كل الشكر لتوكيل مجدي شاهين

[Moh.Fahmy]

روحت اعمل صيانة العشرين من يومين و الحقيقة انهم كانوا زوق جدا
يعني كان المفروض يغير تيل الفرامل انما لاقاهم كويسين جدا لدرجة انه شك اني مغيرهم بره و برضه كشف علي فلتر الانجشكشن و لاقاه كويس لانهم غيروه في الخمسة عشر و كانت وقتها حالته صعبة جدا
و نضفوا فلتر التكييف لاني كنت بشتكي من ضعف آداء التكييف عكس الصيف الماضي اللي كان بيخلي العربية تلاجة في دقيقتين فبصراحة رجع احسن من الاول و كمان كادو من عندهم.. و احسن حاجة اني اتعلمت انضفه ازاي لاني الحقيقة ما كنتش فهمت الطريقة بالضبط لما اسلام شاهين شرحها قبل كده
التوكيل في قمة الاحترام و التقدير لاني شوفت عربيات موديل 99 و 2000 و لسه بتروح التوكيل و كمان بيشكروا قوي في المعاملة
الحقيقة الناس اللي هناك ولاد بلد و فاهمين و عندهم ضمير



محمد فهمي

[salehgharib]

عمل ايه فى صيانة العشرين - وتكلفته كام
وشكرا

[marwan_147]

وياريت تشرح لنا كيف تنظف التكيف لانى انا كمان لم افهم شىء من هذا الموضوع وتحياتى لك

[Sharky]

أستاذ محمد ممكن تقولنا مين مجدى شاهين ؟

و توكيل ميتسوبيشى مش مع شركة مصرية

[limo]

الف مبروك يا استاذ محمد
اريح حاجه فعلا انك تعمل صيانه لعربيتك فى مكان انت مستريح له ومش خايف على العربيه

هوه المركز ده فى الاسكندريه بس ولا فاتح فرع فى القاهره

[limo]

أستاذ محمد ممكن تقولنا مين مجدى شاهين ؟

و توكيل ميتسوبيشى مش مع شركة مصرية

ده مركز صيانه للعربيات الخليجى واعتقد انه فى الاسكندريه فقط
وبيدى ضمان عليها
مش تابع للوكيل مصريه
زى كده مركز صبحى سند -هاى تريد -امير وجوزيف كل ده مراكز بتضمن العربيات الخليجى فقط

[Moh.Fahmy]

أستاذ محمد ممكن تقولنا مين مجدى شاهين ؟

و توكيل ميتسوبيشى مش مع شركة مصرية

شاركي باشا.... مجدي شاهين ده كان هو التوكيل السابق للانسر في الاسكندرية و دخل في لعبة الخليجي لانه من وجهة نظره ان الخليجي افضل من حيث المتانة و نظام الامان و ارخص قليلا من المصري
فحتي الان توجد قضايا بينه و بين مصرية اللي هو صاحبها الرواس و في نفس الوقت صاحب توكيل الخليجي في القاهرة و ميزة مجدي شاهين ان العربية بيديلك عليها ضمان 60000 الف كيلو او ثلاث سنوات
اي معرض سيارات في الاسكندرية بيبيع لانسر خليجي بيتباهي انه واخد ضمان من مهندس مجدي شاهين و بيحمل ثمن الضمان علي العميل انما لما بتشتري من مجدي شاهين مباشرة بتاخد الضمان تلقائي
علي فيه عربيات كتيرة من القاهرة و كفر الشيخ و طنطا و مرسي مطروح بلاقيها في التوكيل بتعمل الصيانة بتاعتها
و فيه مركزين صيانة تابعين لمجدي شاهين واحد في كوم الدكة و التاني علي الطريق الزراعي قبل كوبري ابيس و انت جاي من سموحة و ده مركز عملاق و محترم جدا جدا
يعني في صيانة العشرين كان المفروض انهم يغيروا فلتر الهوا للانجشكشن و البوجيهات و تيل الفرامل انما هما عشان غيروا الفلتر و البوجيهات في 15000 فكل اللي عملوه انهم ربطوا العفشة و شيكوا علي الزيوت و غيروا زيت الموتور و لقوا تيل الفرامل كويس فمارضوش يغيروه

و اي معلومات اضافية انا تحت الامر و الناس هناك حبايبي جدا

محمد فهمي

[goodwave]

محمد باشا حبيب قلبي

بسم الله ما شاء الله
ربنا يبارك لك في العربية ويحفظها.... مجدي شاهين بالفعل محترم وإنت من أشد المعجبين بسياستة من زمان .... ربنا يهديه ويفضل كدة على طول مش زي باقي التوكيلات.