ما هو تقييمك لوكيل ميتسوبيشي و مراكز الخدمه

[Islam_galal]

أنا تعمدت أقلل درجات التقييم لتقليل الخطأ الناتج من أن بعض الناس تميل لوضع تقييمات متفائلة و العكس

برجاء المشاركة ممن يتعامل بشخصه مع الوكيل لضمان نزاهة الإستطلاع (شكرا)

[elpasha009]

عن تجربة العربية عاملة 50 ألف كيلو هو جيد يعني مفيش العيوب اللي الواحد بيسمع عنها في بعض التوكيلات التانية.
العيب المهم إنه بجد مش منظر توكيل عربية ياباني محترة زي المتسوبيشي.بجد مش عارف إزاي بتوع اليابان ساكتين على الموضوع ده:)بس أنا عرفت إنهم بعمله مبني جديد جنب الرئيسي في قليوب وتقرلايبا هيخلص قريب.الناس هناك فاهمة كويس وبتهتم جدا بالعميل وبجد بيقطعو نفسهم شغل.

[hossameg20035]

صراحة توكيل**********

والواحد راح علشان كنت جايب عربية مستعملة ومش عاي أعك

بس الواحد بعده هعك كل يوم أحسن من المرواح

[mpilot_2006]

انا كنت لسه عامل صيانة الاف فى المركز الرئيسى فى قليوب بس مش حاسس ان فى نظام خالص يعنى فى بطء شديد وبرضو اللى ليه حد هناك يجى يدخل العربية وعالطول تخلص انما اللى مالوش حد يتفضل يستنى الدور فى الاستراحة وبعدين المفروض ان يجى مهندس وهو بيستلم من العربية يسالك على الملاحظات اللى فيها مافيش حاجة من دى حصلت حتى وانا بسلم العربية كنت بقول للى استلمها منى ان التكيف ضعيف وان فى كذا وكذا قالى هما بيفحصو كل حاجة ولما العربية خلصت بعد انتظار 4 ساعات مع انها صيانة الف ولقيت التكيف زى ماهو ومعرفش بقى عملو فى حاجة ولا لا
من الاخر هو فى ناس كتير محترمة والناس فعلاً بتشتغل بس عايز شويه تنظيم والمفروض فعلاً يبان انو توكيل عربية يبانى محترمة مش اى عربية

[boody2]

لاسف و مع احترامي للاستاذ طارق

النوكيل قديم جدا و زحمة جدا جدا و كل الناس بتشتكي جدا من التاخير و اسعار قطع الغيار و انا بجد حاسس ان في صيانة ال 30000 كم الاخيرة ما عملوش حاجة غير انهم غيروا زيت للعربية و للاسف لقيتهم رافعين العربية و لما سئلتهم فيه ايه قالوا احنا بنعمل الرجلاش بتاع فرامل اليد طيب هو انا كنت اشتكيت من فرامل اليد؟؟؟؟؟ و بعدين بعد ما سيبت التوكيل بيومينبكشف علي مية الراديتير الي عمري ما ممليتها من سنين لقيتها ناقصة شوية مما يعني انهم ما كلفوش نفسهم يكشفوا عليها فاشتريت مية خضرا من بنزينة الامارات و خالية الراجل بتاع الزيت يزودها ...

عامة التوكيل مش هو توكيل الياباني لاكتر عربية شهرة في مصر

[hussam2009]

التوكيل المحترم يظهر وقت الشدة يا جماعه
تجربة شخصية فى سيارتى اللانسر 2007 لما الفتيس A حصل فيه مشكلة. التوكيل بعت جاب واحد جديد وركبوه والعربية عدادها 60000. يعنى قربت تخرج من الضمان.

[Dr.SherifMansy]

بصراحة انا عن نفسى باروح الرواس اللى فى ش النيل (مش عارف هل هو غير مصرية و لا معاه)
الناس هناك اكتر من ممتازين ، ده غير النظام و الذوق فى المعاملة
دى تجربتى الحالية من بعد ما غيرت من بطة 92 الى بومة 2008
لكن بصراحة مارحتش قليوب ابدا

[hishamkenawy]

انا لية عتاب على التوكيل المصرية او الرواس
مفيش حملة صيانة مجانية واحدة مفيش اعلان فى الجرائد عن الموديلات الجديدة
مفيش عروض على قطع الغيار + ان اسعارها غالية جدامش زى باقى التوكيلات تحس انهم مهتمين

[Ramytoyota]

اول غلطة فى التوكيل انة بيفرق بين العربية الخليجى و المصرى من حيث الضمان المفروض ان وكيل ميتسبوبيشى يضمن اى عربية ميتسوبيشى موجودة فى مصر و مالوش دعوة دى خليجى و لا مصرى لكن الوكيل بيضمن المصرى بس لانة ضايف تمن الضمان على العربية يعنى هو مش دافع اى حاجة من جيبة و بالتالى هو بيكسب مرتين مرة من تمن العربية اصلا و مرة تانية بحجة الضمان ,لان الى بيبيع عربية خليجى بيبقى كسبان فيها برضة.
ولكن العيب مش على الوكيل اصلا لكن العيب على اثنين:-
اولا: الدولة و تحديدا جهاز حماية المستهلك لكن احنا اتعودنا على كدة خلاص (سمك لبن تمر هندى )
ثانيا: شركة ميتوبيشى فى اليابان والى حتى ملهاش اى اميل ممكن نرسلها علية و نفدم من خلالة شكوانا من الوكيل سواء للعربيات الخليجى او المصرى

[مصراوي جدا]

اسمح لي يا استاذ رامي أرد على حضرتك في الجزئية دي

شركة ميتسوبيشي اليابان بتصدر عربياتها الى الدول المختلفة حسب المواصفات المناسبة لكل منطقة او دولة ، وبالتالي هي بتقدم الضمان للعربيات المباعة في كل دولة عن طريق وكيلها
اما العربيات المعاد تصديرها re-exported cars من دولة الى اخرى فشركة ميتسوبيشي اليابان لا تقدم عليها ضمان وده قرار الشركة مش قرار الوكيل

ومن حوالي سنتين تلاته كان بينزل في اعلانات شركة مصرية في الجرايد صورة الخطاب الموجه من ميتسوبيشي اليابان الى مدير عام شركة مصرية (الوكيل في مصر) يخبره فيه بأن الشركة لا تقدم ضمان على السيارات المعاد تصديرها من دولة الى اخرى (وعندي صورة الخطاب لو تحب تطلع عليه)
اذن فالتفريق بين المصري والخليجي من حيث الضمان ده مش الوكيل اللي بيعمله وانما الشركة الأم

وبعدين مفيش تمن للضمان مضاف للعربية لأن الضمان متحملاه الشركة الأم مش الوكيل انما الخليجي هو اللي بيكون ارخص من المصري لأنه بدون ضمان وبالتالي فاقد ميزة مهمه

[Samooh_2003]

مفيش شك التوكيل احسن في معظم الاحوال مع فرق في السعر بس مطمن شوية نمن ناحية اللي بيحط ايدو فيها وخصوصا الايدين ممكن توفر 100 تصرف قدامها 1000 بالنسبة لمراكز الخدمة وكدا انا جربت بتاع المهندسين اللي في شارع النيل الرواس والله الناس هناك كويسة (باستثناء انك لو روحت اي توكيل او مركز خدمة لازم تعد تشرب شاي وقهوة وكل حاجة براحتك تكون العربية يادوب بتخلص او قربت تدخل دورها وبيبقى فيه ناس داعيالك لو دخلت :k45:) بس بكون مطمن وانا طالع من هناك المعاملة كويسه وفيه احترام من الناس بصراحة

بس لحظت حاجة ان تقريبا الفروع ومراكز الخدمة فيها فرق في الاسعار عن بعض في بعض الحاجات هوه مش كبير 50 ومرة 40 في حاجة تانية مش عارف ليه

[hprima]

نفسنا نسمع عن عروض الصيانه المجانيه او الكشف المجانى
دى كل الدنيا بتقدم عروض اشمعنا وكيل ميتسوبيشى

[Ramytoyota]

مراكز الخدمة لا تليق بالسيارات الميتسوبيشى تماما

[turch]

الصراحه انا رحت التوكيل في صيانة ال30000 كنت شاري العربيه عامله 25000 وكنت عايز اطمن عليها ومكنتش اعرف ان الفتيس بتاعها cvt ولما قالولي انه كده قولتلهم طيب عايز افهم يعني ايه مشكورين طلع معايا مهندس من الصيانه وركب معايا العربيه وساقها وجربها وشرحلي بالتفصيل الممل يعني ايه cvt جزاه الله كل خير ده حتى متخرج من كليتي (هندسة شبرا)بس انا مدني وهو ميكانيكا ومعرفتش كده غير في الاخر كتر خيره الصراحه.

بخصوص الصيانه العربيه كان فيها حاجات هم عرفوها لوحدهم من غير انا مقول عليها زي مثلا كان في لمبتين في الصالون محروقين اتغيروا لوحدهم (لمبة الولاعه ولمبة الطفايه) وكان في مسمار متاكل في العفشه مشكورين غيروه وهكذا

فعن تجربتي الشخصيه انا مبسوط جدا ان عربيتي ليها ناس فاهمينها كويس وبيراعوها.

[mohamedosman1s]

اسف جدا لوبعترض علي رأي حضرتك في نقطة تحمل تكلفة الضمان
اولا : سيدي ارجع للفاتورة المصدرة من الوكيل للسيارة اللي طبعا مفيش حد بيشوفها غير المختصين ستجد ( سعر السيارة بعد الجمارك مضافه اليه الضريبة 15% ثم رسم تنمية الموارد ثم سعر الضمان ثم ضريبة الضمان ) اي ان الضمان له تكلفة يدفعها المشتري بعكس الخليجي
( سعر السيارة مضاف ايه الضريبة ثم رسم التنمية فقط ) اي ان فرق السعر بين السيارتان من تكلفة الضمان
ثانيا : السيارة الخليجي مواصفتها اعلي ( مثل في حالة الحوادث فتح البواب بعكس المصري . عزل حرراي لكامل السيارة ابواب وسقف وزجاج عازل حرارة . نوعية المواد المستخدمة في الصالون وفرش السيارة اعلي بالأضافة الي النواكل الخ.. )
ثالثا : جميع الأجزاء الميكانيكية ( محرك فيتيس عفشة تكيف نفس المصري ) وهذا رأي مختصين بالوكيل في المنتدي في مشاركة سابقة
رابعا : من المتعارف عليه دوليا ان الوكيل المحلي يضمن اي منتج تحمله العلامة التجارية في اي بلد ( تكلفة قطع غيار لأن من يتحملها هو المصنع باليابان ) اما المصناعيات فيتحملها الوكيل المحلي في حالة استيراده للسيارة اما السيارات التي لا يستوردها فيتحمل قطع الغيار فقط والمصناعيات علي العميل ( هذا النظام المتبع في وكيل فولكس فاجن في مصر ) ( وفي الخليج يوجد اكثر من وكيل لنفس الماركة في البلد الواحد وهم يتبعوا نفس السياسة ) ولكن في مصر لا ( اضحك علي الزبون بغرض المكسب الزيادة واشتري مني ) في الخليج العميل حر يشتري من اي وكيل بيشتري من اللي بيقدم احسن خدمة مش المحتكر
في رأي الوكيل المصري للمتسوبيشي مش قادر ينافس بدليل انه بيحاول يحتكر بس الخليجي فارض نفسه بعكس ماركات ثانيه مثل الأسكودا الوكيل فعلا مسيطر علي الخليجي بخدمته الجيده ومواصفات سياراته اللي اعلي من الخليجي
علي فكرة في سنه من السنين وكيل متسوبيشي في مصر قام بشراء بعض السيارات الخليجي وبعها في مصر بضمانه وده فعلا موجود والدليل انه ورقة المواصفات الخليجية موجودة علي السيارة من الداخل وده فعلا حادثة مشهورة والجميع عارفها ( اليس هذا اعتراف من الوكيل ان السيارتان الخليجي والمصري واحد ) اي ان لايوجد موصفات لمصر خاصة غير الكماليات فكيف لايضمن قطع الغيار وله ده بس نوع من انواع التسويق المضلل .
ارجو من الوكيل المصري ان يحترم عميله لأن فعلا متسوبيشي سيارة محترمه وشكرا.