هل أشترى من الوكيل نفسه ولا من معرض؟

[aesaad]

ياجماعة أنا ناويت إن شاء الله أشترى لانسر 1600 مانيوال بضمان الوكيل "مصرية"، عرفت إن الأسعار كلها تقريباً واحدة عند الموزعين المعتمدين، وسألت فى الوكيل نفسه اللى هو شركة مصرية اللى فى 3أ ش. رمسيس وعرفت إن عنده نفس السعر.

هل أشترى من الوكيل وللا من موزع؟ وإيه الميزة أو الفرق؟

كمان محتاج أعرف إيه الأوراق والمستندات اللى المفروض آخدها من اللى هاشترى من عنده؟

وأشكركم جداً

م/أشرف

[اسلام المصرى]

شوف يا سيد أشرف على حسب علمى لا يوجد فرق بين الوكيل و الموزع و لا توجد ميزة أيضا نصيحة منى أشترى من عند مصرية علشان تاخد ورقك بسرعة مختوم و ممضى بدل ما لسه الموزع يبعت للوكيل و هكذا تكسب وقت يعنى أما بالنسبة للأوراق على حسب ما أنا فكر أولا كتيب الضمان بتاع الصيانة ثانيا شهادة الضمان بتاعت العربية الأصل مختومة و ممضية
ثالثا صورة من الأفراج الجمركى علشان ثرخص بيها العربية. ونمر تجارية طبعا لو مش هترخص على طول مع أننى لم أفعل ذلك مشيت بيها حوالى 3 أو 4 أيام سيبت الورق اللزق عليها و توكلت على الله :D هذا طبعا مش صحيح بس برده حرام تتأجر ب 60 أو 70 جنيه و أعملها كمان شهادة مخالفات قبل ما أسلمها و أخش فى متاهات و وجع دماغ.

و ربنا يوفقك يا سيد أشرف و لو أنا فى حاجة نسيها ياريت الأخوة الأفاضل يكتبوها للمنفعة العامة و السلام عليكم

[Dr Ahmed]

زى ماقال أخى الشبح بالضبط لكن النمر التجارية عندنا فى بنها ايجارها فى اليوم 25 جنيه ولم يطالبنى أحد بشهادة مخالفات أو غيره ، بس نصيحتى تتمم على السيارة من الخارج والداخل وتذكر الله أول ما تدخلها وتجرب كل ما يمكن تجربته وتبص على العدادات وجوه الكبوت وعلى الاستبن والكاسيت وضمانه وابقى اشتريلها غطا من هناك او وانت راجع مع كلبش دركسيون بمفتاح.

[اسلام المصرى]

تمام يا د. أحمد :D أنا موضوع النمر التجارية مش متأكد منه 100 فى 100 ده كلام أحد البائعين داخل المعرض اللى جبت منه السيارة. و للحفاظ على فرش السيارة خصوصا فى حالة وجود أطفال ركب فرش للعربية و دواسة لأرضية الشنطة للحفاظ عليها و ديه متوفرة فى شارع دمشق أو عند بتاع الفرش.

[Nader]

انا اختلف مع اخواني الاعزاء انا شايف ان من الممكن الفصال قليلاً فالمعارض وانت اولى بفرق السعر بس دة مش ممكن مع معرض المصرية.

[khaled ali]

I think if you buy it from the dealer you may have some discount

khaled ali

[اسلام المصرى]

أنا بعد مناقشات و مناورات الحمد لله نزلت من تمنها ألف جنيه , جرب عند الرواس و عند الموزعين شوف مين هيديك أحسن سعر و ربنا معاك.

[bassam nagy]

انا مع الاخ نادر بالفعل يوجد فصال فى المعارض لو هاتشترى كاش

[M_ElSabaa]

هل أشترى من الوكيل وللا من موزع؟ وإيه الميزة أو الفرق؟

كمان محتاج أعرف إيه الأوراق والمستندات اللى المفروض آخدها من اللى هاشترى من عنده؟

ممكن تروح معرض لايف موتورز الى فى جامعة الدول فى المهندسين صاحب المعرض ده قريب صاحب التوكيل وناس محترمة جدا وممكن ينزل 1500 جنيه وانا اشتريت منهم وهما ناس كويسيين جدا الصراحة
وهتاخد ضمان العربية وكتيب الصيانة و الكاتالوج و مبايعة العربية والافراج الجمركى
واهم حاجة زى ما قاله الاخوة هنا لازم تجيب معاك كلبش الدريكسيون لغاية لما تركب انذار ان شاء الله وخد بالك من كل حاجة فى العربية ويستحسن تاخد حد معاك يبص برده لو فى اى حاجة
ومبروك مقدما وربنا يباركلك فيها

[emadfk]

على فكرة انا اشتريت من المعرض ده

دول ناس محترمين جدا و اخر ذوق و اسعارهم مهاوده عن باقى السوق

وهتاخد ضمان العربية وكتيب الصيانة و الكاتالوج و مبايعة العربية والافراج الجمركى وشهادة الترخيص للمرور الى انت تريده وشهادة البيانات

ومبروك مقدما وربنا يباركلك فيها و يكفيك شرها

8) 8) 8) 8)

[aesaad]

أنا متشكر يا جماعة جداً على الردود ديه، أنا فعلاً سألت فى المعارض ديه ولكن مالقيتش اللون الشامبين اللى كنت عايزه غير عند "وطنيه أوتوموتيف" اللى فى آخر شارع عباس العقاد - مدينة نصر - حى السفارات، وهما ناس كويسين جداً جداً بصراحة، أى نعم ماحصلتش على خصم، وأخدت العربية بنفس سعر الوكيل، ولكن كان السبب إن اللون ماكانش من عندهم واتصرفوا فيه من مكان تانى. لكن أخدت كل الأوراق والضمان والإفراج الجمركى، والعربية الحمد لله زى الفل، ويادوب لسه هارخصها المفروض بكره إن شاء الله.

هل عندكم أى ملاحظات بخصوص إستخدام العربية أول 1000 كيلو؟

[الريس]

alf mabroook

[aesaad]

الله يبارك فيك، وأشكرك جداً.

[اسلام المصرى]

ألف مبروك ربنا يكفيك شرها و يديك خيرها و يستر طريقك. ماتئرصش على العربية , السرعة ما بين 80 و 100 ماتحرئش عليها بلاش كيكداون ريحها على الأخر. هذا ما أنا فعلته.

[emadfk]

السرعة ما بين 80 و 100
ومبروك
وربنا يباركلك فيها و يكفيك شرها