عنيه دمعت ومنمتش من انبارح

[prosecutor]

بسم الله الرحيم

انا عارف ان كتير من الاخوة الاعضاء هيستغربوا من عنوان الموضوع بس فعلا هى دى حالتى من انبارح فعلا :

انا بيعت انبارح عربيتى حبيبتى لانسر كريستالة ومتتخيلوش كمية الزعل والحزن عليها اد ايه حتى زوجتى زعلت عليها هو انا معرفش ليه بعتها بس هو نصيب..
هى على فكره معايا بقالها 7 شهور عمرها فيوم ما حطيتنى فى موقف محرج كانت شيلانى انا كنت جبتها ب 42 الف وصرفت عليها رخصة وطقم جنط حوالى 2000 جنيه ...
حبيتها اوى واعتزيت بيها جداا كانها ابنى مع انى كنت ماهمل فيها خاصة ان صاحبها كان برده مهمل فيها بس ده بسبب ظروف انى داخل على جواز كمان شهر ..

الراجل الى جه اشتراها انا قلتله 45 الف علشان هو يمشى ومش حابب ابيع لقيته وافق حاولت ازهق قيه واطفشه مفيش فايده لدرجة انه جالى مرتين وهو من محافظة تانية ..

المهم تحت ضغط واحد قريبى معرفته وتحت انى احتمال كبير ان شاء الله اسافر السعودية قريب وتحت الحيرة قلت موافق ازاى معرفش على الرغم ان العربية فيها شغل وانا ها احاول اوصفها وصف دقيق ومش عارف بعد الوصف ده اذا كنتم هتهنونى ولا تعزونى وتزعلوا عليه المهم هى :

عربية لانسر كريستالة موديل 99 راشة بره ماعدا السقف ... والشنب بتاع العربية راشش .. ومحتاج يتعدل لانه معوج سنة بسيطة...

العداد عامل: 285.000 الف كيلو ...

العربية اتوماتيك + زجاج كهربا +تكييف + بدون مرايات كهربا

الماتور: صوته عالى وبياكل زيت وفيه دخان ابيض بيطلع من الشكمان تقريبا الماتور مفوت ...

الفتيس : عند النقلة للغيار 3 بتكون العربية مخنوقة اوى وصوت المتور بيعلى وبتحس بالنقلة اوى...
الفتيس لما بكون ماشى على سرعة السلانسية او اجيب الفتيس على ال R بسمع صوت زنة او تكتة كان بيضايقنى جداا.. ومكنش الصوت ده موجود من الاول...

فيه تسريب فى زيت الفتيس لما بصيت على العربية من تحت + ووجود زيت على المكنة من جوان التكيهات...

استخدمت زيت شنبر مرتين ليها مع غيار الزيت ولما كنت اوقف العربية واقفل الكونتاك والمتور بيبطل كنت بسمع صوت زى رزع او هبد فى الماتور احيانا...

استهلاك بنزين عالى اوى مره حسبته لقيته 37 لتر ل 220 كيلو

العفشة تقريبا متوسطة ..

+ ان العربية محتاجه كبوت لانه بلغة الصانيعية مفتول من النص وفيه شرخين صغيرين وخبطة بسيطة زى نقرة كده هو ممكن يمشى وعلى فكره هو مش الكبوت بتاعها ده متغير بواحد من الاسمر واترش +اكصدام امامى + فانوس كامل شمال + شبكة امامبة + ان السمكرى قال انها محتاجة رفرفين لانه بيقول عليهم منفخين مش عارف بصراحة يعنى ايه بس فعلا تحس انهم فيهم حاجة غلط وكمان فيهم واحد مفارق عن الباب +اكصدام خلفى مش اصلى ومفارق وفيه شرخ...

فيهم بابين محتاجين شغل سمكره + سمكرة بسيطة غى الرفرف الخلفى والسقف مطبق حجات بسيطة بس رفضت اعمله ليحتاج يترش وهى مش ناقصة ....

التابلوه حالته كويسة +فرش العربية من جوه كان معقول بس كرسى الامامى متبهدل وباين فيه الاسفنج....

الكاسيت الاصلى + جنط مستعمل 13 حالته معقوله بس متخربش شوية + كاوتش بريدجستون حالته كويسة +بطارية جافة حالتها حلوة ....


بعد ما بعتها بسئل علشان اشترى عربية كريستالة لاقيت 3 عربيات:

1_ لونها كحلى مش بحب اللون ده بصراحة راشة بره مانوال 48 الف
2-واحدة نبيتى راشة بره بدون طقم جنط اول كلمة 52 ممكن تنزل ل 50 ومكملتش كلام معاه وهى على مانوال برضه ..
3- واحدة لونها ابيض راشة بره بس هو بيقول لا والرخص منتهية ب 55 الف اتوماتيك دى ..

'طبعا رجعت مضايق اكتر بس يلا ربنا يبارك للى اشتراها ويبارك ليه ادعولى ...
ولو حد من الاخوة الاعضاء قدامه حاجة كويسة ياريت يقول ...

على فكرة محتاج اوى مشاركتكم

[IronHead]

ياعم الحمد لله انك بعت العربية دى كانت متبهدلة قوى, يعنى موتور بيخلص وعايز عمرة, فيتيس فى حاجة وما ادراك صيانة الفتيس الاوتو

[maryano]

رئي ان ربنا بيحبك انو خلصك من العربيه بحلتها دي بالسعر دة يمكن انتا كنت بتحبها لكن لو كانت فضلت معاك و فتحت كبوتها كنت كرهتا و ربنا يرزقك باحسن منها و الخيره فيما اختره الله

[prosecutor]

السلام عليكم

ياعم الحمد لله انك بعت العربية دى كانت متبهدلة قوى, يعنى موتور بيخلص وعايز عمرة, فيتيس فى حاجة وما ادراك صيانة الفتيس الاوتو

الحمد الله متشكر جداا لمرور حضرتك

[prosecutor]

رئي ان ربنا بيحبك انو خلصك من العربيه بحلتها دي بالسعر دة يمكن انتا كنت بتحبها لكن لو كانت فضلت معاك و فتحت كبوتها كنت كرهتا و ربنا يرزقك باحسن منها و الخيره فيما اختره الله

فعلا العربية دى كنت بحبها جدا ومش عارف ليه بلوم نفسى وكمان على رغم من كل عيوبها دى حاسس انى كنت خسرتها

[maryano]

فعلا العربية دى كنت بحبها جدا ومش عارف ليه بلوم نفسى وكمان على رغم من كل عيوبها دى حاسس انى كنت خسرتها

عادي تلقي ليك زكريات حلوة فيها ولو زعلان اوي دور علي واحدة شبها بس تكون حالتها كويسه و ان شاء الله تتوفقك

[mohammedabdallh]

رئي ان ربنا بيحبك انو خلصك من العربيه بحلتها دي بالسعر دة يمكن انتا كنت بتحبها لكن لو كانت فضلت معاك و فتحت كبوتها كنت كرهتا و ربنا يرزقك باحسن منها و الخيره فيما اختره الله

كلام مظبوط

[elmkaneeki]

انت الكسبان

[MR . Gold]

ربنا يبارك للي اشتراها وانت ان شاء الله ربنا يكرمك بغيرها بس كانت تجيب 48 الف ولو انت وقفت مع المشتري علي السعر اللي بقولك علية كان دفع رزقة بئة ربنا يكرمك باحسن منها

[abo_anas]

متهيألى عنيك دمعت من الفرحه

[dolly13]

ربنا يرزقك باحسن منها على القريب ان شاء الله

[SASA3]

يا راجل دا انت تقول الكلام ده لو انت الى اشتريتها دا انت بيعها مكسب لك و بعدين انت بتقول انها عاوز مكنة و فتيش و شغل كهرباء و مرشوشه من الشنب و تابلوه طالع عينه مش عارف لييه حاسس انك كنت بتوصف 128 مركونة بقالها 3 سنين فى الشمس

هى ممكن بس تكون ليها ذكريات معاك قديمة او روحت بيها مشاوير كان له اثر طيب عليك

و سعرها مش وحش انك بعتها بالسعر ده بالحاله ده تماااام

و عاوزين نشوفك بقا بحاجه زيرو ان شاء الله :)))

[ahmed_bq]

انا حصل معايا نفس الموقف ده بس الصراحه كريستالتي كانت عروسه مفيهاش الهوا موديل 2000 كامله منيوال .. بس صعبت عليا اوي وصورتها كام صوره كده قبل ما المشتري ياخدها وحسيت بحنين كده لما كان بيجبلي بقيت الفلوس ... العشره يجماعه مبتهونش ... لاني وانا ببيعها قعدت افتكر 4 سنين بحلوهم بمرهم قضيته معاها ... بس بعد مركبت السوبر اكشن نسيت امها بصراحه :))))))

[prosecutor]

ربنا يبارك للي اشتراها وانت ان شاء الله ربنا يكرمك بغيرها بس كانت تجيب 48 الف ولو انت وقفت مع المشتري علي السعر اللي بقولك علية كان دفع رزقة بئة ربنا يكرمك باحسن منها

هى فعلا كانت ممكن تجيب السعر ده بس انا مش زعلان على السعر اد ما زعلان عليها بالعكس يمكن السعر كويس كمان على فكرة هى كان فيه ابانوس بس من الى هو لزق فى التابلوه وسمعت ان دى خليجى

[M.Elgergawy]

مبروك عليك البيع