تجربة تغيير المساعدين

[أبو_حمزة]

اخوكم تعب من كتر القرايه و الكتابه في السياسه فقلت اخد معاكم فسحه وأتكلم في العربيات
كنت من فتره فتحت موضوع اختار أنهي مساعدين وبكم ومنين
و كان نفسي أعرف ألاقي في مس بلشتين لكن للاسف مالقيتش
الاختيار انحصر في الموجود في السوق و هم كالتالي بالاسعار
مونرو 800 جنيه
كي واي بي 670 - 780 حسب المحل
توكيكو 650 - 750 حسب المحل

وكنت استقريت على مونرو لكن ما كانش متوفر في الفرع اللي رحت له و قال لي انه هـيبعت يجيبه من فرع اسكندريه
المهم كنت ماصدقت لقيت وقت وما ينفعش أستنى
و بعد جوله على الإنترنت وبحث روح التجربه ودتني على توكيكو
جبته بـ 650 مع بطاحات تايلاندي (العفشجي قال البطاحات القديمه حلوه بس قررت اغيرهم)

تجربتي لأداءهم كالتالي
بالنسبه للنعومه و الراحه على السرعة البطيئه (الشوارع المكسره) أحسن من القديم و لكن مش ماشي على حرير واعتقد ممكن يكون في أحسن منهم في الحته دي
امتصاص الصدمات علي سرعات عاليه برضه كويس جدا (زي ما كان و العربيه زيرو)
الثبات على السرعات العاليه كان أصلا مميز فا محستش فيه بتغير
اللي فاجأني هو المنحنيات
عند أول منحني وب اخده بالسرعه اللي متعود عليها لقيت العربيه متزنه بصوره افضل كتيييير عن الاول
ده اغراني اجرب منحنيات على سرعات أعلى من مااتعودت (بس مش لدرجة الإستهبال في السواقه عشان ماليش في قلة العقل دي)
و الحمد لله كانت عند حسن الظن

الخلاصة بعد التجربه انهم مساعدين بيدو أداء قريب من الأصلي من حيث الراحه وافضل من حيث الأداء
الوقت هو اللي بأمر الله يبين إن كانو بيعيشوا

[SASA3]

الف مبرووك المساعدين الجداد بس مقولتش بتوع لانسر موديل ايه؟؟

[أبو_حمزة]

الأصلي kyb (اللي جايين من المصنع)

[M.Elgergawy]

الف مبروك وشكرا على نقل التجربة

[bassem_sams]

بصراحه يا ابو حمزة اسلوبك فى كلام ممتع لدرجه انى قرات موضوع كذا مرة
عايزين بردوا نعمل موضوع متخخص عن مساعدين زى موضوع حضرتك انك مساعدين اداؤهم حلو زى اصلى و يزيد عليه ثبات فى ملفات

[FunnyMickey]

فعلا هيا دي الانواع المتوفره في السوق
بس كويس انك لقيت التاكيكو
لاني ساعه ما كنت بشتري ملقيتوش خالص
واضطريت الجأ لكي واي بي
ياريت ياباشا تقولنا جبتهم منين

[أبو_حمزة]

الله يبارك فيكم ولكم
جبتهم من التوفيقيه وموجودين كتير
كمان في صيني بـ 400 جنيه
الموضوع عملته اساسا عشان لما كنت با ادور و اسال الناس كانت معظم الردود من نوع:
النوع الفلاني ناشف
النوع العلاني برقبة كل اللي في السوق
ابعد عن كذا عشان مبقاش زي زمان

و هكذا . يعني ما تعرفش تبني قرار منطقي عليها
اتمني يكون كلامي مفيد لحد

[FunnyMickey]

وما زال علي فكره
يعني هما 3 انواع

kyb مش اصلي بيضرب بسرعه
مونرو الناس كلها بتقول انه ناشف مع اني اعتقد ان من كتر ما الناس بتقول عليه ناشف محدش اصلا جربه علي كريستاله :)
والتاكيكو هيما لانسر كان بيقول عليه تحفه ولما نزلت سالت عليه عشان اجيبه ملقيتوش خالص

انا ناوي ان شاء الله اجرب الكوني الاصفر اللي بيتقل وبيخف ده
:)
اصل ناوي في الخطه الخمسيه اعدل العفشه واجنط 16
وزهقت من موضوع المساعدين ده

[أبو_حمزة]

KYB مش مضروب و لو خايف هات من وكيلها
و عن نفسي كلمتهم وسألت وأكدوا إن اللي في السوق مش مضروب
مونرو كل التقيمات بره بتقول انه انعم من KYB
بس عمر مونرو اقصر

كوني الاصفر مش adjustable
وتمنه حوالي 3000 يعني حرام حرام
وجنط 16 كتير قوي و الأصلي 13 ما اعتقدش هـتنبسط من الأداء و 15 كتير كمان والله اعلم

[M.Elgergawy]

على فكرة قابلت مرة واحد راكب ليونسيل وماشاء الله عربيتوا كانت جامدة جدا وخصوصا في الملفات كان بياخد ملفات على سرعات عالية ولما سألتوا والمفاجأة مركب 4 مساعدين مونرو وقاللي تمنهم 3000 ج ال 4 مساعدين

[islamaboelnaga]

طب حضرتك مجبتش kyb لييه مش هو دا بتاع العربيه الاصلى ؟؟؟ و ياريت لو حضرتك تقولى توكيله فين ؟؟

[Ralliart]

انا لسة محتار في مساعدين البومة ولحد دلوقتي مش لاقي رد حاسم
الـkyb من كتر ما الناس شتمت فيه حاسس انهم هيضربو في اول 100 كيلو
والمونرو كل الناس بتقول ناشف
مش عارف اجيب ايه ومستحرم اجيب kyb من توكيل ميتسوبيشي باكتر من ضعف التمن
هو التوكيكو ده في منه للبومة ولا لأ وليه فضلته عن الـkyb؟؟

[أبو_حمزة]

Kyb توكيله هو smg (توكيل سيات)
المنير في فيصل موزع معتمد و مضمون
مونرو أنا متأكد انهم مش وحشين ولا ناشفين
و البياع لما تسأله يقول لك مونرو ده ينفع في نقل مش ملاكي وكأن نفس المساعد هـيركب نقل وملاكي مش موديلات مختلفه
فضلت توكيكو عشان رغبتي في التجربه و ممكن جدا يبقي موجود للبومه

[Ralliart]

أنا عاجبني أداء الاصلي لانه ولا طري ولا ناشف بس نفسي اعرف الـkyb اللي بأقل من نص تمن الـkyb اللي في توكيل ميتسوبيشي ايه الفرق بينهم؟
لان فرق السعر الرهيب ده هغير بيه مقص وقواعد موتور وقواعد فتيس ومسامير ميزان وهيفضلي فلوس كمان
وشكراً لردك.........

[islamaboelnaga]

نفس السؤال هل دا نفس اللى فى توكيل متسوبيشى ؟ طب فرق السعر دا ليه ؟؟