الوكيل و تركيب قطع غيار من الخارج ؟

[mazagnge]

شـــباب بعـــد التحية و الذي منة :o

انا عقبلكم كــــدة مسافر عمرة الفترة اللي جية :)

و بفكر أشتري بعض قطع الغيار من السعودية نظراً لفارق السعر اللي هناك

فكنت عايز أعرف الاتي :

- هل في مشاكل اني أجيب قطع الغيار معي و التوكيل يركبها لي في مصر ؟
- عايز أعرف اسعار القطع الاتية عشان اعرف الفارق يستحق ولا لأ :
* سعــر فوج اللانســر امامي
* سعر الفانوس الخلفي كام
* سعــر تيل فرامل ..... ( 300 ج )
* سعــر ذراع نور ..... ( 440 ج )

- استفسار لمن تعامل مع التوكيل ..... ( انا أقرب توكيل هو توكيل قليوب )

- انا عايز اشحن التكيف + و أظبط العفشــة يا تري يكلفوني كام

و معلش يا شباب عشـان نظبط الميزانية و نشوف هيبقي في قروض و نشد اللحاف علي قد رجلينا :D

[johnyweb]

تابع المواضيع النثبتة هاتفيدك في النقط ديه .

[مصراوي جدا]

أولا مبروك العمرة ولا تنسانا من صالح الدعوات

سعر لمبات الفوج لانسر 98 أكتر من 2000 جنيه ومش موجودة بنجيبها بالطلب فطبعا افضل لو جبتها من السعودية

سعر الفانوس الخلفي الواحد حوالي 850 جنيه

في التوكيل شحن التكييف فقط حوالي 360 جنيه

أما شحن التكييف مع تنظيف الثلاجة (اصل مفيش فلتر تكييف للانسر 98) فبيفكوا التابلوه وينظفوا التكييف بالكامل بحوالي 600 جنيه

بالنسبة للعفشة دي قصتها طويلة شوية لأنها اجزاء كتير وسعرها مش قليل ، عندي اقتراح كويس حضرتك شرفنا في مركز قليوب في اي وقت قبل السفر نكشف على العفشة ونتفق على اللي العربية عاوزاه وتجيبه من هناك لو فرق السعر كويس ولما ترجع بالسلامة نشوف هنعمل ايه عفشة وتكييف وتركيب

[mazagnge]

شكر و تقدير

يا باشمهندس / طارق

انا شاكر الافضال و أهتمام ساعدتك اللي فوق الوصف .... و جزاك الله كل خير :)
و الدعوات محفوظة .... امانة ما تقلقش
و بالنسبة لاقتراحك .... شكلها ها ترسي علي كـــــدة

بس السؤال : اروح اعمل فحص كامل للسيارة الاول و بعد كدة ناخد لستة باسعار الحاجة و التركيب في التوكيل تمام كدة ولا انا فهمي ع قدي :o اصل انييييييييي من الأرياف :D

بالنسبة لموضوع التكييف و الــ 600 ج .... انا بفكر اجيب لوح ثلج كل يوم الصبح و اوصلة بالمروحة بتاعه العربية .... و برضة مش ها دفع 600 ج فى ال10 سنين الي جيين :D
............. مرة تانية شكرا ً يا باشمهندس على تعبك و اهتمامك :)

[mazagnge]

صحيح يا باشمهندس .... بالنسبة لرحلة الوكيل :)
هأحتاج أحجز ميعاد الأول
، ولا أروح لهم و أقول أنا البرادعي يا رشدي :D يعني اروح علي طول و الاولوية بالوصول إلي التوكيل

[Ramy.Gamal]

عمره مقبوله انشاء الله

اولا احب اقولك انى كنت هناك فى رمضان بعمل عمرة وملاقتش لانسر خالص غير عربيتين وكانوا على الطريق بين مكه والمدينة هما مش معترفين غير بالتويوتا اللى زى الرز هناك وعينات من الهوندا والمازدا ودة اللى مخلى زى ما سمعت قطع غيار الانسر غاليه قوى هناك ،ثانيا ماتشتريش من محلات عاديه علشان ممكن تكون تقليد لو لقيت مركز للعيسائى اسأل عندة لانه الوكيل للمتسوبيشى وياريت تلاقى حاجات هناك تشتريها ونسألك الدعاء للمسلمين اجمعين

[مصراوي جدا]

بس السؤال : اروح اعمل فحص كامل للسيارة الاول و بعد كدة ناخد لستة باسعار الحاجة و التركيب في التوكيل تمام كدة ولا انا فهمي ع قدي :o اصل انييييييييي من الأرياف :D

تمام كده

هأحتاج أحجز ميعاد الأول

لأ .. مش مشكلة ميعاد بس اديني خبر قبلها هتيجي امتى

وملاقتش لانسر خالص غير عربيتين وكانوا على الطريق بين مكه والمدينة

هي اللانسر قليلة في السعودية لكن مش للدرجة دي ، معظم شركات ايجار السيارات بتشتغل كورولا ولانسر يعني باذن الله يلاقي قطع غيار لها

[mazagnge]

من الأخــــر ذوقك فوق الوصف يا باشمهندس

متشكر يا رامي باشــا .... :)و ادينا ريحين و هانشوف ، بس سؤال انت دورت في مكة ولا المدينة و لا جدة

[Ramy.Gamal]

بصراحة مدورتش هناك لانى قاعد جنب الحرم وكمان مش لاقى العربية اساسا دة انا قربت انساها هناك وانت عارف عمره رمضان تهجد وتراويح خمس فروض والزحمة مش بتخليك تتحرك بحريه بس انت طبعا هتروح فى وقت فاضى عن رمضان انت ممكن تسأل سواقين التاكسيات اكتر ناس هيفيدوك على اماكن قطع الغيار وإن شاء الله عمره مقبوله ولما ترجع بالسلامه قولنا اشتريت حاجة ولا لأ

[Ramy.Gamal]

هى طبعا فى الكويت والامارات اللانسر اكتر بكتير من السعوديه وقطر علشان كدة تلاقى قطع غيار اللانسر فى الكويت والامارات منتشرة واكيد ارخص من السعوديه وقطر وعلشان الانتشار دة هتلاقى المواصفات الكويتى وبعدها الاماراتى الاعلى فى المواصفات الخليجى غير المواصفات السعودى والقطرى خالص

[boody2]

سيدي الفاضل

انا قاعد هنا في دبي و فعلا السيارة مع احترامي ليها تعتبر عربية درجة رابعة مش بيحبوها و بتستخدم في شركات الايجار التعبانة و او الشركات بتشتري ال 1300 منها لمندوبيها

الامارات هنا بتعشققققق كل ما هو تويوتا عشقا و هياما

بالنسبة لقطع الغيار انا لفيت هنا في نايف و في محلات بيع الجملة للسيارات الميتسوبيشي و كماليات الميتسوبيشي لقيت ان والله هي هي نفس اسعار مصر و للحلفان يمكن مصر اغلي 20 او 30 جنيه مع الملاحظة ان لو اشتريت من مصر البائع حيكون امامامك ممكن ترجعله لو في مشكلة

حتي الفوج لايت في دبي ب 180 درهم من غير التركيب (270 جنيه تقريبا ) و تمنهم في مصر 350 او 400 بالتركيب و الضمان و هما هما نفس الفوج لايت

مش مستاهلة تجيب من بره

و اسف علي الاطالة

[mazagnge]

شكـــرا ُ علي الاهتمام و التجاوب يا أحلي شـــباب

... و الله يا جماعه ادينا خدنا الاسعار من هنا ، لقينا حاجة تستحق خير و بركة
ما لقينا يبقي زى ما رحنا زي ما جينا

بس أعتقد ... اني بدور على حاجتين اساسي :
1 - ذراع النور هو هنا بحوالى .... ان لقيتة بسعر اقل أعتقد ها جيبة اكيد
2 - فوجات العربية ... الصراحة اللي موجود هنا فى حدود 375 ج بس انا مش عجبني البلاستيك الاسود اللي بيكمل الفوج و لمبة في الوسط ، انا عايزة زي الفانوس و علي قد مكانة في الاكصدام زى اللي موجود في الاوكتافيا مثلا ً او النترا .

------- اعتزار كبير ل م / طارق .... انت عارف دوشة السفر و صدقنى انا بكتب الرد و بجهز هدومي و المج بتاعي :D فما لحقتش اخطف يوم اجي فى التوكيل بس اكيد اكيد لي زيارة علي الاقل أعرف الراجل المحترم اللي تعبتة معي .
و اخيرا ً و ليس بأخرا ً ... انتظروا تقرير مزجنجي ابو العافية نايل تورز مووووووووووووووسكو

[مصراوي جدا]

تروح وتيجي بالسلامة وعمرة مقبولة باذن الله