نصيحة لشراء الشارك

[heka_m_y]

انا عايز اقول نصيحة للى محتار بين اللانسر والماركات الاخرى انا كنت محتار ايضا بس لما حسبتها لقيت الفلوس اللى معايا يا إما تجيب كورى زى السيراتو أو الكروز أو الكارينز يا إما يابانى زى البومة أو الشارك وبعد تفكير كتير جدا وسؤال أهل الخبرة وتوكيل متسوبيشى وحتى مندوبى المبيعات عرفت حاجة واحدة وهى قاعدة أنا مؤمن بيها لما يكون معايا فلوس تجيب كورى أو يابانى هجيب يابانى وانا مغمض مع كل الاحترام للكورى ومع الثورة الهائلة اللى عملتها كوريا فى سيارتها ولكن اليابانى أفضل من حيث الثبات والقوة والاحساس والامان والاحساس بأنك تمتلك سيارة لو حصل اى حاجة فيها سيتم ارجاعها لاحسن من الاول . عارفين فكرة البيجو 504 ايه هى احساسك بأنك تمتلك سيارة العمر كل ما تبوظ تجددها وترجع تانى أحسن من الاول زى ما يكون عندك عقار مثلا .

تبقى فكرة واحدة طيب اجيب ايه بومة ولا شارك . البومة منتشرة جداجدا وأثبتت وجودها فى السوق المصرى وهو سوق يختلف عن باقى أسواق العالم وسبب انتشارها هو رخص ثمنها كسيارة يبانية بالنسبة للسيارات الاخرى ومع احترامى لهذه السيارة لكن لى بعض الاسباب لعدم تكرار تجربة امتلاكها مرة ثانية أول الاسباب ان السيارة كراسيها مش كويسة فى القاعدة عليهم يعنى مش بحس بالراحة وامتلاك الكرسى لجسمى وبالاخض ظهرى عكس الكريستالة مثلا كراسيها حكاية فى قاعدتها . ثانى شىء العربية مش ثابتة على السرعات العالية مش زى ما كتير من الناس بيقولوا عليها وانا متأكد من الموضوع ده جدا جدا جدا جدا جدا جدا جدا ثالث شىء العزل فيها مش كويس و فيها بعض عيوب صناعة مثل موضوع صوت النأرزة اللى بنسمعها من الدريكسيون فى المطبات الخفيفة بالاخص وانت كالسر شمال . رابع شىء إضاءه التابلوه الضعيفة مع حترامى لشياكة التابلوه ولكن ضعف الاضاءة وشكل العدادات القديم فى التصميم غير مناسب لى ومش بيحسسنى ان انا بحب ركوبها دايما .

فضلت فكرة واحدة الشارك الغير محبوبة فى السوق المصرى اطلاقا وده بسبب الوكيل اللى نزلها فى البداية بسعر عالى جدا فكان اللى بيفكر يشتريها طيب مايجيب أوكتافيا مثلا فعلشان كده لم تأخذ اعتبارها فى السوق مع العلم انها هى السيارة المتسوبيشى الاكثر انتشارا فى العالم كله حتى فى موقع بيجيب موديلات العربيات عامل البومة لحد 2008 فقط بعد كده أصحبت شارك بس مافيش بومة يعنى مافيش حاجة اسمها بومة بعد كده فى الشيب الجديد وهو الشارك . وبعد ملاحظة دقيقة لقيت ان مثلا 100 واحد بيبيع سيارة بومة مستعملة و 5 فقط بيبيعوا شارك طيب ليه اللى بيشريها بيمسك فيها كده عرفت ليه بعد ما اشترها السيارة فخمة جدا بمعنى الكلمة تخليك عايز تركبها وخلاص مش شرط رايح فين بس المهم تركبها وتستمتع بالفخامة والانوار وشاشة الكمبيوتر اللى فيها أوبشن غير عادى زى العربيات الالمانى ده بخلاف ثباتها الرهيب وقوة الماتور المايفك اللى مش عارف أوصفه ازاى ووسع صالونها بالنسبة للبومة مع الاخذ فى الاعتبار بصغر حجم الشنطة .

فى حاجة واحدة عايز اضيفها موضوع الخسارة فى بيع السيارة بعد الاستخدام هناخد مثلا البومة السوبر أكشن الواحد بيجيبها زيرو بحوالى 125 الف جنيه وبعد 3 أو 4 سنوات استخدام بتتباع بحوالى 85 ألف جنيه يبقى خسر كام حوالى 40 الف جنيه حتى لو باعها ب90 الف جنيه خسر كام 35 الف جنيه نيجى بقى للشارك انا مثلا الفئة الفئة الثالثة ب134 الف جنيه هتتباع مستعملة بعد 4 سنوات بكام بحوالى 90 الف جنيه وده سعر المستعمل موديل 2008 دلوقتى يبقى الخسارة كام حوالى 44 الف جنيه يعنى هى هى زى البومة بس البومة سهل فى بيعها بسرعو نظرا للاسباب اللى ذكرتها والشارك مش هيقدم عليها الا اللى ركبها او ركبها مع واحد قريبه أو صحبه مثلا .

والله مش علشان حاجة انا مش مندوب مبيعات لشارك بس فى فرق رهيب بين البومة والشارك وبردوا مع احترامى للبومة كسيارة عائلية ممتازة جدا جدا جدا .

ومن وجهة نظرى اللى يفوق الشارك التويوتا ثم الهوندا طبعا فلا غبار عليهما اطلاق ولو معايا فلوس زيادة كنت جيبت تويوتا ولو فلوس اكتر كنت جيبت هوندا ولو اكتر كنت جيبت اوكتافيا ولو اكتر يبقى معشوقتى البى ام دبليو حتى لو مانيوال .

الكورى سيارة ممتازة جدا جدا جدا بس مش سيارة العمر لواحد مش هيغير كل 5 سنوات يعنى لو واحد عايز يركب زيرو لمدة 5 سنوات فقط وبعد كده يغير يركب كورى مع اعتراضى على عدم الثبات والتقفيل السيىء للسيارة والذى يتسبب فى أصوات غريبة مش تحسسك انك راكب زيرو .

اليابانى سيارة لفترة كبيرة جدا جدا جدا .

الالمانى مش قادر اوصفها طبعا كلنا عارفين يعنى ايه المانى .

ملحوظة أخيرة الكروز سيارة جميلة بس تقيلة وماتورها لا يناسب جسمها .
الالنترا خفيفة والباور خفيف جدا يصعب التحكم فيها على السرعات العالية .

[Mido Khaled]

واللة يا باشا انا زيك لغاية دلوأتي عمااال اسأل علي الشارك والبومة والكروز بس كدااا حضرتك خلصت الكلام وشكراااا علي الموضووووووع داااا

[Ahmedhussein007]

الشارك مش هيعرف قيمتها غير اللى ركبها ربنا يوفقك ويباركلك فيها والف مبروك

[semi]

تقرير بصراحة اكتر من رائع وواضح انك لك باع طويل مع الميتسوبيشي
لقيتك اتكلمت على الكريستالة لحد الشارك
بصراحة شركة محترمة بس اكتر موديلات بحترمها منها هي الكريستالة والشارك
انا شايف انها موديلات عملت طفرة وهتفضل تتباع لسنين ادام حتى بعد ما تقدم
مش متفق معاك ان التويوتا افضل لكن الهوندا بحترمها والاوكتافيا عربية جبارة وده عرفته متاخر شوية

[S O P H O S]

سؤال هو في شارك مانيول صح
بس موديل 2008 و 2009 وفي بعده كده ولا لا
وهل الي قولته في شئ غلط ؟؟

[heka_m_y]

هو بصراحة اللى شوفته فى المعرض موديل 2012 كلها اوتوماتيك من أول فئة حتى الهى لاين

[S O P H O S]

هو بصراحة اللى شوفته فى المعرض موديل 2012 كلها اوتوماتيك من أول فئة حتى الهى لاين

هو موديل 2012 بالفعل كله اوتو
انا كنت اقصد 2008 و 2009
لاني اعتقد اني لمتحها مانيول بتتباع فبسأل علشان اتأكد
وتسلم علي اهتمامك يا باشا ..

[assaf]

شكرا علي التقرير
الشارك مظلومه في مصر بسبب سعرها و ان قطع غيارها غاليه سنه مع انها احسن واحدث

[Land_Cruiser]

من الاسباب التى أدت لعدم انتشارها انها كانت ١٥٠٠ سى سى و بالتالى الموتور كان ضعيف شويه و ده تداركوه فى موديل السنه دى و كمان ضبطوا السعر و يارب قطع الغيار كمان

[IronHead]

سؤال هو في شارك مانيول صح
بس موديل 2008 و 2009 وفي بعده كده ولا لا
وهل الي قولته في شئ غلط ؟؟

فى 2008 و 2009 مانيول بس قليله قوى

[medhatgaafar]

الله ينور عليكم وفعلا الشارك سيارة محترمه وتحب تسوقها على طول اما بخصوص الموتور بالنسبه لمودلات قبل 2012 كان 1500. لم يكن ضعيف على الاطلاق. لانه 109 حصام فى حين ان البومه 1600 بس 107 حصان. ثانيا قطع العيار عاديه جدا ومتوفره ومش غاليه. وياريت الناس تجرب العربيه وتحكم ولا تاخذ بكلام الناس اللى يهمها البيع فقط. واخيرا السيارة روووووووعه

[S O P H O S]

فى 2008 و 2009 مانيول بس قليله قوى

يعني لو دروت عليها فالسوق هلقيها ولا لا
وهتبقي بحالة جيدة ولا ...
مع اني كنت شوفت واحدة من سنة وكانت ما شاء الله
بس انا كنت اشتريت حاجة تانية