زيت جير شارك 2008

[CIVIC_VTEC]

السلام عليكم ورحمة الله وبركاته،،،
برحب بنفسى أولا كشركاوي جديد وبرحب بنفسى كمان بوجودي معاكو فى المنتدي وأتمنى من الله عز وجل أن افيد واستفيد وأكون ضيف خفيف عليكو...
ثانياً : أنا من كام يوم اشتريت شارك 2008 خليجي بس بصراحه لحد دلوقتى مش قادر احدد فئتها عشان زي ما قولتلكو انى شاركاوي جديد والامور لسه مبهمة بالنسبالي.
ثالثا بقى ودا الأهم طبعا اخدتها غيرتلها زيت الموتور والفلتر وحطيت سوبر شل 20-50 اللى شغال بيه من أول ما سافرت وبصراحه عاجبني الا انى حسيت ان فيه صوت فى الموتور زي صوت التاكيهات كدا اخدتها ورحت لمركز صيانه قالى دا صوت تاكيه قولتله والحل ( قالى ميضرش بأى شيء غير بس الصوت اللى انت سامعه دا بدل ما تفوك وتغير ومش عارف ايه) ملوش ضرر... هل الكلام دا ممنطق ولا... نرجو الافادة.
رابعا: عايز أغير زيت الجير عشان أكون ماشى مطمن خصوصا انى معرفشى صاحبها مغيره امته وهى دلوقتى عامله 110000 كيلو... وكنت عايز اعرف أغير نوع ايه عشان أسمع ان الجير بتاعها ليه زيت معين تقريباً أو حاجه زي كدا...
عارف انى طولت عليكو كتير... ومشكور ليكو سعة صدوركو.
أحمد الدسوقي.

[مصراوي جدا]

اهلا يا استاذ احمد مبروك العربية الجديدة

ممكن يكون الصوت ده تاكيهات وتحتاج ظبط انما الكشف على العربية هو اللي يحدد بالظبط الصوت ده ايه

العربية الشارك فتيسها الاوتوماتيك عادي وليس cvt زي البومة وبالتالي هي مش بتحتاج زيت فتيس مخصوص يعني اي زيت atf كويس ينفع لها

[CIVIC_VTEC]

أهلا بحضرتك يافندم
الله يبارك فيك وعقبال ما نباركلك على جديدك انشاء الله
بخصوص ظبط التاكيهات - هل تاكيهات الشارك بتتظبط عادي - أنا اسمع ان تاكيهاتها بتتظبط اتوماتيك أول مره اسمع موضوع ظبط تاكيهات فى الشارك
وبخصوص الجير فهو ستب ترونيك (اللى فيه ماينس وبلس دا) أفتكر دا مش عادي ولا عادي ولا ايه؟؟
واعتقد بردو ان العربيه 2000 سي سي
مشكور لاهتمامك

[مصراوي جدا]

آه حضرتك قاعد في الرياض انا مخدتش بالي وبالتالي توقعت ان العربية طالما شارك فاحتمال ضعيف جدا تكون 2000 سي سي واكيد هتكون 1500 سي سي لو كانت في مصر علشان الجمارك

انما بالطبع الشارك المنتشرة في الخليج هي العكس اي ان ال 2000 سي سي هي المنتشرة اكتر من 1500 و 1600 سي سي لأن فرق السعر بسيط والكماليات اكتر بكتير

فعلا ال2000 سي سي فتيسها CVT وده بيحتاج زيت فتيس مخصوص هتلاقيه متوفر في كل محلات بيع قطع الغيار هو حاليا بيصنع في الامارات العربية المتحدة وهو ميتسوبيشي اصلي CVT SP III ودي صورته



العبوة 5 لتر فاما بتروح محطة بنزين او محل بنشر وتغيير زيوت بيغيروا من الطبة وبتاخد جالون واحد 5 لتر والافضل تلاقي مكان فيه ماكينة شفط وساعتها تجيب عبوتين لأن الفتيس بياخد 8 لتر وكمان بيتم غسيل الفتيس من الداخل بلتر اضافي

اما عن موضوع ضبط التاكيهات فانا سألت مهندسي الورشة هنا في شركة مصرية وقال لي ايوة بيتم عمل ضبط تاكيهات للعربية فممكن تشوف مركز خدمة كبير مش لازم العيسائي نفسه يعني وتعمل عنده الموضوع ده

وبالتوفيق

[CIVIC_VTEC]

ياباشا بسم الله ما شاء الله
أوفيت ووفيت...
طيب لو ملقتشى مكان فيه مكنة شفط أخليه يفتح الطبه ويغيره عادي كدا ولا زي قلته ولازم يتغير كله ولا ايه؟؟؟
وبخصوص الصورة الصورة مكتوب علىيها atf sp iii وحضرتك كاتب cvt sp iii دا عن طريق الخطأ ولا هو واحد ولا ايه بالظبط؟؟؟

[CIVIC_VTEC]

سؤال أخير:-
بخصوص الفلتر هل بيتم تغييره ولا ملوش فلتر ولا ايه بالظبط؟؟

[MohammedAladel]

عايز أعرف ايه الفرق بين الفتيس الستب ترونيك والفتيس cvt ؟؟؟ انا اول ما الشارك نزلت كانوا بيقولو ع الفتيس بتاعها هيدروماتيك اللى هو ستبترونيك يعنى برضه ؟؟؟؟؟ وعايز أعرف الشارك الجديدة المايفيك فتيسها نوعه إيه ستبترونيك عادى ولا مانيوال بدبرياج كهربا ؟؟؟ بالنسبة للتاكيها ت ركبت قبل كدا ميجان صاحبها كان صوتها بيعلى صاحبها قال لى التاكيهات عايزة تتظبط ؟ يعنى ايه تاكيهات ؟ وايه اعراض اعطالها ؟ وما مدى خطورة اعطالها واسبابها ؟

[مصراوي جدا]

ياباشا بسم الله ما شاء الله
أوفيت ووفيت...
طيب لو ملقتشى مكان فيه مكنة شفط أخليه يفتح الطبه ويغيره عادي كدا ولا زي قلته ولازم يتغير كله ولا ايه؟؟؟
وبخصوص الصورة الصورة مكتوب علىيها atf sp iii وحضرتك كاتب cvt sp iii دا عن طريق الخطأ ولا هو واحد ولا ايه بالظبط؟؟؟

هو الفتيس فيه 8 لتر فالافضل طبعا تغييرهم كلهم انما يعني لو مفيش مكان فيه شفط يبقى من الطبة هتغير 5 لتر وكويس مش زي قلته ولا حاجه اتما ممكن نقلل فترة التغيير يعني بدل ما هي كل 40 ألف كيلو خليها 30 ألف مثلا

ATF=Automatic Transmission Fluid يعني سائل فتيس اوتوماتيك ودي كلمه عامة

CVT= Continuous Variable Transmission وده نوع الفتيس

السي في تي بيحتاج مواصفات SP III انما الفتيس العادي بيكون مواصفات اقل وده لا يمنع ان نفس الزيت بالمواصفات الأعلى تناسب الفتيس الاوتوماتيك العادي

سؤال أخير:-
بخصوص الفلتر هل بيتم تغييره ولا ملوش فلتر ولا ايه بالظبط؟؟

فلتر الفتيس داخلي لا يتم تغييره

عايز أعرف ايه الفرق بين الفتيس الستب ترونيك والفتيس cvt ؟؟؟ انا اول ما الشارك نزلت كانوا بيقولو ع الفتيس بتاعها هيدروماتيك اللى هو ستبترونيك يعنى برضه ؟؟؟؟؟ وعايز أعرف الشارك الجديدة المايفيك فتيسها نوعه إيه ستبترونيك عادى ولا مانيوال بدبرياج كهربا ؟؟؟ بالنسبة للتاكيها ت ركبت قبل كدا ميجان صاحبها كان صوتها بيعلى صاحبها قال لى التاكيهات عايزة تتظبط ؟ يعنى ايه تاكيهات ؟ وايه اعراض اعطالها ؟ وما مدى خطورة اعطالها واسبابها ؟

فتيس السي في تي تكنولوجي مختلفة خالص عن الفتيس الاوتوماتيك العادي من خلاله مش بتشعر بالنقل نهائيا بعكس الاوتوماتيك العادي بتشعر فيه بالنقل من الأول للتاني ومن التاني للتالت وهكذا

السير اللي في الفتيس لو اتقطع لا يتم اصلاحه والفتيس لا يتم اصلاحه ولازم يتغير بالكامل وده عيب في السي في تي

وده فيديو شرح



اما الستيبترونيك اللي هو نازل في البومة من 2010 فهو فتيس اوتوماتيك عادي جدا انما فيه برنامج كمبيوتر بيجبر الفتيس انه يمشي على الأول فقط او الثاني فقط او الثالث او الرابع حسب رغبة السائق اذا ما انتقل الى علامة ال+ و -

وهو يتم صيانته بسهوله وفتحه واصلاحه بعكس السي في تي

الشارك 2012 بمحرك 1600 سي سي مايفك فتيسها اوتوماتيك عادي وليس حتى ستيبترونيك

بخصوص التاكيهات هادور على فيديوهات ومعلومات شرح كويسة وانزلها باذن الله

[youtube]http://www.youtube.com/watch?v=MhFK5gfAGpM[/youtube]

[CIVIC_VTEC]

قلقتنى انت كدا ع الجير يامان بخصوص موضوع السير وعدم الاصلاح دا...
طيب بخصوص الـــ cvt فيه آليه معينه فى الاستخدام لتجنب حدوث الأعطال ومن ثم تغيير الجير بالكامل نظرا لعدم امكانية اصلاحه ( الحقنى بيها الله يخليك )
وبخصوص الزيت سؤال اخير:
يعنى ممكن أغير أى زيت sp iii ولا لازم متسوبيشي..

[thelostman]

الأخ الكريم انا النهاردة غيرت زيت فتيس CVT فى التوكيل وغيرته من الطبة ب 9 لترات كاملة وذلك كالأاتى:
1- تفتح الطبة ويتم تصفية حوالى 5 لتر
2- تغلق الطبة ويتم أضافة 4 لتر من مكان المقياس
3- تدار السيارة ويتم تحريك النقلات كلها تباعا من اول ال P لحد ال L رايح جاى مرتين مثلا.
4- لما زودنا ودورنا الزيت دخل حجرة الجير وطر الزيت القديم لأسفل
تفتح الطبة ويتم تصفية 3 لتر لونهم أسود والله زى ال 5 الأولانيين.
5- تغلق الطبة ويتم زيادة 3 لتر ثم يتم الخروج فى جولة صغيرة بالسيارة
6- التوقف وقياس الزيت وأضافة أو أنقاص الزيت حسب المعيار البلاستيكة علامة HOT & COLD

الكلام ده تم فى توكيل دايموند 9 لتر زيت اللتر ب 80 جنيه وأخدو 160 جنية مصاريف

على فكرة يا أخوة مكتوب فى دليل خدمة المصنع لا تبدل الزيت بأستخدام ممكائن الشفط..... ممنـــــــــــــــــــــــــــــــــــــــوع
فقط عن طريق التصفية من خلال الطبة
دليل خدمة المصنع عندى على الكومبيوتر لو حد عايزه
PDF 3000 page

[CIVIC_VTEC]

طيب حضرتك انا اشتريت نفس الزيت اللى هو ATF III من التوكيل بردو

بس لسه محطيتوش... هل هو دا نفس الزيت اللى غيرته ولا غيرت زيت تانى ولا؟؟؟

[thelostman]

هو بالظبط نفس الزيت.... المفروض تجيب كمان اربعه صغيرين كل واحدة لتر وغير الزيت كله مش اللى بينزل من الطبة بس زى ما شرحت انا قبل كده
يالا بالتوفيق