سؤال لخبراء الشارك ..

[CIVIC_VTEC]

السلام عليكم ورحمة الله وبركاته،،،
انا عندي استفسار بسيط ياشباب ياريت الاقى جواب عليه ...
السماعة اليمين ورا فصلت .. وفرش الباب محتاج يتفك عشان اشيك عليها ..
بس انا بصراحه بقى عندى عقده من فك الحاجات فى العربيه كل ما افوك حاجه اكسر كلبسات واجى اركبها تانى مترضاش تركب زي ما كانت ..
فياريت لو حد عنه طريقه فك الفرش الخلفي يمين اكون ممنون ..
وياريت كمان لو حد عنده كتالوجها عربي اكون شاكر جدا ...
تحياتى ليكو جميعا ....

[CIVIC_VTEC]

بسم الله ما شاء الله ،،،
26 مشاهدة ومفيش رد واحد ..

[IronHead]

مشفتش حد هنا كان عامل موضوع او قال انه فك الفرش قبل كده
اعملها عن حد متخصص واشترى دماغك, لو عربية قديمه كنت قلتك خد الريسك, بس حرام عربيتك جديده

[CIVIC_VTEC]

مشفتش حد هنا كان عامل موضوع او قال انه فك الفرش قبل كده
اعملها عن حد متخصص واشترى دماغك, لو عربية قديمه كنت قلتك خد الريسك, بس حرام عربيتك جديده

تحياتي لحضرتك يافندم
وشكراً جزيلاً لاهتمامك

[M.Mohsen_Saleh]

الموضوع بسيط ، انا بفك فرش باب أي عربية حتى لو مشفتهاش قبل كده. أولا في مسمار عند مقبض الباب اللى جوه. و في تقريبا 3 مسامير على داير الفرش. و بعدين من غير أي عدد، بايديك ابتدي اسحب الباب عليك براحة من تحت من ناحية كالون الباب في اتجاه المفصلات. و بعدين اسحب الفرش كله حته وحدة لبرة ، لو حاجة عصلجت معاك، مفيش عافية، بص بكشاف على الفرش من جوه هتلاقي كليبس معلق، بمفك تخين زق الكليبس لبره و متقلقش كليبسات الشارك قوية مش هتتكسر بسهولة، و لو اتفكت بتتركب تاني بسهولة.

بعد كده عندك الفيشة بتاعت الزجاج الكهربا و أهم حاجة و أصعب انك تفك السلك بتاع السنترلوك بيبقا نهايته بلية راكبة في كليبس رخيص كده، بتلف الكليبس تخليه عمودي على السلك ، هتلاقي البلية بقت حرة معاك و كده السلك طلع.

و في الاخر، تزق الفرش من تحت لفوق و انت منزل الازاز عشان الوتر بروف بتاع الازاز ميضايقش.

بعد ما الفرش يطلع، بص على الفيشة بتاعت السماعة. لو ملقتش فيها حاجة، يبقى هات افوميتر و قيس مقاومة السماعة لو سليمة هتبقى مقاومتها 16 أو 8 أو 4 اوم. لو مش سليمة هتبقى رقم عالى جدا بالكيلو اوم.

[SHRIEF_T7]

من الأفضل متعماهاش بايدك روح الحرفيين و اقف علي ايد الصنايعي

[CIVIC_VTEC]

الموضوع بسيط ، انا بفك فرش باب أي عربية حتى لو مشفتهاش قبل كده. أولا في مسمار عند مقبض الباب اللى جوه. و في تقريبا 3 مسامير على داير الفرش. و بعدين من غير أي عدد، بايديك ابتدي اسحب الباب عليك براحة من تحت من ناحية كالون الباب في اتجاه المفصلات. و بعدين اسحب الفرش كله حته وحدة لبرة ، لو حاجة عصلجت معاك، مفيش عافية، بص بكشاف على الفرش من جوه هتلاقي كليبس معلق، بمفك تخين زق الكليبس لبره و متقلقش كليبسات الشارك قوية مش هتتكسر بسهولة، و لو اتفكت بتتركب تاني بسهولة.

بعد كده عندك الفيشة بتاعت الزجاج الكهربا و أهم حاجة و أصعب انك تفك السلك بتاع السنترلوك بيبقا نهايته بلية راكبة في كليبس رخيص كده، بتلف الكليبس تخليه عمودي على السلك ، هتلاقي البلية بقت حرة معاك و كده السلك طلع.

و في الاخر، تزق الفرش من تحت لفوق و انت منزل الازاز عشان الوتر بروف بتاع الازاز ميضايقش.

بعد ما الفرش يطلع، بص على الفيشة بتاعت السماعة. لو ملقتش فيها حاجة، يبقى هات افوميتر و قيس مقاومة السماعة لو سليمة هتبقى مقاومتها 16 أو 8 أو 4 اوم. لو مش سليمة هتبقى رقم عالى جدا بالكيلو اوم.

حقيقى شكراً جزيلا على وصف حضرتك الوافى
خالص تحياتي وانشاء الله بجرب عن قريب وبقولك النتيجة ..

[CIVIC_VTEC]

من الأفضل متعماهاش بايدك روح الحرفيين و اقف علي ايد الصنايعي

انا مع حضرتك تمام ان الحرص ضروري ..
بس انا حقيقى بحب أعمل اغلب حاجاتى بايدي .. عاده بقى