الفاجعة الكبرى

[aya]

السلام عليكم
ممكن حد يكون عندة لانسر و يرسل ال VIN code بتاع عربيته و نقوم بالبحث عن المزيد من المعلومات حول هذا الموضوع.
فمن الطبيعي إذا كانت السيارة مجمعة في أي بلد غير اليابان أن يدخل فيها العديد من الأجزاء من دول أخرى.
الموضوع ده مايزعلش حد كما هو الحال في الكمبيوترات (لا توجد قطعتان من نفس البلد) المهم الأداء و الإسم الذي تم التجميع تحته فهو الضمان الوحيد.
المهم فعلا أن المشتري يبقى عارف بيشتري إيه و منين و بكام لأن أحمد مش زي الحاج أحمد.
و شكرا

[emadfk]

فعلا صناعة الصين منوره جوه الجنط

[ahmed1981]

الصناعة الصيني في الجنوط فيها ثلاث أو أربع مستويات:
فرز أول وده مفيهوش غلطة وممتاز وغالي
ثم فرز ثاني ثم فرز ثالث ثم إلخ...كلما زاد رقم الفرز زادت العيوب ورخص السعر
فمن الممكن أن تكون الجنوط صيني بس فرز أول
والله أعلم
م/أحمد :D

[جندى مجند]

يا جماعة مفيش ولا عربية واحدة فى العالم كله بتتصنع كل أجزائها بالكامل داخل دولة واحدة فقط ... المهم فى الموضوع هو المواصفات ... يعنى لما لانسر تتطلب جنوط من الصين بتحدد مواصفات معينة للجنوط دى و لما تستلم بتعمل اختبارات فحص للجنوط قبل ما تستخدمها و لو طلعت غير مطابقة للمواصفات بترجع الشحنة و بتقلل من تقييم المورد بتاع الشحنة دى عشان لما تطلب منه بعد كدة تكون فحوص و اختبارات الاستلام أكثر تشدداً ... و لو أخفق مرة تانية ممكن يوقفوا التعامل معاه تماماً ...

أنا لى صديق و زميل دراسة مهندس فى أحد خطوط الانتاج بمصنع العامرية للمعادن ... و بيصنعوا فى الخط دة طنابير لعدة أنواع من السيارات و بيصنعوا طنابير بيتم توريدها لمصانع مرسيدس بنز بألمانيا (مرسيدس ألمانيا مش مرسيدس مصر) و بيأكدلى ان مواصفاتهم متشددة جداً لكن بيقدروا ينفذوها و بيتقبل الانتاج بتاعهم ... و فى نفس الوقت نفس المصنع بيعمل طنابير اللانوس لحساب دايو مصر و صديقى بيؤكدلى ان المواصفة مختلفة تماماً و متساهلة أكتر بكتيييير ... المعنى انك ممكن تلاقى مصنع واحد فى الصين أو مصر أو الهند أو أى بلد بيصنع منتج واحد بعدة مواصفات حسب طلب العميل بتاعه ... و معتقدش ان لانسر ممكن تكون متساهلة فى مواصفاتها و بالتالى لا يوجد داعى للقلق

[اسلام المصرى]

شكرا يا جماعة على ردودكم و أهتمامكم أعتقد لأن ميتسوبيشى مش هتركب جنوط أى كلام فى العربية , كلامكم ريحنى , الفكرة كلها أنى لم أتوقع ذلك و كان المفروض التنبيه عند الشراء. المرة الجاية هاخد بالى :D و لو حد سمع عن الموضوع ده أى جديد لو سمحت يبلغنى و له جزيل الشكر منى , حتى الأن لم أتلقى رد على رسالتى الى مصرية !

[sab3aawy]

انا مش شايف بروبليم -على راى الإعلان الشهير

هل حد فيكم جاب كاميرا فيديو سونى قريب

هيلاقيها احدث تكنولوجيا فى العالم وفيها كل الكماليات اللى بيحلم بيها دا غير كفائتها العالية وعمرها الإفتراضى العالى ، ومصنوعة فى الصين

انا جبت ساعة من ماركة يابنية شهيرة من حوالى 3 سنوات بوعد ما دفعت فيها مبلغ محترم لقيت مكتوب عليها صنع فى الصين، مع ذلك هى تحمل الإسم اليابانى الشهير ومعاها ضمان الشركة اليابانية وتتوزع عند وكيل هذو الشركة

والساعة لها معايا 3 سنوات، لم تحدث بها ايه مشكلة ميكانيكية من اى نوع، ولا الاستانلس بتاعها حصل فيه اى تغير للونه او شكله ولا حصل فيها اى خدوش

النوت بوك اللى انا بكتب منه هذة الرسالة حاليا ينتمى لماركة امريكية من اشهر الماركات فى هذا الصدد ، ومع ذلك هو مصنوع فى الصين، وله معايا 3 سنوات من الشقاء المتواصل فى الشغل والبيت بلا كلل

كل الاحذية الرياضية من الماركات العالمية النهاردة ، حضرتك هتدخ افخم محل ادوات رياضية وتدفع 600 وللا 700 جنيه فى حذاء من هذة الامركة الألمانية العريقة او الأمريكية العظيمة وتفاجأ انه مكتوب عليه صنع فى الصين، لكن بعد 3 سنوات استعمال هتعرف انه صنع فى الصين بجودة الشركة الألمانية او الأمريكية

والأمثلة كثير جدا

انا فى النهاية بشترى ماركة، اى شركة محترمة طالما لو بتصنع منتج بغرض التصدير، حتى لو بتصنعه فى واق الواق بيكون مصنع بجودة هذة الشركة

سبعاوى

[أبو عبدالله]

كلامك مظبوط يا بشمهندس سبعاوي وفعلا ده موجود في كل حاجه المهم اسم الماركه المصنعه للشئ نفسه مش المهم هو مصنع فين لأن كل شركه بتحافظ على اسمها وسمعتها

وده موجود ايضا في انواع الكمبيوترات المعروفه كلها صنع في الصين

[محمدايهاب]

لأ الكلام ده مش مظبوط و دي أمثلة شخصية
mp4 الصيني ب400 و الياباني ب1600 الصيني باظ و الشاشة انكسرت و الصوت بيعلق
الجزمة (shoes) فيتنام و ألمانيا ( الإثنين nike ) الفيتنامي اتقطع و الشريط نسل و النوز طلع
مادة تنظيف العربية واحد إيطالي و التاني صيني النظافة طبعا أحسن 100 مرة من الصيني
الهدوم أوروبي nextو التاني مصري seventy cotton المصري أتبهدل بالغسيل و باظ اللون
طبعا في فرق في التقفيل المصري عن الصيني عن الأروبي و الأمريكي في العربيات
و الأمثلة كتيييييييييييييييييرة جدا

[Dr Ahmed]

اشتراك الصين فى العديد من المنتجات أدى لسعر مناسب للمنتج ، وفيه منتجات صينية كتير تاخد منها جودة معقولة بسعر مغرى جدا وبصراحة الصين بلد يستحق الاحترام والتحية رغم ان عندهم بلاوى كتيرة.. بس ناس بتفكر وتخطط وتقرر وتنفذ وتنتشر وتنجح ...

أنا بس نفسى يعملوا أهم حاجة ويصدروها لنا: رغيف عيش صينى ييجى لنا من الصين بقرشين ويكون خالى من السوس والخشب والتراب والظلط ويمكن رؤيته بالعين المجردة ويظل طريا لعدة أيام ولا يصرف فى طوابير.

[أبو عبدالله]

يا استاذ محمد احنا بنتكلم عن الماركات وليس اي منتج ولكن لما تشتري كاميرا سوني وصنع في الصين وبضمان الشركه الرئيسيه اللي هيا سوني اليابان بتبقى جيده غير اللي ملهاش اسم وكايد الياباني حاجه والصيني حاجه ولكن هما بيبقوا متحددين بسعر
وخلي بالك ان اليابان لا تصنع الا الحاجات اللي عباره عن ميكروا وفيها تكنولوجيا عاليه ............ هما تخصصوا في ذلك واعطوا باقي الصناعات كالتلفاز والكاسيت والحاجات دي للدول المجاوره امثال تايوان وتايلاند وتفرغوا لأنتاج الأجهزة الميكروا المتخصصة

[اسلام المصرى]

الحمد لله على كل شىء. هو فعلا أصبح كابوس و لكنه أمر واقع. الحاجات بتاعت زمان مش هتتعوض و علينا ان نتقبل الأمر صينى صينى هنعمل ايه و شكرا مرة أخرى على ردودكم و المعلومات المفيدة و صباح الفل على الجميع :D

[aya]

الحمد لله
كلنا متفقين على مبدأ واحد و هو تعدد منشأ أجزاء السيارة.

الشيء اللي لم نتفق عليه هو أن هناك بعض الوكلاء يقولون أن السيارة يابانية 100% و هو كلام مشكوك فيه أحيانا كما يتكلم عن السعر و كونه قريب من سعر الصيني و أرخص من سيارات يابانية أخرى. في حين أنه يعلم غير ذلك ... أما المصيبة الأكبر أن يكون لا يعلم و عجبي!!! :(

هناك فارق كبير في قيمة الجمارك على بلد المنشأ ، كما أن قيمة أجزاء السيارة و دقة و جودة التجميع و سعر ساعة العامل يختلف فيكون سعر السيارة اليابانية 100% أغلى بلا جدال من مثيلاتها المجمعة أو المصنعة في بلد آخر.

أما أسهل الطرق لتحديد بلد التجميع فهو البحث عن البلد المصنع للزجاج و الأجزاء البلاستيكية في السيارة فهى لا تستخق النقل من بلد لآخر كما أن حجمها كبير و مخاطر تلفها أثناء النقل تكون كبيرة لأنها لا تغلف بكارتون كما في لعب الأطفال.

و شكرا

[shadow_450]

يا جماعه مش عيب ان يكون الجنط صينى ولا حاجه دلوقت انتم لو دخلتم عند اى حد من بتوع الجنوط هتلاقوا 90 % من الجنوط صينى وهيا كويسه جداااااااا
وبالنسبه للعربيه هيا تمام وسمعتها معروفه
شكرااااااااااا

[اسلام المصرى]

كلامك مظبوط يا أخ شادو. أنا بس فرقت معايا نقطة أن البائع لم يذكر هذه النقطة و أنا أعتقد انهم مش عارفين أساسا يدوبك حافظين كلمتين ياكلو بيهم ودان المشترى - و طبعا مش كلهم - و أن الرواس يؤكد انها يابانية 100 فى 100 و هى كذلك طبعا فى 99 % من أجزائها الجنوط بس صينى و ماخفى كان أعظم. و شكرا على تعليقك يا أخ aya

[vooooo]

فعلآ فين فرق بين الصناعه الصينى و اليابانى حتى لو تحت اشراف الشركه اليابانيه
بدليل تفاوت الأسعار
و تفاوت الأسعار مش بيبقى سببه بلد المنشأ بس........ لكن الخامات المستخدمه برضه
يعنى متثلآ افتكر انى كنت هشترى CD player
كان قدامى الصينى و اليابانى بس مش نفس النوع
الفرق كان كبيرمن الخامات المستخدمه لوزن ال CD player
و طبعآ فرق السعر كمان
بس فى الأخر الصينى احسن من المصرى