تغير لمبة زر الانتظار - كريستالة

[Bonanza]

اولا انا عاوز اقترح اقتراح علي الادارة ياريت يتنفذ هايبقي مفيد لكل الناس بدون عناء

اقتراحي هو اننا نعمل قسم " اصنع بنفسك ( DIY ) " زي اي منتدي اجنبي
هنا في ناس دماغها تتاقل بالذهب و بتعمل اختراعات و افتكاسات زي الفل و مفيدة جدا و غير مكلفة بالمرة


المهم ندخل في الموضوع

الحمد لله و بتوفيقه غيرت لمبة زرار الانتظار في عربيتي _ اللمبة كانت محروقة
كنت بسأل عن طريقة لفك الزرار و مع شوية نخورة مني قدرت افكة

نبتدي في الخطوات بالصور

دا الغطاء بتاع لوحة التكيف



هانستخدم في فكة مفك عادة سنة رفيع و بهدوء و من غير عصبية ندخل سن المفك في المنطقة دي



و ببساطة جدا هايتفك معاك كده



و دول الاربع كلبسات اللي هو بيتثبت بيهم و الل احنا فكيناهم بالمفك العادة .. بهدوء كل حاجة هاتطلع




دي بقي الفيشة بتاعة زرار الانتظار ليها كليبس لونه ابيض من فوق هاندوس عليها و نشدها لفوق هاتتفك بكل سهولة بردو



ده الزرار بعد فك الفيشة



الجزء الاخضر ده عاوزين نفكه بقي عشان هو ده اللي ماسك فيه اللمبة
شايفين بقي النقطة الخضرا اللي صباعي مشاور عليها دي




دي شفة بندوس عليها لجوة و بنزق الطرف الاسود لبره عشان نخرج الجزء الاخضر من الاسود
الشفة دي موجوده علي الناحيتين
احنا بنخرج ناحية و احدة بس و بتشد الجزء الاخضر بالراحة هايطلع معاك
و ده شكله و الجزء اللي راكب فيه اللمبة



هانطلع اللمبة بنفس ذات المفك الرفيع
و شكلها كده



طبعا ماتاخدش بقي اللمبة كده زي ما انا عملت و تنزل تدور عليها عشان مفيش حد هاتلاقيها عنده بشكلها ده

لازم نفكها بقي من الجزء الازرق ده بطرف دبوس و هايبقي شكلها كده




اللمبة دي انا في ناس بتقول انها بتتباع عند بتوع الالكترونيات و بتوع تصليح الكاسيتات

انا بقي لقيتها موجوده في فرع النور بتاع اعياد الميلاد اللي بيبقي فيه لمبات فسافيس بتقعد تنور و تطفي
فرع السلك ده اسمة Bee Lights
و ده شكلة



هاتقص لمبة منهم و تشيل الجزء الاخضر من عليها بطرف Cutter
و تدخلها في الجزء الازرق تاني
وبعدين ترجع اللمبة بالجزء الازرق في القطعة الخضراء
و بعدين تركب الجزء الاخضر في الفيشة تاني عشان تجرب
افتح نور الطابلوه من دراع النور

هاتلاقيها ان شاء الله نورت معاك



الحمد لله نورت

قفل بقي كل حاجة تاني و مبروك عليك نور الزرار

ان شاء الله هاجرب اعمل كده في نور زراير التكييف و نور زراير الزجاج الكهربا

[Ahmed_Ramadan]

تسلم إيدك الشغل بإيدك طبعا ليه طعم تانى

[FunnyMickey]

الله ينور عليك ياحج اسامه
تسلم الدماغ
حعملها ان شاء الله انهارده

[nonnos5]

تمام اوى

انا عملت زيك كده بالظبط من اسبوعين كده
والله ينور عليك فى الدقة فى سرد الموضوع كده وبالصور كمان
بس انت عندك زرار الانتظار مقلوب شوية اتعدل لما فكيت ولا لاء
وانت نسيت تحط صورة بعد ماقفلت واللمبة منورة
انا كان نفسى بعد ماغيرتها اعمل الموضوع ده
علشان تقريبا كده مفيش كريستاله فيها لمبة الانتظار شغاله
لدرجة انى كنت فاكرها مفهاش لمبة لحد ما جازفت وفكيتها
بس الواحد وهو بيعمل الحاجات دى مابيبقاش فايق يصور
وشكرا على المجهود

[Bonanza]

لا يا باشا الزرار مش مقلوب هو كان معدول
بس انا لما فكيته افتركت اني لازم اصور
فا حطيتة كده اي كلام في الاول و صورت

و ان شاء الله بالليل هاصور الزرار
انا لسة مركبة حالا
زوغت من الشغل ربع ساعة و نزلت ركبتة و الشمس مش عاوز اقولك
انا كنت مستخبي تحت الشماسة الفضي

فعلا الواحد بيبقي مستمتع و هو بيعمل حاجة بايدة
و لو فكرت اد ايه انت ممكن تفيد الناس بعمل تقرير مصور اكيد هاتصور اي حاجة تعملها

[nonnos5]

عقبال زرار التكييف والزجاج

لا يا باشا الزرار مش مقلوب هو كان معدول
بس انا لما فكيته افتركت اني لازم اصور
فا حطيتة كده اي كلام في الاول و صورت

و ان شاء الله بالليل هاصور الزرار
انا لسة مركبة حالا
زوغت من الشغل ربع ساعة و نزلت ركبتة و الشمس مش عاوز اقولك
انا كنت مستخبي تحت الشماسة الفضي

فعلا الواحد بيبقي مستمتع و هو بيعمل حاجة بايدة
و لو فكرت اد ايه انت ممكن تفيد الناس بعمل تقرير مصور اكيد هاتصور اي حاجة تعملها

عقبال بقى ياباشا زرار التكييف والزجاج الحرارى
وانا لو عرفت طريقة فكهم هعملهم واقولك علشان الناس كلها تعرف
وانت برضك لو عرفت قولى
ممكن نعمل موضوع سواء
وشكرا لتعبك من اجل المعرفة

[eng_tefa]

مبــروك يا اسامه يا برنس
حط بقى صوره للزرار بليل وهو منور

[heshamzaky]

أية الحلاوة دى يا استاذ , هات اللمبة بدل ما أخطفك ماشى ههههههههههههه
حلو التقرير يا معلم و الصور موضحة كل التفاصيل 100 مية يا باشا

[zago]

حنبتدي نفك بقى

[Bonanza]

حنبتدي نفك بقى

فك يا عم و ربك بيسترها ههههه

[HOSSAM99]

السلام عليكم
تقرير حضرتك رائع و منظم
و في أنتظار الصوره بالليل
و بالتوفيق يا أستاذ Bonanza

[husseinsalah]

زى ما قلت لحضرتك انى هكمل على موضوعك وهو انى غيرت لمبات رسمة التكييف ورسمة الزجاج الحرارى

أولا طريقة فك الزرار من مجموعة التكييف

بعد ما نفك الوش بالمفك (نفس طريقة تغيير لمبة مفتاح الانتظار ) تضغط بصباعك ورا الزرار (مكان السهم ) هتلاقية طلع معاك بسهولة





فى الصورة التانية اضغط على الشفة (مكان السهم) لاخراج فيشة الزرار زى اى جاك فى كهرباء العربية





فى الصورة التالتة شكل المفتاح منفصل وعن طريق فتح الشفتين للخارج (فى اتجاة السهمين) وزى نظام مفتاح الانتظار تفك المفتاح للوصول الى اللمبة




ودة شكل المفتاح وهو مفصص لاخراج اللمبة وطبعا المفتاح بلمبتين واحدة تشتغل مع نور التابلوة ودى اللى هنغيرها والتانية مع تشتغل مع تشغيل المفتاح اللى عاملة زى اللدات وهم الاتنين من نفس نوع لمبة الانتظار





كرر نفس الخطوات مع زرار التكييف


وبالنسبة للمبة انا اشترتها من عند اللى بيصلح الاجهزة اللاكترونية ولما سألتة عليها بصلى وقالى بس ياباشا دى بقت بجنية طبعا عملت فيها مصدوم وقلتلة لييية قالى اصل الجماعة بتوع العربيات بيركبوها فى التابلوة وعلشان كدة غليت مش عارف على اية مع انها ما تستهلش!!!!!!

ملحوظة مهمة جدا جدا جدا .....

لما تيجى تفك المفتاح من بعضة للوصول للمبة احذر ثم احذر ان فية حاجات ممكن تطير منك وهى السوستتين اللى ورا الزرار والريشة النحاس ام اربع اطراف (احفظ اتجاها كويس لو وقعت منك )

واخيرا اخراج اللمبة وتغيرها زى لمبة زرار الانتظار بالظبط..... ويارب اكون وفقت فى شرحى وتحت امركم فى اى استفسار..

[medo_huhu]

تسلم ايدك بجد الموضوع روووعة
بس انا عندى سؤال
هوا ايه الزرار ده؟ بتاع ايه؟
انا مش عندى فى العربية
مع انها 99 اتوماتيك glx


Uploaded with ImageShack.us

[Bonanza]

الله اكبر عليك يا استاذ حسين
ماشاء الله عليك
شرح و صور زي الفل
و طريقة سهلة للغاية
ربنا يكرمك و يجازيك خير
كده الموضوع بقي متكامل

عاوز بس اقول حاجة بخصوص اللمبة اللي انا ركبتها
بتاعة فرع النور بتاع اعياد الميلاد
اتحرقت مني بعد ما شغلتها بعشر دقايق و غيرتها بواحده تانية و اتحرقت بردو
تقريبا هي اقل من 12 فولت فا مش بتستحمل
لكن سخنت و كبرت في دماغي بقي
و قومت واخد بعضي و نزلت باب اللوق مخصوص
دورت عليها عند بتوع الالكترونيات لحد ما دلوني عل واحد اسمة تقريبا حسني شرف
في ممر ديق بس كل الناس عارفاه و عارفة انه بيبيع اللمبات دي
لقيتها عندة الحمد لله و 12 فولت و اللمبة بـ 50 قرش جبت عشر لمبات
و ركبتها و شغالة تمام



علي فكرة الصورة دي بتاعة سلك عيد الميلاد
و هي هي نفس الاضائة بتاعة اللمبة الجديدة اللي جبتها من باب اللوق

[Bonanza]

تسلم ايدك بجد الموضوع روووعة
بس انا عندى سؤال
هوا ايه الزرار ده؟ بتاع ايه؟
انا مش عندى فى العربية
مع انها 99 اتوماتيك glx


uploaded with imageshack.us

الزرار ده بتاع الزجاج الحراري
لما بتدوس عليه
الزجاج اللي ورا بيتسخن عشان مايشبرش في الشتاء او و انت مشغل التكييف