طوبه نقرت الزجاج ونقرت معاها قلبى

[Eng_hatemfathy]

ماشى على الدائرى كالعاده وكالعاده برده مليان تريلات واذا فجأة الاقى كام طوبه بيتنططوا قدامى وجايين جرى عليا طبعا عينى عليهم وقلبى هينط من مكانه لحد ما دب واخ با قلبى ولقيت واحده منهم دب فى الزجاج وطبعا روحت لقيتها عملت نقره صغبره -حسبى الله ونعم الوكيل فى التريلات وعربيات النقل المصره على عدم تغطية الحموله
ربنا ينتقم منهم بسبب المصايب اللى بيعمولها لانى من كام يوم برده واحده منهم تحت نفق كارفور وماشى زى المجنون وعمال يوقع حجاره زى الصواريخ على اللى وراه
مش عارف امتى الشعب المتخلف ده هيخاف ربنا ويخاف على الارواح اللى حواليه

[SASA3]

قدر الله و ما شاء فعل و حاول متمشيش ورا اى نقل بعد كده علاشن الحكاية دى بتحصل على طول


و ممكن عند اى حد بتاع زجاج يصلحلك الزجاج من النقرة الى حصلت فيه و بتختفى بدرجة كبيرة

و خير ان شاء الله

[mohammedabdallh]

عندى برده فى الزجاج نقرق حلوه بسبب تريلا كانت محملة ظلط
ده العادى فى مصر

[bassem_sams]

روح لأى حد بتاع زجاج سيارات او دكتور خالد هيعملهاللك هيحقن زجاج بماده هتختفى نقرة و تكلفه ما تقارب 50 او 60 جنيه و ممكن ارخص و معلش لازم وزير داخليه و اعلام يعملوا وعى اكتر للسائقين تريلات و يعرفوهم ان ده خطر و لازم يغطوا حموله و يمشوا فى حارة واحده و هى يمين و بسرعه معقوله و ينزلوا عربيات شرطه مخصوص للحد من هذه ظاهرة

[IronHead]

معلش يا حاتم بيه, حتى الرادارات اللى على الدائرى مش محوقه مع العالم الزباله دى, الحمد لله انها جت على قد كده,
زى ما الاخ باسم اقترح عليك وعلى د. خالد عشان لو فيه شرخ صغير بسبب النقرة ميسرحش, ومتهيقلى بيدولك ضمان كام سنه على الحقن

[nonnos5]

نفس اللى حصل معايا

انا لسه مغير الزجاج الامامى من كام شهر ولسه الاسبوع اللى فات خدت طوبتين من عربية نقل وبصراحة حاجة تزعل جدا بس الحمد لله قدر الله وماشاء فعل

[ahmedsaiad]

ياباشا روح عند الدكتور خالد بيحقن فيها ماده وبتختفى تماما ولوظهرت محدش هياخد باله منها والدكتور خالد بيدى ضمان مدى الحياه

[kholio]

للاسف الحقن مبيعملش اي حاجة لاني حصلى نفس المشكلة بالظبط والنقرة دي مع الوقت اتحولت لشرخ في البربريز لكن لغاية دلوقتي الزجاج واقف والشرح ده وقف عند حد معين
انا هستناه لغاية لما يجيب اخره وبعدين هغيره انشاء الله

[markato]

علشان كل اللى بيحب الثورات وبيثور على حكومتة كان يقدر كلب من بتوع التريلات يمشى من غير تغطية الحمولة ايام العادلى

[bassem_sams]

فيه دلوقتي معالجة بالليزر ومبتكلفكش كتير وبيرجع زي الاول وتريح دماغك وجيبك من الدفع لكنى لم اجربه بس ليا زميلى كان عنده نقرة فى زجاج عملها بالحقن من 6 شهور و لغايه دلوقتى مفيش حاجه و لو حبت تغيرة عندك مصنع جريش لزجاج اسعارة كويسه جدا فى حدود 300 او 400 وممكن اقل او اكتر و عمال عندهم شاطرين

[أبو صلاح]

علشان كل اللى بيحب الثورات وبيثور على حكومتة كان يقدر كلب من بتوع التريلات يمشى من غير تغطية الحمولة ايام العادلى

انت بتتكلم جد ولا بتهزر ؟



اكيد بتهزر طبعا

[SASA3]

علشان كل اللى بيحب الثورات وبيثور على حكومتة كان يقدر كلب من بتوع التريلات يمشى من غير تغطية الحمولة ايام العادلى

اولا اهلا بك فى مصر


ثانيا ايوه كانوا بيقدورا و بيمشوا و فى الشمال كمان و بيغرزوا يمين و شمال و محدش كان بيوقفهم و بيعملوا حوادث و يموتوا الناس عادى جداا
مشوفتش انت اى حوادث من التريلات ولا من حمولتها !!!!!!!!!!

[Eng_hatemfathy]

متشكر اوى يا جماعه وقدر الله وما شاء فعل-للاسف مش بايد الواحد ميمشيش ورا التريلات لان الدائرى كله تريلات وده طريقى يوميا الحمد لله النقره مش كبيره ولسه مش عارف هعملها ولا اسيبها لان علشان تتحقن لازم يوسع الخرم شويه بشنيور دقيق وبعدين يحقنها بماده عامله زى الامير ويجففها باشعه ينفسجيه والمفروض ضمان مدى الحياه
للاسف المشكله مش فى النقره المشكله فى حرقة الدم والعربيه مكملتش شهرين وتخيلى لو بعد الشر الحجر كسر الزجاج مين المسئول ومين يتحمل ثمن زجاج معدى الالف بكتير -للاسف بيضيع الحق وسط العشوائيه اللى عايشينها والسواقه اللى تحرق الدم
الواحد خلاص كره الشعب ده الا ما رحم ربى اللى اصبح يعبد الفوضى ومصر عليها لاخر نفس
ربنا يرحمنا

[IronHead]

علشان كل اللى بيحب الثورات وبيثور على حكومتة كان يقدر كلب من بتوع التريلات يمشى من غير تغطية الحمولة ايام العادلى

يا ريس ايام العدلى الشرطه كانت فى خدمه النظام مش الشعب
انت شكلك نسيت الحوداث المهوله قبل الثوره, دا انا فاكر كان فى حادثة من اكتر من سنه عربيه ترللة طلعت فوق بتاع 20 عربية على الدائرى المعادى

[Eng_hatemfathy]

طول محنا هتفضل نعلق مشاكلنا على قفا الحكومه اللى فاتت او اللى جايه عمرنا ما هيتفع معانا حلول -طول ما الفهلوة والغباء متفشيين فى المجتمع عمرنا مهيتصلح حالنا
امبارح بعد النقره كملت بانى فكرت اروح كارفور وطبعا اتحبست على الجراج العلوى اكتر من ساعه ونصف وكل ده بسبب الاذكياء اللى عايزين يخرجوا عكسى ويحولوا المطلع لمنزل وقال ايه الناس بتطلب منى انى اسيب اتجاهى وانا ماشى صح بحجة انى قافل الطريق وكأنى مفروض انى انزل معاهم وطظ فيا مع انه اتجاهى انا من الاصل بس للاسف اصبح الباطل حق والحق باطل وعلى الدنيا السلام