والله كل ما تغير الزيت تحس بفرق كبير فى نعومة الموتور وهدوءه وسحبه
تحياتى

[dede_sese]

افضل زيت على الاطلاق هو شل سواء كان الالتر (10000) او هليكس بلس وده مستورد وبيعمل 7000 او هليكس الاصفر 5000 . هاتحس برفق رهيب فى نعومه الماتور

[szaalouk]

السلام عليكم و رحمه الله و بركاته
اولا الف مبروك علي عربيه حضرتك و انشاء الله تنبسط معاها لأنها عربيه محترمه جدا جدا جدا
انا شخصيا عربيتي معايا من الزيرو (2005) و لحد النهارده لازلت مستمتع بيها جدا .
بالنسبه لنوع الزيت فأنا شخصيا استعملت الموبيل 1 لمده طويله و بعدين غيرت لشيل هيلكس و مش عاوز اقوللك بصراحه
احساس مختلف تماما من نعومه و راحه للموتور و استجابه في السحب .
بالنسبه للفلتر خلليك مع الأصلي و حاول تشتريه من الشركه ( حوالين ال50 جم ) يمكن ازيد شويه مش فاكر بالضبط
لكن اوعي اي تاجر او محطه بنزين يديللك اي حاجه مكتوب عليها Made In Japan و سعرها من 20 ل 30 جم حسب المنطقه و التاجر ، صدقني كله مضروب تحت السلم و بيفرق جدا في ضغط الزيت جوه الموتور و بيتعبه .
بالنسبه للكميه فالعربيه بتاخد 3 كجم بالضبط و لو حاتغير فلتر ب 3.3 لتر و ده من واقع كتالوج العربيه .، و اكتر من كده يعتبر هدر للزيت لأنك دافع تمنه و غالي جدا بالأضافه الي انه حايمثل ضغط اضافي علي الموتور و حاتحس ان العربيه مش مضبوطه
( زي ما تأكل واحد اكتر من طاقته بكتير فيبقي مش عارف يقوم من علي السفره اصلا ) . و انا بغير كل 7500 كم .
بالنسبه لزيت الجير الأوتوماتيك انا جربت الموبيبل و الشل و الفيسكو مؤخرا .
اسوأهم الشيل ( خفيف جدا ) و الموبيل جيد و الفيسكو لسه اول تجربه له معايا و يادوب حسبه 2000 كم عليه و احساسي بيه محترم بس ما اقدرش احكم عليه الا بعد 10 15 الف كم ( عموما موبيل أحسن بكتير من الشل ) و العربيه بتاخد 6 كيلو للجير الأوتوماتيك ( بخللي الراجل يشفط الكميه من فتحه المقاس و نحط علي قد اللي خرج في الوعاء المدرج ) و بغيره كل 20000 كم لكن اول مره نزلت زيت الأوتوماتيك علي 60000 كم .
آ سف علي الإطاله و اتمني اكون مفيد لحضرتك .
أخوك شريف .

[A7medHeaders]

بجد أقل حاجة أقدر أقولها لحضراتكم ربنا يجزيكم كل خير وشكرا لكم جميعا علي ردودكم اللي أفادتني جدا ..

[homos99]

طيب يا جماعة ممكن سؤال ؟؟ انا بشد وبحرق معظم الوقت في السواقة ,,, طيب انا دلوقتي احط اي نوع زيت موبيل 1 ولا موبيل xhp ولا شيل هيلكس نظرا ان انا عملت 10000 في خمسة اشهر من ساعة لما جبت السيارة وهل عدد الكيلومترات دا كتير ولا قليل ؟؟

[Hossambecks]

طيب يا جماعة ممكن سؤال ؟؟ انا بشد وبحرق معظم الوقت في السواقة ,,, طيب انا دلوقتي احط اي نوع زيت موبيل 1 ولا موبيل xhp ولا شيل هيلكس نظرا ان انا عملت 10000 في خمسة اشهر من ساعة لما جبت السيارة وهل عدد الكيلومترات دا كتير ولا قليل ؟؟

السلام عليكم
باشا معدل مشيك كتير طبعا و لو زودت حبه كمان عداد الكيلو متر عندك هيبقى اعلى من التاكسي
لو ال 10000 دول كنت بتعملهم على فترات كبيره فيبقى موبيل 1 احسن لمتورك
لكن واضح ان مشيك كتير و اليوم الواحد عندك بيعدي 100 كيلو
يبقى استخدم موبيل xhp
اما بلنسبه للشد و الجري فكلنا بنجري و بنشد بس مش هو دا العادي
الموتور هو اللي هيتهلك و طبعا عمر العربيه و سعرها لما تيجي تبعها
و الله الكلام دا عن تجربه شخصيه
و الأهم من دا كولو, عشانك انت عشان لا قدر الله الحوادث , وربنا يحميك

[homos99]

السلام عليكم
باشا معدل مشيك كتير طبعا و لو زودت حبه كمان عداد الكيلو متر عندك هيبقى اعلى من التاكسي
لو ال 10000 دول كنت بتعملهم على فترات كبيره فيبقى موبيل 1 احسن لمتورك
لكن واضح ان مشيك كتير و اليوم الواحد عندك بيعدي 100 كيلو
يبقى استخدم موبيل xhp
اما بلنسبه للشد و الجري فكلنا بنجري و بنشد بس مش هو دا العادي
الموتور هو اللي هيتهلك و طبعا عمر العربيه و سعرها لما تيجي تبعها
و الله الكلام دا عن تجربه شخصيه
و الأهم من دا كولو, عشانك انت عشان لا قدر الله الحوادث , وربنا يحميك

شكرا على رد حضرتك ,,, بس انا كنت بسافر كتير الايام اللي فاتت ,,, لأ مش العادي عندي الشد لاكن بجري كتير ,,, عموما انا شاكر نصيحتك جدا والواحد لازم فعلا يحافظ على عمر الموتور ,,, ان شاء الله هستعمل موبيل xhp

[jagu]

عن تجربة فى اكتر من عربية سواء معايا او مع ناس من الأهل او اصدقاء شل احسن بكتيير من موبيل فى الزيوت

[Unendlich]

أنا شخصيا بستخدم موبيل 1
الصراحة البلد الوحيدة على وجه الكرة الأرضية اللي ممكن تلاقي فيها ناس بتقول إن زيت عادي أفضل من تخليقي

[HeRo_LaNCeR]

رائي الشخصي موبيل 1