عمرة الانسر 99

[shevechinco]

السلام عليكم و رحمة اللة و بركاتة
انا معايا لانسر 99 بقالها فترة بتدخن علي خفبف روحت للميكانيكي قالي الماتور خف شوية المهم قالي انتي ممكن تمشي عليها سنة كمان الكلام دة من حوالي 4 شهور بس الان العربية دلوقتي بتدخن ازيد من الاول و احد صاحبي اخدني عند ميكانيكي شكلة جامد في حدائق المعادي في حسنين دسوقي لو حد يعرفة بس للاسف مش عارف اسمة قالي لازم نفتح علشان نعرف في اية جوة المشكلة الي محيراني الان و عاوز رايكم ارجوكم بسرعة انا روحت لميكانيكي تاني في المنيل الشياطين الحمر تخصص يا باني قالي الياباني ميتعمرش بيترمي و يجي غيرة استيراد و حرام تصرف عبية جنية عمرة ما يرجع زي الاول .
انا دلوقتي مش عارف اعمل اية اعمر ولا اجيب استيراد مع العلم و انا عند الميكانيكي الاول كا بيعمل عمرة لواحدة 98 و شكل شغلة جامد و نظيف ارجو الافادة بسرعة ارجوكم انا في حيرة مكن امري و شكرا

[mohamed ibiza]

ليه يعني الياباني مبيتعمرش ليه يعني موتور جملي ولا 7000000000 سي سي دي 1300 سي سي بيتعمر و بيرجع زي الفل الكلام بتاعه مش داخل دماغي نهائي هو العيب بس ان لو حاجتها غالية ممكن تمن العمرة يبقي نفس تمن الموتور الاستيراد الحالة الممتازة بس غير كده بيتعمر و عادي جدا جدا مش عارف الميكانيكي ده جاب الكلام ده منين

[shevechinco]

ربنا يطمنك اخي الفاضل بس يا ريت الله يكرمكم يا جماعة الردود عاوز اكون راي نهائي راعو الي انا فية

[mohamed ibiza]

يا مان طمن قلبك لو انت عايز موتور الفابريقة بيتعمر عادي جدا جدا جدا ياما ياباني اتعمر عادي مفيهاش مشاكل يعني خالص انا حاسس انه عايز يسقطلك موتور و خلاص بس اطمن بيتعمر

[SAbuhashem]

بص لو الموضوع مجرد طقم شنبر وخلصنا ماشي
انما هتخش في قصص ومواويل أكبر من كدة في إلبساتم أو الكرنك
ولاقتها هتعدي ٢٠٠٠ جنيه يبقى عندك حل أسهل وهو انك تجيب موتور ١٣٠٠ إنجكشن وخلي بالك من الكلمة دي إنه مش كربراتير زي اللي عندك بحوالي من ٢٥٠٠- ٣٠٠٠ جنيه على حسب شطارتك بس اعمل حسابك انك هتغير رقم الموتور في الرخصة والحل ده أضمن لأنك ممكن تعمل العمرة وتفوت منك تاني بعد كام شهر لو الشغل مش مظبوط
.
عموماً وديها الحرفيين في ناس مشهورة كتير للانسر وبس


Thanks
Eng.Sherif Shaker

[shevechinco]

متشكر يا رجالة ربنا يخليكو يا رب بس لو ممكن تقولي اجيب الماتور الانجكشن دة منين بعد اذنك

[mina_ramsis]

معلش ممكن اعرف العربية عاملة كام الف كيلو

[SAbuhashem]

روح لسيد حماد في الحرفيين هيديهولك بضمان ١٠ أيام بعد التركيب
إن شاء الله


Thanks
Eng.Sherif Shaker

[shevechinco]

العربية عاملة 138000 و شوية

[shevechinco]

علي فكرة الشاطين الحمر الي في المنيل قالي اديك الماتور 1500 سي سي بضمان سنة

[Ghamrawy]

العربية عاملة 138000 و شوية

138000 !!!!!!!!!!!!!!!!!! بس ؟؟؟؟؟؟؟؟؟ ليه و ازاى ؟؟؟ ازاى تعمل عمرة على الكيلو القليل ده ؟؟؟ اكيد العربية دى كانت فى مكتب ايجار عربيات

[hfekry]

انا شايف ان رقم الكيلو متر ده قليل قوى قوى على العمرة ؟
ده انا عربيتى لانسر 2001 وعاملة دلوقتى 150 الف والحمد لله زى الفل.

[eng_mkhalaf]

أولا فعلا 130 إلف قليل على العمرة
بس على العموم لو ناوى يبقى تعمر عند واحد نضيف أحسن من موتور أستيراد على الأقل موتورك أنت ععارفة وصارف علية كويس لكن الأستيراد ممكن عامل زى البطيخة وبختك يا أبو بخيت - وكمان لسة هترخص وتغير رقم الموتور من الأخر موال

[shevechinco]

متشكر يا جماعة علي اهتمامكم يا ريت يا جماعة لو حد يعرف التكلفة ممكن تدخل في كام و المصنعية في حدود كام و شكرا لكم

[مصراوي جدا]

استاذ shevechinco انا لما قريت مشكلة حضرتك استبعدت التفكير في عملها في التوكيل وقلت في نفسي كما اشار الأعضاء يا اما هتجيب محرك جديد بحالة كويسة أو هتعملها في الحرفيين مثلا ، لكن لما حضرتك ارسلت لي على الخاص المشكلة للمشاركة في حلها فعرضتها على مدير الاستقبال عندنا في مركز الخدمة الرئيسي ورد بالآتي :

من المعروف أن محركات السيارات اليابانية معمرة جدا ولا تحتاج الى عمرة الا بعد كيلومترات كثيرة قد تصل الى 300 - 400 ألف كيلو متر ، اذا ما حافظ صاحب السيارة على صيانة المحرك الدورية والاهتمام به.

الا انه من الممكن عند اهمال المحرك مع التحميل الشديد عليه أن يحتاج للعمرة عند 130 ألف كم أو أقل حسب الحالة.

أما المشكلة التي عندنا هنا ..

فيجب تحديد نوع الدخنة الصادرة من السيارة هل هي دخنة سوداء سببها ضبط الكربراتير ، أم هي دخنة زرقاء سببها استهلاك زيت مما يستدعي اجراء عمرة فعلا؟

على العموم يجب تقيم أداء السيارة بطريقة صحيحة ويتم اختبار قياس الضغط داخل المحرك والوقوف على الأداء السليم للمحرك وكلك تحديد هل المحرك يستهلك زيت أم لا ؟ وكل هذه المؤشرات يتم اتخاذ القرار بناء عليها.

الا انه اذا ما اتضح أن المحرك يحتاج الى عمرة بالفعل فان قيمتها (في التوكيل) يتم تحديدها بعد فك المحرك وعمل مقايسة وهي تبدأ من 5000 جنيه.
مع الشكر
مهندس / عبد الجليل
مدير الاستقبال بمركز الخدمة الرئيسي - قليوب