تجربتي في صيانه كولت

[feedodeedo]

انا اشتريت عربية كولت من فترة و كنت بسال عن مركز للصيانة
المهم
من خلال البحث و السؤال
وصلت لورشة فى المعادى صقر قريش بعد نزلة الدائرى
...................
بيشتغل من 11 ص لحد 11 م
معاه فى الورشة 6 مساعدين و مع كل مساعد صبى "حسيت انى فى التوكيل"
عربيات باجيرو و لانسر و جالانت و بدات احس انى فى التوكيل فعلا
كان شغال فى التوكيل و بعد كدا ربنا فتح عليه و بيشتغل لنفسه
اتصلت به و كنت عايز اعمل كشف , قاللى تعال بس نجرب العربية و نشوف محتاجة اية

وصلت عنده 10.30 ص و كنت رابع واحد ,, مع انى كنت متخيل انى اول واحد لان المعاد ده يعتبر بدرى ... المهم وصل 11 بالظبط وصل عدد العربيات 17 عربية و كله قاعد على القهوة و بيسال انا كدا رقم كام و كل واحد حافظ رقمه :]

كلم كل واحد و شاف كل واحد عايز اية
جرب العربية و فتح الكبوت و بص عليه
محتاج طقم كاتينه و فيه ترشيح زيت و هنغير اول سيل و احنا شغالين هنشوف فى اية تانى
اشتريت الحاجات اللى قال عليها من محل ............... و دا محل قطع غيار اصلى و فى طبعا محل تانى بيبع فرز تانى
بدأ شغل فى العربية الساعة 12 خلصنا الساعة 6 عملنا صيانة كاملة و غيرنا حاجات كتير و فلاتر و بوجيهات و ربط عفشة وظبط فرامل اليد و شيك على كل حاجة
المهم انه كل بعد كل دا اخد مبلغ قليل من وجهه نظرى
و قاللى بص على الباور عشان بيعمل هزه
طلع عنده حق زيت الباور كان بيرشح و هو السبب فى الهزة

و الحمد لله العربية حاسس انها اتظبطت عن الاول كتييير
و فى المكان دا فى كل حاجة تحس انها حرفيين على صغير

حبيت انى اشارك التجربة دى مع الناس اللى زيى بيدوروا على ميكانيكى شاطر و بيفهم
بالمناسبة هو بيشتغل فى الميتسوبيشى بس
عيد سعيد ليكو جميعا

الإعلانات التجارية ممنوعة طبقاً لنظام المنتدى دون الرجوع والتنسيق مع إدارة المنتدى.

يرجى مراجعة قواعد المنتدى
تم التعديل بواسطتي مشرف القسم

[FunnyMickey]

من اول الناس اللي سمعت عنهم في المنتدي هنا اول ما اشتركت فيه
بس سمعت انه حراق حبتين
وطالما فلوس بفلوس يبقي اروح التوكيل احسن

[feedodeedo]

اقل من التوكيل فى المصنعية بكتير :]

[ahmed_h_g]

مبروك عالصيانه وياريت تبعتلى بيانات محل قطع الغيار الأصلى اللى أشتريت منه

[prisoner]

مبروك على الصيانة واهلا بيك معانا فى المنتدى نتمنى نشوفك بصفة مستمرة تحكيلنا عن مواقف الكولت معاك ربنا يباركلك فيها وماشاء الله اسلوب دعاية جديد

[Kareem.ElAraby]

متابع

[feedodeedo]

اسف على التأخيرفى الرد
محل قطع الغيار الاصلى على الخاص يا باشا عشان ممنوع :)

لحد دلوقتى لسه محصلش مواقف ربنا يستر :)