عملت حادثة بالكريستاله

[nonnos5]

اولا الحمد لله على كل شى .. انا عملت حادثة يوم الاتنين وانا رايح شغلى الصبح وانا جاى من المنصورة رايح القاهرة قبل بنها بشوية كده خبطت راجل كبير فى السن ده بسبب اللى كان بيعديه كان بيتكلم مع ناس وهوه واقف ومدى ظهره للطريق وبعدين عدوا من غير مايبص وفى لحظة افتكر انه طريق سريع بص لقى عربيات جايه راح سابه وقام راجع هوه طبعا ده كله فى جزء من الثانيه والراجل لانه كبير 84 سنة للاسف توفى الله يرحمه بسبب واحد مستهتر بس ده قضاء الله انا طبعا من ساعة ما شوفته وانا ماسك فرامل وكلكس وروحت اقصى الشمال بس الراجل نصيبه كده من ساعة ما حصل الموضوع ده وانا تعبان نفسيا مش قادر انسى الموقف خالص وبيتهيالى انى مش هركب عربيات تانى انا جبت العربية امبارح بس ماليش نفس اصلحها ولا حتى اركبها
طبعا العربية اتبهدلت خالص وانا المفروض اصلحها لانها واقفه من غير زجاج امامى خالص والكبوت مطبق ومفتوح والفبره بتاع الريداتير اللى فوق اتكسرت وجابت الميه على الارض والشبكة والمساحة الشمال اتكسروا.
وبصراحة انا مش عارف اعمل ايه لان العربية كانت فابريكه بالكامل من الداخل والخارج مفيش حتى سم بويه فى الاكصدام حتى. لان العربية كانت ماشيه 87000 كيلو بس ... الحمد لله على قضاء الله بس انا مش عارف اعمل ايه اجيب كبوت فيرانى فابريكه وهيركب وخلاص وياريت اللى يعرف اجيب منين كبوت فيرانى 99 منين وبكام .... والزجاج الامامى افضل نوع اجيبه منين وبكام ..... وهل شبكة 2000 موجوده فين وبكام ......وياترى ذراع المساحة اللى اتكسر ده اجيبه استيراد ولا جديد وسعره تقريبا اد ايه والفبره الريداتير السوده اللى فوق اللى بيبقى فيها غطاء الرداتير بتتباع لوحدها ولا لاء وياترى سعرها كام
اسف ان كنت طولت عليكوا بس انا بسوق بقالى 10 سنين اول مرة اعمل حادثة فى حياتى سواء جوه البلد او على السريع
ارجو المساعده باسرع وقت وشكرا ليكوا مقدما

[EslaM_NagY]

كان الله فى عونك

عليك بالدعاء : اللهم أجرنى فى مصيبتى واخلفنى خيرا منها.

[abumoh2000]

الف سلامه لحضرتك
الله يكون فى عونك
طريق ميت غمر بنها ده ضيق وكله مشاكل
ربنا يفك كربك ان شاء الله

[eng.m7md.ali]

الحمد لله ده قضاء ربنا
وده عمر الراجل بس عايزين نعرف ايه موقف اللي كان معاه ورجع ده ولا ايه اللي حصل

[mohammedabdallh]

الف سلامه على حضرتك
والحاجات دى كلها بسيطه بدال انت بخير وفى ستين دهيه الفلوس طول ما انت بخير

احسن زجاج د جريش
الكبوت من الحرفيين هو و الريادتير هاته جديد احسن
وتانى مره الف سلامه عليك

[eng.m7md.ali]

ايه اللي جرالنا

انتو بتهتمو بالعربية اكتر من الراجل اللي مات وملوش ذنب غير ان واحد مستهتر بيعدي بيه الشارع ومش شايف ان ده طريق سريع؟؟

[mohammedabdallh]

ايه اللي جرالنا

انتو بتهتمو بالعربية اكتر من الراجل اللي مات وملوش ذنب غير ان واحد مستهتر بيعدي بيه الشارع ومش شايف ان ده طريق سريع؟؟

والله عندك حق
بس هنعمل ايه قدرة كدا هنرجع الزمن يعنى
الحمد لله على كل شىء
وقدر الله وماشاء فعل

[sonystar]

حمدالله على سلمتك

والله يرحم اللى مات برحمتة ويسمحك

[Ralliart]

لا حول ولا قوة إلا بالله
طيب عملت ايه في الراجل اللي كان بيعديه؟؟

الكبوت من الحرفيين والفبرة بتتباع لوحدها وتمنها في البومة كان 100 جنيه معرفش تمنها كام في الكريستالة
والازاز دكتور جريش

[himo_3sfoor]

انا لله وانا اليه لراجعون
قدر الله وماشاء فعل
بص يا باشا بالنسبه لنفسيتك متقلقش انا برض مريت بظروف مشابهه قلت مش راكب ولا سايق ولا واجع دماغي
ريح انته فتره بس وهدي اعصابك وان شاء الله هترجع تسوق تاني وهتنسا الموضوع
اما بالنسبه للمتوفي فذنبو في رقبة اللي كان بيعديه منو لله
وفي الختام ربنا يسمحنا ويغفرلنا كلنا لاننا ببساطه كلنا بنغلط لاننا بشر

[husseinsalah]

ربنا يرحمة وفعلا انا مقدر نفسيتك دلوقتى لانى اتخيلت نفسى من ساعة ماتعلمت السواقة ان لاقدر الله خبط واحد وحصلة حاجة
وعموما انا كنت عملت حادثة من شهر ونص تقريبا بعربيتى كرستالة 99 , خبط فى عربية فيات 131 قطعت على طريق الكورنيش بدون اى انذار فدخلت فى جنب العربية وكانت الخسائر عندى كالاتى
1- كبوت العربية جبتة جديد تيوانى لون اسود ب 550 جنية (كبوت البومة 350 جنية وكبوت ال 97 ب 450 جنية) معرفش لية الكرستالة اغلى!
2- اكصدام امامى تيوانى مش فاكر نوعة ب 155 جنية
3- كشافين امامى ب220 جنية + اشارتين امامى ب 50 جنية
4- حامل او شاسية للاكصدام ب 60 جنية (شكل نضيف جدا بصراحة كان احسن من اللى راكب عندى)
5- ريداتير استيراد ب 300 جنية (خد بالك وانت بتشترية لان معظم الموجود فى الحرفيين بيكون مختلف ) لان الكرستالة استيراد بتكون فيها مروحة واحدة مش اتنين زى اللى عندنا لكن معرفش موضوع الفبرة دى بصراحة
6-سربنتية تكييف استيراد ب 300 جنية
7- سمكرة ودهان 750 جنية
ولما رحت اشحن التكييف اكتشفت ان مروحة التكييف مش شغالة (ملهاش علاقة بالحادثة) فاشترتها استيراد ب 250 جنية

[nonnos5]

الف شكر لوقفكوا جمبى ولو بالكلمة

ياجماعه انا بشكر كل من رد عليا واسف ان كنت مش بدخل كتير لانى نفسيتى مش مستحمله اعمل اى حاجة والحمد لله على كل شىء قبل كل شئ انا بعد ماعملت الحادثة جتلى حالة تشنج والحمد لله بابا كان معايا ودى اول مرة يجى معايا بالصدفة كنت ممكن مت من الخضه لو ما كانش معايا اول ما فوقت ونزلت من العربية وشوفت منظر الراجل هما كل اللى كانوا معاها فلاحين لانهم كانوا جايين من سوق للبهايم ده اللى انا فهمته بعدين بسال وانا متعصب مين اللى كان بيعديه وسابه محدش رد عليا خالص اتصلت بالاسعاف وجه خده واتصلت بالشرطة وسلمت نفسى والعربية والمفاتيح والرخص وعملت محضر بالواقعه وبعدها بشوية كنت مع واحد منهم على التليفون بطمن منه على حالته وبعد شوية توفى وبعدين روحت المركز ومن هناك روحت على النيابة واتعرض على وكيل النيابه وكل الناس لما كانت بتقرا المحضر بتاعى وبتاع الطرف التانى كانت بتعاملنى باحترام خاصة وانا كنت فى انهيار شديد وجه الطرف الاخر ابنه وجوز بنته قالى ماتخافش كلنا ماشين على طريق ومن الواضح انهم كانوا متفهمين انى مش غلطان فى حاجة وانى عملت كل اللى عليا ضارب فرامل من قبله بكام متر وكلكس وروحت اقصى الشمال بس من الواضح انه المتوفى لكبر سنه عنده مشكله سمعيه لانه محاولش حتى يبص وراه وكمل فى اتجاه السيارة على الرغم انه لو كان وقف كنت هفاديه وطبعا لو روحت يمين هجيب كل اللى واقفين معاه فالحمد لله ده قضاء ربنا وقدره انا مش فارق معايا من يوميها الاجراءات القانونيه هترسى على ايه اد ما انا فارق معايا المنظر اللى مش بيروح من بالى وعاملى حاله عصبية سيئة جدا.
وعلى فكرة انا مش بفكر فى العربية خالص انا حتى ماليش نفسى لا اصلحها ولا اركبها بس طبعا الاهل والاقارب كلهم صعبانين عليهم العربية وكل واحد عاوز ياخدها يصلحها بدل وقفتها كده من غير زجاج وكبوت فعلشان كده انا سالت على الاسعار علشان اعرف احاسبهم واعرف ازاى اصلحها وانا احتمال كبير بعد ما تتصلح تفضل واقفه لانى بفكر ما اركبش عربيات تانى وشكرا لردودكم مرة ثانيه.

[Donzi]

قدر الله و ما شاء فعل

و مادام انت راضي ضميرك و الحمد لله مش غلطان يبقى خليها على ربنا و ان شاء الله هاتعدي الفترة دي على خير و حاول تعوض اهل المتوفي بالمبلغ اللي تقدر عليه عشان لو كان بيقبض معاش او عنده اسرة او حاجة زي كدا

و العربية سيبها لحد يتولى تصليحها و بعدين بيعها لأن معتقدش انك هاتقدر تسوقها تاني نظرا للذكريات السيئة المرتبطة بيها

و ربنا يعوضك خير ان شاء الله

[nonnos5]

سرعة الرد

ياجماعه ياريت المساعده وسرعة الرد علشان انا هبعت واحد بكره خلاص يصلح السيارة